သိုၵ်းမၢၼ်ႈပိုၼ်ၽၢဝ်ႇၵုမ်းလႆႈၶိုၼ်း ဝဵင်းသီႇပေႃႉယဝ်ႉၼႆထႅင်ႈဝၼ်းၼိုင်ႈ ဢဝ်ႁိူဝ်းမိၼ်သိုၵ်းၵႂႃႇလိုပ်ႈလမ်းပွႆႇမၢၵ်ႇၸွမ်းလင်သိုၵ်းတဢၢင်း 2 ဝၼ်းထပ်းၵၼ် ၼႂ်း 5 ဝဵင်း ႁဵတ်းႁႂ်ႈၵူၼ်းမိူင်းမၢတ်ႇၸဵပ်းလူႉတၢႆ  ဢမ်ႇယွမ်း 20။

တႄႇဝၼ်းတီႈ 18 လိူၼ်ဢွၵ်ႉထူဝ်ႊပိူဝ်ႊ ယၢမ်းတၢမ်းၶမ်ႈ 5 မူင်းၶိုင်ႈ တေႃႇထိုင် ဝၼ်းတီႈ 19 ယၢမ်းႁူဝ်ၶမ်ႈ ႁိူဝ်းမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇ ၼႂ်းဝၢၼ်ႈၸိူဝ်းမီးၵူၼ်းမိူင်းယူႇသဝ်းၼမ် တီႈၸႄႈဝဵင်းမိူင်းလူင်၊ ဝဵင်းၼမ်ႉသၼ်ႇ၊ ဝဵင်းမိူင်းငေႃႉ၊ ဝဵင်းမၢၼ်ႈတူင်ႈ၊ ဝဵင်းမိူင်းၵုတ်ႈ လႄႈ ဝဵင်းမိူင်းမိတ်ႈၼႆႉ သင်ႇၶ လႄႈ လုၵ်ႈဢွၼ်ႇ၊ ၼၢင်းယိင်း ဢိၵ်ႇၵူၼ်းထဝ်ႈ မၢတ်ႇၸဵပ်းလူႉတၢႆ။

မိူဝ်ႈဝၼ်းတီႈ 18 ယၢမ်းတၢမ်းၶမ်ႈ 5 မူင်းၶိုင်ႈ ႁိူဝ်းမိၼ်သိုၵ်းမၢၼ်ႈယိုဝ်းမၢၵ်ႇတူၵ်းသႂ်ႇ ၵႄႈၵၢင်ဝၢၼ်ႈပၢင်သပ်ႉပေႇ လႄႈ ဝၢၼ်ႈလွႆၸူႉ ဢိူင်ႇၼမ်ႉၶူင်း ၸႄႈဝဵင်းမိူင်းလူင် ၸၢၵ်ႇမၢၵ်ႇသဵၼ်ၵႂႃႇတိူဝ်ႉသႂ်ႇတီႈၵုမ်ႇၵူၼ်ႈ ၼၢင်းယိင်းဢႃႇယု 32 ပီ ။

ၼႂ်းဝၼ်းၼၼ်ႉၵွႆး ထိုင်မႃးယၢမ်းၵၢင်ၶမ်ႈ တႄႇ 8 မူင်းၶိုင်ႈ တေႃႇ 9 မူင်းၼႆႉ ႁိူဝ်းမိၼ်  သိုပ်ႇၵႂႃႇပွႆႇမၢၵ်ႇလူင် သႅၼ်း 500 ပွင်ႊ တူၵ်းသႂ်ႇၼႂ်းၵၢင်ဝၢၼ်ႈၵုၼ်ႁႄ ဝဵင်းၼမ်ႉသၼ်ႇ။  ၼၢင်းယိင်း 5 ၵေႃႉ လႄႈ ၵူၼ်းၸၢႆး 1 ၵေႃႉ တၢႆထင်တီႈ ။ ၼႂ်း ၼၼ်ႉ ပႃးလုၵ်ႈဢွၼ်ႇယိင်း ဢႃႇယု 10 ၶူပ်ႇ တၢႆၸွမ်းၵေႃႉၼိုင်ႈ။ ၵူၼ်းမိူင်းမၢတ်ႇၸဵပ်း ႁၢဝ်ႈႁႅင်း   8 ၵေႃႉ။  ႁိူၼ်းယေးလူႉၵွႆၵႂႃႇ 25 လင် လႄႈ ရူတ်ႉၶိူင်ႈ လူႉၵွႆၵႂႃႇ 4 လမ်း  – လႆႈႁူႉၼင်ႇၼႆ။

ၶၢဝ်းယၢမ်းပိူင်ႈ  5 မိၼိတ်ႉၵူၺ်း ႁိူဝ်းမိၼ်  ၵႂႃႇယိုဝ်းမၢၵ်ႇလူင်ထႅင်ႈ တီႈၵျွင်းမုၼ်ၸဝ်ႈ တီႈဝၢၼ်ႈ 11 လၵ်း ဢၼ်မီး ၼိူဝ်သဵၼ်ႈတၢင်းလူင် လုၵ်ႉဝဵင်းၵျွၵ်ႉမႄး ၵႂႃႇ မိူင်းငေႃႉ။  သင်ႇၶၸဝ်ႈမၢတ်ႇၸဵပ်း   2 ပႃး။  ႁူင်းၵေႃႇၵၢႆႇ ၼႂ်းဝၢင်းၵျွင်း လူႉၵွႆ  2 လင်  ။

ဝၼ်းလဵဝ်ၵွႆး သိုၵ်းမၢၼ်ႈယိုဝ်းသႂ်ႇ ၸွမ်းဢွင်ႈတီႈသိုၵ်းတဢၢင်းယူႇသဝ်း ၵုမ်းၵမ်ဝႆႉ ထပ်းၵၼ်ႁၢဝ်ႈႁႅင်းလႄႈ သင်ႇၶ၊ လုၵ်ႈဢွၼ်ႇၸဵမ်ယိင်းၸဵမ်ၸၢႆး ဢိၵ်ႇပႃး ၵူၼ်းၼုမ်ႇ၊ ၵူၼ်းထဝ်ႈ တင်းသဵင်ႈတၢႆထင်တီႈ 6 ၵေႃႉ မၢတ်ႇၸဵပ်း  11 ၵေႃႉ ။

 ၼုမ်ႇၸၢႆး ဢႃႇယု 35 ပီ  ယူႇဝႆႉၼႂ်းၼႃႈတီႈသိုၵ်းတဢၢင်း (TNLA) ၵုမ်းၵမ် လၢတ်ႈၽူႈတွႆႇႁွၵ်ႈဝႃႈ “ဢွင်ႈတီႈသိုၵ်းမၢၼ်ႈ ပွႆႇမၢၵ်ႇသႂ်ႇယူႇတိၵ်းတိၵ်းၼႆႉ ပဵၼ်ဢွင်ႈတီႈၵူၼ်းမိူင်းယူႇသဝ်းၼမ်။ ဢွင်ႈတီႈၸိူဝ်းၼၼ်ႉ ဢမ်ႇၸႂ်ႈဝႃႈ မီးၸၢဝ်းၶိူဝ်းလွႆၵူၺ်း ယူႇ သဝ်း။ မီးပႃးၸၢဝ်းၶိူဝ်းမၢၼ်ႈ၊ ၸၢဝ်းၶိူဝ်းတႆး ယူႇၸွမ်းဝႆႉ။ မိူၼ်ၶဝ်တင်ႈၸႂ် ႁဵတ်းႁႂ်ႈၵူၼ်းၼႂ်းပိုၼ်ႉ တီႈဢမ်ႇၸၢင်ႈယူႇ။  တင်ႈၸႂ် ႁဵတ်းႁႂ်ႈၶိူဝ်းၵူၼ်းမူၺ်ႉ ပဵၼ်ၸုပ်ႈပဵၼ်ၸုပ်ႈဝႆႉ” ဝႃႈၼႆ။

ထိုင်မႃး ဝၼ်းတီႈ 19 ယၢမ်းၵၢင်ဝၼ်း 12 မူင်း 25 မိၼိတ်ႉ ႁိူဝ်းမိၼ်သိုၵ်းမၢၼ်ႈသိုပ်ႇပွႆႇမၢၵ်ႇသႂ်ႇၼႂ်းၵၢင်ဝဵင်းၼမ်ႉသၼ်ႇ ။ တူၵ်းတႅၵ်ႇသႂ်ႇတီႈႁူင်းၶႄၾႆး တီႈပွၵ်ႉၼမ်ႉမဝေႃး ၵူၼ်းမိူင်းမၢတ်ႇၸဵပ်းသွင်ၵေႃႉ၊ ႁိူၼ်းယေးလူႉၵွႆ 2 လင်၊ ႁူင်းၸၢၵ်ႈၼဵင်ႈ လူႉၵွႆၵႂႃႇ 1 တီႈ လႄႈ ၵႃးၶႄၾႆး လူႉၵွႆ 5 လမ်း ၵႃးၵူၼ်းမိူင်းလူႉၵွႆၵႂႃႇ 4 လမ်း ၼႆယဝ်ႉ။

ၼႂ်းၶၢဝ်းယၢမ်းလဵဝ်ၵၼ် သိုၵ်းမၢၼ်ႈသိုပ်ႇၸႂ်ႉႁိူဝ်းမိၼ်ပွႆႇမၢၵ်ႇသႂ်ႇ တီႈၼႂ်းပွၵ်ႉဢွင်ႇၶျၢၼ်းတႃႇ တီႈမၢၼ်ႈတူင်ႈ ။ႁိူၼ်းယေးၵူၼ်းမိူင်းလူႉၵွႆၵႂႃႇ 6 လင်။ ထိုင်တၢမ်းၶမ်ႈ ႁိူဝ်းမိၼ်ၶွင်သိုၵ်းမၢၼ်ႈသိုပ်ႇၵႂႃႇပွႆႇမၢၵ်ႇသႂ်ႇတီႈဝၢၼ်ႈလွႆပဵင်း ဝဵင်းၼမ်ႉသၼ်ႇ ။ ၸၢၵ်ႇမၢၵ်ႇသဵၼ်တိူဝ်ႉမိုဝ်းၾၢႆႇၶႂႃ ၼၢင်းယိင်းၵေႃႉၼိုင်ႈ မၢတ်ႇၸဵပ်းၵႂႃႇၵူၺ်းဢမ်ႇၵႃး ၶွၵ်ႈလဵင်ႉၵႆႇ ဝၢၼ်ႈၵျွၵ်ႉၽႃးတႂ်ႈ ၾၢႆႇဢွၵ်ႇမိူင်းၵုတ်ႈ ၵေႃႈ လူႉၵွႆ။

ၼႂ်းၶၢဝ်းတၢင်းသွင်ဝၼ်းၼႆႉ ယွၼ်ႉမၢၵ်ႇႁိူဝ်းမိၼ်သိုၵ်းမၢၼ်ႈသေ ၵူၼ်းမိူင်း ၼႂ်း 5 ဝဵင်းၼႆႉ လူႉတၢႆၵႂႃႇ 6 ၵေႃႉ မၢတ်ႇၸဵပ်းၵႂႃႇ 14 ၵေႃႉ။

ဢိင်ၼိူဝ်လွင်ႈၼႆႉသေ ၽူႈၼမ်းၼႂ်း သိုၵ်းတဢၢင်း ၸွမ်ႁၢၼ် တႃႉၽူင်းၵျေႃႇ တႅမ်ႈတၢင်ႇၼိူဝ်သိုဝ်ႇတူင်ႇဝူင်းၵူၼ်း သုၼ်ႇတူဝ်မၼ်းဝႆႉဝႃႈ “တေမၢႆတွင်းဝႆႉ  ၵူၼ်းၸိူဝ်း ပၢဝ်ႇသေႃႇႁႂ်ႈ သိုၵ်းမၢၼ်ႈဢဝ်ႁိူဝ်းမိၼ်တိုၵ်းမႃးပွႆႇမၢၵ်ႇသႂ်ႇၼႂ်းၼႃႈတီႈသိုၵ်းတဢၢင်းတူင်ႉၼိုင်၊ ၵူၼ်းၸိူဝ်းႁူမ်ၸူမ်း တူပ်းမိုဝ်း ပၼ်ႁႅင်းႁႂ်ႈမႃးပွႆႇမၢၵ်ႇ  လႄႈ ၵူၼ်းၸိူဝ်းမႃးပွႆႇမၢၵ်ႇသႂ်ႇ ဝၼ်းဝၼ်းၶိုၼ်းၶိုၼ်းၼႆႉယူႇ။ ၵမ်းၽႂ်ၵမ်းမၼ်းဢၼ်ဝႃႈၼၼ်ႉ တိုၼ်းတေမီး ဢမ်ႇႁၢင်ႉ” ဝႃႈၼႆ။

ၼႂ်းလိူၼ်ဢွၵ်ႉထူဝ်ႊပိူဝ်ႊ ဝၼ်းတီႈ 1 တေႃႇထိုင် ဝၼ်းတီႈ 19 ၼႆႉ သိုၵ်းမၢၼ်ႈၸႂ်ႉႁိူဝ်းမိၼ်ပွႆႇမၢၵ်ႇသႂ်ႇ ၼႂ်းဝဵင်းမၢၼ်ႈတူင်ႈ 1 ပွၵ်ႈ၊ ဝဵင်းၵျွၵ်ႉမႄး 3 ပွၵ်ႈ၊ ဝဵင်းသီႇပေႃႉ 5 ပွၵ်ႈ၊ ဝဵင်းမိူင်းငေႃႉ 1 ပွၵ်ႈ၊ ဝဵင်းမိူင်းလူင် 4 ပွၵ်ႈ၊ ဝဵင်းၼမ်ႉသၼ်ႇ 5 ပွၵ်ႈ၊ ဝဵင်းၼမ်ႉတူႈ 5 ပွၵ်ႈ၊ ဝဵင်းမိူင်းမိတ်ႈ 3 ပွၵ်ႈ လႄႈ ဝဵင်းမိူင်းၵုတ်ႈ 1 ပွၵ်ႈ ႁူမ်ႈသဵၼ်ႈ ပဵၼ် 28 ပွၵ်ႈ ယဝ်ႉ ။

မိူင်းၶႄႇ ယူႇၵၢင်ႁဵတ်းၶဵဝ်ပၼ်သေ ၽွင်းသိုၵ်းမၢၼ်ႈ တင်း သိုၵ်းတဢၢင်း ႁၢင်ႈႁႅၼ်း တႃႇဢုပ်ႇဢူဝ်းၵႄႈလိတ်ႈပၼ်ႁႃၵၼ်ယူႇၼႆႉ ၾၢႆႇသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်းသေ ယိုဝ်းသႂ်ႇ ၼႂ်းပိုၼ်ႉတီႈသိုၵ်းတဢၢင်းႁၢဝ်ႈႁႅင်း။  ၼႂ်းၶၢဝ်းတၢင်းလိူၼ်ပၢႆၽၢၵ်ႇၵူၺ်း သိုၵ်းမၢၼ်ႈယိုတ်းဢဝ်လႆႈၶိုၼ်း ဝဵင်းၵျွၵ်ႉမႄး လႄႈ ဝဵင်းသီႇပေႃႉ။

ၾၢႆႇၼိုင်ႈၵေႃႈ ပေႃးထိုင်မႃး လိူၼ်တီႊသႅမ်ႊပိူဝ်ႊ ဝၼ်းတီႈ 28 ၼႆႉ သိုၵ်းမၢၼ်ႈၶိုင်ပွင်ၸတ်းႁဵတ်းပၢင်လိူၵ်ႈတင်ႈပတ်းပိုၼ်ႉတူဝ်ႈ မိူင်း။  ၼင်ႇႁိုဝ်တေယိုတ်းၵုမ်းဢဝ်လႆႈၶိုၼ်းလႆႈ ၸႄႈဝဵင်းၸိူဝ်းဢၼ်ၶဝ်လႆႈသုမ်းပၼ် သိုၵ်းတဢၢင်း လႄႈ ၸုမ်းဢူၺ်းလီၶဝ်ၵႂႃႇၼၼ်ႉ  ၾၢႆႇသိုၵ်းမၢၼ်ႈ ပိုၼ်ၽၢဝ်ႇငဝ်းလၢႆးၶိုၵ်ႉၶၵ်ႉဝႆႉသေ လၢတ်ႈဝႆႉပဵၼ်တၢင်းၵၢၼ်ဝႃႈ တေ ၶိုင်ပွင်ၵူႈလၢႆးတၢင်း ။

လႆႈႁူႉဝႃႈ ယၢမ်းလဵဝ် သိုၵ်းမၢၼ်ႈသိုပ်ႇၸတ်းသၢႆသိုၵ်း လုၵ်ႉတၢင်းဝဵင်းသီႇပေႃႉ မုင်ႈၼႃႈၵႂႃႇတၢင်းဝဵင်းၼမ်ႉတူႈ ဢွင်ႈတီႈမီး သိုၵ်းတဢၢင်းယူႇသဝ်းဝႆႉၼၼ်ႉသေ တင်းသွင်ၾၢႆႇၶဵင်ႈၶႅင်ႈၵၢၼ်သိုၵ်းၵၼ်ဝႆႉ ၼႆယဝ်ႉ။

ၶေႃႈတူၵ်းလူင်း ၵျီႊတီႊဝႃႊ ၶွၼ်ႊဝႅၼ်ႊသျိၼ်ႊ မတ်ႉတႃ 14 ၶေႃႈတူၵ်းလူင်းၽိူမ်ႉထႅမ် 2 ၼၼ်ႉပႃးဝႆႉဝႃႈ – သိုၵ်းၼႆႉ ႁၢမ်ႈယႃႉၶူဝ်းၶွင်လမ်ႇလွင်ႈၵူၼ်းမိူင်း ဢၼ်ဢမ်ႇမီးဢမ်ႇပဵၼ် မိူၼ်ၼင်ႇ ႁိူၼ်းယေး လိၼ်သူၼ်ႁႆႈၼႃး ဢၼ်ၽုၵ်ႈသွမ်ႈဝႆႉမၢၵ်ႇၶဝ်ႈတဝ်ႈၼမ်ႉ၊ သူၼ်-ၶွၵ်ႈလဵင်ႉသတ်း ၊ ႁူဝ်ၼမ်ႉၵိၼ်ၼမ်ႉၸႂ်ႉ၊ ၵၢၼ်တေႃႉသူင်ႇၶူဝ်းၶွင်ၵူၼ်းမိူင်း ၸိူဝ်းၼႆႉလႃးလႃး။