တပ်ႉသိုၵ်းရၶႅင်ႇ AA ပိုၼ်ၽၢဝ်ႇဝႃႈ သိုၵ်းမၢၼ်ႈၼႆႉ ဝၢႆးလင်ၵိုတ်းတိုၵ်းၵၼ်တင်း တပ်ႉသိုၵ်းၵဝ်ႈၵၢင်ႉ MNDAA လႄႈ တပ်ႉသိုၵ်းတဢၢင်း TNLA ယဝ်ႉ သူင်ႇႁႅင်းသိုၵ်း လႄႈ ႁိူဝ်းမိၼ်တိုၵ်း ၵႂႃႇပွႆႇမၢၵ်ႇတၢင်းမိူင်းရၶႅင်ႇႁၢဝ်ႈႁႅင်း ဝႃႈၼႆ။
တပ်ႉသိုၵ်းရၶႅင်ႇ AA ပိုၼ်ၽၢဝ်ႇမိူဝ်ႈဝႃးဝၼ်းတီႈ 31/10/2025 ဝႃႈ ႁႂ်ႈၵူၼ်းမိူင်းၾၢင်ႉႁိူဝ်းမိၼ်သိုၵ်းမၢၼ်ႈမႃးပွႆႇမၢၵ်ႇ။ ယွၼ်ႉဝႃႈသိုၵ်းမၢၼ်ႈၼႆႉဢမ်ႇဝႄႈတီႈယူႇၵူၼ်းမိူင်းၵူၼ်းသိုၵ်း။ မိူၼ်ၼင်ႇမိူင်းတႆးပွတ်းႁွင်ႇ သိုၵ်းမၢၼ်ႈဢဝ်ႁိူဝ်းမိၼ်ပိုတ်းယိုဝ်းသႂ်ႇဝၢၼ်ႈသူၼ်ႁိူၼ်းယေးၵူၼ်းမိူင်း၊ ႁူင်းႁဵၼ်း၊ ၵၢတ်ႇ၊ ႁူင်းယႃ၊ ႁွင်ႈယႃ ၵျွင်းမုၼ်ၸဝ်ႈ ၸိူဝ်းၼႆႉ။ ၵွပ်ႈၼႆ သိုၵ်းမၢၼ်ႈၸၢင်ႈဢဝ်လွၵ်းလၢႆးၼၼ်ႉမႃးၸႂ်ႉတီႈမိူင်းရၶႅင်ႇ – ဝႃႈၼႆ။
ယွၼ်ႉဝႃႈ တင်ႈတႄႇဝၼ်းတီႈ 29/10/2025 သိုၵ်းမၢၼ်ႈလႄႈသိုၵ်း TNLA ၵိုတ်းယိုဝ်းၵၼ်ပဵၼ်တၢင်းၵၢၼ်မႃးၼႆႉ သိုၵ်းမၢၼ်ႈပိုတ်းယိုဝ်းၼႂ်းမိူင်းရၶႅင်ႇၶိုၼ်းႁၢဝ်ႈႁႅင်း။ ၼႂ်းၶၢဝ်းတၢင်း 29-30-31/10/2025 သၢမ်ဝၼ်းၵူၺ်းၼႆႉ သိုၵ်းမၢၼ်ႈပိုတ်းယိုဝ်းတီႈဝဵင်း ရတေႉတွင်ႇ၊ ပူင်ႇၼႃးၵျုၼ်း၊ ပွၵ်ႉတေႃး၊ ၸိတ်ႉတူၺ်ႇလႄႈ ၵျွၵ်ႉၽိဝ်ႇ၊ ၵူၼ်းမိူင်းတၢႆ 12 ၵေႃႉ ၼႂ်းၼၼ်ႉပႃးလုၵ်ႈဢွၼ်ႇဢႃယု 5 ၶူပ်ႇလႄႈ 9 ၶူပ်ႇ။
ဢၼ်မၢတ်ႇၸဵပ်းသမ်ႉ မီး 31 ၵေႃႉ – ၼႂ်းၼၼ်ႉပႃးလုၵ်ႈဢွၼ်ႇဢႃယု 12 ၶူပ်ႇၵေႃႉၼိုင်ႈ။ ဢၼ်မၢတ်ႇၸဵပ်းႁၢဝ်ႈႁႅင်းထိုင်တီႈလႆႈမႆႈၸႂ်ၵေႃႈမီး 11 ၵေႃႉ – ၼႆ AA လၢတ်ႈဝႆႉၼင်ႇၼႆ။
ၼႂ်းႁၢင်လိူၼ်ဢွၵ်ႉထူဝ်ႊပိူဝ်ႊပူၼ်ႉမႃးၼႆႉ ဢိင်ၼိူဝ်မိူင်းၶႄႇ ၶဝ်ႈၵႄႈၵၢင်သေ သိုၵ်းၵဝ်ႈၵၢင်ႉလႄႈသိုၵ်းတဢၢင်းလႆႈၵိုတ်းယိုဝ်းၵၼ်တင်းသိုၵ်းမၢၼ်ႈ။ လႆႈထွႆထွၼ်ဢွၵ်ႇပၼ်လၢႆလၢႆၸႄႈဝဵင်းမိူၼ်ၼင်ႇ ၵျွၵ်ႉမႄး သီႇပေႃႉၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ