ၶၢဝ်းယၢမ်းပွႆးပွႆႇႁူင်းၾႆးမိၼ် လိူၼ်သိပ်းသွင်ၼႆႉ တီႈဝဵင်းတူၼ်ႈတီးၵူၼ်းၵိုၼ်းငိုၼ်းၶွၼ်ႈ၊ မီးၶႅၵ်ႇတီႈၸမ်တီႈၵႆ တၢင်းမိူင်းမၢၼ်ႈတူင်ႈပဵင်းၸိူဝ်းၼၼ်ႉၵေႃႈႁွတ်ႈၽႅဝ်ဢႅဝ်ႇယဵမ်ႈ။

ဝၼ်းတီႈ 26/10/2025 ယၢမ်းၵၢင်ဝၼ်း မီးၵူၼ်းဢမ်ႇႁူႉၾၢႆႇ 3 ၵေႃႉ ဝႃႈတူဝ်ၵဝ်ႇ ပဵၼ်ၵူၼ်း ၵိၼ်ၸၢင်ႈ တႃးသီၼႆသေ  ၶီႇရူတ်ႉၶဝ်ႈၼႂ်းပွၵ်ႉ မျေႇၽိဝ်ႇ (မြေဖြူ)   ၶဝ်ႈႁိူၼ်းဢွၵ်ႇႁိူၼ်း ႁူၺ်းသူၼ်းၸဝ်ႈႁိူၼ်း တႃႇတႃးသီႁိူၼ်း။   ၸဝ်ႈႁိူၼ်း ဢမ်ႇၽွမ်ႉဢမ်ႇတႃးၼႆၵေႃႈ လၢတ်ႈဝႃႈတေၸၢမ်းတႃးသီပၼ်တူၺ်း –   ပေႃးၵျိူၵ်ႈၸင်ႇသိုပ်ႇတႃးဝႃႈၼႆသေ  ဝၢႆးမႃးၵေႃႈ   ယွၼ်းငိုၼ်းၸဝ်ႈႁိူၼ်းၵႂႃႇ  ၼပ်ႉႁူဝ်သႅၼ်ပျႃး ဝႃႈၼႆ ။

ၼၢင်းယိင်း ၸဝ်ႈႁိူၼ်းလင်ၼိုင်ႈဢၼ်ထူပ်းပိူင်ပဵၼ်ၼႆႉ လၢတ်ႈၽူႈတွႆႇႁွၵ်ႈဝႃႈ -“ၶဝ်ၶီႇရူတ်ႉယွၵ်းမႃးလမ်းၼိုင်ႈ မႃး 3 ၵေႃႉ ။ မီးပုင်းတႃးသီႁိူၼ်းဢွၼ်ႇ 2-3 ပုင်းႁေ။   ၵေႃႉၼိုင်ႈတႄႉပႂ်ႉတီႈရူတ်ႉ ၼွၵ်ႈႁိူၼ်း ၊ ထႅင်ႈသွင်ၵေႃႉတႄႉ ၶဝ်ႈမႃးၼႂ်းႁိူၼ်းသေ မႃးထၢမ်တႂ်ႈထၢမ်ၼိူဝ် ၊ လၢတ်ႈယူႇဝႃႈ ဢမ်ႇတႃးၼႆၵေႃႈ ဢမ်ႇလႆႈ တေၸၢမ်းတႃးပၼ်ၼႆသေ ၽိုတ်ႉၶဝ်ႈၼႂ်းႁိူၼ်းဢေႃႈ ၊ တႃးၵႂႃႇ ၽႃႁိူၼ်းသၢမ်ၶႅပ်း ယွၼ်းငိုၼ်း 3 သႅၼ်ပျႃးၶႃႈဝႃႇ ၊  လႆႈထဵင်မေႃးၵၼ်ဢေႃႈ ၼႆဝႃႈၸၢမ်းတႃး ၵူၺ်းၼႆ- ၼႆလိုၼ်းသုတ်းၵေႃႈလႆႈပၼ်ငိုၼ်းၵႂႃႇ 5 မိုၼ်ႇပျႃး   ”- ဝႃႈၼႆ ။

ယၢမ်းလဵဝ်တီႈဝဵင်းတူၼ်ႈတီး မီးၵူၼ်းဢမ်ႇႁူႉၾၢႆႇ ၵႆႉလႄႇႁႃ လၵ်ႉ လွၵ်ႇလႅၼ်ၵိၼ်ငိုၼ်း ၼႂ်းပွၵ်ႉ ထိုင် ႁိူၼ်း။  ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ။   လွင်ႈၼႆႉ ပလိၵ်ႈသိုၵ်းမၢၼ်ႈ ဢမ်ႇဢဝ်ပုၼ်ႈၽွၼ်း တီႉၺွပ်း ပၼ်။  ၵူၼ်းၼႂ်းပွၵ်ႉ ၸိူဝ်းႁူႉႁၼ်ၸွမ်းလွင်ႈၼႆႉ လႆႈလိုပ်ႈၵူၼ်းၸိူဝ်းၼႆႉ ဢွၵ်ႇပွၵ်ႉဢွၵ်ႇဝၢၼ်ႈ ႁင်းၽႂ် မၼ်း –    ၵူၼ်းပိုၼ်ႉတီႈလၢတ်ႈ ။

ၵူၼ်းၼႂ်းပွၵ်ႉဝႃႈ ၵွၼ်ႇၼႃႈၼႆႉ လႅပ်ႈပဵၼ်ၸုမ်းလဵဝ်ၵၼ်ၼႆႉၵူၺ်း  ၵႆႉၶဝ်ႈဢွၵ်ႇၵႂႃႇမႃးၼႂ်းပွၵ်ႉၺွင်ႇၽိဝ်ႇ ၊ ပွၵ်ႉမင်ႇၵလႃႇၸိူဝ်းၼႆႉသေ  တဵၵ်းၶၢႆထီႇပၼ် ၵူၼ်းၼႂ်းပွၵ်ႉ ။ သင်မီးၵူၼ်းထဝ်ႈ လုၵ်ႈဢွၼ်ႇၵူၺ်းၼႆ ၶဝ်ႈထိုင်ၼႂ်းႁိူၼ်း ယွၼ်းၵိၼ်ၼမ်ႉလႄႈ တၢင်းၵိၼ်တၢင်ႇဢၼ်ထႅင်ႈၼႆ – ၵူၼ်းပိုၼ်ႉတီႈလတ်ႈ ။

ၼၢင်းယိင်းပိုၼ်ႉတီႈလၢတ်ႈဝႃႈ -“ယူႇၼႂ်းႁိူၼ်းၵေႃႈ ဢမ်ႇႁူမ်ႇလူမ်ႈယဝ်ႉ ၊ မႃးၶၢႆမဵဝ်းၼိုင်ႈယဝ်ႉမဵဝ်းၼိုင်ႈ ဢမ်ႇသိုဝ်ႉၵေႃႈ ဢမ်ႇလႆႈၶႃႈ  တဵၵ်းၶၢႆယဝ်ႉယွၼ်းငိုၼ်း ၵူၼ်းပိုၼ်ႉတီႈၵႂႃႇ ၵႆႉၺႃးၼႃႇၶႃႈ မၢင်ၵေႃႉပႃးၵႂႃႇ ၼပ်ႉႁူဝ်သိပ်းသႅၼ်မၼ်းၵွၼ်ႇ”- ဝႃႈၼႆ ။

ဝၢႆးလင်သိုၵ်းမၢၼ်ႈယိုတ်းဢႃၼႃႇ ၸိုင်ႈမိူင်းမႃးၼႆႉ ၵူၼ်းမိူင်းႁႃၵိၼ်လဵင်ႉတွင်ႉယၢပ်ႇၽိုတ်ႇ။  ၵူၼ်းလွၵ်ႇ လႅၼ်ၵိၼ်ငိုၼ်းၵေႃႈ လိူင်ၼမ်မႃး။  ဢမ်ႇၸႂ်ႈဝႃႈ ဝဵင်းတူၼ်ႈတီးၵူၺ်း။  မိူၼ်ၼင်ႇ ဝဵင်းၵၢတ်ႇလေႃႉ ၊ ယွင်ႁူၺ်ႈ ၊  ပၢင်လွင်း ၊ ယႂႃႇငၢၼ် ၸိူဝ်းၼႆႉၵေႃႈ ၵႆႉႁၼ်ၵူၼ်းဢမ်ႇႁူႉၾၢႆႇ ၶဝ်ႈၼႂ်းပွၵ်ႉသေ လွၵ်ႇလႅၼ်ၵိၼ်ငိုၼ်းၵူၼ်းမိူင်းၵႂႃႇ – ၼႆယဝ်ႉ ။

ပေႃးထိုင်မႃးဝၼ်းတီႈ 29 /10/2025  ၼႆႉ ႁွင်ႈၵၢၼ်ၾၢႆႇၽွင်းငမ်းဝဵင်းတႂ်ႈသိုၵ်းမၢၼ်ႈ တေၸတ်းႁဵတ်း ပွႆးႁူင်းၾႆးမိၼ် တီႈဝဵင်းတူၼ်ႈတီး၊ ယွၼ်ႉမီးၽူႈလၵ်ႉၸၵ်ႉၶုတ်ႈၼမ်ႁႅင်းလႄႈ ၵူၼ်းမိူင်းတၢင်ႇတီႈ သီႇလႅၼ် ၸိူဝ်းတေမႃးၶဝ်ႈႁူမ်ႈပၢင်ပွႆး ႁႂ်ႈလႆႈၾၢင်ႉ ၶူဝ်းၶွင်ငိုၼ်းၶမ်းရူတ်ႉၵႃးၸဝ်ႈၵဝ်ႇၼႆ ၵူၼ်းပိုၼ်ႉတီႈတူၼ်ႈတီး တိုၵ်းသူၼ်းလၢတ်ႈဝႆႉၼင်ႇၼႆ။