63 ဝဵင်း ဢၼ်သိုၵ်းမၢၼ်ႈပိုၼ်ၽၢဝ်ႇဝႆႉငဝ်းလၢႆးၶိုၵ်ႉၶၵ်ႉ (အရေးပေါ်အခြေအနေ) ၼၼ်ႉတဵမ် 90 ဝၼ်းၼႂ်းဝၼ်းတီႈ 31/10/2025 ၼႆႉ ယဝ်ႉလႄႈ သိုၵ်းမၢၼ်ႈသိုပ်ႇပိုၼ်ၽၢဝ်ႇတေႃႇဢႃယုငဝ်းလၢႆးၶိုၵ်ႉၶၵ်ႉထႅင်ႈ 90 ဝၼ်း တႄႇဢဝ်ဝၼ်းတီႈ 1/11/2025 ၼႆႉၵႂႃႇ – ဝႃႈၼႆ။

ၸွမ်ၸိၵ်းသိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ ဢၼ်တႅင်ႇတင်ႈလႄႈၶိုၼ်ႈႁပ်ႉပုၼ်ႈၽွၼ်းဝႆႉႁင်းၵူၺ်းမၼ်းပဵၼ် ၸွမ်ၸိုင်ႈၸူဝ်ႈၶၢဝ်းၼၼ်ႉ သိုပ်ႇပိုၼ်ၽၢဝ်ႇပဵၼ်တၢင်းၵၢၼ်ထႅင်ႈဝႃႈ – 63 ဝဵင်း ဢၼ်မီးၼႂ်း 6 ၸႄႈမိူင်းလႄႈ 3 တိူင်း ၼၼ်ႉ တေသိုပ်ႇယူႇၼႂ်းငဝ်းလၢႆးၶိုၵ်ႉၶၵ်ႉထႅင်ႈ 90 ဝၼ်း ၊ တူဝ်မၼ်းၸၢႆးၵေႃႈ တေသိုပ်ႇႁပ်ႉပုၼ်ႈၽွၼ်းပဵၼ်ၵႅမ်ၸွမ်ၸိုင်ႈၵႂႃႇထႅင်ႈ။ ၶွင်ႇသီႇၾၢႆႇႁူမ်ႇလူမ်ႈလႄႈလွင်ႈၵႅတ်ႇၶႄၸိူဝ်ႉၸၢတ်ႈ ၼၼ်ႉၵေႃႈမၼ်းၸၢႆးၵူၺ်း တေသိုပ်ႇဢွၼ်ၼမ်းၵႂႃႇထႅင်ႈ ၊ တေသိုပ်ႇၸႂ်ႉပၵ်းပိူင်မၢႆမီႈၼႂ်းၶေႃႈပူင် ပိူင်သိုၵ်းၽွင်းငမ်း မၢႆ 1 လႄႈ မၢႆ 2 ၼၼ်ႉၵႂႃႇထႅင်ႈ ဝႃႈၼႆ။

ပိူင်ၽွင်းငမ်းသိုၵ်းမၢႆ 1 ဢၼ်မၼ်းၸၢႆးပိုၼ်ၽၢဝ်ႇဝႆႉၼၼ်ႉပဵၼ် – ဝဵင်းဢၼ်ပိုၼ်ၽၢဝ်ႇဝႆႉပဵၼ်ငဝ်းလၢႆးၶိုၵ်ႉၶၵ်ႉၸိူဝ်းၼၼ်ႉ ဢႃႇၼႃႇၽွင်းငမ်းလႄႈ တႅပ်းတတ်းၽိတ်းထုၵ်ႇတင်းမူတ်း မွပ်ႈပၼ်ၼႂ်းမိုဝ်းၽူႈၵွၼ်းတိူင်းၽႂ်မၼ်း၊ ၽူႈၵွၼ်းတိူင်း သိုပ်ႇမွပ်ႈပၼ် ၽူႈၵွၼ်းၼႃႈလိၼ်သိုၵ်း ၸတ်းၵၢၼ်လႆႈ ။ (ပိူင်ၽွင်းငမ်းၸိူင်ႉၼႆ ၶိုၼ်းမိူၼ်ၶိုၼ်းၽွင်း သိုၵ်းမၢၼ်ႈၽွင်းငမ်းမိူင်းၶၢဝ်းတၢင်း 20 – 30 ပီ ၵွၼ်ႇၼႃႈပၢင်လိူၵ်ႈတင်ႈ 2010 ၼၼ်ႉၶိုၼ်း)

ပိူင်ၽွင်းငမ်းသိုၵ်း မၢႆ 2 ၼၼ်ႉမီးတီႈပွင်ႇဝႃႈ – တွၼ်ႈတႃႇတၢင်းၽိတ်းဢၼ်ၵဵဝ်ႇၶွင်ႈတင်းတပ်ႉသိုပ်း 23 ဢၼ်ၼၼ်ႉမွပ်ႈႁႂ်ႈ လုမ်းတြႃးသိုၵ်းထတ်းထွင်ပၼ်တူတ်ႈတၢမ်ႇ- မီးသုၼ်ႇပၼ်တူတ်ႈတၢမ်ႇသုင်သုတ်းထိုင်တူတ်ႈတၢမ်ႇတၢႆလႆႈ – ၶႂၢင်ႉပၼ်ဝႆႉၼင်ႇၼႆပႃး။

တႄႇဢဝ်ဝၼ်းတီႈ 28/12/2025 ၼႆႉၵႂႃႇ သိုၵ်းမၢၼ်ႈတေၶိၼ်ၸတ်းပၢင်လိူၵ်ႈတင်ႈႁႂ်ႈပဵၼ်၊ တေၸႅၵ်ႇၸတ်း တႃႇ 3 ပွၵ်ႈ 3 ၵမ်း။ ပွၵ်ႈၵမ်း 2 တႄႉပဵၼ်ၼႂ်းဝၼ်းတီႈ 11/1/2026 သေ ပွၵ်ႈၵမ်း 3 တႄႉတေၸတ်းမိူဝ်ႈလႂ် ဢမ်ႇပႆႇပိုၼ်ၽၢဝ်ႇ။ ၵွပ်ႈၼႆ ပေႃးငဝ်းလၢႆးၶိုၵ်ႉၶၵ်ႉတဵမ်ထႅင်ႈ 90 ဝၼ်းယဝ်ႉ တေသိုပ်ႇႁဵတ်းၸိူင်ႉႁိုဝ်ထႅင်ႈၵေႃႈပႆႇၸၢင်ႈလၢမ်းႁူႉလႆႈ။

ငဝ်းလၢႆးၶိုၵ်ႉၶၵ်ႉ ဢၼ်ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇပိုၼ်ၽၢဝ်ႇဝႆႉၼႆႉတႄႉ ၼႂ်းမိူင်းတႆးပႃး 15 ၸႄႈဝဵင်း (ၼမ်လိူဝ်ပိူၼ်ႈသုတ်း) ၊ ၼႂ်းမိူင်းရၶႅင်ႇ 14 ၸႄႈဝဵင်း၊ တိူင်းၸႄႈၵႅင်း 9 ၸႄႈဝဵင်း၊ မိူင်းၶျၢင်း 7 ၸႄႈဝဵင်း၊ မိူင်းၶၢင် 5 ၸႄႈဝဵင်း တိူင်းမၵူၺ်း 5 ၸႄႈဝဵင်း တိူင်းမၼ်းတလေး 3ၸႄႈဝဵင်း ၸႄႈမိူင်းယၢင်းလႅင် 3 ၸႄႈဝဵင်းလႄႈ မိူင်းယၢင်းၽိူၵ်ႇ 2 ၸႄႈဝဵင်း ။ ၸႄႈဝဵင်းၸိူဝ်းၼႆႉၵမ်ႈၼမ် ပဵၼ်ၸႄႈဝဵင်းဢၼ်ၸုမ်းလုၵ်ႉၽိုၼ်ႉသိုၵ်းမၢၼ်ႈၶဝ် ၵုမ်းၵမ်ဝႆႉ။

မိူင်းတႆး 15 ဝဵင်းၼႆႉပဵၼ်ဝဵင်း ၼမ်ႉတူႈ၊ မၢၼ်ႈပဵင်း (မဘိမ်းမြို့နယ်) ၊ ၵူတ်ႉၶၢႆ၊ ၼမ်ႉၶမ်း၊ သႅၼ်ဝီ၊ ၵုၼ်လူင်၊ ၼမ်ႉသၼ်ႇ၊ မၢၼ်ႈတူင်ႈ၊ ႁူဝ်ပၢင်ႇ၊ လၢဝ်ႇၵၢႆး(ၵၢတ်ႇၵဝ်ႇ)၊ ၵွင်းၸၢင်ႉ(ၵူင်းၵျၢၼ်း)၊ မိူင်းမိတ်ႈ၊ ၵျွၵ်ႉမႄး၊ သီႇပေႃႉ၊ မိူင်းလႃး ၸဵမ်ၸိူဝ်းၼႆႉ။