ၵူၼ်းပၢႆႈၽေးသိုၵ်း ဝၢၼ်ႈၼွင်ထဝ် ဢၼ်ပၢႆႈမႃးယူႇဝႆႉ တီႈၵျွင်းမူၺ်ႇတေႃႇ – ဝၢၼ်ႈၽြႃးၽိူၵ်ႇ ပွၵ်ႉဢွင်ႇၶျၢၼ်းတႃႇ(အောင်ချမ်းသာ ) လႄႈ ပွၵ်ႉႁူဝ်ၶႄး ၼႂ်းဝဵင်းသီႇသႅင်ႇ ၸိုင်ႈတႆး ပွတ်း ၸၢၼ်းၼၼ်ႉ ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ် ႁၢဝ်ႈႁႅင်း ဝႆႉၼႆယဝ်ႉ ။
ၸုမ်းၸွႆႈထႅမ် ပရႁိတ ၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ႁိူၼ်းယေးထုၵ်ႇၽဝ်ဢမ်ႇမီးတီႈယူႇဢမ်ႇၸၢင်ႈပွၵ်ႈၶိုၼ်း တလဵဝ် ၵူၼ်းပၢႆႈၽေးမၢင်ၸိူဝ်း လႆႈၵႂႃႇ ႁဵတ်းသုမ်ႉႁဵတ်းသွင်းယူႇ ၸွမ်းၼႂ်းဝၢင်းႁိူၼ်းဢၼ်ဢမ်ႇမီးၵူၼ်းယူႇၼၼ်ႉၵေႃႈမီး ယွၼ်ႉဢမ်ႇမီး ၵၢၼ်ငၢၼ်းတႃႇႁႃၵိၼ်လဵင်ႉတွင်ႉလႄႈ ၶဝ်ႈၼိုင်ႈမေႃႈၼႆႉ လႆႈမႅင်ႇၵၼ်ၵိၼ် 7-8 ၵေႃႉ ၊ လႆႈပႅင်းယူႇပႅင်းၵိၼ် လူဝ်ႇတၢင်းၸွႆႈထႅမ် ၶဝ်ႈၼမ်ႉတင်းၵိၼ်လႄႈ ယႃႈယႃ ၸိူဝ်းၼႆႉ”- ဝႃႈၼႆ ။
ယၢမ်းလဵဝ် ၵူၼ်းပၢႆႈၽေးသိုၵ်းဢၼ်မီးတီႈၼႂ်းၸႄႈဝဵင်းသီႇသႅင်ႇ ႁူဝ်ၵူၼ်း မီးၸမ် 300 ။ မၢင်ၸိူဝ်း ပၢႆႈမႃးယူႇၸွမ်းၵျွင်းမုၼ်ၸဝ်ႈ ၊ ၸလွပ်ႈ ၊ ၵျွင်းမူၺ်ႇတေႃႇ ၸိူဝ်းၼႆႉ မၢင်ၸိူဝ်း ၵေႃႈ ယူႇၸွမ်းႁိူၼ်းယေးပီႈၼွင်ႉ၊ ၶၢတ်ႈႁိူၼ်းယူႇ လူဝ်ႇတၢင်းၸွႆႈထႅမ် မိူၼ်ၼင်ႇ – သုမ်ႉ၊ သုတ်း (ၽႃႈၵၢင်ယုင်း) လႄႈ ၽႃႈယၢင် (မူဝ်းၵႃႇ) ၊ ယႃႈယႃ ၊ သိူဝ်ႈၶူဝ်း ၸိူဝ်းၼႆႉ – ၵူၼ်းၸွႆႈထႅမ် ၵူၼ်းပၢႆႈၽေးသိုၵ်းလၢတ်ႈ ။
တႄႇႁူဝ်လိူၼ်ၵျုၼ်ႊၼႆႉမႃး ၸုမ်းပျီႇတူႉၸိတ်ႉပဢူဝ်း PNO ၼႂ်းဢိူင်ႇ ၼွင်ၵႅဝ်းလႄႈ ဝၢၼ်ႈၼွင်ထဝ် ၸိူဝ်းၼႆႉ ႁႂ်ႈၵူၼ်းမိူင်း ၶၢႆႉပၢႆႈ၊ ႁူဝ်ၵူၼ်း မီးၸမ် 6 ႁဵင် လႆႈငိူင်ႉပၢႆႈ ။
ဝၢႆးလင်ၼၼ်ႉၼႂ်းလိူၼ် ဢေႃႊၵၢတ်ႉသ် ၼၼ်ႉ ပျီႇတူႉၸိတ်ႉပဢူဝ်းၶဝ်ႈၵုမ်းလႆႈၶိုၼ်း ၼႂ်းဝၢၼ်ႈၼွင်ထဝ် သေၸႂ်ႉၵူၼ်းပၢႆႈၽေးသိုၵ်းပွၵ်ႈမိူဝ်းၶိုၼ်းႁိူၼ်းၽႂ်မၼ်းသေတႃႉ ယွၼ်ႉ ႁိူၼ်းယေးထုၵ်ႇၾႆးမႆႈ ဢမ်ႇၸၢင်ႈပွၵ်ႈမိူဝ်းႁိူၼ်း လႆႈသိုပ်ႇငိူင်ႉပၢႆႈယူႇဝဵင်းသီႇသႅင်ႇ ၊ ယွင်ႁူၺ်ႈ ၸိူဝ်းၼႆႉ ။
ဝဵင်းသီႇသႅင်ႇၼႆႉ ယူႇတီႈ တပ်ႉသိုၵ်းမၢၼ်ႈ ယိုတ်းၵုမ်းလႆႈၶိုၼ်း တီႈတပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLA မိူဝ်ႈႁၢင်လိူၼ်မၢတ်ႊၶျ် ပီ 2024 ၼၼ်ႉသေ ထိုင်မႃးၸမ်ပီယဝ်ႉ သိုၵ်းမၢၼ်ႈ ဢမ်ႇဢဝ်ပုၼ်ႈၽွၼ်း ပူၵ်းပွင်ပၼ်သင် ၼႆယဝ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ