ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 ပွၵ်ႈၵမ်းၼိုင်ႈမႃး ၼႂ်းၶၢဝ်းတၢင်း  1 ပီပၢႆၼႆႉ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) ၶဝ်ႈယိုတ်းၵုမ်းၵမ် ဝဵင်းၼမ်ႉၶမ်း တီႈလႅၼ်လိၼ် မိူင်းတႆး- မိူင်းၶႄႇ တိတ်းၸပ်းၵၼ် ၼႂ်းမိူင်းတႆးပွတ်းႁွင်ႇသေ ပၼ်ႇၵၢၼ်ၽွင်းငမ်းဝႆႉ ႁၢၼ်ႉတေႃႇထိုင်ယၢမ်းလဵဝ်။

ၼႂ်းၶၢဝ်းတၢင်း 1 ပီပၢႆ တႂ်ႈၵၢၼ်ၽွင်းငမ်းသိုၵ်းတဢၢင်းၼႆႉ ၵူၼ်းမိူင်းဝဵင်းၼမ်ႉၶမ်း ၺႃးၶႃႈႁၢပ်ႇၵၢၼ်ၼႂ်းတပ်ႉသိုၵ်းတဢၢင်း မိပ်ႇငႅၼ်း တဵၵ်းတဵင် ၵဵပ်းသဵၼ်ႈသၢႆမၢႆႁူဝ်ၼပ်ႉၵူၼ်း၊ ႁူဝ်ၼပ်ႉမုင်ႉႁေႃႁိူၼ်း၊ ၵဵပ်းၶွၼ်ႇရူတ်ႉၵႃး၊ ႁဵတ်းဝႂ်လၢႆႊသိၼ်ႊ တႃႇၵၢၼ်ၵႃႉၶၢႆ၊ ၵဵပ်းၵႃႈၾႆးၾႃႉ ၼမ်လိူဝ်ၼႂ်းပိူင်ဢၼ်တမ်းဝၢင်းဝႆႉ၊ ၵဵပ်းၶွၼ်ႇၵႃႈပိုတ်ႇႁူင်းႁဵၼ်း ၵူၺ်းဢမ်ႇၵႃး ယၢမ်းလဵဝ် မိပ်ႇငႅၼ်းတဵၵ်းႁႂ်ႈၵူၼ်းမိူင်း ၸိူဝ်းယူႇၼႂ်းဝဵင်းၼမ်ႉၶမ်း ႁဵတ်းမၢႆၾၢင် လႄႈ မုင်ႉႁေႃႁိူၼ်းထႅင်ႈ ၼႆယဝ်ႉ။

ၸၢႆးပီး ဢႃႇယု 40 ပၢႆ ၵေႃႉယူႇဝႆႉၼႂ်းဝဵင်းၼမ်ႉၶမ်း လၢတ်ႈၼႄတီႈၽူႈတွႆႇႁွၵ်ႈဝႃႈ “ၼႂ်းႁၢင်လိူၼ်ၼႆႉ သိုၵ်းလွႆၶဝ် ၸႂ်ႉၵူၼ်းၼႂ်းၼမ်ႉၶမ်းၵႂႃႇႁဵတ်းမၢတ်ႈပုင်ႇတိၼ်ႇ (မၢႆၾၢင်) ။ ပေႃးဢမ်ႇၵႂႃႇႁဵတ်း ၽႂ်ဢမ်ႇမီးဝႆႉ မၢႆၾၢင်ဢၼ်ၶဝ်ႁဵတ်းပၼ်ၵေႃႈ တေဢမ်ႇပၼ်လတ်းၵႂႃႇမႃး ၵႄႈၵၢင်သဵၼ်ႈတၢင်း မူႇၸေႊ- ၼမ်ႉၶမ်း ၼႆဢေႃႈ။ မိူဝ်ႈလဵဝ်ၼႆႉ ၶဝ်တႄႇႁႂ်ႈၵူၼ်းၼႂ်းပွၵ်ႉ 1 ႁဵတ်းၵႂႃႇ။ ၶဝ်ဢမ်ႇႁဵတ်းပၼ်လၢႆလၢႆၼင်ႇၵဝ်ႇ။ ပေႃးပဵၼ်မၢႆၾၢင်ၼႆႉ လႆႈပၼ် 10000၊ ပေႃးပဵၼ်ဝႂ်မုင်ႉႁေႃႁိူၼ်းၵေႃႈ 10000 ပျႃး။ ၶဝ်တဵၵ်းႁႂ်ႈပူႇၵၢင်ႉၼႂ်းပွၵ်ႉၼႂ်းဝၢၼ်ႈသေႃႇႁႂ်ႈဢွၼ်ၵၼ်ၵႂႃႇႁဵတ်းၼႆဢေႃႈ။ ၵမ်ႈၽွင်ႈၵေႃႈ ၵႂႃႇႁဵတ်း။ ၵမ်ႈၽွင်ႈၵေႃႈဢမ်ႇၵႂႃႇႁဵတ်းၼင်ႇၵဝ်ႇၶႃႈ” ဝႃႈၼႆ။

တႃႇႁဵတ်းမၢႆၾၢင် လႄႈ မုင်ႉႁေႃႁိူၼ်းၼႆႉ ၾၢႆႇတပ်ႉသိုၵ်းတဢၢင်း ႁဵတ်းဝႂ်ပိဝ်သေ ၸႅၵ်ႇပၼ်ၵူၼ်းမိူင်းပိုၼ်ႉတီႈ။ ၼႂ်းဝႂ်ပိဝ်ၼၼ်ႉ ပႃးဝႆႉ ၶေႃႈမၵ်းမၼ်ႈၵူၼ်းၸိူဝ်းတေလႆႈၵႂႃႇႁဵတ်းမၢႆၾၢင်၊ ပၵ်းပိူင်ၶွင်မုၵ်ႉၸုမ်း TNLA ၊ ယိူင်းဢၢၼ်းဢၼ်လႆႈၶပ်းၶိုင်ႁႂ်ႈႁဵတ်းမၢႆၾၢင် ၸဵမ်ၸိူဝ်းၼႆႉသေ ပိုၼ်ႉတီႈၸိူဝ်းတေႁဵတ်းပၼ်မၢႆၾၢင် ၸဵမ်ၸိူဝ်းၼႆႉ။

လႆႈႁူႉဝႃႈ သိုၵ်းတဢၢင်းၼႆႉ ၶပ်းၶိုင်ၸတ်းႁဵတ်းပၼ် မၢႆၾၢင် လႄႈ မုင်ႉႁေႃႁိူၼ်းၵူၼ်းမိူင်းပိုၼ်ႉတီႈ ၸိူဝ်းယူႇသဝ်းၼႂ်းၸႄႈဝဵင်းၼမ်ႉၶမ်း လႄႈ ၸႄႈဝဵင်းၼမ်ႉသၼ်ႇ။ ၼႂ်းၶၵ်ႉၵၢၼ်ႁဵတ်းဢွၵ်ႇပၼ် မၢႆၾၢင် လႄႈ ဝႂ်မုင်ႉႁေႃႁိူၼ်းပၼ် ၵူၼ်းမိူင်းပိုၼ်ႉတီႈၼၼ်ႉ ၾၢႆႇသိုၵ်းတဢၢင်း ၶိုၼ်းဢဝ်ၶေႃႈမုၼ်းၼႂ်းဝႂ်မုင်ႉႁေႃႁိူၼ်း လႄႈ ၶႅပ်းမၢႆၾၢင် ဢၼ်ႁွင်ႈၵၢၼ်ၾၢႆႇၵူတ်ႇထတ်းၵူၼ်းၶဝ်ႈဢွၵ်ႇမိူင်းမၢၼ်ႈ (လဝက) ႁဵတ်းဢွၵ်ႇပၼ်ဝႆႉၼၼ်ႉမႃးထတ်းထွင်သေ မၵ်းမၼ်ႈ ႁဵတ်းပၼ်ဝႂ်ဢၼ်မႂ်ႇၵႂႃႇ ၼႆယဝ်ႉ။

ၵဵဝ်ႇလူၺ်ႈလွင်ႈၸုမ်းသိုၵ်းတဢၢင်း တဵၵ်းတဵင် မိပ်ႇငႅၼ်း ၸီႉသင်ႇႁႂ်ႈၵူၼ်းမိူင်းၸိူဝ်းတူၵ်းယူႇၼႂ်းၼႃႈတီႈၶဝ်ၵုမ်းၵမ်ဝႆႉ ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃးၼႆႉၵႂႃႇႁဵတ်းမၢႆၾၢင် လႄႈ ဝႂ်ၵူႈလွင်ႈလွင်ႈၼၼ်ႉသေ ႁဵတ်းႁႂ်ႈၸဝ်ႈၵႃႉၶူဝ်းၵုၼ်ႇ ႁဵတ်းၵၢၼ်ပၢႆးမၢၵ်ႈမီးၶဝ် ဢွၵ်ႇၶၢဝ်းတၢင်းၵႂႃႇမႃးယၢပ်ႇၽိုတ်ႇ ၼႆယဝ်ႉ။

ၼၢင်းယိင်း ၵေႃႉႁဵတ်းၵၢၼ်ၵႃႉၶၢႆ ၸဝ်ႈပၢႆးမၢၵ်ႈမီး ၼႂ်းမိူင်းတႆးပွတ်းႁွင်ႇ ၵေႃႉၼိုင်ႈလၢတ်ႈၼႄတီႈၽူႈတွႆႇႁွၵ်ႈဝႃႈ “သိုၵ်းလွႆၶဝ်ၼႆႉ မိူဝ်ႈၶဝ်ႁဵတ်းပၼ်ၵူၼ်းတၢင်းဝဵင်းၼမ်ႉတူႈၼၼ်ႉၵေႃႈ ၶဝ်လႆႈၵႂႃႇငိုၼ်းၼပ်ႉႁူဝ်ႁဵင်သႅၼ်မၼ်း။ မိူဝ်ႈလဵဝ်ၵေႃႈ ၺႃးၵမ်းၼမ်ႉၶမ်းယဝ်ႉ။ ဝႂ်လၢႆႊသိၼ်ႊဢၼ်ၶဝ်ၸႂ်ႉႁဵတ်းယူႇဢၼ်ၼၼ်ႉဢၼ်ၼႆႉၼႆႉ တေၵႂႃႇၸႂ်ႉလႆႈတီႈလႂ်တေႉတေႉတမ်ႉဢမ်ႇ ၸႅင်ႈလႅင်း။ ၼႂ်းမိူင်းတႆးပွတ်းႁွင်ႇၼႆႉသမ်ႉ မီးၸုမ်းသိုၵ်းၼမ်။ ၸွမ်ႇၵႄႈၵၼ်ပႂ်ႉလူင်ၵႂႃႇဝႆႉ။ ၶဝ်ႁဵတ်းၸိူင်ႉၼႆၼႆႉ ႁဵတ်းႁႂ်ႈၵူၼ်းမိူင်းၵႂႃႇ မႃးယၢပ်ႇၵူၺ်း။ ပေႃးၺႃးသိုၵ်းၸုမ်းၼိုင်ႈ သမ်ႉတေလႆႈသိမ်းၶွင်သိုၵ်းၸုမ်းၼိုင်ႈၼႆ တုၵ်ႉၶၼႃႇ” ၼႆယဝ်ႉ။

ဝဵင်းၼမ်ႉၶမ်းၼႆႉ သိုၵ်းတဢၢင်းၵုမ်းၵမ်ပၼ်ႇၵၢၼ်ၽွင်းငမ်းဝႆႉသေ ဝၢႆးလင် သိုၵ်းမၢၼ်ႈယိုတ်းမိူင်း ႁႅၼ်းသိုၵ်းလေႃႇတိုၵ်းႁၢဝ်ႈႁႅင်း သိုၵ်းတဢၢင်းၸိူဝ်းတူင်ႉၼိုင်ယူႇသဝ်းၼႂ်းၸႄႈဝဵင်းၼွင်ၶဵဝ်၊ ၸႄႈဝဵင်းၵျွၵ်ႉမႄး၊ ၸႄႈဝဵင်းသီႇပေႃႉ လႆႈထွႆဢွၵ်ႇပၼ်ၶိုၼ်းသိုၵ်းမၢၼ်ႈယဝ်ႉ သိုပ်ႇၸႂ်ႉႁိူဝ်းမိၼ် လႄႈ ၶိူင်ႈတရူၼ်ႊၶိုၵ်ႉတွၼ်း ယိုဝ်းသႂ်ႇ ၸွမ်းၼႂ်းၼႃႈတီႈသိုၵ်းတဢၢင်းၵုမ်းၵမ်ဢမ်ႇထၢတ်ႇလႄႈ ၵူၼ်းမိူင်းဝဵင်းၼမ်ႉၶမ်းၵေႃႈ ဢွၼ်ၵၼ်မႆႈၸႂ်ၵူဝ်သိုၵ်းမၢၼ်ႈတင်း သိုၵ်းတဢၢင်းပဵၼ်ပၢင်တိုၵ်းၵၼ်ထႅင်ႈ။ မၢင်ၸိူဝ်းလႆႈႁႅၼ်းၶူဝ်းလဵင်း သွင်ႉပၢႆႈၵႂႃႇသေႃႉယူႇတၢင်ႇဝဵင်းဝႆႉလူင်ႈၼႃႈ ၼႆယဝ်ႉ။