ၶွမ်ႊပၼီႊ ႁဵတ်းဢွၵ်ႇယႃႈယႃသုတ်ႇၼႂ်းမိူင်းထႆး ပိုၼ်ၽၢဝ်ႇဝႃႈ – တေႁုပ်ႈသိမ်းၶိုၼ်းဢႅပ်ႇယႃႈယႃ ဢၼ်ၵူတ်ႇထတ်းႁၼ်ဝႃႈ မီးမူင်ႈမႅင်း ပႅၵ်ႊတီႊရီႊယိူဝ်ႊၼမ် ဝႃႈၼႆ။

ယႃႈယႃသုတ်ႇဢႅပ်ႇသီၶဵဝ် ဢၼ်မီးၸိုဝ်ႈဝႃႈ Hong Thai ၼႆႉ ၵူၼ်းမိူင်းထႆးၵူၺ်းဢမ်ႇၵႃး ႁႅင်းၵၢၼ်ၵူၼ်းမိူင်းႁူမ်ႈတုမ်မၢၼ်ႈၵေႃႈ ဢွၼ်ၵၼ်ၸႂ်ႉတိုဝ်းဝႆႉၼမ်။

ပူၼ်ႉမႃးပႆႇပေႃးႁိုင် ႁွင်ႈၵၢၼ်ၾၢႆႇၵူတ်ႇထတ်းၵုမ်းၵမ် ယႃႈယႃလႄႈၶဝ်ႈၼမ်ႉတၢင်းၵိၼ်မိူင်းထႆး (FDA) ပိုၼ်ၽၢဝ်ႇဢွၵ်ႇမႃးဝႃႈ တီႈၼႂ်းဢႅပ်ႇယႃႈယႃသုတ်ႇ Hong Thai ၼၼ်ႉ မီးမူင်ႈမႅင်း ပႅၵ်ႊတီႊရီႊယိူဝ်ႊ ၼမ်လိူဝ်သေဢၼ်မၵ်းမၼ်ႈဝႆႉ ဝႃႈၼႆ။ ၵူၺ်းၵႃႈ ပဵၼ်ဢႅပ်ႇယႃႈယႃ ဢၼ်ပႃးမိၵ်ႈမၢႆႁဵတ်းဢွၵ်ႇ No.000332 ၼၼ်ႉၵူၺ်း၊ ဢမ်ႇၸႂ်ႈတၢင်းမူတ်း ဝႃႈၼႆ။

ယႃႈယႃသုတ်ႇ Hong Thai ၼႆႉ ပဵၼ်ယႃႈယႃ ၶၢႆလီဢၼ်ၼိုင်ႈ ၼႂ်းပတ်းပိုၼ်ႉမိူင်းထႆး။

ၾၢႆႇၶွမ်ႊပၼီႊလၢတ်ႈဝႃႈ – ၼင်ႇႁိုဝ် ၵူၼ်းၸိူဝ်းသိုဝ်ႉၸႂ်ႉတိုဝ်းယႃႈယႃ တေမီးလွင်ႈႁူမ်ႇလူမ်ႈ လွတ်ႈၽေးၼၼ်ႉ လႆႈယုၵ်ႉမုၼ်းၶၵ်ႉတွၼ်ႈၵၢၼ်ငၢၼ်း ႁဵတ်းဢွၵ်ႇယႃႈယႃဝႆႉယူႇ။ ၵူၼ်းမိူင်း ၸိူဝ်းသိုဝ်ႉၶၢႆ သိုဝ်ႉၸႂ်ႉတိုဝ်းယႃႈယႃဝႆႉၸိူဝ်းၼၼ်ႉၵေႃႈ ႁႂ်ႈဢဝ်ၵႂႃႇဢၢပ်ႈပၼ်ၶိုၼ်းတီႈၶွမ်ႊပၼီႊ၊ ၾၢႆႇၶွမ်ႊပၼီႊ တေပၼ်ငိုၼ်း ၵႃႈသၢႆႈတႅၼ်းၵႂႃႇၶိုၼ်း ဝႃႈၼႆ။

မိူဝ်ႈဝၼ်းတီႈ 9/12/2024 ၼၼ်ႉ Hong Thai ႁဵတ်းဢွၵ်ႇယႃႈယႃသုတ်ႇ 2 သႅၼ်ဢႅပ်ႇ၊ ၼႂ်းၼၼ်ႉ16,666 ဢႅပ်ႇၼႆႉ ပဵၼ်ဢၼ်ၺႃး FDA ၶဝ် ပၼ်ၾၢင်ႉဝႆႉ ၼႆယဝ်ႉ။