ပေႃႊလ်ပၢႆႊယႃႊ (Paul Biya) ၸွမ်ၸိုင်ႈ မိူင်းၵႅမ်ႊမရုၼ်ႊ (Cameroon) ဢွင်ႇပေႉပၢင်လိူၵ်ႈတင်ႈ ၵမ်ႈထူၼ်ႈ 8 သေ တေသိုပ်ႇႁဵတ်း ၸွမ်ၸိုင်ႈ ဢွၼ်ႁူဝ်ဝၢၼ်ႈမိူင်းၵႂႃႇထႅင်ႈၼႆ ပိုၼ်ၽၢဝ်ႇပဵၼ်တၢင်းၵၢၼ်ဝႆႉ ၼႂ်းဝၼ်းတီႈ 27/10/2025 ၼင်ႇၼႆ။

မၼ်းၸၢႆးၼႆႉ မီးဢႃယု 92 ပီ ၸိုဝ်ႈလိုဝ်းဝႃႈ ပဵၼ်ၸွမ်ၸိုင်ႈဢႃယုယႂ်ႇသုတ်းၼႂ်းလုမ်ႈၾႃႉ။ မိူင်းၵႅမ်ႊမရုၼ်ႊၼႆႉ သၢၵ်ႈတၢမ်းၸူဝ်ႈပၢၼ်ၸွမ်ၸိုင်ႈၼိုင်ႈၵမ်းလႂ် မီးဢႃယု 7 ပီ၊ ယၢမ်းလဵဝ်ၵေႃႈ မၼ်းၸၢႆးဢွင်ႇပေႉပၢင်လိူၵ်ႈတင်ႈထႅင်ႈလႄႈ တေႁပ်ႉႁဵတ်းၸွမ်ၸိုင်ႈၵႂႃႇထႅင်ႈ တေႃႇပေႃးထိုင် ဢႃယုၸမ် 100 ပီ ။

ပၢင်လိူၵ်ႈတင်ႈ မိူင်းၵႅမ်ႊမရုၼ်ႊၼႆႉ ၸတ်းႁဵတ်းၵႂႃႇ ၼႂ်းဝၼ်းတီႈ 12/10/2025။ ၽွင်းၸတ်းပၢင်လိူင်ႈတင်ႈၼၼ်ႉၵေႃႈ ပဵၼ်ပၼ်ႁႃလၢႆလွင်ႈ။ ၵူၼ်းမိူင်းၵမ်ႈၽွင်ႈ ၼႄၵၢင်ၸႂ်တေႃႇ ၸွမ်ၸိုင်ႈ။ ၼႂ်းဝၼ်းပိုၼ်ၽၢဝ်ႇ သဵၼ်ႈမၢႆ ၶႅပ်းၵၢင်ၸႂ်ၼၼ်ႉ တီႈဝဵင်းယႂ်ႇလၢႆလၢႆတီႈ တိုၵ်ႉမီးလွင်ႈၼႄၵၢင်ၸႂ်ဝႆႉ။

ပေႃးလ်ပၢႆႊယႃႊ ၼႆႉ လႆႈၶႅပ်းၵၢင်ၸႂ် 53.7% သေဢွင်ႇပေႉ ၽူႈၶႅင်ႇဢၼ်လႆႈၶႅပ်းၵၢင်ၸႂ် 35.2 % ဝႃႈၼႆ။ မၼ်းၸၢႆးၼႆႉ တႄႇပဵၼ် ၸွမ်ၸိုင်ႈၸိုင်ႈမိူင်း မိူင်းၵႅမ်ႊမရုၼ်ႊ ၸဵမ်မိူဝ်ႈပီ 1982။ မိူဝ်ႈပီ 2008 ၼၼ်ႉ ၸွမ်ၸိုင်ႈပၢၵ်ႈပႅတ်ႈ ပိူင်ၶွတ်ႇၽွတ်ႈဢၼ်ႁႄႉႁၢမ်ႈဝႆႉ လွင်ႈၶဝ်ႈၶႅင်ႇပၢင်လိူၵ်ႈတင်ႈၼၼ်ႉသေ သိုပ်ႇႁဵတ်းၸွမ်ၸိုင်ႈမႃး ပၢၼ်သိုပ်ႇပၢၼ်။

ၼႂ်းပၢၼ်မၼ်းၸၢႆးပဵၼ်ၸွမ်ၸိုင်ႈၼႆႉ ယုၵ်ႉယွင်ႈပၢႆးပၺ်ႇၺႃႇ ၵေႃႇသၢင်ႈႁူင်းႁဵၼ်းလႄႈ ၸၼ်ႉၸွမ်တင်းၼမ်သေ ၵႄႈလိတ်ႈလႆႈ ပၼ်ႁႃၼႃႈတီႈ တင်းမိူင်း ၼၢႆႊၵျီႊရီႊယႃႊထႅင်ႈ။ ၵူၺ်းၵႃႈ ၵူၼ်းၼုမ်ႇၼႂ်းမိူင်းတင်းၼမ် ႁၢမ်းၵၢၼ်ႁဵတ်း၊ ႁူင်းသဝ်းၾၢႆႇႁူင်းယႃ လူႉၵွႆၼမ်ၸိူဝ်းၼႆႉ ဢမ်ႇမူၼ်ႉမႄးၵႄႈလိတ်ႈပၼ်လႆႈလႄႈ ႁဵတ်းႁႂ်ႈၵူၼ်းမိူင်းၵမ်ႈၽွင်ႈ ဢမ်ႇႁၼ်လီၸွမ်းတေႃႇထိုင်ယၢမ်းလဵဝ်။