ဝၼ်းတီႈ 26/05/2025 ၼႆႉ ၸုမ်းဢႃႊသီႊယၼ်ႊ တႄႇၸတ်းႁဵတ်း ပၢင်ၵုမ်သုင်သုတ်း တီႈဝဵင်း ၵူဝ်ႊလူဝ်ႊလမ်ႊပူဝ်ႊ မိူင်းမလေးသျႃး ၼႂ်းၼၼ်ႉ တေဢုပ်ႇၵုမ်ၵၼ်ပႃး လွင်ႈၵၢၼ်မိူင်း မိူင်းမၢၼ်ႈ  ပၢင်ၵုမ်ၼႆႉ ၸတ်းႁဵတ်းၵႂႃႇ တႃႇၶၢဝ်းတၢင်း 2 ဝၼ်း။

ပၢင်ၵုမ်သုင်သုတ်း ၸုမ်းဢႃႊသီႊယၼ်ႊၼႆႉ ယူႇတီႈ မိူင်းမလေးသျႃး ႁပ်ႉပုၼ်ႈၽွၼ်းပဵၼ် ႁူဝ်ပဝ်ႈဝႆႉသေ ဢွၼ်ၼမ်းၸတ်းႁဵတ်း၊ မီးၽူႈဢွၼ်ႁူဝ် လၢႆၸိုင်ႈမိူင်း ၸိူဝ်းပဵၼ်လုၵ်ႈ ၸုမ်းဢႃႊသီႊယၼ်ႊ ၶဝ်ႈႁူမ်ႈ။ ၾၢႆႇမိူင်းမၢၼ်ႈတႄႉ ပဵၼ်ၽူႈမီးပုၼ်ႈၽွၼ်း ၾၢႆႇၼွၵ်ႈမိူင်းၶဝ်ႈႁူမ်ႈ။

တႃႇၵႄႈလိတ်ႈပၼ်ႁႃၵၢၼ်မိူင်း မိူင်းမၢၼ်ႈ ဢၼ်ပဵၼ်မႃး ဝၢႆးလင် သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းၼၼ်ႉသေ မိူဝ်ႈပၢင်ၵုမ်သုင်သုတ်း ၸုမ်းဢႃႊသီႊယၼ်ႊ ဢၼ်ၸတ်းႁဵတ်းတီႈ မိူင်း ဢိၼ်ႊတူဝ်ႊၼီႊသျႃး ဝၢႆးလင် သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်း လႆႈ 2 လိူၼ်ပၢႆၼၼ်ႉ လႆႈတမ်းဝၢင်းဝႆႉၶေႃႈတူၵ်းလူင်းႁူမ်ႈၵၼ် 5 ၶေႃႈ။ မိူဝ်ႈပၢင်ၵုမ်ၼၼ်ႉ ႁူဝ်ၼႃႈ သိုၵ်းမၢၼ်ႈ ယိုတ်းမိူင်း ၵေႃႈ ၶဝ်ႈႁူမ်ႈၸွမ်း။

ၵူၺ်းၵႃႈ ဝၢႆးလင်ၼၼ်ႉမႃး ယွၼ်ႉသိုၵ်းမၢၼ်ႈ ဢမ်ႇႁဵတ်းသၢင်ႈ ၸွမ်းၼင်ႇ ၶေႃႈတူၵ်းလူင်းၵၼ်ဝႆႉလႄႈ ၸင်ႇလႆႈပိၵ်ႉဢိုတ်း ဢမ်ႇပၼ်ၽူႈဢွၼ်ႁူဝ်ၸၼ်ႉသုင် သိုၵ်းမၢၼ်ႈ ၶဝ်ႈႁူမ်ႈၸွမ်းၼႂ်းပၢင်ၵုမ် ဢႃႊသီႊယၼ်ႊ။

ၶေႃႈတူၵ်းလူင်းႁူမ်ႈၵၼ် 5 ၶေႃႈၼၼ်ႉပဵၼ် – တေလႆႈၵိုတ်း လွင်ႈၵေႃႇၵၢၼ်ႁၢႆႉၼႂ်းမိူင်းမၢၼ်ႈ၊ ႁႂ်ႈႁူပ်ႉထူပ်းဢုပ်ႇၵုမ်ၵၼ်တင်း မုၵ်ႉၸုမ်း ၸိူဝ်းမီးဝႆႉၼႂ်းမိူင်းသေ ႁႃၶေႃႈတွပ်ႇ၊ ႁႂ်ႈမၵ်းမၼ်ႈဝႆႉ ၽူႈတၢင်တူဝ်ၶိုၵ်ႉတွၼ်း ၸုမ်းဢႃႊသီႊယၼ်ႊ တႃႇၶဝ်ႈယူႇၵႄႈၵၢင်သေ ၸွႆႈၵႄႈလိတ်ႈပၼ်ႁႃ ၼႂ်းမိူင်းမၢၼ်ႈ၊ ႁႂ်ႈဢႃႊသီႊယၼ်ႊ ပၼ်လွင်ႈၸွႆႈထႅမ် ၵူၼ်းၼင်ႇၵၼ် ႁၼ်ထိုင်ၸွႆႈထႅမ်ၵၼ်တီႈ မိူင်းမၢၼ်ႈလႄႈ ႁႂ်ႈၽူႈတၢင်တူဝ်ၸုမ်းဢႃႊသီႊယၼ်ႊ လႆႈၵႂႃႇႁူပ်ႉထူပ်း ၽူႈၵဵဝ်ႇၶွင်ႈ/ ၽူႈမီးပုၼ်ႈၽွၼ်းၼႂ်းမိူင်းမၢၼ်ႈ ၼႆယဝ်ႉ။

ပၢင်ၵုမ်သုင်သုတ်း ၸုမ်းဢႃႊသီႊယၼ်ႊ ဢၼ်ၸတ်းႁဵတ်း တီႈမိူင်းမလေးသျႃး ၼႆႉၵေႃႈ လႅပ်ႈ တေဢုပ်ႇၵုမ်ထတ်းသၢင်ၶိုၼ်း ၶေႃႈတူၵ်းလူင်း 5 ၶေႃႈ ၼႆႉယူႇ။ ႁွင်ႈၵၢၼ် ၽွင်းလူင်ၾၢႆႇၼွၵ်ႈမိူင်း မိူင်းထႆးတႄႉ လၢတ်ႈဝႆႉဝႃႈ တေဢုပ်ႇၵုမ်ၵႂႃႇ ၵဵဝ်ႇလူၺ်ႈလွင်ႈတေပၼ်တၢင်းၸွႆႈထႅမ် တီႈမိူင်းမၢၼ်ႈ ဝႃႈၼႆ။