မိူဝ်ႈဝၼ်းတီႈ 9 လိူၼ်ၵျူႊလၢႆႊ လူင်ပွင်ၸိုင်ႈသိုၵ်းမၢၼ်ႈယိုတ်းမိူင်း ၸတ်းပၢင်ၵုမ်လူင်လုမ်းသၽႃးမိူင်းႁူမ်ႈတုမ်သေ ဢုပ်ႇဢူဝ်းတူၵ်းလူင်းမၵ်းမၼ်ႈၵၼ် ထႅင်ႈဢမ်ႇႁိုင်သင်ၼႆႉ တေႁႂ်ႈဢူးတိၼ်ႇမွင်ႇသူၺ်ႇ ၽွင်းလူင်ၾၢႆႇမိူင်းၼွၵ်ႈၵႂႃႇႁူပ်ႉဢုပ်ႇဢူဝ်း ၸွမ်း ၽွင်းလူင်မိူင်းၼွၵ်ႈ ၸိူဝ်းပဵၼ်ၽူႈၶဝ်ႈၸုမ်း ၼႂ်းၸိုင်ႈမိူင်းဢႃႊသီႊယၼ်ႊ ၼႆယဝ်ႉ။

ပၢင်ႁူပ်ႉဢုပ်ႇၵၼ်ၼႆႉ တေၸတ်းႁဵတ်းတီႈလႂ် ဝၼ်းလႂ်ၼႆၼၼ်ႉ သိုၵ်းမၢၼ်ႈဢမ်ႇပိုၼ်ၽၢဝ်ႇပဵၼ်တၢင်းၵၢၼ်သေတႃႉ ၸွမ်းၼင်ႇႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း မိူင်းထႆးပိုၼ်ၽၢဝ်ႇဝႆႉတႄႉ တေပဵၼ်ၼႂ်းဝၼ်းတီႈ 12 ႁူပ်ႉၵၼ်တီႈ ဝဵင်းၽတ်ႉထယႃး မိူင်းထႆးၼႆ ႁွင်ႈၵၢၼ်သိုဝ်ႇၶၢဝ်ႇ BBC ႁၢႆးငၢၼ်းဢွၵ်ႇဝႆႉၼင်ႇၼႆ။

ၵွၼ်ႇမိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း ပႆႇႁပ်ႉၼႃႈတီႈပုၼ်ႈၽွၼ်း “ၸွမ်ၸိုင်ႈ” ပဵၼ်တၢင်းၵၢၼ်ၼၼ်ႉ ဢူးတၢၼ်းသူၺ်ႇ ၽွင်းလူင်ၾၢႆႇႁွင်ႈၵၢၼ်မိူင်းၼွၵ်ႈ ယၢမ်ႈႁူပ်ႉဢုပ်ႇၵၼ်တင်း ၽွင်းလူင်ၾၢႆႇႁွင်ႈၵၢၼ်မိူင်းၼွၵ်ႈ မိူင်းထႆးယဝ်ႉပွၵ်ႈၼိုင်ႈ တီႈဝဵင်းၽတ်ႉထယႃး။

ဢူးတိၼ်ႇမွင်ႇသူၺ်ႇ ၽွင်းလူင်ႁွင်ႈၵၢၼ်ၾၢႆႇမိူင်းၼွၵ်ႈ ၸုမ်းလူင်ပွင်ၸိုင်ႈသိုၵ်းမၢၼ်ႈယိုတ်းမိူင်း လၢတ်ႈဝႃႈ – ၵဵဝ်ႇလူၺ်ႈၵၢၼ်မိူင်းမိူင်းမၢၼ်ႈ (မိူင်းႁူမ်ႈတုမ်) ၼႆႉသေ ၽူႈၶဝ်ႈၸုမ်းၼႂ်းၸိုင်ႈမိူင်းဢႃႊသီႊယၼ်ႊၶဝ် ဢမ်ႇပႆႇမီးတၢင်းႁၼ်ထိုင်မိူၼ်ၵၼ်သေတႃႉ လုၵ်ႉတီႈလွင်ႈၶဝ်ႈဢွၵ်ႇၵပ်းသိုပ်ႇႁႃ မိူင်းလႂ်မိူင်းၼၼ်ႉသေ တေလႆႈႁၼ်ဝႃႈ လွင်ႈၵပ်းသိုပ်ႇၵႄႈၵၢင် ဢႃႊသီႊယၼ်ႊ တင်း မိူင်းမၢၼ်ႈ မီးလွင်ႈၶိုပ်ႈၼႃႈမႃးၶိုၼ်းယူႇ ဝႃႈၼႆ။

ၼႂ်းၶၢဝ်းတၢင်း လူင်ပွင်ၸိုင်ႈသိုၵ်းယိုတ်းမိူင်း ၶိုၼ်ႈမႃးၸတ်းၵၢၼ်ၽွင်းငမ်းမိူင်း ၶၢဝ်းတၢင်း 2 လိူၼ်ပၢႆၼႆႉ ၽွင်းလူင်ၾၢႆႇၼွၵ်ႈမိူင်း မိူင်းထႆး၊ မိူင်းမလေးသျႃႊ၊ မိူင်းဢိၼ်ႊတူဝ်ႊၼီးသျႃႊလႄႈ မိူင်းလၢဝ်း ဢွၵ်ႇၶၢဝ်းတၢင်း မႃးႁူပ်ႉဢုပ်ႇၸွမ်းသိုၵ်းမၢၼ်ႈ။

လိူဝ်ၼၼ်ထႅင်ႈဢမ်ႇႁိုင်သင် ၽွင်းလူင်ၾၢႆႇၼွၵ်ႈမိူင်း ဢႃႊသီႊယၼ်ႊ ထႅင်ႈလၢႆၸိုင်ႈမိူင်းၵေႃႈ မီးၶပ်ႉမၢႆ တေဢွၵ်ႇၶၢဝ်းတၢင်း မႃးတီႈမိူင်းမၢၼ်ႈထႅင်ႈ ၼႆယဝ်ႉ။