ဝၼ်းတီႈ 22/10/2025 ၼႆႉ ၸဝ်ႈၼႃႈတီႈထႆး လႆႈငိူၼ်ႈၶၢဝ်ႇသေ လူင်းပိုၼ်ႉတီႈၵူတ်ႇထတ်း  ၼႂ်းဢိူင်ႇမႄႈႁႄႇ ဝဵင်းၵဵင်းမႂ်ႇ ၸိုင်ႈထႆး ၊ တီႉၺွပ်းႁႅင်းၵၢၼ် ၵူၼ်းမိူင်းႁူမ်ႈတုမ်မၢၼ်ႈၵေႃႉၼိုင်ႈ ဢၼ်ႁဵတ်းၵၢၼ် ၼႂ်းႁၢၼ်ႉယွမ်ႉၵၢပ်ႇၼဵပ်ႉမိုဝ်း ။

ၸွမ်းၼင်ႇ Chiangmai Immigration ႁၢႆးငၢၼ်းဝႆႉတႄႉ  ႁႅင်းၵၢၼ်ၵေႃႉၼႆႉ-   ၶဝ်ႈႁဵတ်းၵၢၼ်သႅၼ်းဢၼ်ၸိုင်ႈထႆးႁၢမ်ႈဝႆႉ။  ႁဵတ်းၵၢၼ်ဢမ်ႇထုၵ်ႇမႅၼ်ႈတီႈမၼ်း။ ၼႂ်းဝႂ်ႁဵတ်းၵၢၼ်ၼၼ်ႉ ၸိုဝ်ႈပေႃႈလဵင်ႉၼၢႆးၸၢင်ႈပဵၼ်ၵေႃႉၼိုင်ႈ ၊ တီႈဢၼ်မၼ်းမႃးႁဵတ်းၵၢၼ်ၼႆႉသမ်ႉပဵၼ်ပေႃႈလဵင်ႉထႅင်ႈၵေႃႉၼိုင်ႈ – ဝႃႈၼႆ ။  

ပေႃႈလဵင်ႉၸဝ်ႈၵၢၼ်ႁၢၼ်ႉယွမ်ႉၼဵပ်ႉမိုဝ်းၼႆႉၵေႃႈ ယွမ်းႁပ်ႉတီႈပလိၵ်ႈဝႃႈ ပႆႇလႆႈၵႂႃႇလၢႆႈၸိုဝ်ႈပေႃႈလဵင်ႉ ၼႂ်းဝႂ်ႁဵတ်းၵၢၼ် ႁႅင်းၵၢၼ်ၵေႃႉၼႆႉ – ဝႃႈၼႆ။

ၵၢၼ်ဢၼ်ႁႅင်းၵၢၼ်မႃးႁဵတ်းၼႆႉ ပဵၼ်ၵၢၼ်ယွမ်ႉၼဵပ်ႉမိုဝ်း -ငိုၼ်းလိူၼ် 14000 ဝၢတ်ႇ ၊ ႁဵတ်းလႆႈမႃး 2 လိူၼ် ။ ၵူၺ်းၵႃႈမၼ်းၼၢင်း သမ်ႉယိပ်းဝႂ်ဢၼုၺၢတ်ႈႁဵတ်းၵၢၼ်( ဝႂ်ၶႂၢင်ႉႁဵတ်းၵၢၼ် ) ဢၼ်ပဵၼ်ၸိုဝ်ႈပေႃႈလဵင်ႉၼၢႆးၸၢင်ႈၵေႃႉၵဝ်ႇ  – မၼ်းပႆႇလႆႈလၢႆႈတီႈႁဵတ်းၵၢၼ်လႄႈၸိုဝ်ႈပေႃႈလဵင်ႉမႂ်ႇ – ၼႆ ၸဝ်ႈၼႃႈတီႈထႆးၶဝ်ႁၢႆးငၢၼ်းဝႆႉၼင်ႇၼႆ။

ၵၢၼ်ယွမ်ႉၼဵပ်ႉမိုဝ်းၼႆႉ ပႃးၼႂ်းသႅၼ်းၵၢၼ်ဢၼ်လူင်ပွင်ၸိုင်ႈထႆးႁႄႉႁၢမ်ႈဝႆႉဢၼ်ၼိုင်ႈ – ဢမ်ႇပၼ်ႁႅင်းၵၢၼ်ယၢၼ်မိူင်းႁဵတ်း။ ၵွပ်ႈၼႆပေႃးၵူတ်ႇထတ်းတီႉၺႃး ႁႅင်းၵၢၼ်ၵေႃႈတၵ်းၺႃးတူတ်ႈတၢမ်ႇ ၊ ပေႃႈလဵင်ႉၼၢႆးၸၢင်ႈၵေႃႈ  ၺႃးတူတ်ႈတၢမ်ႇ ဝႃႈၼႆ။

မိူဝ်ႈလဵဝ် ပေႃႈလဵင်ႉၼၢႆးၸၢင်ႈ ဢၼ်ႁပ်ႉႁႅင်းၵၢၼ်ၵူၼ်းမိူင်းႁူမ်ႈတုမ်မၢၼ်ႈႁဵတ်းၵၢၼ်ဝႆႉၼၼ်ႉ ၺႃးတီႉၺွပ်းၵုမ်းၶင်ဝႆႉသေ တေဢဝ်လိူင်ႈၵႂႃႇၸွမ်းၼင်ႇ ပၵ်းပိူင်မီးဝႆႉ ၼႆယဝ်ႉ။

ယၢမ်းၽွင်းမိူဝ်ႈလဵဝ် ဢိင်ၼိူဝ်ငဝ်းလၢႆးလၢႆလွင်ႈသေ ၸဝ်ႈၼႃႈတီႈထႆး ပၵ်းတႃၵူတ်ႇထတ်းႁႅင်းၵၢၼ်ႁၢဝ်ႈႁႅင်း။ ၵူၼ်းမိူင်းႁူမ်ႈတုမ်မၢၼ်ႈၸိူဝ်းၶဝ်ႈမိူင်းထႆးမႂ်ႇမႂ်ႇၵေႃႈ ယၢပ်ႇၵိၼ်း ၵွပ်ႈပႆႇၸၢင်ႈႁဵတ်းဝတ်းဝႂ်သင်ႁႂ်ႈပဵၼ်တၢင်းၵၢၼ် – ၼႆ ၽူႈၸွႆႈႁဵတ်းဝတ်းဝႂ်ႁႅင်းၵၢၼ်ၵေႃႉၼိုင်ႈလၢတ်ႈ။