ၼႂ်းၶၢဝ်းတၢင်း သိုၵ်းမၢၼ်ႈယိုတ်းမိူင်း လႄႈ သိုၵ်းတဢၢင်း (TNLA) ပဵၼ်ပၢင်တိုၵ်းၵၼ် ၸွမ်းထုင်ႉၸႄႈဝဵင်းၵျၵ်ႉမႄး လႄႈ ၸႄႈဝဵင်းသီႇပေႃႉယူႇၼၼ်ႉ သိုၵ်းမၢၼ်ႈၸႂ်ႉ ႁိူဝ်းမိၼ် ပွႆႇမၢၵ်ႇလူင်သႂ်ႇ ႁိူၼ်းယေး၊ ဝတ်ႉဝႃးၽႃသိူဝ်ႇ ႁဵတ်းႁႂ်ႈ သင်ႇၶ လႄႈ ၵူၼ်းမိူင်း လူႉတၢႆမၢတ်ႇၸဵပ်းၸွမ်း။
လိူၼ်ဢွၵ်ႉထူဝ်ႊပိူဝ်ႊပူၼ်ႉမႃးၼႆႉ ယွၼ်ႉမၢၵ်ႇႁိူဝ်းမိၼ်သိုၵ်းမၢၼ်ႈတူၵ်းတႅၵ်ႇသႂ်ႇသေ သင်ႇၶ ၸဝ်ႈ လႄႈ ၵူၼ်းမိူင်း လူႉတၢႆမၢတ်ႇၸဵပ်းၵႂႃႇ 71 ၵေႃႉၼႆ ႁွင်ႈၵၢၼ်ၾၢႆႇပိုၼ်ၽၢဝ်ႇ တပ်ႉသိုၵ်းတဢၢင်း (TNLA) ပိုၼ်ဢွၵ်ႇ မိူဝ်ႈဝႃးဝၼ်းတီႈ 1/11/2025 ဝႆႉၼင်ႇၼႆ။
“သင်ၶ လူႉလွၼ်ႇ 2 ပႃး၊ လုၵ်ႈဢွၼ်ႇ 10 ၵေႃႉ၊ ၼုမ်ႇၸၢႆး 16 ၵေႃႉ လႄႈ ၼၢင်းယိင်း 21 ၵေႃႉ တၢႆၵႂႃႇသေ သင်ႇၶတႃႇ 6 ပႃး၊ လုၵ်ႈဢွၼ်ႇ 26 ၵေႃႉ၊ ၵူၼ်းၸၢႆး 20 ၵေႃႉ၊ ၼၢင်းယိင်း 19 ၵေႃႉ မၢတ်ႇၸဵပ်းၵႂႃႇၸွမ်းႁၢဝ်ႈႁႅင်း။” – ပႃးဝႆႉၼင်ႇၼႆ။
လိူဝ်ၼၼ်ႉ ႁိူၼ်းယေးၵူၼ်းမိူင်း တႃႇ 175 လင်၊ ႁူင်းႁဵၼ်းသွၼ်လိၵ်ႈ 5 တီႈ၊ ဝတ်ႉဝႃးၽႃသိူဝ်ႇ 16 လင်၊ ႁူင်းၵေႃႇၵၢႆႇသုၼ်ၵၢင်ၶွင်ၵူၼ်းမိူင်း 6 တီႈ၊ ႁူင်းလဵင်ႉၵႆႇ 2 လင်၊ ႁွင်ႈၶၢတ်ႈၶၢႆၵုၼ်ႇ 5 ႁွင်ႈ၊ ႁူင်းၸၢၵ်ႈႁဵတ်းဢွၵ်ႇၼဵင်ႈႁႅင်ႈ 1 တီႈ လႄႈ ရူတ်ႉၶိူင်ႈ 4 လမ်း ဢိၵ်ႇပႃး ရူတ်ႉၵႃး 10 လမ်း ၵေႃႈ လူႉၵွႆၵႂႃႇၸွမ်း ပႃးဝႆႉၼင်ႇၼႆ။
လႆႈႁူႉဝႃႈ သိုၵ်းမၢၼ်ႈၸႂ်ႉတိုဝ်းႁိူဝ်းမိၼ်တိုၵ်း လႄႈ ၶိူင်ႈတရူၼ်ႊ ယိုဝ်းသႂ်ႇ ၼႂ်းၸႄႈဝဵင်းၼမ်ႉတူႈ တႃႇ 7 ပွၵ်ႈ၊ ၸႄႈဝဵင်းမၢၼ်ႈတူင်ႈ 2 ပွၵ်ႈ၊ ၸႄႈဝဵင်းမိူင်းလူင် 5 ပွၵ်ႈ၊ ၸႄႈဝဵင်းၵျွၵ်ႉမႄး 3 ပွၵ်ႈ၊ ၸႄႈဝဵင်းမိူင်းငေႃႉ 3 ပွၵ်ႈ၊ ၸႄႈဝဵင်းၼမ်ႉသၼ်ႇ 6 ပွၵ်ႈ၊ ၸႄႈဝဵင်းမိူင်းၵုတ်ႈ 4 ပွၵ်ႈ၊ ၸႄႈဝဵင်းမိူင်းမိတ်ႈ 5 ပွၵ်ႈ တင်းမူတ်း 35 ပွၵ်ႈ ဝႃႈၼႆ။
ၼႂ်းလိၵ်ႈၵိၼ်ႇၵႅၼ်ႇ ၵျီႊၼီႊဝႃႊ ၶွၼ်ႊဝႅၼ်းသျိၼ်ႊ ဢၼ်သိုၵ်းမၢၼ်ႈၶဝ်ႈႁူမ်ႈ လူင်းလၢႆးမိုဝ်းၸွမ်းဝႆႉၼၼ်ႉတႄႉ ပႃးဝႆႉဝႃႈ “ပိုၼ်ႉတီႈသိုၵ်းတေဢမ်ႇလႆႈယိုဝ်း လႄႈ ဢမ်ႇလႆႈတိူဝ်ႉလႃးလႃးၼႆႉ ပဵၼ်ႁိူၼ်းယေးၵူၼ်းမိူင်း၊ ႁူင်းယႃ၊ ႁွင်ႈယႃ၊ ႁူင်းႁဵၼ်း၊ ဝတ်ႉဝႃးၽႃသိူဝ်ႇတီႈၵူၼ်းပိုၼ်ႉတီႈၵိူဝ်းယမ် လႄႈ ပိုၼ်ႉတီႈသုၼ်ႇၵၢင်ႁူင်းၵေႃႇၵၢႆႇ ၸိူဝ်းမီးၽွၼ်းလီတႃႇၵူၼ်းမိူင်း ၸဵမ်ၸိူဝ်းၼႆႉ။
ၵူၺ်းၵႃႈ ဝၢႆးလင်မိၼ်းဢွင်ႇလၢႆႇ သိမ်းဢႃႇၼႃႇၸိုင်ႈမိူင်း ယိုတ်းဢဝ် ဢႃႇၼႃႇလူင်ပွင်ၸိုင်ႈၵူၼ်းမိူင်းယဝ်ႉ မိူဝ်ႈပီ 2021 မႃး ႁၢၼ်ႉတေႃႇထိုင်ယၢမ်းလဵဝ် သိုၵ်းမၢၼ်ႈ လႄႈ ၸုမ်းယိပ်းၵွင်ႈၵၢင်ႇၼႂ်းမိူင်း ပဵၼ်ပၢင်တိုၵ်းၵၼ် ၼႂ်းမိူင်းႁူမ်ႈတုမ် တီႈၼိုင်ႈယဝ်ႉ ဢွင်ႈၼိုင်ႈသေ တင်းသွင်ၸုမ်းသွင်ၾၢႆႇ ဢမ်ႇတွၼ်ႉႁဵတ်းၸွမ်း ပၵ်းပိူင် ၶေႃႈၵိၼ်ၵႅၼ်ႇ သုၼ်ႇလႆႈသုၼ်ႇပဵၼ်ၵူၼ်း လႄႈ ၶေႃႈတိုဝ်းၵမ်သိုၵ်းသေဢိတ်း။ ႁၢၼ်ႉတေႃႇထိုင်ယၢမ်းလဵဝ်ၵေႃႈ တိုၵ်ႉသိုပ်ႇႁဵတ်းၽိတ်း လိၵ်ႈၵိၼ်ႇၵႅၼ်ႇ ၵျီႊၼီႊဝႃႊ ၶွၼ်ႊဝႅၼ်ႊသျိၼ်းယူႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ