ဝၼ်းတီႈ 20/10/2025 ယၢမ်းၵၢင်ၶမ်ႈ 8 မူင်းပၢႆ ႁိူဝ်းမိၼ်တိုၵ်းၸုမ်းသိုၵ်းမၢၼ်ႈယိုတ်းမိူင်း ပွႆႇမၢၵ်ႇသႂ်ႇ ၼႂ်းဝဵင်းမိူင်းငေႃႉ တူၵ်းတႅၵ်ႇသႂ်ႇ ၼႂ်းၵၢင်ဝဵင်းမိူင်းငေႃႉ ၸွမ်းထႅဝ်ၵၢတ်ႇလူင်ၼၼ်ႉလႄႈ  ၾႆးမႆႈႁိူၼ်းယေးၵူၼ်းမိူင်းသေ မီးၵူၼ်းလူႉတၢႆမၢတ်ႇ ၸဵပ်းၵႂႃႇၸွမ်း ၼႆယဝ်ႉ။

ႁိူဝ်းမိၼ်ၵျႅၵ်ႉၾၢႆႇတႃႇ ၶွင်သိုၵ်းမၢၼ်ႈယိုတ်းမိူင်း ၸႂ်ႉမၢၵ်ႇလူင် သႅၼ်း 250 ပွင်ႊ တင်ႈၸႂ်ယိူင်းပွႆႇသႂ်ႇၸူး ၵၢတ်ႇလူင် ဝဵင်းမိူင်းငေႃႉသေ တႃႉ ဢမ်ႇတိူဝ်ႉၺႃးၵၢတ်ႇသေ တူၵ်းတႅၵ်ႇသႂ်ႇႁိူၼ်းၵူၼ်းမိူင်းၵႂႃႇ လုၵ်ႉပဵၼ်ၾႆးၵႂႃႇၵမ်းသိုဝ်ႈၼႆ ၼၢင်းယိင်း ဢႃႇယု 40 ပီပၢႆ ၵေႃႉယူႇမိူင်းငေႃႉ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ၶဝ်မႃးပွႆႇမၢၵ်ႇၼႆႉ ပဵၼ်ၶၢဝ်းၵၢင်ၶမ်ႈ 8 မူင်းပၢႆဢိတ်းၼိုင်ႈၵူၺ်း။ ပဵၼ်ပွၵ်ႉၼႂ်းၵၢတ်ႇၵမ်းသိုဝ်ႈယဝ်ႉဢေႃႈ။ ၵၢတ်ႇတႄႉဢမ်ႇမႆႈ။ ႁူင်းပလိၵ်ႈၵေႃႈဢမ်ႇမႆႈ။ သဵင်မၼ်းလင်ႁႅင်းၼႃႇ။ မၢၵ်ႇၼႆႉၵႂႃႇတူၵ်းသႂ်ႇႁိူၼ်း တႄႇဢဝ်ႁူဝ်ၶူဝ်မႃးၼၼ်ႉၶႃႈၼႃႇ။ မၢၵ်ႇတူၵ်းယဝ်ႉၵမ်းၼိုင်ႈၵေႃႈ ၾႆးၵိုင်ႉၵၢင်ႉ လုၵ်ႉမႆႈၵႂႃႇႁႅင်း။”

လႆႈႁူႉဝႃႈ ၾႆးဢၼ်မႆႈတေႃႇထိုင်ယူႇ ယၢမ်းၵၢင်ၼႂ်ၸဝ်ႉၼႆႉ ပဵၼ်ၾႆးဢၼ်မႆႈမႃးၶိုၼ်းမႂ်ႇမႂ်ႇ ယွၼ်ႉမေႃႈၵႅတ်ႉတႅၵ်ႇထႅင်ႈသေ သိုပ်ႇလၢမ်းမႆႈၵႂႃႇထႅင်ႈ။  ၵႃးၶႄၾႆးၵေႃႈ သမ်ႉမီးလမ်းၼိုင်ႈၵူၺ်းသေ ၵူၼ်းပိုၼ်ႉတီႈ လႆႈပိုင်ႈဢိင် ၵေးၼမ်ႉႁွင်ႈ ဢၼ်လႂ်လတ်းၵႂႃႇ ၼႂ်းၵၢင်ၵၢတ်ႇၼၼ်ႉ ႁူတ်းၵူၺ်းလႄႈ ၶႄႇၾႆးဢမ်ႇၶိုတ်းၵၼ်လႆႈ ၼႆယဝ်ႉ။

ၵူၼ်းၸိူဝ်းလူႉတၢႆမၢတ်ႇၸဵပ်းၼႆႉ ပဵၼ်ၸၢဝ်းၶိူဝ်းမူႇသလိမ်ႇ တႃႇသွင်ၵေႃႉၼႆႉ ပဵၼ်မႄႈလုၵ်ႈၵၼ်။ လူႉတၢႆၵႂႃႇၼႂ်းႁိူၼ်း ဢၼ်ၺႃးၾႆးမႆႈလႄႈ ႁၢၼ်ႉတေႃႇထိုင်ယၢမ်းလဵဝ် ႁႃၵဵပ်းတူဝ်တၢႆ ၵေႃႉပဵၼ်မႄႈ ယင်းပႆႇလႆႈ။ ၼွၵ်ႈလိူဝ်ၼၼ်ႉ မီးၵူၼ်းမၢတ်ႇၸဵပ်း ၸွမ်း သွင်ၵေႃႉသေ ဢၼ်တၢႆၼႆႉ ၽိူမ်ႉမႃးထႅင်ႈၼိုင်ႈၵေႃႉ ဝႃႈၼႆ။

ၼုမ်ႇၸၢႆး ဢႃႇယု 30 ပီပၢႆ ၵူၼ်းမိူင်းငေႃႉ လၢတ်ႈၼႄတီႈၽူႈတွႆႇႁွၵ်ႈဝႃႈ “ဢၼ်ႁဝ်းၶႃႈလႆႈႁူႉၸွမ်းတေႃႇထိုင်ယၢမ်းလဵဝ်ၼႆႉ တၢႆၵႂႃႇ 3 ၵေႃႉယဝ်ႉဢေႃႈ။ ဢၼ်ၾႆးမႆႈၵႂႃႇၼႆႉၵေႃႈ ပဵၼ်ၵူၼ်းႁိူၼ်းၵူၺ်း တႃႇသွင်ၵေႃႉတႄႉ မၢတ်ႇၵႂႃႇႁႅင်းဝႆႉယူႇဢေႃႈ။ မိူဝ်ႈလဵဝ်ၼႆႉ ပႆႇလႆႈႁူႉ သဵၼ်ႈမၢႆတႅတ်ႈတေႃးတေႉတေႉ” ၼႆယဝ်ႉ။

တႄႇလိူၼ်ဢွၵ်ႉထူဝ်ႊပိူဝ်ႊ 1 ဝၼ်း ဝၢႆးလင် သိုၵ်းမၢၼ်ႈယိုတ်းမိူင်း ၵုမ်းၵမ်လႆႈၶိုၼ်းဝဵင်းၵျွၵ်ႉမႄးယဝ်ႉ ႁိူဝ်းမိၼ်သိုၵ်းမၢၼ်ႈ ၵမ်းၵမ်းမိူဝ်းပွႆႇမၢၵ်ႇၸွမ်း ထုင်ႉမိူင်းလူင် – မိူင်းငေႃႉဢမ်ႇထၢတ်ႇလႄႈ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ဢွၼ်ၵၼ်ငိူင်ႉပၢႆႈဢွၵ်ႇဝႆႉၵမ်ႈၼမ်။

ၾၢႆႇၼိုင်ႈၵေႃႈ သိုၵ်းတဢၢင်း ဢိုတ်းဝႆႉသဵၼ်ႈတၢင်း လုၵ်ႉတၢင်းမိူင်းငေႃႉ ၵႂႃႇၵျွၵ်ႉမႄးဝႆႉ ႁိုင်ၼၢၼ်းယဝ်ႉလႄႈ ႁဵတ်းႁႂ်ႈၵူၼ်းမိူင်း ၸိူဝ်းယူႇၼႂ်းပိုၼ်ႉတီႈ ယၢပ်ႇၽိုတ်ႇၵၢၼ်ႁႃၵိၼ်လဵင်ႉတွင်ႉပႃးၼႆ ၵူၼ်းမိူင်းပိုၼ်ႉတီႈ ဝဵင်းမိူင်းငေႃႉလၢတ်ႈတီႈၽူႈတွႆႇႁွၵ်ႈဝႃႈ “သိုၵ်းလွႆၼႆႉ ၶဝ်ပိၵ်ႉတၢင်း မိူင်းငေႃႉ ႁႄ ၵျွၵ်ႉမႄးဝႆႉ ၸဵမ်မိူဝ်ႈၶဝ်သုမ်းယဝ်ႉႁႄ ဢမ်ႇပၼ်ၵူၼ်းမိူင်းဢွၵ်ႇၵႂႃႇတၢင်းလႂ်။ ၵူဝ်ၵူၼ်းမိူင်းပၼ်ၶၢဝ်ႇၼႆၶႃႈဝႃႇ။ လႅင်းၾူၼ်းၵေႃႈ ဢမ်ႇမီး။ လႆႈၸႂ်ယႂ်ႇသတႃးလိင်ႉၵူၺ်း။ ၵပ်းသိုပ်ႇၵၼ်ယၢပ်ႇႁႅင်းၼႃႇ” ဝႃႈၼႆ။

တႄႇလိူၼ်ဢွၵ်ႉထူဝ်ႊပိူဝ်း 1 ဝၼ်းမႃး ႁၢၼ်ႉတေႃႇထိုင် 20 ဝၼ်းၼႆႉ ႁိူဝ်းမိၼ်သိုၵ်းမၢၼ်ႈ ယိုဝ်းသႂ်ႇ ၼႂ်းဝဵင်းၼမ်ႉသၼ်ႇ၊ မၢၼ်ႈတူင်ႈ၊ ၼမ်ႉတူႈ၊ မိူင်းငေႃႉ၊ မိူင်းလူင်၊ မိူင်းၵုတ်ႈ လႄႈ မိူင်းမိတ်ႈ ၸိူဝ်းၼႆႉ ႁၢဝ်ႈႁႅင်း ႁူမ်ႈသဵၼ်ႈ ဢမ်ႇယွမ်း 30 ၵမ်းယဝ်ႉ။

ယွၼ်ႉမၢၵ်ႇႁိူဝ်းမိၼ်သိုၵ်းမၢၼ်ႈယိုတ်းမိူင်းသေ သင်ၶ၊ လုၵ်ႈဢွၼ်ႇ၊ ၼၢင်းယိင်း လႄႈ ၵူၼ်းၼုမ်ႇ လူႉတၢႆၵႂႃႇ 40 ၵေႃႉ မၢတ်ႇၸဵပ်းၵႂႃႇ မွၵ်ႈ 50 ၵေႃႉသေ ႁိူၼ်းယေးၵူၼ်းမိူင်း 138 လင်၊ ႁူင်းႁဵၼ်း 3 လင်၊ ဝတ်ႉဝႃး 3 လင်ၵေႃႈ လူႉၵွႆၵႂႃႇႁၢဝ်ႈႁႅင်းၼႆ ႁွင်ႈၵၢၼ်ၶၢဝ်ႇ ၶွင်သိုၵ်းတဢၢင်း (TNLA) ၶဝ်ပိုၼ်ဢွၵ်ႇပဵၼ်တၢင်းၵၢၼ်ဝႆႉ ၼင်ႇၼႆ။

ၼႂ်းလိၵ်ႈၵိၼ်ႇၵႅၼ်ႇ ၵျီႊၼီႊဝႃႊ ၶွၼ်ႊဝႅၼ်းသျိၼ်ႊ ဢၼ်သိုၵ်းမၢၼ်ႈၶဝ်ႈႁူမ်ႈလူင်းလၢႆးမိုဝ်းၸွမ်းဝႆႉၼၼ်ႉတႄႉ ပႃးဝႆႉဝႃႈ “ပိုၼ်ႉတီႈသိုၵ်းတေဢမ်ႇလႆႈယိုဝ်း လႄႈ ဢမ်ႇလႆႈတိူဝ်ႉလႃးလႃးၼႆႉ ပဵၼ်ႁိူၼ်းယေးၵူၼ်းမိူင်း၊ ႁူင်းယႃ၊ ႁွင်ႈယႃ၊ ႁူင်းႁဵၼ်း၊ ဝတ်ႉဝႃးၽႃသိူဝ်ႇတီႈၵူၼ်းပိုၼ်ႉတီႈၵိူဝ်းယမ် ၸဵမ်ၸိူဝ်းၼႆႉ။

ၵူၺ်းၵႃႈ ဝၢႆးလင်မိၼ်းဢွင်ႇလၢႆႇ သိမ်းဢႃႇၼႃႇၸိုင်ႈမိူင်း ယိုတ်းဢဝ် ဢႃႇၼႃႇလူင်ပွင်ၸိုင်ႈၵူၼ်းမိူင်းယဝ်ႉ မိူဝ်ႈပီ 2021 မႃး ႁၢၼ်ႉတေႃႇထိုင်ယၢမ်းလဵဝ် သိုၵ်းမၢၼ်ႈ လႄႈ ၸုမ်းယိပ်းၵွင်ႈၵၢင်ႇၼႂ်းမိူင်း ပဵၼ်ပၢင်တိုၵ်းၵၼ် ၼႂ်းမိူင်းႁူမ်ႈတုမ် တီႈၼိုင်ႈယဝ်ႉ ဢွင်ႈၼိုင်ႈသေ တင်းသွင်ၸုမ်းသွင်ၾၢႆႇ ဢမ်ႇတွၼ်ႉႁဵတ်းၸွမ်း ပၵ်းပိူင် ၶေႃႈၵိၼ်ၵႅၼ်ႇ သုၼ်ႇလႆႈသုၼ်ႇပဵၼ်ၵူၼ်း လႄႈ ၶေႃႈတိုဝ်းၵမ်သိုၵ်းသေဢိတ်း။