ၵူၼ်းမိူင်းႁူမ်ႈတုမ်မၢၼ်ႈ ၼပ်ႉပဵၼ်သႅၼ်ပဵၼ်လၢၼ်ႉ ႁွတ်ႈၽႅဝ်မိူင်းထႆး လူၺ်ႈလၢႆးတၢင်း ၵူႈလွင်ႈလွင်ႈ ၸဵမ်မိူဝ်ႈလၢႆသိပ်းပီ ။ ပၵ်းပိူင်ဢၼ်ၵဵဝ်ႇၶွင်ႈႁႅင်းၵၢၼ်မိူင်းထႆးၵေႃႈ မၢင်ပွၵ်ႈယွၼ်ႇယၢၼ်း မၢင်ပွၵ်ႈၶဵင်ႈၶႅင် ။ ႁႅင်းၵၢၼ်ပတ်းပိုၼ်ႉၼႂ်းၸိုင်ႈထႆးၼႆႉ ၸိူဝ်းႁဵတ်းၸွမ်းပၵ်းပိူင်ဢၼ်တမ်းဝႆႉၵေႃႈမီး ၸိူဝ်းဢမ်ႇၸွမ်းသေႁဵတ်းၵေႃႈမီး ။ ၸဝ်ႈၼႃႈတီႈထႆး ယၢမ်ႈၺွပ်းလႆႈ ႁႅင်းၵၢၼ်ဢၼ်ၽိတ်းပၵ်းပိူင်တင်းၼမ်ယဝ်ႉလႄႈ တႄႇဢဝ်ၼႆႉၵႂႃႇ ၸဝ်ႈၼႃႈတီႈထႆးတေလူင်းၵႂၢတ်ႇလၢင်ႉႁႅင်းၵၢၼ် ၸိူဝ်းႁဵတ်းဢမ်ႇမႅၼ်ႈပိူင် ၊ ဢမ်ႇထုၵ်ႇတီႈ ၸိူဝ်းၼႆႉ။ ၵွပ်ႈၼၼ် ႁႂ်ႈႁႅင်းၵၢၼ် မေႃယူႇမေႃၵိၼ်ၼင်ႇႁိုဝ်တေလွတ်ႈတၢင်းၽိတ်းၼႆ MIC – သုၼ်ၶေႃႈမုၼ်း ႁႅင်းၵၢၼ်ယၢၼ်မိူင်း ပၼ်ၾၢင်ႉဝႆႉ။  

ဢိင်ၼိူဝ် ၸဝ်ႈၼႃႈတီႈထႆး ၵမ်းၵမ်းတီႉၺွပ်းလႆႈႁႅင်းၵၢၼ် ၸိူဝ်းႁဵတ်းၵၢၼ်ဢၼ်ႁႄႉႁၢမ်ႈဝႆႉ လၢႆတီႈယဝ်ႉသေ ၽူႈၵွၼ်းႁွင်ႈၵၢၼ်ႁႅင်းၵၢၼ်ၸိုင်ႈထႆး ၼၢႆႊၽိၶျဵတ်ႉ ထွင်ႊၽၼ်ႊ นายพิเชษฐ์ ทองพันธ์ ပိုၼ်ၽၢဝ်ႇပဵၼ်တၢင်းၵၢၼ်ဝႃႈ – “ တေလူင်းၵႂၢတ်ႇလၢင်ႉႁႅင်းၵၢၼ်ၸိူဝ်းႁဵတ်းၵၢၼ်ၽိတ်းပၵ်းပိူင် ပႃးၸဵမ် ဢဝ်ၸိုဝ်ႈၵူၼ်းထႆးတႅၼ်းတၢင်သေ ႁဵတ်းပၢႆးမၢၵ်ႈမီးဝႆႉၸိူဝ်းၼၼ်ႉ ” – ဝႃႈၼႆ။

ၸွမ်းၼင်ႇ ပိူင်ႁႅင်းၵၢၼ် ဢၼ်လူင်ပွင်ၸိုင်ႈထႆး ႁႄႉႁၢမ်ႈဝႆႉတႄႉ ၵၢၼ်ဢၼ်ၵူၼ်းတၢင်ႇမိူင်းမႃးႁဵတ်းၼႂ်းမိူင်းထႆးဢမ်ႇလႆႈ မီး 40 သႅၼ်း ၼႂ်းၼၼ်ႉ ၶိုၼ်းၸႅၵ်ႇပဵၼ်ႁူဝ်ၶေႃႈလႂ် ႁူဝ်ၶေႃႈၼၼ်ႉသေ မီး 4 ႁူဝ်ၶေႃႈ။

1)ၵၢၼ်ဢၼ် ၵူၼ်းတၢင်ႇမိူင်း တၵ်းဢမ်ႇလႆႈႁဵတ်းသေဢိတ်းၼၼ်ႉ မီး 27 သႅၼ်း

2) ၵၢၼ်ဢၼ်တေလႆႈဢဝ်ၶေႃႈတူၵ်းလူင်း သွင်ၸိုင်ႈမိူင်းသေ ၸင်ႇႁဵတ်းလႆႈသမ်ႉ 3 သႅၼ်း

3)ၵၢၼ်ဢၼ် ၶူင်ဢွၵ်ႇ ၶိူင်ႈၸႂ်ႉၶူဝ်းသွႆ လူၺ်ႈမေႃတိၼ်မေႃမိုဝ်း မီး 8 သႅၼ်း

4)ၵၢၼ်ဢၼ် ဢမ်ႇမီးၶေႃႈတူၵ်းလူင်း MOU ၼၼ်ႉ တၵ်းတေဢမ်ႇလႆႈႁဵတ်း မီး 2 သႅၼ်း – ၼႆသေ တမ်းပိူင်ဝႆႉၼင်ႇၼႆ။

ၵၢၼ်ဢၼ် ၸဝ်ႈၼႃႈတီႈထႆး ၵႆႉတီႉၺွပ်းလႆႈတႄႉ ပဵၼ်ၵၢၼ် ဢၼ်ယူႇၼႂ်းႁူဝ်ၶေႃႈထီႉၼိုင်ႈ  ၵၢၼ် 27 သႅၼ်းၼၼ်ႉ ။  မိူၼ်ၼင်ႇ ႁႅင်းၵၢၼ်ၸိူဝ်းပိုတ်ႇႁၢၼ်ႉၵႅတ်းၶူၼ်ႁူဝ် ၊ ႁၢၼ်ႉၶၢတ်ႈယိုမ်ရူတ်ႉၵူႈသႅၼ်းသႅၼ်း(ၶပ်းရူတ်ႉသူင်ႇၶူဝ်း/သူင်ႇၶႅၵ်ႇ) ၊ ၵၢၼ်ႁဵတ်းလၢမ်ႈပိၼ်ၽႃႇသႃႇ ၼႆ ၸိူဝ်းၼႆႉ ပႃးၼႂ်း 27 သႅၼ်းၼၼ်ႉ  ။

ပေႃးတူၺ်းၸွမ်း ၶပ်ႉမၢႆ ၵၢၼ် 27 သႅၼ်းၼၼ်ႉၸိုင် 1) ၵၢၼ်ၶႅၵ်းမႆႉႁဵတ်းႁၢင်ႈၵူႈသႅၼ်းသၼ်း ၊ 2) ၵၢၼ်ႁေႃႈရူတ်ႉၵႃးတေႃႉသူင်ႇ ၊ 3)ၵၢၼ်ၶၢႆၵုၼ်ႇၶူဝ်းၵူႈသႅၼ်းသႅၼ်း ၊ 4)ၵၢၼ်ၶၢႆၵႅဝ်ႈသႅင်ငိုၼ်းၶမ်း ၊ 5)ၵၢၼ်ၵႅတ်းၶူၼ်ႁူဝ်/ႁဵတ်းႁၢင်ႈ ၊ 6)ၵၢၼ်တေႃးသိူဝ်ႈၽႃႈ ၊ 7)ၵၢၼ်သၢၼ်သၢတ်ႇ ႁိုဝ်ဢမ်ႇၼၼ် ၵၢၼ်ဢၼ်လႆႈဢဝ် ၸႂ်ႉတိုဝ်း ဝၢႆ မႆၾၢင်း မႆႉသၢင်း ၶူၼ်ၵႆႇ သဵၼ်ႈယႆး(ယႆးမူဝ်) ၸိူဝ်းၼႆႉ တေဢမ်ႇလႆႈႁဵတ်း။

 8) ၵၢၼ်ၸႂ်ႉၸေႈသေႁဵတ်းၶူဝ်းၶွင်မေႃတိၼ်မေႃမိုဝ်း ၊ 9)ၵၢၼ်ယွမ်ႉသီၶိူင်ႈၸႂ်ႉၶူဝ်းသွႆၵူႈၸိူဝ်းၸိူဝ်း ၊ 10)ၵၢၼ်ၶူင်ဢွၵ်ႇၶိူင်ႈသဵင်ႁႆႇတိုင်ႈ ၊ 11)ၵၢၼ်ဢၼ်ဢဝ်ႁႄႈၸိုၼ်းငိုၼ်းၶမ်း ဢၼ်မီးတႅင်ႈမၼ်းယဝ်ႉၼၼ်ႉ မႃးၶိတ်ႇႁဵတ်းလၢႆးႁၢင်ႈလီၵူႈသႅၼ်းသႅၼ်း။

 12) ၵၢၼ်ႁဵတ်းဢွၵ်ႇၶမ်း ငိုၼ်း ႁိုဝ်ဢမ်ႇၼၼ် ႁႄႈၵူႈသႅၼ်းသႅၼ်း ၊ 13)ၵၢၼ်ဢၼ်ဢဝ်ႁိၼ်သေႁဵတ်းၶိူင်ႈၸႂ်ႉၶူဝ်းသွႆၵူႈသႅၼ်းသႅၼ်း ၊ 14)ၵၢၼ်ႁဵတ်းတၢင်းလဵၼ်ႈ မိူၼ်ၼင်ႇ ႁၢင်ႈတူဝ်သတ်းလႄႈႁၢင်ႈၵူႈသႅၼ်း ၊ 15)ၵၢၼ်ႁဵတ်းၶူဝ်းလူႇတၢင်းတၢၼ်းၶၢႆ။

16)ၵၢၼ်ႁဵတ်းၽႃႈႁူမ်ႇ ၊ 17)ၵၢၼ်ႁဵတ်းႁုၼ်ႇႁၢင်ႈၽြႃး ၊ 18)ၵၢၼ်ဢၼ်ဢဝ်ၸေႊ ဢဝ်ၽႅၼ်ႇ ႁဵတ်းၸွင်ႈ ၊ 19)ၵၢၼ်ၼၢႆးၼႃႈ(ပွႆးၸႃး) ၊ 20) ၵၢၼ်မိပ်ႇၼူတ်ႈ ။

21)ၵၢၼ်ႁဵတ်းဢွၵ်ႇလႅၼ်းယႃႈ  22)ၵၢၼ်ပိၼ်ႇၽႃႇသႃႇ(လၢမ်ႈ)  23)ၵၢၼ်ဢၼ်လႄႇႁႃၵႃႉၶၢႆၵူႈၸိူဝ်းၸိူဝ်း 24)ၵၢၼ်ၶပ်ႉတူဝ်လိၵ်ႈ 25)ၵၢၼ်ဢၼ်ႁဵတ်းဢွၵ်ႇသဵၼ်ႈမႆၵူႈသႅၼ်းသႅၼ်း 26)ၵၢၼ်ပဵၼ်ႁူဝ်ၼႃႈၼႂ်းလုမ်းၵူႈသႅၼ်းသႅၼ်း 27)ၵၢၼ်ၸတ်းပွင်ပၵ်းပိူင် ၼႆၸိူဝ်းၼႆႉ။

မိူဝ်ႈလဵဝ် ဢၼ်ၸဝ်ႈၼႃႈတီႈထႆး ႁၢင်ႈႁႅၼ်းလူင်းပိုၼ်ႉတီႈၵူတ်ႇထတ်းႁၢဝ်ႈႁႅင်းၼႆႉ တေပဵၼ် ၵုင်းထဵပ်ႈ ၊ ၽူးၵဵတ်ႇ ၊ ၵဵင်းမႂ်ႇ ၊ ၵေႃႇသမုၺ် ၊ ၽတ်ႉထယႃး ၸိူဝ်းၼႆႉ။ ၵွပ်ႈဝႃႈ ဢွင်ႈတီႈၸိူဝ်းၼႆႉ ပဵၼ်တီႈပၢႆးမၢၵ်ႈမီးၶိုၼ်ႈ ပဵၼ်တီႈၵူၼ်းၼွၵ်ႈမိူင်းမႃးၶွၼ်ႈၵၼ် ဝႃႈၼႆ။

ဢၼ်တေလူင်းၵူတ်ႇထတ်းပွၵ်ႈၼႆႉ ၸဝ်ႈၼႃႈတီႈထႆး မီးၶေႃႈယိူင်းဢၢၼ်းဝႆႉဝႃႈ ၼင်ႇႁိုဝ် ႁႅင်းၵၢၼ်ယၢၼ်မိူင်း ၸိူဝ်းႁွတ်ႈမိူင်းထႆး ႁဵတ်းၵၢၼ်ႁႂ်ႈထုၵ်ႇတီႈထုၵ်ႇပိူင်။ လႄႈ တေဢမ်ႇႁႂ်ႈမီးဝႃႈ ႁိမ်ၸိင်းၼႃႈၵၢၼ်ၵူၼ်းထႆး ဝႃႈၼႆ။

ၼႂ်းၵႄႈၼႆႉ ပေႃးလူင်းၵူတ်ႇထတ်းလႄႈ ထူပ်းႁႅင်းၵၢၼ်ႁဵတ်းၽိတ်း ဢမ်ႇၸွမ်းၼင်ႇပိူင်တမ်းဝႆႉၸိုင် တၵ်းၺႃး တူတ်ႈတၢမ်ႇ ငိုၼ်း 5,000 ဝၢတ်ႇ ထိုင် 500,00 ဝၢတ်ႇ ။ လိူဝ်ၼၼ်ႉ ၸၢင်ႈၺႃးတီႉၺွပ်း သူင်ႇပွၵ်ႈ ၶိုၼ်းဝၢၼ်ႈၵဝ်ႇ မိူင်းလင်ၶိုၼ်း ။

လိူဝ်သေ ႁႅင်းၵၢၼ်ယဝ်ႉ မိူၼ်ၼင်ႇ ပေႃႈလဵင်ႉၼၢႆးၸၢင်ႈၸိူဝ်းၼႆႉၵေႃႈ သင်ဢမ်ႇႁဵတ်းၸွမ်းၼင်ႇ ပိူင်ႁႅင်းၵၢၼ်မီးဝႆႉၸိုင် တၵ်းၺႃးတူတ်ႈတၢမ်ႇ 10,000 ထိုင် 100,000 ဝၢတ်ႇ တေႃႇႁႅင်းၵၢၼ်ၼိုင်ႈၵေႃႉ  ။ ၸွမ်းၼင်ႇ ႁူဝ်ၼပ်ႉႁႅင်းၵၢၼ်မီးၼမ်ၵႃႈႁိုဝ်ၵေႃႈ တေလႆႈသဵင်ႈၼမ်ၵႃႈၼၼ်ႉ။
 

သင်ဝႃႈ ၺႃးဢဝ်တၢင်းၽိတ်းသေ သမ်ႉၶိုၼ်းႁဵတ်းၽိတ်းပိူင်ထႅင်ႈၵမ်းၼိုင်ႈၸိုင် တၵ်းၺႃးတၢမ်ႇ ၶွၵ်ႈ 1 ပီ ႁိုဝ်ဢမ်ႇၼၼ် 50,000 ဝၢတ်ႇ ထိုင် 200,000 ဝၢတ်ႇ  ဢမ်ႇၼၼ် ၸၢင်ႈၺႃးႁၢမ်ႈဢမ်ႇႁႂ်ႈၸၢင်ႈႁႅင်းၵၢၼ် တႃႇၶၢဝ်းတၢင်း 3 ပီ ဝႃႈၼႆဝႆႉ။

လွင်ႈဝႃႈ ၸဝ်ႈၼႃႈတီႈထႆး တေလူင်းၵူတ်ႇထတ်း ဝၼ်းလႂ်ယၢမ်းလႂ်ၼႆၼၼ်ႉတႄႉ ဢမ်ႇႁူႉၸွမ်းတႅတ်ႈတေႃးသေတႃႉ တႃႇတူဝ်ၵဝ်ႇ ပေႃးတေဢမ်ႇၺႃးတီႉၺႃးၺွပ်း ၊ ၼင်ႇႁိုဝ်ပေႃးတေဢမ်ႇတုၵ်ႉဢမ်ႇယၢၵ်ႈၸွမ်းပိူင်ႁႅင်းၵၢၼ်ၼၼ်ႉ ႁႂ်ႈဢွၼ်ၵၼ် ဝႆႉၼမ်ႉၼၵ်းၼိူဝ် ပၵ်းပိူင်ၸိုင်ႈမိူင်းထႆး ယႃႇဝႆႉမဝ်မၢင်ၼႆ  ထွင်းၶမ်း ၽူႈၵိူဝ်းၵုမ် ၸုမ်းႁႅင်းၵၢၼ်ႇ ယၢၼ်မိူင်း MAP Foundation လၢတ်ႈသင်ႇဝႆႉၼင်ႇၼႆ –

“ႁဝ်းၵေႃႈ ၶတ်းၸႂ်ႁဵတ်းၵႂႃႇၸွမ်းပိူၼ်ႈၼႆၵေႃႈ မႃးတီႉမႃးၺွပ်းႁဝ်းလႄႈၼႆၵေႃႈ ပိူၼ်ႈတေဢမ်ႇတီႉ ဢမ်ႇၺွပ်း။ ပေႃးႁဝ်းသမ်ႉတေတိုဝ်တိုဝ်တၼ်တၼ်သေယဝ်ႉၵေႃႈ ႁဵတ်းၽိတ်းပၵ်းပိူင်မၢႆမီႈပိူၼ်ႈၵႂႃႇတိၵ်းတိၵ်းၼႆၵေႃႈ မၼ်းၵေႃႈတေၺႃးတႄႉၼၼ်ႉၶႃႈၼႃႇၼေႃႈ ။ ၵမ်းၼႆႉပိူၼ်ႈၵေႃႈ ဢမ်ႇလဵၼ်ႈလဵၼ်ႈ ။ ပူၼ်ႉမႃးၵေႃႈ ဢၼ်ပိူၼ်ႈလူင်းၺွပ်းလၢႆတီႈလၢႆတၢင်း ။ၺႃးမႃးၵေႃႈၼမ်ယဝ်ႉ။”

ၼင်ႇႁိုဝ် တေဢမ်ႇၺႃးတီႉၺွပ်းတႄႉ ႁႂ်ႈလဵပ်ႈႁဵၼ်းႁူႉၸွမ်းပၵ်းပိူင်ၸိုင်ႈထႆးၼမ်ၼမ် ၊ ၵၢၼ်သႅၼ်းလႂ် ႁဵတ်းလႆႈ ဢမ်ႇလႆႈႁဵတ်းလႆႈၵေႃႈ ႁႂ်ႈမေႃၶူၼ်ႉၶႂႃႉလဵပ်ႈႁဵၼ်းသေ ႁဵတ်းၸွမ်းပိူင်လီတီႈသုတ်း။

ႁႅင်းၵၢၼ်မၢင်ၸိူဝ်းၵေႃႈ ဝႃႈ ၸဝ်ႈၼႃႈတီႈထႆးတင်ႈၸႂ် ၶႂ်ႈၵူတ်ႇထတ်းလူၺ်ႈဢမ်ႇမီးလွင်ႈမီးတၢင်း ၊ ၾၢႆႇၸဝ်ႈၼႃႈတီႈထႆးၵေႃႈ သမ်ႉၶိုၼ်းဢွၵ်ႇသဵင်ဝႃႈ ႁႅင်းၵၢၼ်လိူဝ်ၵႂၢမ်းၼႃႇ ဢမ်ႇၸွမ်းပိူင်ၼႆၸိူဝ်းၼႆႉ။

လွင်ႈဝႃႈ ၸဝ်ႈၼႃႈတီႈထႆးၶဝ် ၵူတ်ႇထတ်းႁၢဝ်ႈႁႅင်းဢၼ်ဝႃႈၼႆႉ ၵွပ်ႈဝႃႈၶဝ်ပဵၼ်ၸဝ်ႈၶွင်ၽႅၼ်ႇလိၼ် ၊ ၶဝ်ၵေႃႈ ႁဵတ်းၸွမ်းၼင်ႇပုၼ်ႈၽွၼ်းမီး ၊ သင်ဝႃႈ ႁႅင်းၵၢၼ်ၵေႃႈ ႁဵတ်းၸွမ်းၼင်ႇပိူင်မီးဝႆႉၵေႃႈ တေဢမ်ႇၸၢင်ႈမီး ပၼ်ႁႃသင်ၼႆ ထွင်းၶမ်း ၽူႈၵိူဝ်းၵုမ် ၸုမ်းႁႅင်းၵၢၼ်ယၢၼ်မိူင်းသိုပ်ႇလၢတ်ႈၼင်ႇၼႆ –

“ပေႃးမႃးတူၺ်းၼႆ ၸဝ်ႈၼႃႈတီႈၵေႃႈ ပဵၼ်ပုၼ်ႈၽွၼ်းပိူၼ်ႈ ၊ ထႅင်ႈလွင်ႈၼိုင်ႈၵေႃႈ ပဵၼ်ဝၢၼ်ႈပိူၼ်ႈမိူင်းပိူၼ်ႈ ။ပိူၼ်ႈၵေႃႈ လူဝ်ႇလႆႈၵႅတ်ႇၶႄပၼ် ၵူၼ်းမိူင်းပိူၼ်ႈ ။ ယွၼ်ႉဝႃႈ ၶၢဝ်ႇမၼ်းၵေႃႈ ဢွၵ်ႇမႃးၼမ် ဢၼ်ဝႃႈ ႁႅင်းၵၢၼ် ယၢၼ်မိူင်းႁဝ်း မႃးႁိမ်ၵၢၼ်ပိူၼ်ႈဝႃႈ ၸိူင်ႉၼၼ်ၸိူင်ႉၼႆၼၼ်ႉၶႃႈ ။ ႁႅင်းၵၢၼ်သမ်ႉၶိုၼ်းဝႃႈ ႁဝ်းဢမ်ႇလႆႈႁိမ်ၵၢၼ်ၽႂ် ၊ ၵူၺ်းၵႃႈ ႁဝ်းလူဝ်ႇလႆႈဝူၼ်ႉတူၺ်းဝႃႈ ဢၼ်ႁဝ်းႁဵတ်းၵၢၼ်ယူႇၼၼ်ႉ ၸွင်ႇမၼ်းထုၵ်ႇမႅၼ်ႈၸွမ်းၼင်ႇပၵ်းပိူင် ။ ႁဝ်းၵေႃႈလူဝ်ႇလႆႈတူၺ်းတူဝ်ၼၼ်ႉပႃး ။ ပေႃးၸဝ်ႈၼႃႈတီႈၶဝ် ဢမ်ႇၵူတ်ႇဢမ်ႇထတ်း ၶဝ်သမ်ႉတေဝႆႉႁဵတ်းသင် တမ်ႇၼူတ်ႇမိူင်းၼႆႉ”

ဝၼ်းတီႈ 22/10/2025 ၼႆႉၵေႃႈ ႁႅင်းၵၢၼ်ဢၼ်ႁဵတ်းၵၢၼ်ၼႂ်းႁၢၼ်ႉယွမ်ႉၵၢပ်ႇၼဵပ်ႉမိုဝ်း တီႈၼႂ်းဢိူင်ႇမႄႈႁႄႇ ဝဵင်းၵဵင်းမႂ်ႇ ၸိုင်ႈထႆး  ၺႃးတီႉၺွပ်း ၊ ပေႃႈလဵင်ႉၼၢႆးၸၢင်ႈမၼ်းၵေႃႈ ၺႃးတီႉၺွပ်းၵူတ်ႇထတ်းဢဝ်လိူင်ႈ လူၺ်ႈ ၸၢင်ႈၵူၼ်းႁဵတ်းၵၢၼ်ဢမ်ႇမႅၼ်ႈတီႈမႅၼ်ႈတၢင်းလႄႈ ဢမ်ႇႁဵတ်းၸွမ်းၼင်ႇပိူင်ႁႅင်းၵၢၼ် ။ ၼႂ်း ပီ 2025 ၼႆႉၵူၺ်း ႁႅင်းၵၢၼ် ၸိူဝ်းႁဵတ်းၵၢၼ်ဢမ်ႇထုၵ်ႇတီႈ ဢမ်ႇမႅၼ်ႈၸွမ်းပိူင် ၺႃးတီႉၺွပ်း ပၼ်တၢင်းၽိတ်း ၼပ်ႉႁူဝ်ပၢၵ်ႇယဝ်ႉ ဝႃႈၼႆ။