သုၼ်ငမ်းယဵၼ် လႄႈၾၢႆႇမႄးလီၸိူဝ်ႉၸၢတ်ႈ NRPC ၶွင်လူင်ပွင်ၸိုင်ႈၼူၵ်ႉယုင်း ၵပ်းၾူၼ်း ၸူး ၽူႈတူၵ်း ပုၼ်ႈၽွၼ်းၼင်ႈၼၵ်း(ႁူဝ်ပဝ်ႈ) ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU သေ လၢတ်ႈဝႃႈ ဢမ်ႇပၼ်ႁဵတ်း ပၢင်ၵုမ်  ၼႆ လႄႈ ဢၼ်ႁၢင်ႈႁႅင်း တႃႇႁဵတ်းပၢင်ၵုမ် ၼႂ်းဝၼ်းတီႈ 3-4/9/2018 ၼၼ်ႉၵေႃႈ ၸိူင်ႉၵၢတ်ႈ ပႅတ်ႈယဝ်ႉ – လႆႈႁူႉၶၢဝ်ႇမီးၼၼ်ႇၼႆ။

မိူဝ်ႈဝၼ်းတီႈ 27/8/2018 ၽူႈမီးပုၼ်ႈၽွၼ်း တီႈလုမ်း NRPC ၵပ်းၾူၼ်းၸူး လုင်းၸၢႆးဢၢႆႈပဝ်း ႁူဝ်ပဝ်ႈ ပႃႇတီႇသိူဝ်ၽိူၵ်ႇ ၽူႈတူၵ်းပုၼ်ႈၽွၼ်း ႁူဝ်ပဝ်ႈ CSSU သေလၢတ်ႈဝႃႈ သူင်ႇလိၵ်ႈပွၵ်ႈၶိုၼ်းဝႆႉ လွင်ႈဢမ်ႇ ပၼ်ႁဵတ်းပၢင်ၵုမ် ။ ဝၢႆးၼၼ်ႉ လုင်းၸၢႆးၽူဝ်း ဢွင်ႇ  ၽူႈၼမ်းၼႂ်းလူင် CSSU တႅမ်ႈလိၵ်ႈၸူး လုၵ်ႈၸုမ်း CSSU လွင်ႈဝႃႈဢမ်ႇပဵၼ်ႁဵတ်းပၢင်ၵုမ် ယဝ်ႉဝႃႈၼႆ။

ၵဵဝ်ႇၵပ်းလွင်ႈၼႆႉသေ လုင်းၸၢႆးဢၢႆႈပဝ်းလၢတ်ႈဝႃႈ – “မိူဝ်ႈႁဵတ်းပၢင်ၵုမ်တီႈၵဵင်းမႂ်ႇဝႃႇ တီႈယၼ်ႇၵုင်ႇ ဝႃႇၸိူဝ်းၼႆႉ ယၢမ်ႈၺႃးႁၢမ်ႈ။ မိူဝ်ႈတိုၵ်ႉႁဵတ်းပၢင်ၵုမ်ယူႇ ဢမ်ႇၶႂ်ႈၺႃးၸိူင်ႉၼၼ်လႄႈ မိူဝ်ႈဝူင်ႈပူၼ်ႉၼႆႉ လုင်းလႆႈတႅမ်ႈလိၵ်ႈၸူး တေႃႇဢွင်ႇသၢၼ်းသုၵျီႇလႄႈ ၽူႈၵွၼ်းသိုၵ်းမၢၼ်ႈ ၸွမ်ၸိၵ်းသိုၵ်း မိၼ်းဢွၵ်ႇလၢႆႇဝႆႉ။ ၽိူဝ်ႇၶဝ်ၵပ်းၾူၼ်း လၢတ်ႈ မႃးမိူဝ်ႈဝႃး ဝႃႈပွင်ႈလိၵ်ႈၶိုၼ်းဝႆႉ လွင်ႈဢမ်ႇပၼ်ႁဵတ်းပၢင်ၵုမ်။ ပဵၼ်ၵွပ်ႈသင်ၼႆ ပေႃးလိၵ်ႈ ၼၼ်ႉ ထိုင်မႃးၵွၼ်ႇ ၸင်ႇၸၢင်ႈလၢတ်ႈ ”- ဝႃႈၼႆ။

ပၢင်ၵုမ်ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU ဢၼ်ဢၢၼ်းၸတ်းႁဵတ်းတီႈဝဵင်းတူၼ်ႈတီး သွင်ဝၼ်း 3-4/9/2018 ၼႆႉ ဢၢၼ်းဢုပ်ႇၵၼ် ၵဵဝ်ႇၵပ်းၵၢၼ်ၶိုပ်ႈၼႃႈၶိုၼ်ႈသင်ႉမူႇၸုမ်း၊ ၵဵဝ်ႇၵပ်းငဝ်းလၢႆး ၵၢၼ်မိူင်း ဢၼ်ပဵၼ်ယူႇ ၸိူဝ်းၼၼ်ႉ ဢၢၼ်းဢုပ်ႇဢူဝ်းၵၼ်ပဵၼ်တၢင်းၵၢၼ် လႄႈ လုင်းၸၢႆးဢၢႆႈ ပဝ်းၸင်ႇလႆႈတႅမ်ႈလိၵ်ႈထိုင် တီႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းသုၵျီႇ၊ တင်း ၸိၵ်းၸွမ်သိုၵ်းလူင် ပွင် ၸိုင်ႈမၢၼ်ႈ ၸွမ်သိုၵ်းလူင်မိၼ်းဢွင်ႇလၢႆႇ – ဝႃႈၼႆ။

ၸၢႆးလဵၵ်ႉ ၽူႈၶၢၼ်ပၢၵ်ႇ ငဝ်ႈငုၼ်းတီႈမူဝ်ႇၶရေႇၸီႇ ၸိူဝ်ႉၶိူဝ်းတႆး SNLD လၢတ်ႈဝႃႈ – “လူင်ပွင်ၸိုင်ႈ တင်း သိုၵ်းလူင်ပွင်ၸိုင်ႈမၢၼ်ႈ မီးၵၢင်ၸႂ် ၼိူဝ် ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး ၸိူင်ႉႁိုဝ် ဢၼ်ဝႃႈ ဢမ်ႇလႆႈႁူႉတႅၵ်ႇလႅင်း။ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး ၼႆႉယိူင်းဢၢၼ်းတႃႇတႆးၽွမ်ႉႁူမ်ႈ၊ တႃႇၸၢဝ်းၶိူဝ်းၼႂ်းၸိုင်ႈတႆးၽွမ်ႉႁူမ်ႈ၊ ယိူင်းဢၢၼ်းသုင်သုတ်းတႃႇ ၵေႃႇသၢင်ႈလွင်ႈၽွမ်ႉႁူမ်ႈ တင်း ၵူႈၸၢဝ်းၶိူဝ်းယဝ်ႉ။ ၵွပ်ႈၼၼ် CSSU ၼႆႉ ဢမ်ႇၸႂ်ႈတႃႇ ယႃႉမိူင်းႁူမ်ႈတုမ် ၊ ဢမ်ႇၸႂ်ႈတႃႇ ၵိတ်ႇၶႂၢင် သၢၼ်ၶတ်းမိူင်းႁူမ်ႈ ၼႆ လူင်ပွင်ၸိုင်ႈ တင်း သိုၵ်းလူင်ပွင်ၸိုင်ႈမၢၼ်ႈလီလႆႈႁူႉ။ ဢမ်ႇႁူႉလွင်ႈတၢင်း ၸိူဝ်းၼႆႉသေ ၵႃႈပဵၼ် ၵၢၼ် CSSU ၸွမ်းႁႄႉႁၢမ်ႈယူႇမႅၵ်းမႅၵ်းၸိုင် တုမ်ႉတိူဝ်ႉလွင်ႈယုမ်ႇယမ် တုမ်ႉတိူဝ်ႉတႃႇႁူမ်ႈၵၢၼ်ႁဵတ်းသၢင်ႈလွင်ႈငမ်းယဵၼ် လႄႈမိူဝ်းၼႃႇဢမ်ႇထုၵ်ႇလီႁႂ်ႈပဵၼ်ႁႂ်ႈမီးၸိူင်ႉၼႆ ထႅင်ႈၼၼ်ႉ ၽူႈမီးပုၼ်ႈၽွၼ်းၶဝ် လီလႆႈၾၢင်ႉၵၢၼ်ဝူင်ႉသၢင်ႈတႅပ်းတတ်းၸိူင်ႉၼႆ” – ဝႃႈၼႆ။

ဢိင်ၼိူဝ်လွင်ႈတၢင်းဢၼ် လူင်ပွင်ၸိုင်ႈမၢၼ်ႈ ႁၢမ်ႈႁႄႉပၢင်ၵုမ် ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU သေ ၸဝ်ႈၶိုၼ်းသႂ် ၸႂ်ယဵၼ် ၽူႈႁူမ်ႈၵမ်ႉၸွႆႈၵၢၼ်ငမ်းယဵၼ်မိူင်းမၢၼ်ႈ ၊ ၽူႈၵွၼ်းႁွင်ႈၵၢၼ် PI (ပျီႇထွင်ႉၸုဢိၼ်ႊသတီႊၵျုတ်ႉ) လၢတ်ႈတီႈ ၽူႈတွႆႇႁွၵ်ႈဝႃႈ –

“ပေႃးယူႇတီႈၵူၼ်းၶႂ်ႈၵေႃႇသၢင်ႈလွင်ႈငမ်းယဵၼ်ၼႆ မၼ်းထုၵ်ႇလႆႈႁႃ သဵၼ်ႈတၢင်းၵူႈလၢႆး။ တၢင်းၼႆႉပိၵ်ႉ တၢင်းၼႆႉပိုတ်ႇ ၼႆ ပိူၼ်ႈဢမ်ႇႁဵတ်း။ တေလႆႈၵၢင်ၸႂ်ၵူႈၾၢႆႇၾၢႆႇသေ ႁဵတ်း။ တေလႆႈတိူင်ႇပၢင်ၵၼ်သေ ႁဵတ်း။ ဢၼ်ၼႆႉသမ်ႉဢဝ်ၵၢင်ၸႂ်ၾၢႆႇလဵဝ်သေ ႁဵတ်းၼႆႉ ၸွင်ႇတေလႆႈလွင်ႈငမ်းယဵၼ်ယူႇႁႃႉ ၼႆ လီထၢမ်တူၺ်းၶိုၼ်းၵၢင်ၸႂ်တူဝ်ၵဝ်ႇဢိူဝ်ႈ။ ႁဵတ်းလွင်ႈငမ်းယဵၼ်ၼႆႉ မၼ်းပဵၼ်ၵၢၼ်ဢၼ်လူဝ်ႇၸႂ်ၵႂၢင်ႈ တႄႉတႄႉ ၸႂ်ယၢဝ်းတႄႉတႄႉ။ ဢဝ်ၸႂ်ၵႅပ်ႈသေႁဵတ်းမၼ်းဢမ်ႇလႆႈ။ ဢဝ်ၸႂ်ပိတ်းၸႂ်ပွတ်းသေ ႁဵတ်း မၼ်းဢမ်ႇလႆႈ။ ၸဝ်ႈၸိူဝ်းဢၼ်မီးပၺ်ၺႃ ၶဝ် လၢတ်ႈဝႃႈ ဢမ်ႇမီးသဵၼ်ႈတၢင်းတႃႇလႆႈလွင်ႈငမ်း ယဵၼ် မီးလွင်ႈငမ်းယဵၼ်ၼႆႉၵူၺ်းယဝ်ႉပဵၼ်သဵၼ်ႈတၢင်း There is no way to peace , peace is the way ၼႆဝႃႇ။ တႃႇလႆႈလွင်ႈငမ်းယဵၼ်ၼႆႉ တေလႆႈဢဝ်လၢႆးငမ်းယဵၼ်သေႁဵတ်း။ ႁဝ်းဢမ်ႇဢဝ်လၢႆ ငမ်း ယဵၼ် သေ သမ်ႉတေဢဝ်လၢႆး လိူတ်ႇ မႆႈသေ ႁဵတ်းၼႆႉမၼ်းဢမ်ႇလႆႈငမ်းယဵၼ်လႆႈ” – ဝႃႈၼႆ။

ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU ၼႆႉ ၸွမ်သိုၵ်းလူင်ယွတ်ႈသိုၵ်း ၽူႈၼမ်းၶွင်ႇသီႇဢဝ်ၶိုၼ်း ၸိုင်ႈတႆးတပ်ႉသိုၵ်းၸိုင်ႈတႆး RCSS/SSA ဢၼ်လူင်းလၢႆးမိုဝ်းလိၵ်ႈႁူမ်ႈမၢႆၵိုတ်းတိုၵ်း NCA ၼၼ်ႉ ဢွၼ်ႁူဝ်ၵေႃႇတင်ႈမႃးၸဵမ်မိူဝ်ႈပီ 2013။ ပၢၼ်လူင်ပွင်ၸိုင်ႈ တဵင်းၸဵင်ႇ ဢမ်ႇႁႄႉႁၢမ်ႈသေ ၼႃႈၵၢၼ် CSSU သေဢမ်ႇၵႃး ဢၼ်ႁဵတ်းပၢင်ၵုမ် တီႈမိူင်းၵွၵ်ႈ မိူဝ်ႈပီ 2014 ၼၼ်ႉ ယင်းသူင်ႇတူဝ်တႅၼ်းလူင်ပွင်ၸိုင်ႈ ၽွင်းလူင် ဢူးဢွင်ႇမိၼ်း မႃးၸွမ်း လုင်းၸၢႆးဢၢႆႈပဝ်းသေ ၶဝ်ႈႁူမ်ႈပိုတ်ႇပၢင်ၵုမ် CSSU  လူးၵွၼ်ႇ။ ပၢၼ်လူင်ပွင်ၸိုင်ႈၼူၵ်ႉယုင်း ဢၼ်ဢွင်ႇသၢၼ်းသုၵျီႇဢွၼ်ႁူဝ်ၼႆႉတႄႉ ၾၢႆႇသိုၵ်းမၢၼ်ႈ ၾၢႆႇလူင်ပွင်ၸိုင်ႈမၢၼ်ႈ ၸွမ်းႁၢမ်ႈ ၸွမ်းႁႄႉမႃးယူႇတႃႇသေႇ။