မိူဝ်ႈဝၼ်းတီႈ 7 ယၢမ်းၵၢင်ၼႂ် လိူၼ်ၼူဝ်ႊဝႅမ်ႊပိူဝ်ႊ သိုၵ်းမၢၼ်ႈယိုတ်းမိူင်း ပိုတ်ႇၼႄၶိူင်ႈၸႂ်ႉတိုဝ်းၵၢၼ်သိုၵ်းၵူႈလွင်ႈလွင်ႈ ၵဵဝ်ႇလူၺ်ႈႁွင်ႈၵၢၼ်တပ်ႉၵၢင်ႁၢဝ် (တပ်ႉလူမ်း) တီႈဝဵင်းလူင်ၼေႇပျီႇတေႃႇ။
တၢမ်တူဝ် မိၼ်းဢွင်ႇလၢႆႇၵေႃႉၶိုၼ်ႈႁွတ်ႈ ပၢင်ပွႆးပၢႆးၼႄၶူဝ်းၶွင်တပ်ႉသိုၵ်းမၢၼ်ႈ ၾၢႆႇႁွင်ႈၵၢၼ်တပ်ႉၵၢင်ႁၢဝ် (တပ်ႉလူမ်း) ၼၼ်ႉသေ မွၵ်ႇလၢတ်ႈၶေႃႈၵႂၢမ်းၵႂႃႇဝႃႈ “ တင်ႈတႄႇပီ 2011 ထိုင် 2025 ၶၢဝ်းတၢင်း 15 ပီမႃးၼႆႉ လႆႈၽိူမ်ႉပၼ် ႁိူဝ်းမိၼ်၊ ၼမ်ႉၵတ်ႉၵူၼ်းသိုၵ်း ၵူႈသႅၼ်းသႅၼ်း တႃႇၼႂ်းႁွင်ႈၵၢၼ်တပ်ႉလူမ်းမႃး။ ဢိင်ၼိူဝ်ပၼ်ႁႃၵၢၼ်မိူင်းၵၢၼ်သိုၵ်း ၼႂ်းမိူင်းယၢမ်းလဵဝ်ၼႆႉသေ လႆႈတွၼ်ႈသွၼ်ဝႃႈ ႁိူဝ်းမိၼ် လႄႈ တရူၼ်ႊၼႆႉ ပဵၼ်ၶိူင်ႈၵမ်ႉၵႅမ်သိုၵ်း ဢၼ်ဢမ်ႇမီးဢမ်ႇပဵၼ်” ဝႃႈၼႆ။
ၼႂ်းပၢင်ပွႆးၼၼ်ႉ သိုၵ်းမၢၼ်ႈ ပိုတ်ႇမိၼ်ၼႄ ႁိူဝ်းမိၼ် သႅၼ်း Mi-17 တႃႇ 4 လမ်း၊ Eurocopter တႃႇ 2လမ်း၊ Bell- 206 တႃႇ 2 လမ်း၊ H-125 တႃႇ 2 လမ်း၊ ႁိူဝ်းမိၼ်ၸွပ်ႇၶၢဝ်ႇ MTX-1B တႃႇ 1 လမ်း၊ MTX-A တႃႇ 1 လမ်း လႄႈ ႁိူဝ်းမိၼ်ဢၼ်ၸႂ်ႉဝႆႉတႃႇၾိုၵ်း ၵူၼ်းသိုၵ်းႁေႃႈ သႅၼ်း Grob-120 TPၼၼ်ႉ 1 လမ်း၊ ႁိူဝ်းမိၼ်ဢၼ်ၸႂ်ႉတိုဝ်းၾၢႆႇၵၢၼ်တေႃႉသူင်ႇၶိူင်ႈၸႂ်ႉတိုဝ်းသိုၵ်း ATR ၼၼ်ႉ 1 လမ်း၊ Beech-1900D တႃႇ 2 လမ်း၊ ႁိူဝ်းမိၼ်တိုၵ်းၵျႅတ်ႊၾၢႆႊတိူဝ်ႊ သႅၼ်း K-8 တႃႇ 4 လမ်း၊ MiG-29 တႃႇ 5 လမ်း၊ ႁိူဝ်းမိၼ်တိုၵ်း ၵျႅတ်ႊၾၢႆႊတိူဝ်ႊ ဢၼ်ၸႂ်ႉတိုဝ်းလႆႈၵူႈလွင်ႈလွင်ႈ သႅၼ်းယႂ်ႇ Su-30 SME တႃႇ 3 လမ်း ၼႆယဝ်ႉ။
လႆႈႁူႉဝႃႈ ႁိူဝ်းမိၼ်တိုၵ်း တႃႇ 5 လမ်းၼႆႉ မိၼ်းဢွင်ႇလၢႆႇသိုဝ်ႉမႃးမႂ်ႇမႂ်ႇ တီႈလူင်ပွင်ၸိုင်ႈမိူင်းၶႄႇ မိူဝ်ႈလိူၼ်မေႊ လႄႈ လိူၼ်ၵျုၼ်ႊ ပီ 2025 ၼႆယဝ်ႉ။
ႁိူဝ်းမိၼ်တေႃႉသူင်ႇၶူဝ်းၶွင် ဢၼ်မိၼ်းဢွင်ႇလၢႆႇပိုတ်ႇၼႄၼႆႉ ယၢမ်ႈတေႃႉမၢၵ်ႇ မိူဝ်းပွႆႇမၢၵ်ႇသႂ်ႇၼႂ်းပိုၼ်ႉတီႈၸုမ်းသိုၵ်းၸၢဝ်းၶိူဝ်း ၼႂ်းမိူင်းတႆးပွတ်းႁွင်ႇ၊ မိူင်းရၶႅင်ႇ၊ မိူင်းမၢၼ်ႈထုင်ႉပဵင်း၊ မိူင်းယၢင်းလႅင်၊ မိူင်းၶၢင် ၸဵမ်ၸိူဝ်းၼႆႉပႃးၼႆ ၽူႈမီးၸၼ်ႉ ၼႂ်းတူင်ႇဝူင်း ႁွင်ႈၵၢၼ်တပ်ႉၵၢင်ႁၢဝ် သိုၵ်းမၢၼ်ႈ ဢၼ်ႁဵတ်း CDM ဝႆႉၼၼ်ႉ တူၵ်ႇတၵ်ႉလၢတ်ႈၼႄဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ