ၸုမ်းလုၵ်ႉၽိုၼ်ႉ 4 ၸုမ်း ဢၼ်တိုၵ်ႉၵိူတ်ႇမီးမႃး ၼႂ်းမိူင်းတႆးပွတ်းၸၢၼ်း ၶၢဝ်းတၢင်းၸွမ်ၸိၵ်း သိုၵ်း မၢၼ်ႈ မိၼ်းဢွင်ႇလၢႆႇ ယိုတ်းမိူင်းမႃးၼႆႉ တေႁူမ်ႈၵၼ်ပဵၼ်ဢၼ်လဵဝ်သေ သိုပ်ႇၵၢၼ်လုၵ်ႉၽိုၼ်ႉ တေႃႇသူႈ သိုၵ်းမၢၼ်ႈၵႂႃႇထႅင်ႈ ဝႃႈၼႆ။

ၸုမ်းလုၵ်ႉၽိုၼ်ႉ 4 ၸုမ်းၼႆႉ ပဵၼ်တပ်ႉ မၢႆ 1005 (SSPDF) ၊ 1008 (SSRY) ၊ SSLRU လႄႈ SODF (Special Operation Drone Force) ၸိူဝ်းၼႆႉ။ ၶဝ်လႆႈၸႂ်ၵၼ်သေ ႁူမ်ႈၵၼ်တင်ႈတပ်ႉပိဝ်ႇႁႃႇ မၢႆ 9 ဢၼ်မီးၸိုဝ်ႈဝႃႈ SSNDF ။ တႃႇၶွၼ်ႈႁႅင်းၵၼ်မႃးၸိူင်ႉၼႆၵေႃႈ လႆႈပိုင်ႈဢိင် တပ်ႉၸုမ်းၵႅတ်ႇၶႄၸိူဝ်ႉ ၸၢတ်ႈ ယၢင်းလႅင် KNDF သေ ၸင်ႇပဵၼ်မႃး။ ၸင်ႇမီးၸိုဝ်ႈတပ်ႉၸုမ်းမႂ်ႇဝႃႈ SSNDF/ KNDF ဗျူဟာ အမှတ် (၉) ။

တပ်ႉၸုမ်းလုၵ်ႉၽိုၼ်ႉ ၼႂ်းမိူင်းတႆးပွတ်းၸၢၼ်း 4 ၸုမ်းၼႆႉ ႁူမ်ႈၵၼ်တင်းတပ်ႉၸုမ်းၾၢႆႇတရူၼ်ႊ ၼႂ်းမိူင်းတႆးပွတ်းၸၢၼ်းသေ လႆႈၵႂႃႇၶိုၼ်ႈပၢင်ၾိုၵ်းသိုၵ်း တီႈ KNDF ။ ပၢင်ၾိုၵ်းသိုၵ်းၼႆႉ တႄႇမိူဝ်ႈ ဝၼ်းတီႈ 11/02/2025 ၼၼ်ႉသေ ဝၼ်းတီႈ 17/04/2025 ၼႆႉ ၸင်ႇၸတ်းပွႆးလူင်းပၢင်။

ဝၼ်းတီႈ 19/04/2025 ၼႆႉ တီႈၾဵတ်ႉသ် SSNDF/ KNDF Tactical – 9 ၸင်ႇပိုၼ်ၽၢဝ်ႇဝႃႈ – ၸုမ်း လုၵ်ႉၽိုၼ်ႉၼႂ်းမိူင်းတႆးပွတ်းၸၢၼ်း 4 ၸုမ်းၼႆႉ ၶိုၼ်းၶွတ်ႇၽွတ်ႈပဵၼ် တပ်ႉၸုမ်း SSNDF / KNDF B – 101 ၊  B – 102 ၊ B – 103 ၼႆသေ တင်ႈပဵၼ် SSNDF/ KNDF တပ်ႉပိဝ်ႇႁႃႇမၢႆ 9 ဝႆႉယဝ်ႉ ဝႃႈၼႆ။

ဢိင်ၼိူဝ်လွင်ႈၶွတ်ႇၽွတ်ႈၸုမ်းမႂ်ႇၼႆႉသေ ၵူဝ်ႇၽူဝ်းၶႂႃး ၽူႈပွင်ၵၢၼ်သိုၵ်း SSNDF/ KNDF လၢတ်ႈၼႄဝႆႉၼင်ႇၼႆ –

“ၸုမ်းလုၵ်ႉၽိုၼ်ႉ ဢၼ်မီးၼႂ်းမိူင်းတႆးပွတ်းၸၢၼ်းၼႆႉ ၵမ်ႈၼမ် ၸႂ်ႉလၢႆးၽႂ်မၼ်း ယူႇတႂ်ႈပိူင်တိုဝ်း ၵမ်သိုၵ်း COC (code of conduct) ၽႂ်မၼ်းသေ ပၼ်ႇၵၢၼ်ၵႂႃႇၵူၺ်း။ ယွၼ်ႉၼၼ် ယူႇတီႈ ၸုမ်းၽႂ် မၼ်းသေ ႁႂ်ႈပေႃးပဵၼ်ၸုမ်းလဵဝ် ယူႇတႂ်ႈႁူဝ်ၶေႃႈဢၼ်လဵဝ်ၵၼ် ယူႇတႂ်ႈ COC ဢၼ်လဵဝ်ၵၼ်ၼႆသေ ၸင်ႇတူၵ်းလူင်းၽွတ်ႈၸုမ်းၼႆႉမႃး။ ၸူဝ်ႈႁဝ်းပႆႇထိုင်တၢင်းယိူင်းဢၢၼ်းၼၼ်ႉ ႁဝ်းတေယူႇတႂ်ႈ KNDF သေ ႁူမ်ႈမိုဝ်းၵၼ်ၵႂႃႇ။ ပိူင်လူင်မၼ်းတႄႉ ၼင်ႇႁိုဝ် ဢဵၼ်ႁႅင်း တေၵႅၼ်ႇၶႅင်သေဢမ်ႇၵႃး ၼင်ႇႁိုဝ် ၵၢၼ်လုၵ်ႉၽိုၼ်ႉ တေတူဝ်ႈထိုင်ၼႂ်းမိူင်းတႆးပႃး”- ဝႃႈၼႆ။  

ၸုမ်း SSNDF ၼႆႉ တေဢၢၼ်းယိပ်းၵွင်ႈတိုၵ်းတေႃး ၽွင်းတိုၵ်ႉလုၵ်ႉၽိုၼ်ႉၼႆႉၵူၺ်း သင်ၸိူဝ်ႉဝႃႈ ၵၢၼ်လုၵ်ႉၽိုၼ်ႉဢွင်ႇမၢၼ်ၵႂႃႇယဝ်ႉၵေႃႈ တေမီးလွင်ႈလႅၵ်ႈလၢႆႈယူႇ။

လၢတ်ႈလႆႈဝႃႈ လွင်ႈတူင်ႉၼိုင်ၵၢၼ်သိုၵ်း ၸုမ်း SSNDF ၼႆႉ မၼ်းမီးတီႈယင်ႇတီႈတိူၵ်ႈမၼ်းယူႇ ဢမ်ႇၸႂ်ႈဝႃႈ ႁဵတ်းၵၢၼ်သိုၵ်း ဢမ်ႇမေႃသုတ်းမေႃသဵင်ႈ။ လွင်ႈဝႃႈ SSNDF တေလေႃႇၶဝ်ႈတိုၵ်းၼႂ်း မိူင်းတႆး ၸိူင်ႉႁိုဝ်ၼႆၼၼ်ႉတႄႉ ပႆႇၸၢင်ႈလၢတ်ႈၼႄ။ တေဢၢၼ်းၶဝ်ႈတိုၵ်းတေႃး သိုၵ်းမၢၼ်ႈ ၼႂ်း မိူင်းတႆးၵႂႃႇယူႇ – ၵူဝ်ႇၽူဝ်းၶႂႃး ၽူႈပွင်ၵၢၼ်သိုၵ်း SSNDF/ KNDF လၢတ်ႈၼႄဝႆႉၼင်ႇၼႆ။

“ထႅင်ႈလွင်ႈၼိုင်ႈၵေႃႈ ၶႂ်ႈမီးလၢႆးတၢင်းၸတ်းပၢင်တိုၵ်းၵေႃႈ ပိူင်ၼိုင်ႈ။ ယဝ်ႉၵေႃႈ SSNDF ႁဝ်းၼႆႉ  ဢမ်ႇၸႂ်ႈဝႃႈ ၸုၵ်းတႃႇၸၢဝ်းၶိူဝ်းဢၼ်လဵဝ်။ ၼႂ်းၸုမ်းႁဝ်းၶႃႈၼႆႉ ပႃးဝႆႉလၢႆၸၢဝ်းၶိူဝ်း။ ပႃးပဢူဝ်း ၵူၼ်းၼွင်ႁၢႆးယႃႈ ထၼု၊ မၢၼ်ႈလႄႈ တၢင်ႇၸၢဝ်းၶိူဝ်းၸိူဝ်းၼႆႉ ပႃးဝႆႉၼမ်။ လၢတ်ႈလႆႈဝႃႈ ၸုမ်းႁဝ်း ၼႆႉ ဢိင်ၼိူဝ်ၼႃႈလိၼ်သေ လုၵ်ႉၽိုၼ်ႉၵူၺ်း ဢမ်ႇဢိင်ၼိူဝ်ၶိူဝ်းၵူၼ်း။ ပိူင်လူင်မၼ်း ႁဝ်းၸုၵ်းၼိူဝ် ၵၢၼ်လုၵ်ႉၽိုၼ်ႉသေ ႁဵတ်းၵႂႃႇၵူၺ်း။ ၶႂ်ႈၼႄဝႃႈ မိူင်းတႆးၵေႃႈ မီးၸုမ်းဢၼ်ၵႅၼ်ႇၶႅင် တေႃႇသူႈ လုၵ်ႉၽိုၼ်ႉယူႇၼႆၼၼ်ႉဢေႃႈ”- ဝႃႈၼႆ။

မိူင်းတႆးပွတ်းၸၢၼ်းၼႆႉ မီးပၢင်တိုၵ်းယူႇသေတႃႉ ၵူၼ်းမိူင်းတိုၵ်ႉလႆႈတုမ်ႉတိူဝ်ႉၸၢၵ်ႇမၼ်း ၽိဝ်မၼ်း ၵူၺ်း။ မိူဝ်းၼႃႈမႃး ဢမ်ႇပဵၼ်မႃးႁၢဝ်ႈႁႅင်းၼႆဢမ်ႇဝႃႈလႆႈ ၶႂ်ႈႁႂ်ႈၵူၼ်းမိူင်းၾၢင်ႉယူႇၵိၼ်ဝႆႉ။ ယႃႇပေ ထၢင်ႇဝႃႈ ဢမ်ႇပဵၼ်မႃးႁၢဝ်ႈႁႅင်းၼႆသေ ယူႇမဝ်ၵိၼ်မၢင်။ ႁႂ်ႈမေႃဝူၼ်ႉၽိူဝ်ႇဝႆႉဝႃႈ သင်ပဵၼ်ပၢင်တိုၵ်း မႃး ၼင်ႇႁိုဝ် တေယူႇလွတ်ႈၼၼ်ႉ တေလႆႈႁၢင်ႈႁႅၼ်းၸိူင်ႉႁိုဝ်ၼႆၼၼ်ႉ ၶႂ်ႈႁႂ်ႈသႂ်ႇၸႂ်ဝူၼ်ႉဝႆႉၼႆ – ၵူဝ်ႇ ၽူဝ်းၶႂႃး သိုပ်ႇလၢတ်ႈ။

တပ်ႉၸုမ်း မၢႆ 1005 (SSPDF)  ၊ 1008 (SSRY) ၸိူဝ်းၼႆႉ မိူဝ်ႈတႄႇတင်ႈမႃးတႄႉ ယူႇတႂ်ႈႁွင်ႈၵၢၼ် ၾၢႆႇၵႅတ်ႇၶႄ MOD ဢၼ် NUG ၶွတ်ႇၽွတ်ႈဝႆႉ။ ထိုင်မႃး ဝၼ်းတီႈ 01/02/2025 ၼႆႉ ၸင်ႇပိုၼ်ၽၢဝ်ႇ ထွၼ်ဢွၵ်ႇတႂ်ႈၸုမ်း MOD NUG ပဵၼ်တၢင်းၵၢၼ်။

ၼွၵ်ႈလိူဝ် ၸုမ်းလုၵ်ႉၽိုၼ်ႉၼႂ်းမိူင်းတႆး ထွၼ်ဢွၵ်ႇတႂ်ႈ NUG ယဝ်ႉ ၸုမ်းလုၵ်ႉၽိုၼ်ႉၸိူဝ်း မီးပွတ်း တၢင်းမိူင်းမၢၼ်ႈ ဝဵင်းလိူဝ်ႇ ၺွင်ႇဢူး ၸိူဝ်းၼႆႉၵေႃႈ ထွၼ်ဢွၵ်ႇ။ မိူၼ်ၼင်ႇ 21 BAGAN LPDF ပိုၼ် ၽၢဝ်ႇထွၼ်ဢွၵ်ႇ တႂ်ႈ NUG မိူဝ်ႈဝၼ်းတီႈ 24/04/2025 သိုဝ်ႇၶၢဝ်ႇမိူင်းမၢၼ်ႈ တွၼ်ႈၼိူဝ် Burma VJ ႁၢႆးငၢၼ်းဝႆႉ။

ၼႂ်းလိၵ်ႈပိုၼ်ၽၢဝ်ႇထွၼ်ဢွၵ်ႇ 21 BAGAN LPDF ၼၼ်ႉပႃးဝႆႉဝႃႈ – ၸုမ်းလုၵ်ႉၽိုၼ်ႉၼင်ႇၵၼ် ဢမ်ႇမီးလွင်ႈၼပ်ႉယမ်ၵၼ် သေဢမ်ႇၵႃး ဢမ်ႇႁူႉငဝ်းလၢႆးၼႃႈလိၼ်တႄႉတႄႉသေ တႅပ်းတတ်းၼႃႈ ၵၢၼ်ၵႂႃႇၵေႃႈမီးလႄႈ တေထွၼ်တူဝ်သေ တေၶဝ်ႈႁူမ်ႈၸုမ်းလုၵ်ႉၽိုၼ်ႉတၢင်ႇၸုမ်းၵူၺ်းယဝ်ႉ – ဝႃႈၼႆ။

ၸုမ်းလုၵ်ႉၽိုၼ်ႉ ဢၼ်တင်ႈမႃးၶၢဝ်းတၢင်းသိုၵ်း ယိုတ်းမိူင်း မွၵ်ႈ 7 ၸုမ်းၼႆႉ ဢွၼ်ၵၼ် ထွၼ်ဢွၵ်ႇ တႂ်ႈ NUG MOD ။ ၼႂ်းၼၼ်ႉ ပႃးၸုမ်းလုၵ်ႉၽိုၼ်ႉ ဢၼ်ယူႇၼႂ်းၵႄႈမိူင်းတႆး – မိူင်းယၢင်းလႅင် SSPDF  လႄႈ SSRY ၊ ၸုမ်းဢၼ်ယူႇၼႂ်းၸႄႈမိူင်းမွၼ်း ဂဠုန်စစ်ကြောင်း၊ ကျားဖြူစစ်ကြောင်း လႄႈ ၸုမ်း ဢၼ်မီးၼႂ်းတိူင်းမၵူၺ်း ဂန့်ဂေါ PDF ၸိူဝ်းၼႆႉ ၵေႃႈ ထွၼ်ဢွၵ်ႇ NUG မိူၼ်ၵၼ်။