ဝဵင်းပၢင်လွင်း မိူင်းတႆးပွတ်းၸၢၼ်း မၢၵ်ႇၶိူဝ်သူမ်ႈ ဢမ်ႇမီးၵႃႈၶၼ် – တေဢဝ်ၵႂႃႇၶၢႆၵေႃႈ   သုမ်းၵႃႈႁႅင်း ၵႃႈၼမ်ႉမၼ်းၸၢၵ်ႈၵူၺ်းယဝ်ႉၼႆသေ ၸဝ်ႈသူၼ်ထွၵ်ႇပႅတ်ႈ ပဵၼ်ၵေႃႇပဵၼ်ၵွင် သုမ်းတင်းၼမ်တင်းလၢႆ။

တႄႇႁူဝ်လိူၼ် ဢွၵ်ႉထူဝ်ႊပိူဝ်ႊ ၼႆႉမႃး ၶၼ်မၢၵ်ႇၶိူဝ်သူမ်ႈ ၼႂ်းလွၵ်းၵၢတ်ႇမီး ၼိုင်ႈၸွႆႉ 400 ထိုင် 500 ပျႃးၵူၺ်း၊  မၢၵ်ႇၶိူဝ်သူမ်ႈၼႆႉသမ်ႉပဵၼ်မဵဝ်းဝႆႉႁိုင်ဢမ်ႇလႆႈလႄႈ ၶၼ်လီဢမ်ႇလီၵေႃႈပေႃးပိတ်းယဝ်ႉၵႃႈလႆႈၶၢႆ ။ လၢႆးလႂ်ၵေႃႈ ႁဵတ်းႁႂ်ႈၸဝ်ႈသူၼ် မၢၵ်ႇၶိူဝ်သူမ်ႈ သုမ်းတိုၼ်းလၢင်း   ။   

ၸဝ်ႈသူၼ်မၢၵ်ႇၶိူဝ်သူမ်ႈ ဝဵင်းပၢင်လွင်း လၢတ်ႈၽူႈတွႆႇႁွၵ်ႈဝႃႈ -“ မၢၵ်ႇၶိူဝ်သူမ်ႈၼႆႉ ပေႃးထိုင်ၶၢဝ်းဢဝ်ၶၢႆမႃး မၼ်းဢမ်ႇဝႆႉလႆႈ။ ပေႃးဝႃႈၶၼ်မၼ်းတူၵ်း- ငိုၼ်းသမ်ႉပႆႇလႆႈ ၵႃႈၵႃးတၢင်ႇၵႂႃႇၶၢႆသမ်ႉတေလႆႈပၼ်ဢွၼ်တၢင်း – ပေႃးဢမ်ႇမီးၵႃႈၵႃးၵေႃႈ ဢမ်ႇၸၢင်ႈႁဵတ်းႁိုဝ် ၵႃႈလႆႈ ထွၵ်ႇပႅတ်ႈပဵၼ်ၵေႃႇပဵၼ်ၵွင်။     ၵူၼ်းသိုဝ်ႉၵိၼ်ၵေႃႈ ပေႃးသိုဝ်ႉဝႆႉ ၼိုင်ႈၸွႆႉ လႆႈၵိၼ်ႁိုင်ၼႃႇ ယွၼ်ႉၼၼ် ၽႂ်ၵေႃႈ ဢမ်ႇသိုဝ်ႉၼမ် ဢမ်ႇၸၢင်ႈႁဵတ်းႁိုဝ် ”- ဝႃႈၼႆ ။

ၼႂ်းႁၢင်လိူၼ်မေႊၽွင်း တႄႇၽုၵ်ႇ မၢၵ်ႇၶိူဝ်သူမ်ႈၼၼ်ႉ ၵႃႈၶၼ် မၢၵ်ႇၶိူဝ်သူမ်ႈ ၶိုၼ်ႈထိုင် ၼိုင်ႈၸွႆႉ 3000 ပၢႆ။ ၽွင်းၼၼ်ႉ ၸဝ်ႈသူၼ် မီးႁႅင်းၸႂ် မၢင်ႇၵိူဝ်းလႆႈၶၢႆမၢၵ်ႇၶိူဝ်သူမ်ႈ  ၵႃႈယႂ်ႇ ၶၼ်သုင်ၼႆသေ ဢွၼ်ၵၼ်ၵႂႃႇဢဝ်ငိုၼ်းၶီႈငိုၼ်းတူဝ်းသေမႃးၽုၵ်ႇ။ ၽိူဝ်ႇထိုင်  ယၢမ်းလဵဝ် ၶၼ်မၢၵ်ႇၶိူဝ်သူမ်ႈ တူၵ်းလႄႈ ၸဝ်ႈသူၼ် သုမ်းပႃး တိုၼ်းလၢင်းတင်းၼမ် ဝႃႈၼႆ ။

ၸဝ်ႈသူၼ်မၢၵ်ႇၶိူဝ်သူမ်ႈ ဝဵင်ႈလွၵ်ႉၸွၵ်ႇ လၢတ်ႈၽူႈတွႆႇႁွၵ်ႈဝႃႈ -“ ဢဝ်ငိုၼ်းၶီႈ 50 သႅၼ်သေ ၽုၵ်ႇဝႆႉ ၊ တလဵဝ် လႆႈၶိုၼ်း 10 သႅၼ်ၵူၺ်း  ယႃႇဝႃႈ တေလႆႈၼမ်ႉတွၼ်းၶႃႈလႃႈ သုမ်းပႃးတိုၼ်းလၢင်း ပၢႆထုၵ်ႇပႃးၼီႈၵွၼ်ႇ”- ဝႃႈၼႆ။

ယၢမ်းလဵဝ် ၶၼ်မၢၵ်ႇၶိူဝ်သူမ်ႈ တီႈဝဵင်းတူၼ်ႈတီး ၊ သီႇသႅင် ၊ ၼမ်ႉၸၢင် ၼိုင်ႈၸွႆႉ လႆႈသိုဝ်ႉၵိၼ် 2500 ထိုင် 3000 ယူႇသေတႃႉ ၸဝ်ႈသူၼ်ၽုၵ်ႇ မၢၵ်ႇၶိူဝ်သူမ်ႈ မိူၼ်ၼင်ႇ တင်းၼွင်တရႃး ၊ ပၢင်လွင်း ၊ လွၵ်ႉၸွၵ်ႇၸိူဝ်းၼႆႉ လႆႈၶၢႆ ၼိုင်ႈၸွႆႉ 400 – 500 ပျႃး ၵူၺ်း ၼႆယဝ်ႉ ။

မၢၵ်ႇၶိူဝ်သူမ်ႈ ဢၼ်ဢွၵ်ႇတၢင်း ထုင်ႉပၢင်လွင်း၊ ၼွင်တရႃး ၸိူဝ်းၼႆႉ သူင်ႇၶၢႆတီႈဝဵင်းဢွင်ႇပၢၼ်း၊ ယူႇတီႈ ဝဵင်းဢွင်ႇပၢၼ်း ၶိုၼ်းသူင်ႇၶၢႆ တၢင်းဝဵင်းတႃႈၵုင်ႈ၊ ဝဵင်းလိူဝ်ႇ၊ မျႃႉဝတီႇ၊ မူႇၸေႊ ၸိူဝ်းၼႆႉ။

ယၢမ်းလဵဝ် ယွၼ်ႉၼမ်ႉထူမ်ႈ ၶၼ်မၢၵ်ႇၶိူဝ်သူမ်ႈတူၵ်း ၵၢၼ်ၽုၵ်ႇမၢၵ်ႇၶိူဝ်သူမ်ႈ ဢမ်ႇပဵၼ်ၵၢၼ်လႄႈ ၸဝ်ႈသူၼ်တီႈထုင်ႉၸၢမ်ၵႃး လႆႈဢွၼ်ၵၼ်လႅၵ်ႈလၢႆႈ ၽုၵ်ႇသွမ်ႈယႃႈၾိၼ်ႇၵေႃႈမီးတင်းၼမ် – လႆႈႁူႉၼင်ႇၼႆ ။