တႄႇဢဝ်ႁူဝ်လိူၼ်ဢွၵ်ထူဝ်ႊပိူဝ်ႊၼႆႉမႃး သိုၵ်းမၢၼ်ႈႁႄႉရူတ်ႉၵႃးတၢင်ႇၶူဝ်းသေ ၵူတ်ႇထတ်းတီႈ ၵဵတ်ႉ/လၢၼ်ႇ ဝဵင်းလွႆလႅမ်ၸိုင်ႈတႆးပွတ်းၸၢၼ်း၊ ပိူင်လူင်ထတ်းၶူဝ်းၵုၼ်ႇမိူင်းၶႄႇ မိူင်းထႆး – ၸဝ်ႈၵႃးၼႂ်းပိုၼ်ႉတီႈလၢတ်ႈၼင်ႇၼႆ။
ၸဝ်ႈၵႃးတၢင်ႇၶူဝ်းၵုၼ်ႇဢၼ်လႅၼ်ႈမိူင်းတႆးပွတ်းႁွင်ႇပွတ်းၸၢၼ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ဢၼ်ၶဝ်ၸႅတ်ႈၵုၼ်ႇတေႉၵေႃႈ မၼ်းတေပဵၼ်ၵုၼ်ႇမိူင်းၶႄႇ မိူင်းထႆးၼၼ်ႉၶႃႈၼႆ၊ ပေႃးပႃးလိၵ်ႈၶႄႇ လိၵ်ႈထႆးတေႉ ၶဝ်တိုၼ်းဢမ်ႇပၼ်ၶၢမ်ႈၶႃႈ တီႈမိူင်းပွၼ်ၼႆႉ။ ၶဝ်ထတ်းၸဵမ်ၶူဝ်းၼုင်ႈ ၶူဝ်းၵိၼ် ၶူဝ်းၸႂ်ႉ ၵူႈၸိူဝ်ႉၵူႈလွင်ႈ။ ဢၼ်တူဝ်ၶႃႈထူပ်းတေႉၵေႃႈ မၼ်းတေပဵၼ်ၶူဝ်းဢၼ်မႃးတၢင်းမိူင်းၶႄႇ ၸဵမ်သိူဝ်ႈၶူဝ်းႁိုဝ်ႉ ပေႃးပႃးမိၵ်ႈမၢႆမိူင်းၶႄႇ တိုၼ်းဢမ်ႇလႆႈ။ ၶဝ်ဢမ်ႇပၼ်ပူၼ်ႉ လႆႈမႃး ၶျႃးဝႆႉတီႈၼႂ်းမိူင်းပွၼ်ၼႆႉ ။”
ၶူဝ်းၵုၼ်ႇမိူင်းၶႄႇမိူင်းထႆး ဢၼ်ပၼ်တေႃႉတၢင်ႇယူႇၸိူဝ်းၼၼ်ႉၵေႃႈ သင်ဢမ်ႇမီး ဝႂ်ၸၢႆႇၵႃႈၶွၼ်ႇတီႈ သိုၵ်းမၢၼ်ႈၸိုင် ဢမ်ႇၸၢင်ႈလတ်ႈၶၢမ်ႈၵဵတ်ႉလၢၼ်ႇလႆႈၼင်ႇၵဝ်ႇၼႆ ၵူၼ်းႁေႃႈရူတ်ႉ ၵႃးၼႂ်းမိူင်းတႆး ထႅင်ႈၵေႃႉၼိုင်ႈၵေႃႈလၢတ်ႈၼင်ႇၼႆ။
“ တီႈမိူင်းပွၼ်ၼႆႉ ၶဝ်တိုၼ်းဝႃႈဢမ်ႇပၼ်လတ်းလၢၼ်ႇၶဝ် ပေႃးတၢင်ႇမႃးၶူဝ်းမိူင်းၶႄႇ။ ၶဝ်ထၢမ်တူၺ်း ဝႂ်ၶွၼ်ႇ ၵျူႊတီႊ ၼၼ်ႉၵမ်းလဵဝ်။ ပေႃးဢမ်ႇမီးတႄႉတိုၼ်းဢမ်ႇလတ်းလၢၼ်ႇလႆႈယဝ်ႉဝႃႈ ။ ပေႃးဝႃႈ ၶႂ်ႈၽႅတ်ႈၵေႃႈ မၼ်းလူဝ်ႇမီးၶွၼ်ႇမၢၼ်ႈၼၼ်ႉၶႃႈၼႃႇ၊ တႄႇၸဵမ်မၢၵ်ႇမႆႉမၢၵ်ႇတွၵ်ႇၸိူဝ်းၼႆႉယဝ်ႉ။ မၢင်ၵေႃႉမၢင်ၸဝ်ႈၵေႃႈလႆႈတၢင်ႇပွၵ်ႈမိူဝ်းၶိုၼ်းပွတ်းႁွင်ႇဢေႃႈ။ယၢပ်ႇဝႆႉဢေႃႈယၢမ်းလဵဝ်”
မိူၼ်ၼၼ်ၼင်ႇၵဝ်ႇ ၶူဝ်းၵုၼ်ႇ၊မၢၵ်ႇဝၢၵ်ႈတၢင်းၵိၼ်ဢၼ်တေႃႉမႃးတၢင်းလႅၼ်လိၼ်မိူင်းၶႄႇ ၸိူဝ်းၼၼ်ႉၵေႃႈ တေလႆႈသႂ်ႇၶွၼ်ႇဝႆႉမိူၼ်ၵၼ် သင်သိုၵ်းမၢၼ်ႈၵူတ်ႇထတ်းၸွမ်း ၵဵတ်ႉလၢၼ်ႇယဝ်ႉ ဢမ်ႇၼႄလႆႈဝႂ်သႂ်ႇၶွၼ်ႇၸိုင် ယင်းၺႃးႁေႉႁၢမ်ႈ ဢမ်ႇပၼ်လတ်းၶၢမ်ႈ ၵူၺ်းဢမ်ႇၵႃး တေလႆႈၶိုၼ်းဝၢႆႇပွၵ်ႈတၢင်းၵဝ်ႇလူးၵွၼ်ႇ။
တႄႇဢဝ် မိူဝ်ႈၵၢင်လိူၼ်ဢေႃႊၵတ်ႉသ်မႃး ႁွင်ႈၵၢၼ်ၾၢႆႇၵုမ်းၵမ် ၵၢၼ်ငိုၼ်းၼွၵ်ႈမိူင်း ဢၼ်ယူႇတႂ်ႈသိုၵ်းမၢၼ်ႈ ပိုၼ်ၽၢဝ်ႇႁေႉႁၢမ်ႈ ၶူဝ်းၵုၼ်ႇ၊ ၶဝ်ႈၼမ်ႉတၢင်းၵိၼ် ပႃးၸဵမ်ၶိူင်ႈၾႆးၾႃႉ ဢၼ်လုၵ်ႉၼွၵ်ႈမိူင်းၶဝ်ႈမႃး တႃႇ 35 မဵဝ်း ။
ဝၢႆးလင်ၼႆႉ ၶူဝ်းၸိူဝ်းထုၵ်ႇႁၢမ်ႈဝႆႉၸိူဝ်းၼၼ်ႉ ၵႃႈၶၼ်ပုင်ႈၶိုၼ်ႈမႃးႁႅင်းၼႆ ၵူၼ်းၵႃႉၶူဝ်းၵုၼ်ႇ ၼႂ်းမိူင်းတႆးလၢတ်ႈၼင်ႇၼႆ။
ၶူဝ်းၵုၼ်ႇၼွၵ်ႈမိူင်းဢၼ်သိုၵ်းမၢၼ်ႈဢမ်ႇပၼ်ဢဝ်ၶၢမ်ႈလႅၼ်လိၼ်ၶဝ်ႈမႃးၼႂ်းမိူင်းတႆးပွတ်းၸၢၼ်းၼႆႉတႄႉပဵၼ်မိူၼ်ၼင်ႇ – ၶႅပ်းတိၼ်၊ မၼ်းမၢၵ်ႇပၢဝ်ႉ(ဢူင်းၼူဝ်ႉ)၊ မၢၵ်ႇထၢၼ်ႇ – ပႅတ်ႇထရီႇ၊ တဵၼ်းႁွမ်၊ သၢတ်ႇ၊ ၶဝ်ႈသွႆး – ၵျႃႇသၢၼ်ႇႁႅင်ႈ၊ ယၢင်မၢၵ်ႇၵႃး၊ လုၵ်ႈဢူမ် (မၢၵ်ႇၸဵမ်းသူမ်ႈ)၊ ပီႊသၵိတ်ႉ၊ ၼမ်ႉၸၢင်ႇ(ပႄးငၢၼ်ႇပျႃႇယေႇ)၊ မဵတ်ႉၵႃႇၽီႇ၊ ၽွင်ၵႃႇၽီႇ ၊ ၼဵင်ႈႁႅင်ႈ၊ ၽႃႈဢွမ်ႈၵူၼ်းလူင်၊ ၼမ်ႉမၼ်းၸၢၵ်ႈ ဢိၼ်ႊၵျိၼ်ႊဝၢႆႊ၊ မၢၵ်ႇၾႆးလွတ်ႇၾႆး၊ ၼမ်ႉၼူမ်း ၊ ပုင်းၵေႃႇ သွင်းသႃႉၵေႃႇ၊ လိၼ်ပုၼ် ၽိလပ်ႉမျေႇမိူင်းထႆး ၸဵမ်ၸိူဝ်းၼႆႉ။
တႅမ်ႈ- ၶုၼ်ၶိင်း
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ