သိုၵ်းမၢၼ်ႈၶဝ်ႈတီႉၺွပ်းၵူၼ်းမိူင်း 7 ၵေႃႉ တီႈဝၢၼ်ႈငႂ်ႈ (ယႂႃႇငၢၼ်ႇ )  ၸိုင်ႈတႆးပွတ်းၸၢၼ်း ထိုင်ဝၼ်းမိူဝ်ႈၼႆႉ ပႆႇပွႆႇပၼ်ၶိုၼ်း   ။

တႄႇၼႂ်းႁူဝ်လိူၼ် ၼူဝ်ႊဝႅမ်ႊပိူဝ်ႊမႃး သိုၵ်းမၢၼ်ႈၶဝ်ႈၼႂ်းႁိူၼ်းၵူၼ်းဝၢၼ်ႈ ၼပၢၼ်းၵျီး  သေတီႉၺွပ်း ၵူၼ်းဝၢၼ်ႈ 2 ၵေႃႉ ထိုင်ဝၼ်းမိူဝ်ႈၼႆႉ ပႆႇလႆႈႁူႉဝႃႈ တီႉယွၼ်ႉသင်။

ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ သိုၵ်းမၢၼ်ႈၶဝ်ႈတီႉထိုင်ႁိူၼ်း ၊ ယွၼ်ႉသင်လႄႈ တီႉၺွပ်းၵႂႃႇဢၼ်ဝႃႈၼၼ်ႉတႄႉ ပႆႇလႆႈႁူႉ ၊ ၵူၼ်းဝၢၼ်ႈသွင်ၵေႃႉၼၼ်ႉ ဢမ်ႇမီးလွင်ႈၵဵဝ်ႇၶွင်ႈ ၵၼ်တင်း ၵၢၼ်မိူင်းသင် ၊ ၶဝ်ပဵၼ်ၵူၼ်း ယူႇၵတ်းၵတ်းယဵၼ်ယဵၼ်ၵူၺ်း ၊ ယွၼ်ႉသင်လႄႈ တီႉၵေႃႈဢမ်ႇႁူႉ ပႆႇပွႆႇမႃးၶိုၼ်းထိုင်မိူဝ်ႈၼႆႉ”- ဝႃႈၼႆ ။

ၵူၼ်းဝၢၼ်ႈၼပၢၼ်းၵျီး ဢၼ်သိုၵ်းမၢၼ်ႈတီႉၺွပ်းၵႂႃႇၼၼ်ႉ ဢႃယု မီးၸမ် 40 ပီ။ ပဵၼ်ၵူၼ်းႁဵတ်းၵၢၼ်ၽုၵ်ႇသွမ်ႈလႄႈ ၊ ပဵၼ်ပေႃႈၸဝ်ႈႁိူၼ်း ႁဵတ်းႁႃလဵင်ႉၵူၼ်းတီႈႁိူၼ်း  လႆႈႁူႉၼင်ႇၼႆ ။

မိူၼ်ၼင်ႇၼႆ ၼႂ်းၵၢင်လိူၼ် ဢွၵ်ႉထူဝ်ႊပိူဝ်ႊၼၼ်ႉၵေႃႈ သိုၵ်းမၢၼ်ႈၶဝ်ႈတီႉၺွပ်း ၵူၼ်းဝၢၼ်ႈ တပိၼ်ႇပျေႃႇ 5 ၵေႃႉ ထိုင်ဝၼ်းမိူဝ်ႈၼႆႉ ဢမ်ႇလႆႈလွင်ႈၵပ်းသိုပ်ႇၵၼ်တင်း ၵူၼ်းတီႈႁိူၼ်းၼႆယဝ်ႉ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ မႃးတီႉၺွပ်းၵႂႃႇ မီးၸမ်လိူၼ်ယဝ်ႉ ၊ ယွၼ်ႉသင်လႄႈ တီႉၵေႃႈဢမ်ႇႁူႉ ။ ယိၼ်းဝႃႈ ၺႃးတၢမ်ႇၶွၵ်ႈ 10 ပီ  ၊ ၵူၼ်းႁိူၼ်းၶဝ်ၵေႃႈ ဢမ်ႇႁူႉဝႃႈ မီးတီႈလႂ် ယွၼ်ႉၼၼ် ဢမ်ႇၸၢင်ႈၵႂႃႇၸွမ်း ၊ လိူဝ်သေ မႆႈၸႂ် ဢမ်ႇၸၢင်ႈႁဵတ်းႁိုဝ်ၶႃႈ  ”- ဝႃႈၼႆ ။ 

ၵူၼ်းၸၢႆးဝၢၼ်ႈတပိၼ်ႇပျေႃႇ ဢၼ်သိုၵ်းမၢၼ်ႈ တီႉၺွပ်းၵႂႃႇ 5 ၵေႃႉၼၼ်ႉ  ပဵၼ်ၵူၼ်းႁဵတ်းၵၢၼ် ႁႃၵိၼ်လဵင်ႉတွင်ႉ ဝၼ်းလႂ်ဝၼ်းၼၼ်ႉ ၵူၺ်းဝႃႈၼႆ ။

ၼႂ်းဝၼ်းတီႈ 28/10/2025  ပူႇၵႄႇဝၢၼ်ႈၵျွၵ်ႉပီႉသပ်ႉ  ထုၵ်ႇၶႃႈႁႅမ်ယဝ်ႉ သိုၵ်းမၢၼ်ႈၵူတ်ႇထတ်းၵူၼ်းၶဝ်ႈဢွၵ်ႇဝၢၼ်ႈႁၢဝ်ႈႁႅင်း ။ သင်ၶႂ်ႈၵႂႃႇမႃးတၢင်ႇဝၢၼ်ႈၼႆၸိုင် လႆႈၼႄမၢႆၾၢင် လႆႈလူင်းလၢႆးမိုဝ်းယဝ်ႉၸင်ႇလႆႈၵႂႃႇ – ၵူၼ်းပိုၼ်ႉတီႈလၢတ်ႈ ။

တီႈဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၼႆႉ မီးၸုမ်းတပ်ႉသိုၵ်းထၼူႉ DPLA ၊ ၸုမ်းလုၵ်ႉၽိုၼ်ႉ ၵျဵဝ်းၽိဝ်ႇ ၊ ၸုမ်းသိုၵ်းထၼူႉ DSNDA လႄႈ ပျီႇတူႉၸိတ်ႉပဢူဝ်း PNO သေ သိုၵ်းမၢၼ်ႈၵႆႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၼႂ်းဝဵင်း ။

သိုၵ်းမၢၼ်ႈထႅမ်ႁႅင်းသိုၵ်းၶဝ်ႈ ဝဵင်းဝၢၼ်ႈ ၵမ်းလႂ်ၵေႃႈ ပူႇၵႄႇလႄႈ ၵူၼ်းမိူင်းၺႃးၶႃႈႁႅမ်ၵမ်းၼၼ်ႉ တႄႇပီ 2024 ၼႆႉမႃး ၵၢင်ႉၵႄႇ ၵွၼ်းဢိူင်ႇ  ၵမ်းၵမ်းၺႃးၶႃႈႁႅမ်တၢႆ၊  ပေႃးပႃးၵမ်းၼႆႉ မီး 5 ပွၵ်ႈယဝ်ႉ၊  ဢမ်ႇႁူႉပဵၼ်ၽႂ် ၸုမ်းလႂ်လူင်းမိုဝ်းၶႃႈႁႅမ်တၢႆ ၼႆယဝ်ႉ ။