ၼႂ်းဝၼ်းတီႈ8/11/2025 ၸုမ်းလုၵ်ႉၽိုၼ်ႉၵျဵဝ်းၽိဝ်ႇ (JPRF ) ဢၼ်ပၵ်းတပ်ႉၼႂ်းၸႄႈဝဵင်းဝၢၼ်ႈငႂ်ႈ( ယႂႃႇငၢၼ်ႇ) ၸိုင်ႈတႆးပွတ်းၸၢၼ်း ႁူမ်ႈႁွမ်းၵၼ်တင်း တပ်ႉသိုၵ်းထၼူႉ DPLA ၼႆ ၸုမ်း JPRF ပိုၼ်ၽၢဝ်ႇဝႆႉၼင်ႇၼႆ။

ၼႂ်းၶေႃႈပိုၼ်ၽၢဝ်ႇၼၼ်ႉပႃးဝႆႉဝႃႈ တွၼ်ႈတႃႇတပ်ႉသိုၵ်း ၵျဵဝ်းၽိဝ်ႇ  ( JPRF) တေၸုၵ်းမၼ်းလႆႈ သေ ႁႂ်ႈပဵၼ်မႃးၵၢၼ်လုၵ်ႉၽိုၼ်ႉ ဢၼ်မီးၽွၼ်းလီတႃႇၵူၼ်းမိူင်းလႄႈၸင်ႇလႆႈ ႁူမ်ႈႁွမ်းၵၼ်တင်းၸုမ်းသိုၵ်းထၼူႉ DPLA  ဝႃႈၼႆ ။

လုၵ်ႈၸုမ်း ၵျဵဝ်းၽိဝ်ႇလၢတ်ႈၽူႈတွႆႇႁွၵ်ႈဝႃႈ -“ ႁဝ်းၶႃႈၸုမ်းလဵဝ်ၵူၺ်းၵေႃႈ တေဢမ်ႇၸုၵ်းမၼ်ႈလႆႈၶႃႈ ၊ ပေႃး ၸုမ်းထၼူႉၶဝ် မႃးႁူမ်ႈၵၼ်ႁဵတ်းၼႆ ၼႄလႆႈဝႃႈ ၸုမ်းထၼူႉၼင်ႇၵၼ်ၽွမ်ႉႁူမ်ႈၵၼ် ၊ ပေႃးႁူမ်ႈႁွမ်းၵၼ် ၸင်ႇတေၸဵဝ်းထိုင်ယိူင်းမၢႆလႆႈဝႆးဝႆး”– ဝႃႈၼႆ ။

ၵဵဝ်ၵပ်းလွင်ႈၼႆႉသေ ၸုမ်းသွင်ၸုမ်းၼႆႉ တေႁူမ်ႈၵၼ် ၽဵဝ်ႈမူၺ်ႉ ဢႃႇၼႃႇၽွင်းငမ်းသိုၵ်းမၢၼ်ႈ တေၵႅတ်ႇၶႄႁႄႉၵင်ႈ ၸၢဝ်းၶိူဝ်း ၸိူဝ်းယူႇသဝ်းၼႂ်းပိုၼ်ႉတီႈၼႃႈလိၼ်သိုၵ်းထၼူႉၵႂႃႇ ၊ ယိၼ်းလီ ႁပ်ႉတွၼ်ႈ လွင်ႈႁူမ်ႈမိုဝ်း ၸုမ်း JPRF တေႁူမ်ႈၵၼ် ၵႅတ်ႇၶႄႁႄႉၵင်ႈ ၸၢဝ်းၶိူဝ်း ႁႂ်ႈၶိုၼ်ႈယႂ်ႇမႂ်ႇသုင်ၵႂႃႇမိူဝ်းၼႃႈၼႆ  ၽူႈၶၢၼ်ပၢၵ်ႇ တပ်ႉသိုၵ်းထၼူႉ လၢတ်ႈၼင်ႇၼႆ ။

ၽူႈၶၢၼ်ပၢၵ်ႇ တပ်ႉသိုၵ်းထၼူႉ ထုၼ်းထုၼ်းၼၢႆႇ လၢတ်ႈၽူႈတွႆႇႁွၵ်ႈဝႃႈ – “ႁဵတ်းၵၢၼ်ၸွမ်းသွင်ၵေႃႉၼႆႉ လီလိူဝ်သေ ႁဵတ်းၵၢၼ်ၵေႃႉလဵဝ်။ ပေႃးႁဵတ်း သၢမ်ၵေႃႉၶႅၼ်းတေဢွင်ႇမၢၼ် တေႁူမ်ႈၵၼ်ၵႅတ်ႇၶႄႁႄႉၵင်ႈ ၵူၼ်းမိူင်းၸၢဝ်းၶိူဝ်းၸိူဝ်းယူႇသဝ်းၼႂ်းပိုၼ်ႉတီႈၼင်ႇၵႃႈပွင်ပဵၼ်လႆႈ” ၼႆယဝ်ႉ။

ပၢင်လိူၵ်ႈတင်ႈ ဢၼ်သိုၵ်းမၢၼ်ႈတေၸတ်းႁဵတ်းၼႆႉ ဝဵင်းဝၢၼ်ႈငႂ်ႈ(ယႂႃႇငၢၼ်ႇ) ၼႆႉပႃးၼႂ်းၸုပ်ႈသွင်  ယၢမ်းလဵဝ် သိုၵ်းမၢၼ်ႈတဵၵ်းထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၼႂ်းဝဵင်းႁၢဝ်ႈႁႅင်းသေ သွၵ်ႈတဝ် ၸုမ်းလုၵ်ႉၽိုၼ်ႉၼႂ်းဢိူင်ႇၼႂ်းဝၢၼ်ႈ  ဝႃႈၼႆ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈၵႆႉထႅမ်ႁႅင်းသိုၵ်းၶဝ်ၼႂ်းဝၢၼ်ႈၸိူဝ်းၸမ်ၼႂ်းထိူၼ်ႇ ဢၼ်ၸုမ်းလုၵ်ႉၽိုၼ်ႉၶဝ်ယူႇၼၼ်ႉသေ ၵႆႉလၢမ်းယိုဝ်းၵွင်ႈၼႂ်းထိူၼ်ႇၼႃႇ ၊ ၵႆႉၶဝ်ႈဝၢၼ်ႈဢွၵ်ႇဝၢၼ်ႈ လႄႇလမ်းသွၵ်ႈတဝ်ႁႃ ၸုမ်းလုၵ်ႉၽိုၼ်ႉၼႃႇ ၊ၵူၼ်းပိုၼ်ႉတီႈပေႃးဢမ်ႇႁတ်းၵႂႃႇသူၼ်ၵႂႃႇႁႆႈယဝ်ႉ”– ဝႃႈၼႆ ။

ၸုမ်းလုၵ်ႉၽိုၼ်ႉ ၵျဵဝ်းၽိဝ်ႇၼႆႉ တႄႇလုၵ်ႉၽိုၼ်ႉသိုၵ်းမၢၼ်ႈမႃး မိူဝ်ႈပီ 2022 သေ ၸႂ်ႉတိုဝ်းလၢႆးလပ်ႉ တိုၵ်းတေႃးသိုၵ်းမၢၼ်ႈမႃးၼႂ်းပိုၼ်ႉတီႈ  ႁၢၼ်ႉထိုင်ဝၼ်းမိူဝ်ႈၼႆႉ ။

တပ်ႉသိုၵ်းထၼူႉ DPLA ၼႆႉ  တူင်ႉၼိုင်ယူႇသဝ်းၼႂ်းထုင်ႉၵျွၵ်ႉၵူႇ ၸႄႈဝဵင်းလွၵ်ႉၸွၵ်ႇ ၸိုင်ႈတႆး ပွတ်းၸၢၼ်းလႄႈ ၼႂ်းၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ။ မီးယိူင်းဢၢၼ်းတႃႇၵုမ်းလႆႈ ပိုၼ်ႉတီႈ ဢၼ်တူင်ႉၼိုင်ဝႆႉ  ၼၼ်ႉ ပဵၼ်ၸႄႈမိူင်း ၼႆဝႆႉ။ ယၢမ်း ႁူမ်ႈၵၼ်တင်းၸုမ်းသိုၵ်းတဢၢင်း TNLA,  သိုၵ်းၵႅတ်ႇၶႄၵူၼ်းမိူင်း PDF ထုင်ႉလိၼ်ပဵင်းသေ  ပိုတ်းယိုဝ်းၵၼ်တင်းသိုၵ်းမၢၼ်ႈဝႆႉ ႁၢဝ်ႈႁႅင်းၼႂ်းမိူင်းတႆးပွတ်းႁွင်ႇ ၼႆယဝ်ႉ ။