သိုၵ်းမၢၼ်ႈ ပိုၼ်ၽၢဝ်ႇ ၵဵပ်းသိုၵ်းမႂ်ႇ ၼႂ်းၸႄႈဝဵင်းပၢင်ႇဢူႈလူင် သင်လၵ်ႉပၢႆႈ ဢမ်ႇမႃးၶဝ်ႈၾိုၵ်းၵၢၼ်သိုၵ်းၼႆ တေတီႉၺွပ်း ၵူၼ်းၼႂ်းမုင်ႉႁေႃႁိူၼ်းလႄႈ ယိုတ်းဢဝ်တီႈလိၼ်ႁိူၼ်းယေး ဝႃႈၼႆ။

ၸွမ်းၼင်ႇ သဵၼ်ႈမၢႆ ႁူဝ်ၵူၼ်း ဝဵင်းပၢင်ႇဢူႈလူင်သေ ၾၢႆႇသိုၵ်းမၢၼ်ႈ တၵ်းမၵ်းလိူၵ်ႈဝႆႉ ၵူၼ်းမိူင်း ၼိုင်ႈလိူၼ်လႂ် 2 ၵေႃႉ တေႃႇ 7 ၵေႃႉ တေလႆႈၵႂႃႇၾိုၵ်းၵၢၼ်သိုၵ်း တႃႇ 15 ဝၼ်း တီႈႁူင်းပွႆႇသဵင် FM တသိၼ်ႇ ဢၼ်မီးႁိမ်းဝၢၼ်ႈသူၺ်ႇတိၼ်း ၼႂ်းၸႄႈဝဵင်းပၢင်ႇဢူႈလူင်ၼၼ်ႉ ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၵူၼ်းမိူင်းပိုၼ်ႉတီႈ လၢတ်ႈဝႃႈ – “ၼႂ်းပွၵ်ႉႁဝ်းၶႃႈတႄႉ ၼိုင်ႈလိူၼ်ၼႆႉ လႆႈသူင်ႇပၼ် 2 ၵေႃႉ။ တွၼ်ႈတႃႇ ႁိူၼ်းဢၼ်တေလႆႈၵႂႃႇၼၼ်ႉ လႆႈပၼ်ငိုၼ်းၼိုင်ႈႁိူၼ်းၼိုင်ႈမိုၼ်ႇ။ သင်ဝႃႈ ဢမ်ႇၶဝ်ႈႁၢပ်ႇၵၢၼ်သိုၵ်းသေ လၵ်ႉပၢႆႈၼႆ ၶဝ်တေၺွပ်းၵူၼ်းႁိူၼ်းသေ ယိုတ်းဢဝ် တီႈလိၼ်ႁိူၼ်းယေး ၼႆၶႃႈဢေႃႈ”- ဝႃႈၼႆ။

ယၢမ်းလဵဝ် ၼႂ်းဝၢၼ်ႈသူၺ်ႇတိၼ်းၼႆႉ လႆႈသူင်ႇၵူၼ်းၼုမ်ႇ ၵႂႃႇ 7 ၵေႃႉ တႃႇၵႂႃႇၾိုၵ်းၵၢၼ်သိုၵ်း။ ဝၢႆးၾိုၵ်းၵၢၼ်သိုၵ်းယဝ်ႉ သိုၵ်းမၢၼ်ႈ ၶိုၼ်းသိုပ်ႇသူင်ႇ ၶိုၼ်ႈၼႃႈသိုၵ်း ၵမ်းလဵဝ်။

“မိူဝ်ႈလဵဝ်တႄႉ တီႈဝၢၼ်ႈႁဝ်းၶႃႈၼႆႉ သူင်ႇၵႂႃႇတင်းမူတ်းမီး 7 ၵေႃႉယဝ်ႉၶႃႈ။ ဢၼ်ၺႃးမၢၵ်ႇၵွင်ႈၵေႃႈ မီးၶႃႈဢေႃႈ။ ယၢမ်းလဵဝ် ယူတ်းယႃတူဝ်ဝႆႉတီႈ ႁူင်းယႃသိုၵ်း။ ပေႃးပဵၼ်ၵူၼ်းႁိူၼ်းတႄႉ ၵႂႃႇၸႂ်းလႆႈ ယူႇၶႃႈ။ မိူဝ်ႈလဵဝ်ၵေႃႈ ၼႂ်းဝၢၼ်ႈ ႁဝ်းၶဝ် လႆႈလိူၵ်ႈဝႆႉထႅင်ႈ 7 ၵေႃႉ တႃႇၵႂႃႇၾိုၵ်းၵၢၼ်သိုၵ်းထႅင်ႈၶႃႈဢေႃႈ။ ၶဝ်လၢတ်ႈဝႃႈ ပေႃးမၼ်းႁၢဝ်ႈႁႅင်းမႃး ၸၢင်ႈ ၵဵပ်းၼမ်သေၼႆႉထႅင်ႈ ၼႆၶႃႈဢေႃႈ”- ၵူၼ်းမိူင်း ပိုၼ်ႉတီႈ သိုပ်ႇလၢတ်ႈၼင်ႇၼႆ။

ယၢမ်းလဵဝ် ၸုမ်းသိုၵ်းလုၵ်ႉၽိုၼ်ႉ သိုၵ်းမၢၼ်ႈၶဝ် ယိုတ်းလႆႈဝႆႉဝဵင်းၼွင်ၶဵဝ်သေ မီးၶၢဝ်ႇဢွၵ်ႇမႃးဝႃႈ တေၶဝ်ႈယိုတ်းပႃး ဝဵင်းပၢင်ႇဢူႈလူင်ၼႆလႄႈ ပူၼ်ႉမႃး မိူဝ်ႈဝၼ်းတီႈ 8 လိူၼ်ဢေႃႊၵတ်ႊသ်ၼႆႉၵေႃႈ ၶႃႈႁၢပ်ႇၵၢၼ်ၶုၼ်သိုၵ်းမၢၼ်ႈလႄႈ ၵူၼ်းၼႂ်းမုင်ႉႁေႃႁိူၼ်း သိုၵ်းမၢၼ်ႈ ဢၼ်မီးၼႂ်းဝဵင်းပၢင်ႇဢူးလူင်ၼႆႉ လႆႈဢွၼ်ၵၼ် ပၢႆႈၵႂႃႇတၢင်းဝဵင်းလိူဝ်ႇ၊ ဝဵင်းတႃႈၵုင်ႈ၊ ဝဵင်းၼေႇပျီႇတေႃႇလႄႈ တၢင်ႇတီႈတၢင်ႇဝဵင်း ထႅင်ႈ။

ယူႇတီႈ ၸုမ်းပၵ်းတႃပႂ်ႉတူၺ်း လွင်ႈပၼ်ႁႃလႄႈ ၵၢၼ်မိူင်း မိူင်းမၢၼ်ႈ (BACS) ဢွၵ်ႇလိၵ်ႈဝႆႉ ၸွမ်းၼင်ႇ ၶပ်ႉမၢႆ ၸုပ်ႈ 1 တင်း ၸုပ်ႈ 2 ဢၼ်သိုၵ်းမၢၼ်ႈ ပိုတ်ႇပၢင်သွၼ် ၾိုၵ်းၵၢၼ်သိုၵ်းမႂ်ႇၼႆႉ ၵူၼ်းၼုမ်ႇ မိူင်းႁူမ်ႈတုမ် ဢၼ်ထုၵ်ႇၵဵပ်း ၵႂႃႇၾိုၵ်းၵၢၼ်သိုၵ်း တင်းမူတ်းမီး  9,000 ပၢႆယဝ်ႉ ဝႃႈၼႆ။