ရူတ်ႉၵႃးတၢင်ႇႁႅင်းၵၢၼ်ၵူၼ်းမိူင်းမၢၼ်ႈ ၶဝ်ႈမိူင်းထႆးလူၺ်ႈဢမ်ႇမႅၼ်ႈတၢင်းၵၢၼ် ႁေႃႈပၢႆႈၵဵတ်ႉ/လၢၼ်ႇသိုၵ်းထႆးသေ ပဵၼ်ၽေးၵိုင်ႉၵၢင်ႉ ၽႃႇသႂ်ႇသဝ်ၾႆးၾႃႉ မီးၵူၼ်းမၢတ်ႇၸဵပ်း ဢမ်ႇယွမ်း 18 ၵေႃႉ၊ ဢၼ်မၢတ်ႇၸဵပ်းႁႅင်း မီး 3 ၵေႃႉ ဝႃႈၼႆ။
ပိူင်ပဵၼ်ၼႆႉ ပဵၼ်ၵႂႃႇ ဝၼ်းတီႈ 9/11/2025 ဝၼ်းဢႃးတိတ်ႉ ၶၢဝ်းယၢမ်းၵၢင်ဝၼ်း 1 မူင်း ၼႂ်းၸႄႈဝဵင်း သင်ႊၶလပူႊရီႊ မိူင်းထႆး။
ပဵၼ်ရူတ်ႉၵႃး မိတ်ႊသူႊပီးသျီႊ Mitshbishi သီလမ် တၢင်ႇမႃးႁႅင်းၵၢၼ်ၵူၼ်းမိူင်းမၢၼ်ႈ ႁူမ်ႈသဵၼ်ႈ 21 ၵေႃႉ ပဵၼ်ၵူၼ်းၸၢႆး 4 ၵေႃႉလႄႈ ၵူၼ်းယိင်း 17 ၵေႃႉ။ ၽွင်းမိူဝ်ႈမႃးထိုင်တီႈ ၵဵတ်ႉ/လၢၼ်ႇ သိုၵ်းထႆးပႂ်ႉၵူတ်ႇထတ်းၼၼ်ႉ ၸဝ်ႈၵႃးဢမ်ႇယွမ်းၵိုတ်းသေ ႁေႃႈပၢႆႈ၊ မိူဝ်ႈထိုင်တီႈတၢင်းၵူင်ႉတၢင်းငွၵ်း ဢမ်ႇၵုမ်းလႆႈတၢင်းဝႆးသေ ၽႃႇသႂ်ႇသဝ်ၾႆးၾႃႉ ႁၢဝ်ႈႁႅင်း၊ ႁူဝ်ရူတ်ႉၵႃး ပေႃးယွၵ်းယွႆ၊ ဝၢႆးပဵၼ်ၽေးၵိုင်ႉၵၢင်ႉယဝ်ႉ ၸဝ်ႈၵႃးပွႆႇဝႆႉႁႅင်းၵၢၼ်ၸိူဝ်းၼၼ်ႉသေ ပၢႆႈဢွၵ်ႇၵႂႃႇ ဝႃႈၼႆ။
ႁႅင်းၵၢၼ်ၸိူဝ်းၼၼ်ႉလၢတ်ႈတီႈ ၸဝ်ႈၼႃႈတီႈထႆးဝႃႈ – ၸိူဝ်းၶဝ် လုၵ်ႉတၢင်းဝဵင်းတႃႈၵုင်ႈမႃးသေ ဢၢၼ်းတေၵႂႃႇႁဵတ်းၵၢၼ်တီႈ ႁူင်းၸၢၵ်ႈတီႈၼိုင်ႈ၊ ႁူင်းၸၢၵ်ႈၼၼ်ႉ မီးတီႈလႂ်တႄႉ ဢမ်ႇႁူႉ၊ ပွႆးသႃး ၼၢႆးၼႃႈၶဝ် ၶပ်းၶိုင်ဝႆႉၵူၺ်း ဝႃႈၼႆ။
ယၢမ်းလဵဝ် ၾၢႆႇပလိၵ်ႈထႆး တီႉၺွပ်းၵုမ်းတူဝ်ၶဝ်ဝႆႉတၢင်းသဵင်ႈသေ ၸိူဝ်းမၢတ်ႇၸဵပ်းႁႅင်းၼၼ်ႉ သူင်ႇယူတ်းယႃတူဝ်ဝႆႉ တီႈႁူင်းယႃ။
ၼႂ်းလိူၼ်ဢွၵ်ႉထူဝ်ႊပိူဝ်ႊ (October) ပူၼ်ႉမႃးၼႆႉ ၶၢဝ်းတၢင်းၼိုင်ႈလိူၼ်ၵူၺ်း ၸဝ်ႈၼႃႈတီႈထႆး ၵူတ်ႇထတ်းတီႉၺွပ်းလႆႈႁႅင်းၵၢၼ်ၵူၼ်းမိူင်းမၢၼ်ႈ ဢမ်ႇယွမ်း 700 ၵေႃႉ ၸိူဝ်းၶဝ်ႈမိူင်းထႆး ဢမ်ႇမႅၼ်ႈတၢင်းၵၢၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ