(ၼၢင်းယိင်းလႄႈလုၵ်ႈဢွၼ်ႇၵႆႉႁၢႆ ယွၼ်ႉၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ)

“ ပိုၼ်ၽၢဝ်ႇႁႃၵူၼ်းႁၢႆ ”  ၼႆၼႆႉ ၼႂ်း 2-3 ပီမႃးၼႆႉ ၵႆႉလႆႈႁၼ် ပိူၼ်ႈတၢင်ႇ ပိုၼ်ၽၢဝ်ႇ ၼႂ်းသိုဝ်ႇ ၼႅင်ႈသၢၼ်ၼႂ်ၽႂ်ၵေႃႈတေဢမ်ႇထဵင်လႆႈ။ၵူၼ်းႁၢႆၼႆႉ ၵမ်ႈၼမ်ပဵၼ်ၼၢင်းယိင်းဢွၼ်ႇသေ ၵူၼ်းၸၢႆးၼုမ်ႇ ပႃးၸဵမ်လုၵ်ႈဢွၼ်ႇ၊ ထဝ်ႈယိင်း ၊ ထဝ်ႈၸၢႆးၸိူဝ်းၼႆႉၵေႃႈ ႁၢႆ ။

လုၵ်ႈလၢင်း ၵူၼ်းႁိူၼ်းၵိုင်ႉၵၢင်ႉႁၢႆလႄႈ ပေႃႈမႄႈပီႈၼွင်ႉ ဢွၼ်ၵၼ် မႆႈႁူမႆႈၸႂ် ၸွမ်းႁႃ။ ႁူႉလၢႆးလႂ်ၵေႃႈဢဝ်လၢႆးတၢင်းၼၼ်ႉသေႁႃ။ ၵမ်ႈၼမ်လႆႈပိုင်ႈဢိင်ၸႂ်ယႂ်ႇတူဝ်ၵဝ်ႇ။

  မၢင်ၸိူဝ်းၵႂႃႇတိူင်ႇလၢတ်ႈဢဝ်လိူင်ႈ တီႈႁူင်းပလိၵ်ႈ ၊ မၢင်ၸိူဝ်းပိုၼ်ၼိူဝ် သိုဝ်ႇတူင်ႇဝူင်း ၊ မၢင်ၸိူဝ်း ဢဝ်ၶႅပ်းႁၢင်ႈ ၵူၼ်းၵေႃႉဢၼ်ႁၢႆသေ  လႄႇလမ်းႁႃ တိတ်းၸပ်းဝႆႉၸွမ်း သဝ်ၾႆး လၵ်းၾႆး တီႈမီးၵူၼ်းၵိုၼ်းၶွၼ်ႈ ပေႃႈမႄႈမၢင်ၸိူဝ်းသမ်ႉ ၵႂႃႇလႄႇႁႃ ဝၢၼ်ႈၼိုင်ႈယဝ်ႉ ဝဵင်းၼိုင်ႈ ၶိုၼ်းၶိုၼ်းဝၼ်းဝၼ်း ဢမ်ႇပဵၼ်လပ်းပဵၼ်ၼွၼ်း ။

ၽွင်းငဝ်းလၢႆးဝၢၼ်ႈမိူင်းဢမ်ႇၼိမ်ၼႆႉ ယႃႈမဝ်းၵမ်လိူင်ႇၼမ် KTV ႁၢၼ်ႉၵိၼ်ၵျေႃႇၵေႃႈ လိူင်ႇၼမ် ၵၢၼ်လွၵ်ႇလႅၼ်ၵိၼ်ၵၼ် ၵျႃႊၽျႅၼ်ႉ ၵေႃႈလိူင်ႇၼမ်။ ၵူၼ်းၼုမ်ႇ လုၵ်ႈဢွၼ်ႇ မိူင်းတႆး ၵႆႉႁၢႆ ၵမ်ႈၽွင်ႈထုၵ်ႇဢဝ်ၵႂႃႇၶၢႆၵိၼ် ၵမ်ႈၽွင်ႈၵႂႃႇႁဵတ်းၵၢၼ်တီႈပၢင်တေႃႇလွင်း ၸွမ်းဝဵင်းယႂ်ႇဝဵင်းလူင် မၢင်ၵေႃႉၵေႃႈႁၼ်ၶိုၼ်း မၢင်ၵေႃႉၵေႃႈဢမ်ႇႁၼ်ၶိုၼ်း။

ယွၼ်ႉဝႃႈ ငဝ်းလၢႆးပိုၼ်ႉတီႈဢမ်ႇၼိမ်သဝ်းသေ ၵူၼ်းႁႃၵိၼ်လဵင်ႉတွင်ႉ ယၢပ်ႇၽိုတ်ႇၵိၼ်းၸႂ် ႁဵတ်းႁႂ်ႈ ၵူၼ်းပိုၼ်ႉတီႈဢမ်ႇမီးတီႈပိုင်ႈဢိင်ယူႇသဝ်း ပေႃးပဵၼ်မႃးသေၸိူဝ်ႉသေလွင်ႈ ဢမ်ႇမီးၽူႈလႂ် ၸုမ်းလႂ်မႃးဢဝ်လွင်ႈႁူမ်ႇလူမ်ႈပၼ်လႄႈ ႁဵတ်းႁႂ်ႈ ၵူၼ်းမိူင်းၼႂ်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈ ၵိူတ်ႇၶိုၼ်ႈ လွင်ႈႁၢႆႉၸႃႉမႃး ၵူႈမိုဝ်ႉၵူႈဝၼ်း။

ဢမ်ႇၸႂ်ႈဝႃႈ ၼႂ်းပိုၼ်ႉတီႈပဵၼ်ပၢင်တိုၵ်း ဢၼ်ပဵၼ် ပတိၵ်ႈၶၢတ်ႈၵူၺ်း ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈၼႆႉ။ပိုၼ်ႉတီႈဢၼ်ဢမ်ႇပဵၼ်ပၢင်တိုၵ်းသင်ၵေႃႈဢမ်ႇမီးလွင်ႈႁူမ်ႇလူမ်ႈ  ၼႂ်းၶၢဝ်းတၢင်း လိူၼ် သႅပ်ႊထႅမ်ႊပိူဝ်ႊ လႄႈ ဢွၵ်ႉထူဝ်ႊပိူဝ်ႊ ၼႆႉ ၵူၼ်းၼုမ်ႇၼႂ်းၸိုင်ႈတႆးပွတ်းၸၢၼ်းႁၢႆ ဢမ်ႇယွမ်း 10 ၵေႃႉ ။

မီးၵူၼ်းမွင်း .. ၶဝ်ပွၵ်ႈႁိူၼ်းၶိုၼ်း

ၸပ်းၸႂ်မႆႈၸႂ် တႃႇလုၵ်ႈၸၢႆး ဢၼ်လႆႈႁၢႆၵႂႃႇၼၼ်ႉသေ ၵုမ်ႇဝူၼ်ႉၸွမ်း တေၵႂႃႇမီးယူႇတီႈလႂ် မီးယူႇၸွမ်းၽႂ် ၸွင်ႇမီးလွင်ႈႁူမ်ႇလူမ်ႈယူႇႁႃႉ ၵုမ်ႇဝူၼ်ႉလွင်ႈလုၵ်ႈၸၢႆးသေ ပႃႈၼၢင်းၵေႃႉၼိုင်ႈ ၶိုၼ်းၶိုၼ်းဝၼ်းဝၼ်း ဢမ်ႇပဵၼ်လပ်းပဵၼ်ၼွၼ်း  ဢမ်ႇပဵၼ်ယူႇပဵၼ်သဝ်း လႄႇလမ်းႁႃယွၼ်းတင်းၸွႆႈထႅမ် ထူဝ်းႁႃ တီႈၼိုင်ႈယဝ်ႉ တီႈၼိုင်ႈ ။

ၼႂ်းဝၼ်းတီႈ 12/10 /2025 ယၢမ်းၵၢင်ၼႂ် 11 မူင်း  ၼုမ်ႇၸၢႆးဢႃယု  28 ပီ ယူႇပွၵ်ႉၵျွင်းၵျီးၸူႉ ဝဵင်းတူၼ်ႈတီး မၼ်းၸၢႆးလၢတ်ႈၵူၼ်းတီႈႁိူၼ်းဝႃႈ တေၵႂႃႇတၢင်းၼွၵ်ႈၵမ်းၼိုင်ႈၼႆသေ ႁၢႆၵႂႃႇ ႁိုင်  10 ဝၼ်းပၢႆ ထိုင်ဝၼ်းမိူဝ်ႈၼႆႉ ပႆႇပွၵ်ႈမႃးႁိူၼ်းၶိုၼ်း ၵူၼ်းႁိူၼ်းမႆႈၸႂ်ဝႆႉ ဝႃႈၼႆ ။

“ ပေႃးၵၢင်ဝၼ်းၵေႃႈဢမ်ႇပဵၼ်ၵိၼ်ပဵၼ်ယမ်ႉ။ ဝူၼ်ႉႁႃဝႃႈ လႅပ်ႈမၼ်းတေမီးတီႈၼၼ်ႈတီႈၼႆႈ ႁိုဝ်ဢေႉၼႆ။ ပေႃးၵၢင်ၶိုၼ်းၵေႃႈ ဢမ်ႇပဵၼ်လပ်းပဵၼ်ၼွၼ်း။  လႄႇလမ်းႁႃပေႃးၸႄးတီႈမၼ်းယဝ်ႉ။  လုၵ်ႈၸၢႆးၶႃႈ ပဵၼ်လုၵ်ႈဢွၼ်ဝႃႈငၢႆႈ ပဵၼ်ၵူၼ်းႁႃလဵင်ႉတီႈႁိူၼ်း။  ဢမ်ႇမီးလွင်ႈၽိတ်းမေႃးၵၼ်သင်တင်းဢူၺ်းၵေႃႉဢူၺ်းသႄႈမၼ်းသေပွၵ်ႈ။ ၵိုင်ႉၵၢင်ႉၵပ်းသိုပ်ႇဢမ်ႇလႆႈ ၵူဝ်ထုၵ်ႇတီႉၺွပ်းၵႂႃႇႁဵတ်းသိုၵ်းၼၼ်ႉၵူၺ်း ”- ဝႃႈၼႆ ။

ၼႂ်းဝၼ်းတီႈ 7/9/2025 ယၢမ်းၵၢင်ဝၼ်း 2 မူင်း လုၵ်ႈဢွၼ်ႇယိင်း ဢႃယု 16 ပီ ၵူၼ်းပွၵ်ႉ 1 ဝဵင်းၵၢတ်ႇလေႃႉ ဢၢၼ်းတေ ၵႂႃႇ ႁိူၼ်းၼၢႆးၶဝ် ဢၼ်ယူႇတီႈပွၵ်ႉ 10 ။ ၵူၺ်းၵႃႈ ႁိူၼ်းၼၢႆးၶဝ်ၵေႃႈဢမ်ႇထိုင် ႁိူၼ်းၶဝ်ၵေႃႈ ဢမ်ႇပွၵ်ႈမႃး ထိုင်ၶိုၼ်း ႁၢႆဝႆႉ ႁိုင်ၶၢဝ်းတၢင်း 10 ဝၼ်းပၢႆ ၸင်ႇထူပ်းႁၼ်ၶိုၼ်းတီႈမိူင်းမၢၼ်ႈတူင်ႇပဵင်း လႆႈႁူႉဝႃႈ ဢွၼ်ႇယိၼ်းၵေႃႉၼၼ်ႉ  ထုၵ်ႇလႅၼ်သေ ႁွင်ႉၵႂႃႇၼႆယဝ်ႉ ။

မိူၼ်ၼင်ႇၼႆ ၼင်ႇၵဝ် ဝၼ်းတီႈ 12/9/2025 ယၢမ်းဝၢႆးဝၼ်း 1 မူင်း ယိင်းဢွၼ်ႇ ဢႃယု 14 ယူႇပွၵ်ႉၼိုင်ႈ ဝဵင်းလၢႆးၶႃႈ ၵေႃႉၼိုင်ႈ လၢတ်ႈဝႃႈ တေဢွၵ်ႇၵႂႃႇလႄႇတင်းၼွၵ်ႈၵမ်းၼိုင်ႈသေ ႁၢႆတူဝ်ၵႂႃႇ 6 ဝၼ်း ထိုင်ဝၼ်းတီႈ 18 /9/2025 ၸင်ႇထူပ်းႁၼ်ၶိုၼ်းၼႆယဝ်ႉ ။

ၼၢင်းၶမ်းမၢႆ ၸုမ်းၵပ်းသၢၼ်လွင်ႈၼၢင်းယိင်းတႆးလၢတ်ႈၽူႈတွႆႇႁွၵ်ႈဝႃႈ -“ လွင်ႈၼႆႉ တေႁၼ်လႆႈၸႅင်ႈလႅင်းဝႃႈ ၼၢင်းယိင်းၼႂ်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈ ၊ တႄႇပီၵၢႆ ပီၼႆႉ ၵႆႉလႆႈႁၼ်ၼၢင်းယိင်းၼႂ်းပိုၼ်ႉတီႈ ဢႃယုပႃႈတႂ်ႈ 18  ႁၢႆ ၊ မၢင်ၸိူဝ်းႁၼ်တူဝ်တၢႆသေ ဢမ်ႇႁူႉဝႃႈပဵၼ်သင် ။ မၢင်ၸိူဝ်း ၺႃးတီႉၵႂႃႇၶၢႆ ၊ ထုၵ်ႇႁဵတ်းႁၢႆႉပူၼ်ႉပႅၼ်တၢင်းၵႃႇမ  ၊ ထုၵ်ႇၵူတ်ႇထတ်း ၸိူဝ်းၼႆႉၵေႃႈ လႆႈႁၼ်တင်းၼမ် ဢမ်ႇၸႂ်ႈဝႃႈ ပိုၼ်ႉတီႈပဵၼ်ၼႃႈသိုၵ်း ၼႃႈသိူဝ်ၵူၺ်း ပိုၼ်ႉတီႈဢမ်ႇပဵၼ်ၵေႃႈ ယွၼ်ႉဢမ်ႇမီးလွင်ႈႁူမ်ႇလူမ်ႈလႄႈ လႆႈပဵၼ်ၸိူင်ႉၼႆ ”- ဝႃႈၼႆ ။  

လိူဝ်သေဢမ်ႇမီးလွင်ႈတၢင်းသင်သေ ၼၢင်းယိင်းၼႂ်းပိုၼ်ႉတီႈၵႆႉႁၢႆယဝ်ႉ မၢင်ၸိူဝ်းထုၵ်ႇၺႃးယႃႈဢမ်သေ ႁူၺ်းႁွင်ႉၵႂႃႇၵေႃႈမီး ။

ၼႂ်းဝၼ်းတီႈ 23 / 9/ 2025 ယၢမ်းဝၢႆးဝၼ်း 2 မူင်း။  ဢွၼ်ႇယိင်း လုၵ်ႈႁဵၼ်းၸၼ်ႉၸွမ် ယူႇပွၵ်ႉၼမ်ႉၵတ်း(ရေအေးကွင်း ) လၢတ်ႈၵူၼ်းတီႈႁိူၼ်းဝႃႈ တေၵႂႃႇဢဝ်ပပ်ႉတီႈ ၸၼ်ႉၸွမ်ၼႆသေ ႁၢႆၵႂႃႇ ၵူၼ်းႁိူၼ်းၸွမ်းႁႃ ဢမ်ႇႁၼ် တိတ်းတေႃႇဢမ်ႇလႆႈ ၶိုၼ်းၼိုင်ႈ။

ထိုင်မႃးဝၢႆးဝၼ်း မွၵ်ႈ 2 မူင်းၼႂ်းဝၼ်းတီႈ 24/09/2025 မၼ်းၼၢင်းၸင်ႇၵပ်းၾူၼ်းၸူးၵူၼ်းတၢင်းႁိူၼ်း ႁႂ်ႈမႃးႁပ်ႉမၼ်းၼၢင်းတီႈဝၢၼ်ႈဢွင်ႇသပေႇ (ဝၢၼ်ႈဢၼ်မီးတပ်ႉ တေႃႉသူင်ႇ တၢင်းၵိၼ် သိုၵ်းမၢၼ်ႈ) ၸႄႈဝဵင်းသူၺ်ႇၺွင်ႇ  ။

ၽိူဝ်ႇၵူၼ်းတၢင်းႁိူၼ်းၵႂႃႇႁပ်ႉတူဝ်မၼ်းမႃး   ၸင်ႇလႆႈႁူႉဝႃႈမၼ်းၼၢင်းၺႃးယႃႈဢမ် တူဝ်ႉသေး ၸွမ်းတၢင်းသေ ထုၵ်ႇႁွင်ႉတူဝ်ၵႂႃႇၵုမ်းၶင်ဝႆႉတီႈ ၵူဝ်ႇတွင်ႇ (တီႈၵဵပ်းၶူဝ်းၶွင်) ၼႂ်းထိူၼ်ႇတီႈၼိုင်ႈ တၢင်းတွင်ႇလေးလူင်း (ၶွၵ်ႈလူင်ၼႂ်းမိူင်းတႆး) ၼႆယဝ်ႉ။

ယွၼ်ႉသင်လႄႈ ၵူၼ်းႁၢႆ

ၵဵဝ်ႇၵပ်းလွင်ႈၼၢင်းယိင်းၼုမ်ႇၼႂ်းပိုၼ်ႉတီႈႁၢႆၼႆႉ ၼၢင်းယိင်းၽူႈတူင်ႉၼိုင်တႃႇ သုၼ်ႇလႆႈသုၼ်ႇပဵၼ်ၵူၼ်းလၢတ်ႈဝႃႈ တေၸၢင်ႈပဵၼ်ယွၼ်ႉ

• ထုၵ်ႇႁူၺ်းသူၼ်း  လွၵ်ႇလႅၼ်ၵႂႃႇၵႃႉၶၢႆ ၊
• မီးလွင်ႈသုၵ်ႉသၵ်ႉၸႂ်ၽိတ်းမေႃးၵၼ်တင်း ၵူၼ်းတီႈႁိူၼ်းသေ ပၢႆႈဢွၵ်ႇႁိူၼ်းၵႂႃႇ
• ထုၵ်ႇတီႉၺွပ်းၵႂႃႇႁၢပ်ႇၵၢၼ်သိုၵ်း
• ယွၼ်ႉငဝ်းလၢႆးပၢႆးမၢၵ်ႈမီးဢမ်ႇလီလႄႈ ၶႂ်ႈလႆႈၵၢၼ် တႃႇႁႃလဵင်ႉတွင်ႉ တွၼ်ႈတႃႇတေၸွႆႈထႅမ်ၵူၼ်းတီႈႁိူၼ်း
• ၵႂႃႇၸွမ်းၸူႉၸူဝ်း

ပေႃးပႃးၵႂႃႇယဝ်ႉၼႆယဝ်ႉ တေၵႂႃႇမီးၼႂ်းတူင်ႇဝူင်း မိူၼ်ၼင်ႇ KTV  ဢမ်ႇၼၼ် ၸၢင်ႈၵႂႃႇၶဝ်ႈၼႂ်းတူင်ႇဝူင်း ယႃႈမဝ်းၵမ်  ၊ ယွၼ်ႉသင်လႄႈ ႁၢႆၵႂႃႇၵေႃႈယဝ်ႉ ပဵၼ်ယွၼ်ႉငဝ်းလၢႆႈပတိတ်ႈၶၢတ်ႈ ဢမ်ႇမီးလွင်ႈႁူမ်ႇလူမ်ႈလႄႈၼႆ လႆႈႁၼ်ၸႅင်ႈလႅင်းလီလီ  ။

လွင်ႈၵူၼ်းလဵၵ်ႉၼုမ်ႇယႂ်ႇထဝ်ႈ ၸဵမ်ယိင်းၸဵမ်ၸၢႆး ႁၢႆၼႆႉ ပဵၼ်ယွၼ်ႉ လွင်ႈသိုၵ်းလွင်ႈသိူဝ် ၊ ငဝ်းလၢႆးပၢႆးမၢၵ်ႈမီးဢမ်ႇလီ ၊ ယႃႈမဝ်းၵမ်လိူင်ၼမ် လႄႈ ၵၢၼ်ဢမ်ႇထုၵ်ႇမႅၼ်ႈၸွမ်းပၵ်းပိူင် ၵေႃႈလိူင်ၼမ်မႃး ၵူၼ်းဢၼ်ၵႆႉႁၢႆၼႆႉၵေႃႈ တေၸၢင်ႈၵဵဝ်ၶွင်ႈၵၼ်တင်းသဵင်ႈ – ၼႆယဝ်ႉ ။

ၵူၼ်းႁိူၼ်းႁႃၵူၼ်းႁၢႆ ၼႆႉၵေႃႈ ၸၢင်ႈတူၵ်းပဵၼ်ယိူဝ်ႇ တႃႇၵူၼ်းလွၵ်ႇလႅၼ်

ပေႃးၵူၼ်းၼႂ်းမုင်ႉႁေႃႁိူၼ်းႁၢႆၼႆ ပေႃႈမႄႈပီႈၼွင်ႉ ၵႆႉပိုၼ်ၽၢဝ်ႇၼိူဝ်သိုဝ်ႇတူင်ႇဝူင်းဝႃႈ  “ ၶႅၼ်းတေႃႈ ၵပ်းသိုပ်ႇမႃးမၢႆၾူင်းၼႆႉၶႃႈ 09—– သေၵမ်း ” ၶေႃႈၵႂၢမ်းဢၼ်ၼႆႉ ႁဵတ်းႁႂ်ႈ ပၼ်ႁႅင်းဢီး ၵူၼ်းၶႂ်ႈလွၵ်ႇလႅၼ်ၵိၼ်ငိုၼ်းထႅင်ႈ မဵဝ်းၼိုင်ႈ ။

ၼၢင်းမျႃႉ  ဢၼ်လုၵ်ႈယိင်းႁၢႆဝႆႉၼၼ်ႉ လၢတ်ႈဝႃႈ – “ မုင်ႈမွင်းဝႃႈတေမီးသေၵေႃႉၵေႃႉၵပ်းသိုပ်ႇၾူၼ်း မႃးပၼ်ၶၢဝ်ႇငၢဝ်း လုၵ်ႈၼႆၵူၺ်း  ၊ တလဵဝ်ၼႆႉ ၾူၼ်းဢၼ်သိုပ်ႇမႃးၼၼ်ႉ ဢမ်ႇၸႂ်ႈဝႃႈ ၶႂ်ႈၸွႆႈထႅမ် ပဵၼ်ၾူၼ်းဢၼ် ယႃႉၵဝ်း ၊ ပဵၼ်ၾူၼ်းၶႂ်ႈလႅၼ်ၵိၼ်ငိုၼ်းၵမ်ႈၼမ်  ၊  လၢတ်ႈဝႃႈ လုၵ်ႈသူမီးတီႈၼၼ်ႈ တီႈၼႆႈ ဢူၼ်းမႃးငိုၼ်းလႄႈ ၼႆ ၵမ်းၵမ်းထူဝ်းမႃးလၢတ်ႈ ၊ ထူဝ်းမႃးဢမ်ႇၸႂ်ႈၵေႃႉလဵဝ် ထူဝ်းမႃး 4-5 ၵေႃႉ ၊ မၢႆၾူၼ်း ၊ Viber ၸိူဝ်းၼႆ မီးၽႄးထႅင်ႈ  ပေႃးၵူၼ်းဢမ်ႇႁူႉၸၢင်ႈထုၵ်ႇလႅၼ်ၵိၼ်ငိုၼ်းၵႂႃႇ ”- ဝႃႈၼႆ ။

ၼၢင်းယိင်းၽူႈတူင်ႉၼိုင် သုၼ်ႇလႆႈသုၼ်ႇပဵၼ်ၵူၼ်း ၵေႃႉၼိုင်ႈၵေႃႈ  လၢတ်ႈဝႃႈ -“ပေႃးမႃးတူၺ်း ငဝ်းလၢႆး ပိုၼ်ႉတီႈတလဵဝ်ၼႆႉ ပေႃးဢမ်ႇႁဵတ်းၼၼ်ၵေႃႈ ဢမ်ႇၸၢင်ႈပိုင်ႈဢိင်ၽႂ် ဢမ်ႇၸၢင်ႈႁဵတ်း ၸိူင်ႉႁိုဝ်လႆႈ ။ ၵူၺ်းၵႃႈ လူဝ်ႇဝူၼ်ႉလွင်ႈႁူမ်ႇလူမ်ႈဢွၼ်တၢင်းသုတ်း ၊ ၶေႃႈမုလ်းၸိူဝ်းၼႆႉၵေႃႈ လမ်ႇလွင်ႈ ၊ ယွၼ်ႉၼၼ် ပေႃးတေတၢင်ႇ ၼိူဝ်သိုဝ်ႇၵေႃႈ မီးလွင်ႈလီ ၊ လွင်ႈႁၢႆႉပႃးမႃးၸွမ်း။  လွင်ႈၼႆႉၵေႃႈ ၶႂ်ႈႁႂ်ႈ ၵူၼ်းပိုၼ်ႉတီႈ ဝူၼ်ႉသွၼ်ႇပႃး ။ ၽွၼ်းလီမၼ်းတႄႉၵေႃႈ ၶဝ်ႈထိုင်လႆႈၵူၼ်းဝႆး ၊ ၽွၼ်းၸႃႉမၼ်း တႄႉၵေႃႈ ၶေႃႈမုလ်း တီႈယူႇ ၸဝ်ႈၵဝ်ႇ ၵူၼ်းတင်းၼမ်တေႁူႉလႄႈ တေဢမ်ႇမီးလွင်ႈႁူမ်ႇလူမ်ႈ  ၸၢင်ႈမီးလွင်ႈၶဵင်ႇတႃႉမႃးၸွမ်း”- ဝႃႈၼႆ ။  

ပိုၼ်ၽၢဝ်ႇႁႃၵူၼ်းႁၢႆ ၼိူဝ်သိုဝ်ႇတူင်ႇဝူင်းၼႆႉ ပဵၼ်လၢႆးတၢင်းဢၼ်တေႁဵတ်းႁႂ်ႈ ၵူၼ်းႁူႉႁၼ်ၸွမ်းၼမ် လႄႈ ၸၢင်ႈလႆႈတင်းၸွႆႈထႅမ်ယူႇသေတႃႉ ထုၵ်ႇလီၾၢင်ႉ ပၼ်ၶေႃႈမုလ်းသုၼ်ႇတူဝ် ဢၼ်ဢမ်ႇထုၵ်ႇလီ လႆႈပိုၼ်ၽႄႈ ၼိူဝ်သိုဝ်ႇ မိူၼ်ၼင်ႇ (မၢႆၾူၼ်း ) ႁႂ်ႈၵူႈၵေႃႉၶဝ်ႈထိုင်လႆႈ ၊ ပဵၼ်လၢႆးတၢင်း ပိုတ်ႇပၼ်ၵူၼ်း တီႈ ၶႂ်ႈလွၵ်ႇလႅၼ် ၶဝ်ႈထိုင်လႆႈငၢႆႈငၢႆႈၼႆယဝ်ႉ ။

ၾၢင်ႉ…. ယွၼ်ႉဢမ်ႇၸၢင်ႈ ဝၵ်ႉတၢဝ်း ပိုင်ႈဢိင်ၽႂ်   

ယွၼ်ႉငဝ်းလၢႆး ဝၢၼ်ႈမိူင်းဢမ်ႇလီ လွင်ႈႁူမ်ႇလူမ်ႈၵေႃႈဢမ်ႇမီး ၊ ပေႃးပဵၼ်မႃးၵေႃႈ ၵူၼ်းဢၼ်ဢဝ် ပုၼ်ႈၽွၼ်းပၼ် ၵေႃႈ ဢမ်ႇမီး ။

ယွၼ်ႉၼၼ် တွၼ်ႈတႃႇ လုၵ်ႈဢွၼ်ႇတေဢမ်ႇတူၵ်းပဵၼ်တူဝ်ယိူဝ်ႇၼၼ်ႉ ၵူၼ်းၼႂ်း တူင်ႇဝူင်း ၸိူဝ်းၼႆႉ ၵေႃႈၵိုင်ႇလီၸွႆႈၵၼ် ပၼ်တင်းႁူႉသေ ၸွႆႈၵၼ်ၵႅတ်ႇၶႄႇႁႄႉၵၢင်ႈ ။ ယူႇတီႈ ၵူၼ်းၼုမ်ႇတင်းသဵင်ႈၵေႃႈ  ပေႃးမီးၵူၼ်းမႃး ႁူၺ်းသူၼ်းလၢတ်ႈဝႃႈ မီးၵၢၼ်လီၼႆ တေႁႃပၼ်ၵၢၼ် ယႃႇပေယုမ်ႇငၢႆႈ ၊ တေလႆႈ ၵူတ်ႇထတ်း ထတ်းသၢင်ၶေႃႈမုလ်းလၢႆလၢႆဢၼ် ။ ဢမ်ႇၶႂ်ႈႁႂ်ႈယုမ်ႇငၢႆႈ ။  ၶႂ်ႈလႆႈၵၢၼ် သေ ၵႂႃႇၸွမ်းငၢႆႈငၢႆႈၼႆႉဢမ်ႇထုၵ်ႇလီပဵၼ် ၊ ယူႇတီႈပေႃႈမႄႈၵေႃႈ ၸွႆႈတူၺ်း ၸွႆႈႁၢမ်ႈ ဢမ်ႇၵိုင်ႇလီပၼ်ႁႅင်း လုၵ်ႈလၢၼ်ႁဵတ်းၵၢၼ် ၼႂ်းႁၢၼ်ႉလဝ်ႈ ႁၢၼ်ႉKTV  ၊ ပေႃးမႃးဝူၼ်ႉထႅင်ႈၾၢႆႇၼိုင်ႈၵေႃႈ ၸၢင်ႈတုမ်ႉတိူဝ်ႉ ပၢႆးပၺ်ႇၺႃႇ လႄႈ ၸၢတ်ႈပၢၼ် လုၵ်ႈဢွၼ်ႇပႃး ။

ပေႃးဢမ်ႇၵႅတ်ႇၶႄ ၵႄႈလိၵ်ႈပၼ်ၵူၼ်းမိူင်း မီးၸဝ်ႈၼႃႈတီႈၵေႃႈ ဢမ်ႇပွင်ႇသင်

“ပေႃးဢမ်ႇမီးလွင်ႈႁူမ်ႇလူမ်ႈၼႆႉ ဢၼ်တေတုမ်ႉတိူဝ်ႉ ဢွၼ်တင်းပိူၼ်ႈၼႆႉ တေပဵၼ် ၼၢင်းယိင်းလႄႈ လုၵ်ႈဢွၼ်ႇ ။ ၵၢၼ်ဢဝ်တၢင်းၽိတ်းၵေႃႈဢမ်ႇမီးၼႆလႄႈ ပေႃးပဵၼ်မႃးလွင်ႈၸိူဝ်းၼႆႉ ဢမ်ႇၸၢင်ႈ ၵႂႃႇတိူင်ႇ လၢတ်ႈတီႈလႂ် ။ ပေႃးႁၢႆ ၸိူင်ႉၼႆ ၵူၼ်းမုင်ႉႁေႃႁိူၼ်းဢၼ်ၵိုတ်းဝႆႉတင်းလင်ၵေႃႈ ဢမ်ႇၸၢင်ႈ ဝၵ်ႉၸၢင်ႈတၢဝ်းတီႈလႂ် ၊ ဢမ်ႇၸၢင်ႈပိုင်ႈဢိင်ၽႂ် ” – ၼႆ ၼၢင်းယိင်းၵေႃႉဢၼ် ၸွႆႈထႅမ် ၼႂ်း တူင်ႇဝူင်း လၢတ်ႈၼင်ႇၼႆ ။  

ပေႃးဢမ်ႇမီးလွင်ႈႁူမ်ႇလူမ်ႈ ၊ ဢမ်ႇမီးၵူၼ်းၸွႆႈႁပ်ႉဢဝ်ပုၼ်ႈၽွၼ်းဢၼ်တေပဵၼ်မႃးၸွမ်းတၢင်းလင်ၼႆႉ  လွင်ႈႁဵတ်းႁၢႆႉၸႃႉတေႃႇလုၵ်ႈဢွၼ်ႇလႄႈၼၢင်းယိင်းၼႆႉၵေႃႈ  တိုၼ်းတေသိုပ်ႇမီးမႃး ၵႂၢင်ႈၶႂၢင် ထႅင်ႈ ၵူႈမိုဝ်ႉၵူႈဝၼ်း ဢမ်ႇႁၢင်ႉ ။   

ယၢမ်းလဵဝ် ယွၼ်ႉငဝ်းလၢႆးပိုၼ်ႉတီႈၼႆႉ ဢမ်ႇမီးလွင်ႈႁူမ်ႇလူမ်ႈ တွၼ်ႈတႃႇ ၵူၼ်းမိူင်းတင်းသဵင်ႈ ။ ဢမ်ႇဝႃႈ လဵၵ်ႉထဝ်ႈၼုမ်ႇယိင်းၸၢႆး တင်းသဵင်ႈ ၸွမ်းတႃႈၸွမ်းတၢင်း ၵၢၼ်ၵူတ်ႇထတ်းၸိူဝ်းၼႆႉသေ လွင်ႈႁဵတ်းႁၢႆႉၸႃႉၵေႃႈၵိူတ်ႇၶိုၼ်ႈ လႆႈငၢႆႈ ၊ ၼႂ်းၼၼ်ႉတွၼ်ႈတႃႇၼၢင်းယိင်းလႄႈ လုၵ်ႈဢွၼ်ႇ ၼႆႉမီးလွင်ႈၶဵင်ႇတႃႉတင်းၼမ် ၊ ငဝ်းလၢႆးလၢႆလၢႆဢၼ်တီႈမၼ်းမိပ်ႇငႅၼ်း တုမ်ႉယွၼ်ႈ ၵူၼ်းမိူင်း ၵေႃႈမီးတင်းၼမ် ၊ ပေႃးပဵၼ်လွင်ႈ ႁဵတ်းႁၢႆႉၸႃႉၸိူင်ႉၼႆ ၵိူတ်ႇၶိုၼ်ႈမႃးၼႆ ၵူၼ်းမီးပုၼ်ႈၽွၼ်းၼႆႉပဵၼ် ၸဝ်ႈၼႃႈတီႈၼႂ်းပိုၼ်ႉတီႈ ၶႂ်ႈႁႂ်ႈဝႆႉၼမ်ႉၼၵ်း  တွၼ်ႈတႃႇ လွင်ႈႁူမ်ႇလူမ်ႈၵူၼ်းမိူင်းပၼ် ။

ငဝ်းလၢႆးၵၢၼ်ႁဵတ်းႁၢႆႉၸႃႉၵေႃႈလီ လွင်ႈၼၢင်းယိင်းလႆႈႁၢႆၵႂႃႇၵေႃႈလီ  လွင်ႈႁူမ်ႇလူမ်ႈဢမ်ႇမီးသေ လႆႈၵႂႃႇႁဵတ်းၵၢၼ်တီႈၼႂ်း KTV ၵေႃႈလီ လႆႈၵႂႃႇသုၵ်ႉယုင်ႈၸွမ်းယႃႈမဝ်းၵမ်ၸိူဝ်းၼႆႉ ၶႂ်ႈႁႂ်ႈၶတ်းၸႂ်ၵႄႈၶႆ လွင်ႈၼႆႉ ပေႃးမီးလွင်ႈၵိူတ်ႇၶိုၼ်ႈမႃး  ၶႂ်ႈႁႂ်ႈၸုၵ်းမၼ်ႈပၼ်တွၼ်ႈတႃႇၵူၼ်းမိူင်းႁဝ်းၶႃႈတင်းသဵင်ႈ ၼႆ ၼၢင်းယိင်းၸွႆႈထႅမ်ၼႂ်းတူင်ႇဝူင်းၵေႃႉၼိုင်ႈတိုၵ်းသူၼ်းလၢတ်ႈဝႆႉ ၼင်ႇၼႆ ။  

ပိုင်ႈဢိင်တူဝ်ၸဝ်ႈၵဝ်ႇ တႃႇလွတ်ႈၽေး

ၸိူင်ႉႁိုဝ်ၵေႃႈလီ မိူင်းၶူင်းၵၢင်လူင်ၼႆႉ ဢတ်ႉတႃႁိ ဢတ်ႉတၼေႃး ၼႃထေႃး ၼႆလႄႈ ၸဵမ်ၸၢႆးၸဵမ်ယိင်း ၸဵမ်လိၵ်ႉယႂ်ႇၼုမ်ႇထဝ်ႈ တႃႇယူႇလီလွတ်ႈၽေးၼၼ်ႉ မၼ်းယူႇတီႈမေႃဢဝ်တူဝ်လွတ်ႈႁင်းၵူၺ်းၼႆၽႂ်တေဢမ်ႇထဵင်လႆႈ။ၵွပ်ႈၼႆ ၼႂ်းၵၢပ်ႈပၢၼ်ယၢမ်းလဵဝ် တႃႇႁဝ်းတေဢမ်ႇတူၵ်းပဵၼ်ယိူဝ်ႇ လွင်ႈလွၵ်ႇလႅၼ်ၵိၼ်ၵၼ် လွင်ႈတီႉၺွပ်းႁူၺ်းႁွင်ႉဢဝ်ၵႂႃႇၶၢႆၵိၼ်ၼၼ်ႉ – 1- ယႃႇယုမ်ႇပိူၼ်ႈငၢႆႈ 2-တေတႅပ်းတတ်းၵႂႃႇလႂ် ၵႂႃႇၸွမ်းၽႂ်ၼႆ ႁႂ်ႈထၢမ်တူၺ်းတူဝ်ၵဝ်ႇၶိုၼ်းလီလီ လၢႆၵမ်း 3- တီႈၸဝ်ႈၵဝ်ႇတေၵႂႃႇၼၼ်ႉၸွင်ႇမီးၵူၼ်းဢၼ်ၸဝ်ႈၵဝ်ႇႁူႉၸၵ်း – ပေႃးဢမ်ႇမီးယႃႇၵႂႃႇ 4- တီႈဢၼ်ၸဝ်ႈၵဝ်ႇတေၵႂႃႇၼၼ်ႉ ၸွင်ႇမီးလွင်ႈလွတ်ႈၽေး 5- ၸဝ်ႈၵဝ်ႇတေၵႂႃႇတၢင်းလႂ် ႁွတ်ႈထိုင်လႂ်ႁႂ်ႈၸႅင်ႈလၢတ်ႈၸူးၵူၼ်းတီႈႁိူၼ်း/ ၵူၼ်းႁူႉၸၵ်းၸွမ်းတိၵ်းတိၵ်း- 6-တီႈဢၼ်ၸဝ်ႈၵဝ်ႇလိုဝ်ႈ / မၢႆၾူၼ်းၸဝ်ႈၵဝ်ႇ/ လွင်ႈသုၼ်ႇတူဝ်ၸဝ်ႈၵဝ်ႇၼၼ်ႉ ယႃႇပေ ၽူတ်ႉသ်ၶိုၼ်ႈၼိူဝ်သူဝ်ႊသျႄႊလ်လႃးလႃး 7- တေၶဝ်ႈ/ဢွၵ်ႇႁိူၼ်းလႂ်၊ ႁွတ်ႈထိုင်တီႈလႂ်ၵေႃႈယဝ်ႉႁႂ်ႈလဵပ်ႈႁဵၼ်းတူၺ်းႁိမ်းႁွပ်ႈၶၢင်ႈယူႇတႃႇသေႇလႄႈၶတ်းၸႂ်တွင်းၾၢင်ႁၢင်ႈႁိူၼ်းယေး၊ တူၼ်ႈမႆႉ၊သဵၼ်ႈတၢင်း၊ ၼမ်ႉလိၼ်ႁိၼ်ၽႃ ဢမ်ႇၼၼ်ၵူၼ်းႁိမ်းၶၢင်ႈႁႂ်ႈလႆႈသေပိူင်ပိူင် 8- ႁႂ်ႈတွင်းမၢႆၾူၼ်း/တီႈၵပ်းသိုပ်ႇသေဢၼ်ဢၼ် ပေႃးထူပ်းၽေးသင်ၵေႃႈယဝ်ႉတေလႆႈၵပ်းသိုပ်ႇလၢတ်ႈလႆႈၵမ်းလဵဝ်။ ႁႂ်ႈလွတ်ႈၽေးလွင်ႈလွၵ်ႇလႅၼ်လႄႈလွင်ႈၵဝ်းလႅၼ်ဢဝ်ၵႂႃႇၶၢႆၵိၼ်သေၵမ်း။