သိုၵ်းမၢၼ်ႈၵုမ်းဝဵင်းၾၢႆၶုၼ် ၸိုင်ႈတႆးပွတ်းၸၢၼ်း ပႂ်ႉၸွမ်းသဵၼ်ႈတၢင်းၵူတ်ႇထတ်းၵူၼ်းၶဝ်ႈဢွၵ်ႇဝၢၼ်ႈ/ဝဵင်း ၵူၼ်းမိူင်းယၢပ်ႇၽိုတ်ႇတႃႇၵႂႃႇႁဵတ်းၵၢၼ်သူၼ်ႁႆႈၼႃး။

ႁၢင်လိူၼ်ၼူဝ်ႊဝႅမ်ႊပိူဝ်ႊၼႆႉမႃး သိုၵ်းမၢၼ်ႈတႄႇၶဝ်ႈၵုမ်းဝဵင်းၾၢႆၶုၼ်ၶိုၼ်း။ ဝၢႆးၼၼ်ႉတဵၵ်းႁႂ်ႈ ၵူၼ်းပၢႆႈၽေးသိုၵ်း ပွၵ်ႈယူႇၶိုၼ်းႁိူၼ်းယေး။ၵူၺ်းၵႃႈဝဵင်းမိူင်းပၢႆးသမ်ႉ တိုၵ်ႉပဵၼ်ပၢင်တိုၵ်းယူႇတေႃႇထိုင်ယၢမ်းလဵဝ်။

ၼုမ်ႇၸၢႆးတႆးၵူၼ်းမိူင်းဝဵင်းၾၢႆၶုၼ် လၢတ်ႈတီႈၽူႈတွႆႇႁွၵ်ႈဝႃႈ-“ယၢမ်းလဵဝ်ၼႆႉသိုၵ်းမၢၼ်ႈပႂ်ႉႁူဝ်ဝဵင်းႁၢင်ဝဵင်းသေ ၵူတ်ႇထတ်းၵူၼ်းၼႂ်းဝဵင်းၶဝ်ႈဢွၵ်ႇၵႂႃႇမႃး။ထၢမ်တိၵ်းတိၵ်းထၢမ်ၵူႈၵမ်းလႄႈ ႁဝ်းၶႃႈၵူၼ်းမိူင်းယၢပ်ႇၽိုတ်ႇဢေႃႈ။ မိူၼ်ၼင်ႇဝၢၼ်ႈလႁႄႇၼႆ 4 မူင်းၶိုင်ႈဝၢႆးဝၼ်းၼႆႉ တေလႆႈထိုင်ၶိုၼ်းႁိူၼ်းၼႆၶႃႈလူးသိုၵ်းမၢၼ်ႈ သင်ႇဝႆႉ။ ၵွပ်ႈၼႆလႄႈ  ဢမ်ႇယဝ်ႉၵၢၼ်ၵေႃႈ ၵႃႈလႆႈဝႆႉၵၢၼ်ဝႆႉငၢၼ်းသေပွၵ်ႈႁိူၼ်းၶိုၼ်း ႁႂ်ႈၶိုတ်းၶၢဝ်းယၢမ်း ၼၼ်ႉယဝ်ႉၶႃႈ။ ပေႃးမိူၼ်ၼႆမႃး ဢၼ်ႁဝ်းဢဵၼ်းဢၢၼ်းဝႆႉၼၼ်ႉဢမ်ႇယဝ်ႉဢမ်ႇတူဝ်ႈ တူၵ်းလႃႈတူၵ်းလိုၼ်း မူတ်းဢေႃႈ။”– ဝႃႈၼႆ။

ဝၢၼ်ႈလႁႄႇၼႆႉ ပဵၼ်ၼႂ်းဢိူင်ႇလွႆပဝ်း မီးၾၢႆႇဢွၵ်ႇ ဝဵင်းၾၢႆၶုၼ် ၾၢႆႇဢွၵ်ႇ ၼွင်လူင်မိူင်းပၢႆးထႅင်ႈ။ ပဵၼ်ဝၢၼ်ႈဢၼ်ထူပ်းၽေးပၢင်တိုၵ်းႁႅင်းသုတ်းၼႂ်းၶၢဝ်းတၢင်း 4 ပီမႃးၼႆႉ။ ၵူၼ်းဝၢၼ်ႈပဵၼ်တႆးၵမ်ႈၼမ်။

ဝဵင်းၾၢႆၶုၼ်ၼႆႉသမ်ႉ မီးႁိမ်းၾင်ႇၾၢႆႇတူၵ်းၼွင်လူင်မိူင်းပၢႆး။ ဝဵင်းမိူင်းပၢႆးသမ်ႉ မီးၾၢႆႇၸၢၼ်းဝဵင်းၾၢႆၶုၼ် ယၢၼ်ၵႆမွၵ်ႈ 11 လၵ်း။ၵူၼ်းမိူင်းၾၢႆၶုၼ်ၸိူဝ်းပၢႆႈၽေးသိုၵ်းဝႆႉၼၼ်ႉ ဢၼ်လုၵ်ႉၾၢႆႇႁွင်ႇလႄႈၾၢႆႇတူၵ်းဝဵင်းၶဝ်ႈမႃးၵူၺ်းငၢႆႈလူမ်ၸႂ်။ ၵူၺ်းၵႃႈပေႃးတေသိုပ်ႇလူင်းၵႂႃႇၸူးမိူင်းပၢႆး တႃႇၵႃႉၶၢႆ/တႃႇႁဵတ်းၵၢၼ်ႁႃၵိၼ်လဵင်ႉတွင်ႉသမ်ႉ သိုၵ်းမၢၼ်ႈၵူတ်ႇထတ်းႁဵင်းဢမ်ႇပၼ်ၵႂႃႇမႃးလႄႈ ဢမ်ႇငၢႆႈၸႂ်သေဢိတ်း။

ၸၢႆးၼုမ်ႇၵူၼ်းမိူင်းဝဵင်းၾၢႆၶုၼ်သိုပ်ႇလၢတ်ႈထႅင်ႈဝႃႈ-“ၵူႈပွၵ်ႈတႄႉ မၢၵ်ႇၶဝ်ႈတဝ်ႈၼမ်ႉဢၼ်ဢွၵ်ႇၼႂ်းသူၼ်ႁဝ်းၶႃႈၼႆႉႁဝ်းၶႃႈဢဝ်ၵႂႃႇၶၢႆ တၢင်းမိူင်းပၢႆး။ လူဝ်ႇဢိတ်ႇၶဝ်ႈၵေႃႈဢဝ်ၵႂႃႇမိူင်းပၢႆး။ပေႃးၵႂႃႇၶၢႆၶူဝ်းတၢင်းမိူင်းပၢႆးတႄႉ လႆႈၵႃႈၶၼ်ယႂ်ႇဢေႃႈ။ၵူၺ်းၵႃႈတလဵဝ်တႄႉၶဝ်ဢမ်ႇပၼ်ၵႂႃႇတၢင်းမိူင်းပၢႆးၶႃႈလႄႇၼေႃႈ ။ ၵႃႈတေလႆႈဢဝ်ၵႂႃႇၶၢႆၶိုၼ်းတၢင်းဝဵင်းသီႇသႅင်ႇ။ၵူၺ်းၵႃႈၶၢဝ်းတၢင်းသမ်ႉၵႆ-ယၢပ်ႇလိူဝ်။ၵႃႈၶၼ်မၢၵ်ႇၶဝ်ႈတဝ်ႈၼမ်ႉၵေႃႈလႆႈၵႃႈထုၵ်ႇၵႃႈပေႃးလိူဝ်ဢေႃႈ” -ဝႃႈၼႆ။

ၵမ်ႈၽွင်ႈၸိူဝ်းပၢႆႈၽေးသိုၵ်းဝႆႉယူႇႁိမ်းႁွမ်းဝဵင်းၼၼ်ႉၵူၺ်းၸၢင်ႈၶဝ်ႈမႃးယူႇၶိုၼ်းႁိူၼ်းယေးၸဝ်ႈၵဝ်ႇ။ၸိူဝ်းပၢႆႈၵႂႃႇယူႇၵႆၽွင်ႈၼၼ်ႉတႄႉ ဢမ်ႇပႆႇယုမ်ႇၸႂ်ငဝ်းလၢႆးၼႂ်းပိုၼ်ႉတီႈလႆႈလႄႈ တိုၼ်းဢမ်ႇႁတ်းပွၵ်ႈမႃး။ ၾၢႆႇၼိုင်ႈဝဵင်းၾၢႆၶုၼ်ၼႆႉထူပ်းၽေးပၢင်တိုၵ်းမႃးၶၢဝ်းတၢင်း 3 ပီယဝ်ႉလႄႈႁိူၼ်းယေး၊ ႁူင်းၸၢၵ်ႈ၊ ၶူဝ်းၶွင်ၵူၼ်းမိူင်းလူႉၵွႆယွၼ်ႉၽေးပၢင်တိုၵ်းမူတ်း။မၢင်ဝၢၼ်ႈမၢင်ပွၵ်ႉသမ်ႉၺႃးၽဝ်။ၵွပ်ႈၼႆလႄႈသင်ဝႃႈတေပွၵ်ႈယူႇၶိုၼ်းၸိုင် ၵူၼ်းမိူင်းတၵ်းတေလႆႈၶိုၼ်းပၼ်ၶၢဝ်းယၢမ်း ပူၵ်းပွင်ႁိူၼ်းယေးဝၢၼ်ႈဝဵင်းၶိုၼ်းလီလီၵွၼ်ႇ-လႆႈႁူႉၼင်ႇၼႆ။