မိူဝ်ႈၼႆႉ ဝၼ်းတီႈ 12/11/2025 ဝၼ်းပုတ်ႉ ယၢမ်းၵၢင်ၼႂ် မွၵ်ႈ 8 မူင်းၶိုင်ႈၼႆႉ ၵူၼ်းၸၢႆးသွင်ၵေႃႉ ယိပ်းၵွင်ႈၶဝ်ႈၸူၼ် ႁၢၼ်ႉၶၢႆၶမ်း “ဢွင်ႇသပႄႇ” တီႈၵၢင်ဝဵင်း ပၢင်ႇဢူႈလူင်၊ ၵူၼ်းပႂ်ႉႁူမ်ႇလူမ်ႈႁၢၼ်ႉၶၢႆၶမ်း ထဝ်ႈၸၢႆးၵေႃႉၼိုင်ႈ ၺႃးယိုဝ်း တၢႆထင်တီႈ ဝႃႈၼႆ။
ၵူၼ်းၸၢႆးသွင်ၵေႃႉၼၼ်ႉ သွၼ်ႉရူတ်ႉၶိူင်ႈမႃးၸွမ်းၵၼ်၊ တိုဝ်းမၢၵ်ႇႁူဝ်ရူတ်ႉၶိူင်ႈတင်းသွင်သေ ယိပ်းၵွင်ႈၶဝ်ႈၸူၼ် ၼႂ်းႁၢၼ်ႉၶၢႆၶမ်း၊ ၽွင်းမိူဝ်ႈ ၵူၼ်းပႂ်ႉႁူမ်ႇလူမ်ႈႁၢၼ်ႉၶၢႆၶမ်း မႃးႁႄႉႁၢမ်ႈၵေႃႈ ၵူၼ်းၸၢႆးသွင်ၵေႃႉၼၼ်ႉ ထုပ်ႉပေႃႉသေၵွင်ႈၸမ်ႈယိုဝ်းသႂ်ႇလႄႈ ၵူၼ်းပႂ်ႉႁူမ်ႇလူမ်ႈၼၼ်ႉတၢႆထင်တီႈ။
ၸၢႆးႁူမ်ႇလူမ်ႈ ဢၼ်ၺႃးယိုဝ်းတၢႆၼၼ်ႉ ပဵၼ် ဢူးၸဵင်ႇဝိၼ်း ဢႃယု 58 ပီ။
ၵူၼ်းယူႇသဝ်းႁိမ်းႁွမ်းၼၼ်ႉ ႁူမ်ႈၵၼ်တီႉၺွပ်းလႆႈ ၵူၼ်းၸူၼ်ၵေႃႉၼိုင်ႈ ပဵၼ် ဢွင်ႇၼၢႆႇမဵဝ်း ဢႃယု 30 ပီ ယူႇဝဵင်းၽႃၵၢၼ်ႉ မိူင်းၶၢင်၊ ၵေႃႉပၢႆႈလွတ်ႈၵႂႃႇသမ်ႉပဵၼ် မဵဝ်းၵျီး ၵူၼ်းဝဵင်းလိူဝ်ႇ (မၼ်းတလေး) ၊ မၼ်းၸၢႆး လႆႈၶမ်းသေ ပၢႆႈလွတ်ႈဝႆႉ ။ ၶမ်းတႄႉပႃးၵႂႃႇၸွမ်းလၢႆၵျၢပ်ႈ ၵိုင်ႇငိုၼ်းၵႃႈႁိုဝ်ၼႆ ပႆႇမီးၽႂ်ယိုၼ်ယၼ်။
ဝဵင်းပၢင်ႇဢူႈလူင်ၼႆႉ ပဵၼ်ဝဵင်းဢၼ်မီးၸၼ်ႉၸွမ်သိုၵ်းမၢၼ်ႈ။ သိုၵ်းမၢၼ်ႈယူႇသဝ်းတူင်ႉၼိုင်ၵုမ်းၵမ်ဝႆႉၼႅၼ်ႈၼႃ။ ပလိၵ်ႈမၢၼ်ႈ ဢဝ်ႁူမ်ႇလူမ်ႈဝႆႉၵူႈတီႈၵူႈယွမ်ႇ ။ ယၢမ်းလဵဝ် ပဵၼ်ၽွင်းႁၢင်ႈႁႅၼ်းတႃႇပၢင်လိူၵ်ႈတင်ႈၼႆလႄႈ လွင်ႈႁူမ်ႇလူမ်ႈယိင်ႈၶႅၼ်းၼႅၼ်ႈၼႃ။
ၼႂ်းငဝ်းလၢႆးၸိူင်ႉၼႆ ယင်းတိုၵ်ႉမီးၵူၼ်းၸူၼ်ႁၢၼ်ႉၶမ်းလႆႈလူၺ်ႈ ပၢႆႈလွတ်ႈလႆႈလွတ်ႈၽေးၼႆယူႇတႄႉ ၵူၼ်းၸူၼ်ၸိူဝ်းၼႆႉလႅပ်ႈပဵၼ်ၵူၼ်းဢၼ်ၵဵဝ်ႇၵွင်ႉၵၼ်တင်း ပလိၵ်ႈမၢၼ်ႈသိုၵ်းမၢၼ်ႈၵူၺ်းၼႆ ၵူၼ်းပိုၼ်ႉတီႈလၢတ်ႈၼင်ႇၼႆ။
ဝၢႆးပဵၼ်လိူင်ႈၸူၼ်ႁၢၼ်ႉၶၢႆၶမ်းယဝ်ႉ ၵူၼ်းမိူင်း ၼႅတ်ႈၵႂႃႇတိူင်ႇလၢတ်ႈတီႈႁူင်းပလိၵ်ႈယူႇသေတႃႉ ၾၢႆႇပလိၵ်ႈသိုၵ်းမၢၼ်ႈ ၼၢၼ်းမႃးထိုင် – ၵူၼ်းပိုၼ်ႉတီႈလၢတ်ႈၼင်ႇၼႆ။
မိူၼ်ၼႆၼင်ႇၵဝ်ႇ ၼႂ်းဝူင်ႈၼႆႉၵူၺ်း ၵူၼ်းၸၢႆးသွင်ၵေႃႉ ယိပ်းၵွင်ႈၶဝ်ႈၸူၼ်ႁၢၼ်ႉၶၢႆၶမ်း ႁိမ်းၵၢတ်ႇ ဝဵင်းမိူင်းသူႈ၊ သုမ်းပႃးၵႂႃႇတူဝ်ငိုၼ်း 100 သႅၼ်ပၢႆ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ