ၸုမ်းသိုၵ်းမၢၼ်ႈၶႂၢၵ်ႈမိူင်းၶဝ် ၶတ်းၸႂ်တဵၵ်းတဵင်ယႃႉၵဝ်းဢူမ်ဢိုၼ် ၾိင်ႈငႄႈသိူၵ်ႈပိုၼ်း၊လိၵ်ႈလၢႆးၵႂၢမ်းလၢတ်ႈႁဝ်းၵူႈလွၵ်းၵူႈလၢႆး၊-ၵူႈၸိူဝ်ႉၵူႈပိူင်ၵူႈၸဝ်ႉၼႂ်ဝၼ်းၶမ်ႈဢၼ်ဝႃႈၼၼ်ႉ လၢတ်ႈယူႇတႅမ်ႈယူႇပွင်ႉယူႇ ပၢၵ်ႈလွင်ႈၼႄတၢင်းၵူၼ်းမိူင်းတႆးႁဝ်းၵေႃႈသမ်ႉပေႃးဢမ်ႇမေႃသုတ်းသဵင်ႈယဝ်ႉတူဝ်ႈသေပွၵ်ႈယဝ်ႉ။
ဢမ်ႇလိူဝ်သေလွင်ႈၽုၵ်ႇႁႆႈသွမ်ႈၼႃး၊ လွင်ႈမၢၵ်ႇၶဝ်ႈတဝ်ႈၼမ်ႉၸိူဝ်းၼႆႉၵေႃႈ ၶဝ်မႃးၸွမ်ႇၸိမ်ၸွၼ်ၸဵင်ႇၽိုတ်ႇႁိမ်ၸီးၸွမ်းၶဝ်ႈသေဢဝ်ၶွင်မၢၼ်ႈၶဝ်မႃးႁူမ်ႇတဵင်သုမ်ႇငမ်းပုတ်ႈတဵၼ်းပၼ်ၸိုဝ်ႈတိၵ်းတိၵ်းလႄႈ။ မိူၼ်ၼင်ႇၸိုဝ်ႈသဵင်ၶေႃႈႁွင်ႉႁိၵ်ႈ “ ၶဝ်ႈ ” ၼႆႉၵူၺ်းၵူၼ်းမိူင်းတႆးၵမ်ႈၼမ်ႁဝ်းယင်းတေႁူႉၸၵ်းၸိုဝ်ႈမၢၼ်ႈၼမ်လိူဝ်သေၸိုဝ်ႈတႆးလူးၵွၼ်ႇယဝ်ႉ။
ၵူၼ်းၵမ်ႈၼမ်ၸုပ်ႈသႅၼ်းၵၢင် ဢႃႇယု 40 လူင်းတႂ်ႈဢၼ်ယူႇၸွမ်းတႄႇ သၢပ်ႇ ဝဵင်းႁိမ်း ဝဵင်းတေႃႇထိုင်ၼႂ်းဝဵင်းမိူင်းတႆးၵမ်ႈၼမ်ၼႆႉတေႁူႉၸၵ်းၸိုဝ်ႈၶဝ်းမၢၼ်ႈၸိူဝ်ႉၼင်ႇ [ငစိန်၊ ငကျွဲ၊ ငကျွဲမွှေး၊ ဧည့်မထ၊ မီးဒုံး၊ပေါ် ဆန်းမွှေး၊ရွှေဝါထွန်း၊ ရွှေဝါယဥ◌်၊စူပါ ၊စူပါဖွဲ့ စူပါဒင်္ဂါး၊ဆင်းသိင်္ဂီ၊ ဆင်းသီရိ၊မနော်ဟရီ၊ကောက်ကြီး၊ ရွှေလီ၊ ရာကျော်၊ ဒင်္ဂါးအင်းမ၊စိန်တလေး ဌက်တောင်ပျံ၊မှော်ဘီ- -]ၸိူဝ်းၼႆႉလွၼ်ႉ။
ဢၼ်တေႁူႉၸၵ်းၸိုဝ်ႈ “ ၶဝ်ႈမိူင်းတႆး ” ၸိူင်ႉၼင်ႇ- [ၶဝ်ႈႁၢဝ်ႉ၊ၶဝ်ႈသႅင်၊ၶဝ်ႈၼူၵ်ႉတဵတ်ႇ ၊ၶဝ်ႈမဵတ်ႉယၢဝ်း၊ၶဝ်ႈလၢင်ႇလူင်၊ၶဝ်ႈလၢင်ႇပၢၼ်ၶျေး၊ၶဝ်ႈမဵတ်ႉမူၼ်း၊ၶဝ်ႈမူၼ်ႇႁူင်းပုၵ်ႉ၊ၶဝ်ႈမူၼ်ႇႁူင်းႁွမ်၊ၶဝ်ႈၵႂၢႆးလမ်ႁူင်းယၢဝ်း၊ ၶဝ်ႈၵၢင်ၶွင်ႇ ၶဝ်ႈလိူင်သၢင်ႇ၊ၶဝ်ႈလႅင်ဢွၼ်ႇ၊ၶဝ်ႈလႅင်လူင်၊ ၶဝ်ႈလၢႆး၊ ၶဝ်ႈပု ၊ၶဝ်ႈၵမ်ႇတႃဢွႆႈ၊ ၶဝ်ႈလမ်မႃၶုၼ်ႇ၊ ၶဝ်ႈလမ်ပႃမူၼ်ႇ၊ၶဝ်ႈသၢင်း၊ ၶဝ်ႈသၢင်းႁွမ်၊ ၶဝ်ႈမူသီ၊ၶဝ်ႈၶမ်းပႃး၊ၶဝ်ႈၸွၼ်ႈ၊ ၶဝ်ႈလၢႆးၵႆႇၶၼ်၊ၶဝ်ႈလၢႆးလႅင်း၊ၶဝ်ႈဝႃႉ၊ ၶဝ်ႈၼဵပ်ႉၸၢင်၊ ၶဝ်ႈၶႆႇပူ၊ ၶဝ်ႈတႅမ်ႇဢႅၵ်း၊ၶဝ်ႈၼေႃႇၽႄႈ–] ၸိူဝ်းၼႆႉတႄႉ လိူဝ်သေၵူၼ်းထဝ်ႈဝၢၼ်ႈၼွၵ်ႈၼႃးပၢင်ႇလႄႈ ၽူႈလဵပ်ႈႁဵၼ်းၶဝ်ၼၼ်ႉဢမ်ႇၶႂ်ႈမီးၵူၼ်းႁူႉၸၵ်းၼမ်ယဝ်။
တၢင်းႁဵတ်းလၢႆးသၢင်ႈၸုမ်းသိုၵ်းမၢၼ်ႈၶုၼ်မိူၵ်ႈမႂ်ႈၶဝ်ၼႆႉ ဢဝ်ၶဝ်မႃးတဵၵ်းၸႂ်ႇ ၵူၼ်းမိူင်း တႆးႁဝ်းၽုၵ်ႇ၊ ႁႂ်ႈၵူၼ်းမိူင်းတႆးႁဝ်းသိုဝ်ႉၵိၼ်ၶဝ်ႈမၢၼ်ႈ ( ၶဝ်ႈမဵၼ်ၶဝ်ႈသႃးၶဝ်ႈၵႅၼ်ႇၶဝ်ႈယၢႆႈ) ၶဝ် သေဢဝ်ၸိူဝ်ႉၶဝ်ႈမိူင်းတႆးမိူဝ်းၽုၵ်ႇမိူင်းမၢၼ်ႈဢႃးထမ်ႇမတဵၵ်းၵဵပ်းသိုဝ်ႉၶဝ်ႈလီၶဝ်ႈဝၢၼ်ၶဝ်ႈႁွမ်မိူင်းတႆးႁဝ်းၵႂႃႇၵိၼ်-ႁဵတ်းၼႆမႃးသၢဝ်းသၢမ်သိပ်းပီႊမိူင်းယဝ်ႉ။
“ ၸၢင်ႈႁဵတ်းႁိုဝ်-ပိူၼ်ႈပဵၼ်ၶုၼ်ႁဝ်းပဵၼ်ၶႃႈလူး၊သုတ်းတီႈႁဝ်းဢမ်ႇပေႉပိူၼ်ႈၼႃႇ” လိူဝ်သေဝႃႈၼႆႉၼၼ်ႉ ၵူၼ်းမိူင်းတႆးဢမ်ႇၸၢင်ႈဝႃႈဢမ်ႇမေႃဝႃႈသင်ထႅင်ႈယဝ်ႉႁိုဝ်?။
သူမ်ႈၶူမ်ႁိုၼ်း(7.7.96)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ