ၽွင်းသိုၵ်းမၢၼ်ႈႁၢင်ႈႁႅၼ်းတႃႇႁဵတ်းပွႆးပွႆႇႁူင်းၾႆးမိၼ်လိူၼ်သိပ်းသွင် ဝဵင်းတူၼ်ႈတီးယူႇၼႆႉ တႃႇလွင်ႈႁူမ်ႇလူမ်ႈၼႆသေ ထတ်းရူတ်ႉၵႃးႁၢဝ်ႈႁႅင်း- ဢမ်ႇပၼ်ရူတ်ႉတၢင်ႇၵုၼ်ႇ ၶဝ်ႈဢွၵ်ႇဝဵင်း ၵူၼ်းမိူင်းဝဵင်းတူၼ်ႈတီးလၢတ်ႈၼင်ႇၼႆ။
သိုၵ်းမၢၼ်ႈႁၢမ်ႈဢမ်ႇပၼ်ရူတ်ႉတၢင်ႇၵုၼ်ႇ ၶဝ်ႈဢွၵ်ႇဝဵင်း၊ ဢမ်ႇပၼ်တႆႇသဵၼ်ႈတၢင်းၵၢင်ဝဵင်း ပႃးၸဵမ်သဵၼ်ႈတၢင်းလဵပ်ႈဝဵင်းၸိူဝ်းၼႆႉ တႃႇၶၢဝ်းတၢင်း 8 ဝၼ်း ၽွင်းပွႆးဝႃႈၼႆ။
ပေႃးထိုင်မႃးဝၼ်းတီႈ 29/10/2025 ၼႆႉ ႁွင်ႈၵၢၼ်ၾၢႆႇၽွင်းငမ်းဝဵင်းတႂ်ႈသိုၵ်းမၢၼ်ႈ တေၸတ်းႁဵတ်း ပွႆးႁူင်းၾႆးမိၼ် တီႈပၢင်ႇ ဢဝေႇရႃႇ ဝဵင်းတူၼ်ႈတီး ၊ တွၼ်ႈတႃႇ တေဢမ်ႇမီးပၼ်ႁႃ ရူတ်ႉၵႃးတိတ်းၶမ် လႄႈ တွၼ်ႈတႃ လွင်ႈႁူမ်ႇလူမ်ႈၼၼ်ႉ ပလိၵ်ႈသိုၵ်းမၢၼ်ႈႁႄႈႁၢမ်ႈ ရူတ်ႉၵႃးယႂ်ႇ ၵႃးတၢင်ႈၶူဝ်းၵုၼ်ႇ ၵႂႃႇမႃးၶိုၼ်ႈလူင်းတီႈသဵၼ်ႈတၢင်းလဵပ်ႈဝဵင်း တႄႇဝၼ်းတီႈ 29/10/2025 ထိုင် 5/11/2025 ၼႆယဝ်ႉ ။
ၾၢႆႇတင်းပလိၵ်ႈသိုၵ်းမၢၼ်ႈႁႄႉႁၢမ်ႈ ၵႃးလူင်တၢင်ႇၵုၼ်ႇ ၵႂႃႇမႃးတႄႇယၢမ်းႁူဝ်ၶမ်ႈ 4 မူင်းထိုင် ၵၢင်ၼႂ် 4 မူင်း ဝႃႈၼႆ ။
ၵူၼ်းမိူင်းဝဵင်းတူၼ်ႈတီး လၢတ်ႈၽူႈတွႆႇႁွၵ်ႈဝႃႈ – “ မိူဝ်ႈပီၵၢႆတႄႉ ၶဝ်ၸႂ်ႉၵႃးတၢင်ႇၵုၼ်ႇၵႂႃႇ တၢင်း သဵၼ်ႈတၢင်း လဵပ်ႈဝဵင်းဢဝ် ၊ ၶဝ်ဝႃႈယွၼ်ႉပိူဝ်ႈရူတ်ႉၵႃးတိတ်းၶမ် ၊ သဵၼ်ႈတၢင်းလူႉလႄႈ ပီၼႆႉ ၶဝ်ႈႁၢမ်ႈပႅတ်ႈႁူဝ်ၶမ်ႈ 4 မူင်း ထိုင် ၵၢင်ၼႂ် 4 မူင်း ဢမ်ႇပၼ်လတ်းၵႂႃႇမႃးယဝ်ႉ ၊ တေပိုတ်ႇပဵၼ်တႃႇ ၵူၼ်းၵႂႃႇပွႆး ႁႂ်ႈၸႂ်ႉပဵၼ်သဵၼ်ႈတၢင်း လူင်းမႃး တၢင်းသဵၼ်ႈတၢင်းလဵပ်ႈဝဵင်းၼၼ်ႉ ၊ သဵၼ်ႈတၢင်းလဵပ်ႈဝဵင်းၼၼ်ႉ မၼ်းၵႅပ်ႈၼႃႇ ၵႃးၵေႃႈၶမ်ၼမ် ”- ဝႃႈၼႆ ။
တႄႇၼႂ်းဝၼ်းတီႈ 28/10/2025 ၼၼ်ႉ တေတႄႉပိုတ်ႇပၼ်သဵၼ်ႈတၢင်းလဵပ်ႈဝဵင်း တႃႇၸႂ်ႉပဵၼ်တၢင်းလူင်း ၵႂႃႇမႃး- ၼႆယဝ်ႉ ။
လႆႈႁူႉဝႃႈ ရူတ်ႉၵႃးယႂ်ႇဢၼ် လတ်းၶၢမ်ႈ ၵႂႃႇမႃးၼိူဝ်သဵၼ်ႈတၢင်းလဵပ်ႈဝဵင်းတူၼ်ႈတီး ၼၼ်ႉ မၢင်ၸိူဝ်း ပဵၼ်ရူတ်ႉၵႃးပဝ်ႇ ဢၼ်လုၵ်ႉတၢင်း ဝဵင်းတူၼ်ႈတီး လူင်းမႃး တႃႇတေၵႂႃႇတၢင်ႇထၢၼ်ႇႁိၼ် ၼႂ်းမိူင်းတႆးပွတ်းၸၢၼ်း ပွတ်းႁွင်ႇ။ မၢင်ၸိူဝ်းသမ်ႉ ပဵၼ်ဢၼ်တၢင်ႇထၢၼ်ႇႁိၼ်မိူင်းတႆးၶိုၼ်ႈမႃး ဝဵင်းတူၼ်ႈတီး ဢၢၼ်းတေၵႂႃႇသူင်ႇလူင်းၵႂႃႇတၢင်းမိူင်းမၢၼ်ႈ တူင်ႈပဵင်း။ မၢင်ၸိူဝ်း ပဵၼ်ရူတ်ႉၵႃး တၢင်ႇၶူဝ်းၵုၼ်ႇ ဢၼ်လုၵ်ႉတၢင်းမိူင်းလႃး – ၵဵင်းတုင် – တႃႈၶီႈလဵၵ်းမႃး ဢၢၼ်းတေၵႂႃႇတၢင်းမိူင်းမၢၼ်ႈ ဝႃႈၼႆ။
ပၢင်ပွႆးႁူင်းၾႆးမိၼ်ၼႆႉ ၵူၼ်းႁူႉၸၵ်းပွႆးၼမ် ရူတ်ႉၵႃးၵေႃႈၼမ် လႄႈ ၵႆႉမီးပၼ်ႁႃ ရူတ်ႉၵႃးတိတ်းၶမ်၊ ပၼ်ႁႃၵူၼ်းလၵ်ႉၵူၼ်းၸၵ်ႉၵူၼ်းၸူၼ်၊ ပၼ်ႁႃၽိတ်းမေႃးပေႃႉထုပ်ႉတၢပ်ႇႁူဝ်ၶႃႈႁႅမ်ၵၼ်ၸိူဝ်းၼႆႉၵေႃႈမီးၼမ်မႃးၵူႈပီ လႄႈ ႁႂ်ႈၾၢင်ႉၵၼ်ၵႂႃႇမႃးပႃး – ၵူၼ်းၸၢႆးပိုၼ်ႉတီႈလၢတ်ႈ ။
ယွၼ်ႉ COVID လၢမ်းၽႄႈ ငဝ်းလၢႆးဝၢၼ်ႈမိူင်းဢမ်ႇၼိမ်သဝ်း ပၢင်ပွႆးႁူင်းၾႆးမိၼ်ၼႆႉ ဢမ်ႇပဵၼ်ၸတ်းႁဵတ်းပွႆး မီးမႃး 3-4 ပီ ။ ပီၵၢႆလႄႈပီဢွၼ် 2023-2024 ၼႆႉ သိုၵ်းမၢၼ်ႈၶိုၼ်းတဵၵ်းၸႂ်ႉၵူၼ်းမိူင်းပိုၼ်ႉတီႈၸတ်းႁဵတ်းၶိုၼ်း ။ ၼႂ်းပီၼႆႉၵေႃႈသိုၵ်းမၢၼ်ႈၸီႉသင် ၸတ်းႁဵတ်းပွႆး တေတႄႇၸတ်း ၼႂ်းႁၢင်လိူၼ်ထူၼ်ႈ 10 ဢွၵ်ႊထူဝ်ႊပိူဝ်ႊ တေႃႇထိုင် ႁူဝ်လိူၼ်ထူၼ်ႈ 11 ၼူဝ်ႊဝႅမ်ႊပိူဝ်ႊ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ