မိူဝ်ႈၼႆႉ ဝၼ်းတီႈ 21/10/2025 ယၢမ်းဝၢႆးဝၼ်း 3 မူင်း သိုၵ်းမၢၼ်ႈၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ႁိမ်းၵျွင်းတႆး ၾၢႆႇလင်ၽြႃးႁႃႈသူႇ ပွတ်းဢွၵ်ႇဝဵင်းမိူင်းၵုတ်ႈ။

ၵူၼ်းမိူင်းၵုတ်ႈလၢတ်ႈဝႃႈ “မိူဝ်ႈတႄႇၶႃႈထၢင်ႇပဵၼ်သဵင်ၾႃႉလင်ၼႆ။ တူၺ်းၾႃႉသမ်ႉပၢင်ႇယူႇ။ တူၵ်းၸႂ်ႁႅင်းဢေႃႈ။ မၼ်းမႃးပွႆႇၵႂႃႇ 2 ၵမ်းၶႃႈၼႃႇ။ ၺႃးၼႂ်းဝၢင်းပိတ်ႉမၢၵ်ႇၼင်။ တိူဝ်ႉၺႃးၵူၼ်းၼမ်ယူႇ။ တေႃႇထိုင်မိူဝ်ႈလဵဝ်တႄႉ ငိၼ်းဝႃႈ လုၵ်ႈဢွၼ်ႇၵေႃႈတၢႆ။ ၵူၼ်းၸိူဝ်းမၢတ်ႇၵေႃႈ မီးလၢႆၵေႃႉၼႆယူႇဢေႃႈ” ဝႃႈၼႆ။

သိုၵ်းမၢၼ်ႈယိုတ်းမိူင်းၼႆႉ ၸႂ်ႉႁိူဝ်းမိၼ်တိုၵ်းပွႆႇမၢၵ်ႇသႂ်ႇ ၼႂ်းၼႃႈတီႈသိုၵ်းတဢၢင်းၵုမ်းၵမ်ဝႆႉၼၼ်ႉ ႁၢဝ်ႈႁႅင်း။ ႁဵတ်းႁႂ်ႈၵူၼ်းမိူင်း လူႉတၢႆ မၢတ်ႇၸဵပ်းႁၢဝ်ႈႁႅင်း။

ၸွမ်းၼင်ႇ ၸုမ်းၶၢဝ်ႇၽူႈတွႆႇႁွၵ်ႈ ၵဵပ်းၶေႃႈမုၼ်းဝႆႉတႄႉ တႄႇႁူဝ်လိူၼ်ဢွၵ်ႇထူဝ်ႊပိူဝ်ႊ 1 ဝၼ်းမႃး တေႃႇထိုင် မိူဝ်ႈၼႆႉ 21 ဝၼ်း ၵူၼ်းမိူင်း လႄႈ လုၵ်ႈဢွၼ်ႇ ဢိၵ်ႇပႃးသင်ႇၶ မၢတ်ႇၸဵပ်းလူႉတၢႆယွၼ်ႉသိုၵ်းမၢၼ်ႈယိုဝ်းမၢၵ်ႇလူင်ၼႆႉ ဢမ်ႇယွမ်း 100 ၵေႃႉယဝ်ႉ ။

ၼႂ်းလိၵ်ႈၵိၼ်ၵႅၼ်ႇ ၵျီႊၼီႊဝႃႊ ၶွၼ်ႊဝႅၼ်းသျိၼ်ႊ ဢၼ်သိုၵ်းမၢၼ်ႈၶဝ်ႈႁူမ်ႈလူင်းလၢႆးမိုဝ်းၸွမ်းဝႆႉၼၼ်ႉတႄႉ ပႃးဝႆႉဝႃႈ “ပိုၼ်ႉတီႈသိုၵ်းတေဢမ်ႇလႆႈယိုဝ်း လႄႈ ဢမ်ႇလႆႈတိူဝ်ႉလႃးလႃးၼႆႉ ပဵၼ်ႁိူၼ်းယေးၵူၼ်းမိူင်း၊ ႁူင်းယႃ၊ ႁွင်ႈယႃ၊ ႁူင်းႁဵၼ်း၊ ဝတ်ႉဝႃးၽႃသိူဝ်ႇတီႈၵူၼ်းပိုၼ်ႉတီႈၵိူဝ်းယမ်” ၸဵမ်ၸိူဝ်းၼႆႉ။ ၵူၺ်းၵႃႈတူဝ်သိုၵ်းမၢၼ်ႈ ဢမ်ႇယွမ်းႁဵတ်းၸွမ်းၵူၺ်းဢမ်ႇၵႃး တင်ႈၸႂ်ယိုဝ်းပႃးႁိူၼ်းယေးၵူၼ်းမိူင်းဢမ်ႇထၢတ်ႇ – ၶႂ်ႈဝႃႈၵူႈဝၼ်း။

ဝၼ်းပၢင် NCA ၶွပ်ႈၶူပ်ႇတဵမ် 10 ပီၼၼ်ႉ တူဝ်ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇယင်းပၢႆလၢတ်ႈဝႃႈ – ၽႂ်ႁဵတ်းႁႂ်ႈဝၢၼ်ႈမိူင်းလူႉလႅဝ်တႄႉ မီးၽႅၼ်ၵၢၼ်တေတွပ်ႇတႅၼ်းၶိုၼ်းၵမ်းလဵဝ်- ၼႆယူႇ။

ၵူၺ်းၵႃႈတေႃႇထိုင်ဝၼ်းမိူဝ်ႈၼႆႉ သိုၵ်းမၢၼ်ႈဢဝ်ၶိူင်ႈမိၼ်မိူဝ်းပွႆႇမၢၵ်ႇသႂ်ႇၼႂ်းမိူင်းတႆးပွတ်းႁွင်ႇ- ၵူၼ်းမိူင်းမၢတ်ႇၸဵပ်းလူႉတၢႆၵူႈဝၼ်း။