သိုၵ်းမၢၼ်ႈ ႁၢမ်ႈၵူၼ်းမိူင်း ၸိူဝ်းယိပ်းမၢႆၾၢင် မိူင်းတႆး (13/) ၶဝ်ႈဝဵင်းပၢင်ႇဢူႈလူင်

ၵူၼ်းမိူင်း ဝဵင်းပၢင်ႇဢူႈလူင် ၸိူဝ်းပၢႆႈၽေးသိုၵ်း ၵႂႃႇယူႇတၢင်ႇဝဵင်းသေ ပွၵ်ႈၶိုၼ်းႁိူၼ်းၼၼ်ႉ ၺႃးသိုၵ်းမၢၼ်ႈ ၵူတ်ႇထတ်းႁၢဝ်ႈႁႅင်း သင်ယိပ်းမၢႆၾၢင် မိူင်းတႆး (13/) ၸိုင် သိုၵ်းမၢၼ်ႈ ဢမ်ႇပၼ်ၶဝ်ႈ ဝဵင်း။

မိူဝ်ႈဝၼ်းတီႈ 06/08/2024 ပူၼ်ႉမႃးၼႆႉ ယူႇတီႈ သိုၵ်းတဢၢင်း TNLA – PDF ပိုၼ်ၽၢဝ်ႇ ယိုတ်းလႆႈ တပ်ႉတိၼ်ဝႆး ၶမယ 501 တင်း 502 လႄႈ ငဝ်ႈငုၼ်းၵုမ်းၵမ်ယၼ်ႇသိုၵ်းမၢႆ 1 တီႈၵျွၵ်ႉမႄး ၼၼ်ႉယဝ်ႉ ယူႇတီႈ ၵူၼ်းမိူင်းၵျွၵ်ႉမႄး – သီႇပေႃႉ ၸိူဝ်းပၢႆႈၵႂႃႇသွၼ်ႈဝႆႉ တီႈဝဵင်းလိူဝ်ႇၼၼ်ႉ ၶိုၼ်းဢွၼ်ၵၼ် ပွၵ်ႈမႃး ၺႃးသိုၵ်းမၢၼ်ႈ ဢၼ်ပႂ်ႉတီႈၵဵၵ်ႉ/ လၢၼ်ႇ ၸီးပိၼ်ႇၵျီး ၼႂ်းၸႄႈဝဵင်းပၢင်ႇဢူႈလူင်ၼၼ်ႉ ၵူတ်ႇ ထတ်း ရူတ်ႉၵႃးၵႂႃႇမႃး ႁၢဝ်ႈႁႅင်း ၸိူဝ်းယိပ်းမၢႆၾၢင်မိူင်းတႆး 13/ (၁၃/ မျဉ်းစောင်း) ၼၼ်ႉ ဢမ်ႇပၼ်လတ်းၽၢၼ်ႇတၢင်းဝဵင်းပၢင်ႇဢူႈလူင် ႁႂ်ႈဝၢႆႇႁူဝ်ရူတ်ႉၵႃး မိူဝ်းၶိုၼ်းတၢင်းဝဵင်းလိူဝ်ႇ ၼႆယဝ်ႉ။

ၵူၼ်းပၢႆႈၽေးသိုၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈ ဢမ်ႇပၼ်ႁဝ်းၶႃႈ ၶဝ်ႈလတ်း ဝဵင်းပၢင်ႇဢူႈလူင် ႁႂ်ႈႁဝ်းၶႃႈ ဝၢႆႇႁူဝ်ရူတ်ႉၶိုၼ်းၶႃႈဢေႃႈ။ ႁဝ်းၶႃႈ ၵႂႃႇၸၢမ်းတူၺ်း သွင်သၢမ်ၵမ်းၵေႃႈ ဢမ်ႇပၼ်ၵႂႃႇသေၵမ်းၶႃႈ။ ႁဝ်းၶႃႈ လႆႈမႃးတၢင်းဝဵင်းတူၼ်ႈတီးသေ ၶိုၼ်ႈမႃးတၢင်းၵျွၵ်ႉမႄးဢေႃႈ”- ဝႃႈၼႆ။

ၵူၼ်းပၢႆႈၽေးသိုၵ်း ဢၼ်တေပွၵ်ႈမိူဝ်းၶိုၼ်း တီႈဝဵင်းၵျွၵ်ႉမႄးၼႆႉ လႆႈပၼ်ၵႃႈၵႃး ၼိုင်ႈသႅၼ်ပျႃးပၢႆ သေ ၸင်ႇလႆႈမိူဝ်း။ ယၢမ်းလဵဝ် ၼႂ်းဝဵင်းၵျွၵ်ႉမႄး ပၢင်တိုၵ်းဢမ်ႇပဵၼ်ယဝ်ႉ ၼႆသေတႃႉ ၵူၼ်းမိူင်း ဢမ်ႇၸၢင်ႈႁဵတ်းၵိၼ်ၵၢၼ်သင် ယၢပ်ႇၽိုတ်ႇဝႆႉ လွင်ႈယူႇလွင်ႈၵိၼ် ၸိူဝ်းၼႆႉ – ၼၢင်းယိင်း ၵေႃႉၼိုင်ႈ တီႈဝဵင်းၵျွၵ်ႉမႄး လၢတ်ႈၼင်ႇၼႆ။

“မိူဝ်ႈလဵဝ်တႄႉ ဢမ်ႇလႆႈငိၼ်းသဵင်ၵွင်ႈသဵင်မၢၵ်ႇသင်ယဝ်ႉ။ ၵူၺ်းၵႃႈ ဢမ်ႇၸၢင်ႈႁဵတ်းၵိၼ်ၵၢၼ်သင်  ယၢပ်ႇၽိုတ်ႇၵူႈလွင်ႈယဝ်ႉ။ လုၵ်ႈဢွၼ်ႇၶႃႈသမ်ႉ မီးဝႆႉ 3 ၵေႃႉ။ ၶူဝ်းတီႈႁိူၼ်းၵေႃႈ ၺႃးၵူၼ်းလၵ်ႉဢဝ် ၵႂႃႇမူတ်းယဝ်ႉ ဢမ်ႇၵိုတ်းလိူဝ်သင်”- ဝႃႈၼႆ။

ယူႇတီႈ ၸဝ်ႈရူတ်ႉၵႃးၶဝ်တႄႉ ပၼ်ၾၢင်ႉၵူၼ်းပၢႆႈၽေးသိုၵ်းဝႃႈ သင်တေပွၵ်ႈၶိုၼ်းႁိူၼ်းၼႆ ႁႂ်ႈၵပ်း သိုပ်ႇတူၺ်းလီလီယဝ်ႉ ၸင်ႇပွၵ်ႈၼႆ တေတိူဝ်းလီ ဝႃႈၼႆ။

ယၢမ်းလဵဝ် ၼႂ်းၸႄႈဝဵင်းၵျွၵ်ႉမႄးၼႆႉ ၵူၼ်းမိူင်းမႆႈၸႂ် ၵူဝ်သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇထႅင်ႈ။ ၵၢၼ်ၵပ်းသိုပ်ႇတိတ်းတေႃႇ မိူၼ်ၼင်ႇ လႅင်းၾူၼ်း၊ ဢိၼ်ႊထိူဝ်ႊၼႅတ်ႊ ၸိူဝ်းၼႆႉၵေႃႈ ၶၢတ်ႇဝႆႉလႄႈ ၶိုၼ်းလႆႈဢွၼ်ၵၼ်ၸႂ်ႉၵတ်ႉၾူၼ်း CDMA ၵၼ်ၼၼ်ႉၵူၺ်း ဝႃႈၼႆ။