တႄႇႁူဝ်လိူၼ်ဢွၵ်ႇထူဝ်ႊပိူဝ်ႊမႃး သိုၵ်းမၢၼ်ႈႁႅၼ်းသိုၵ်းလေႃႇတိုၵ်း သိုၵ်းတဢၢင်း TNLA ၼႂ်းၸႄႈဝဵင်းသီႇပေႃႉသေ ၵုမ်းလႆႈ ၶိုၼ်း ၼႂ်းဝၼ်းတီႈ 16/10/2025 ယၢမ်းတၢမ်းၶမ်ႈ မွၵ်ႈ 5 မူင်း ။

ၵွၼ်ႇသိုၵ်းမၢၼ်ႈတေၶဝ်ႈထိုင်လႆႈၼႂ်းဝဵင်းသီႇပေႃႉၼႆႉ ႁူင်းၵေႃႇၵၢႆႇ၊ ႁွင်ႈၵၢၼ်ၽွင်းငမ်း (လုမ်းၵဝ်ႇ) ၶွင်ၸုမ်းသိုၵ်းမၢၼ်ႈယိုတ်းမိူင်း လၢႆလၢႆဢွင်ႈတီႈ လႄႈ ႁူင်းႁႅမ်းၸိုဝ်ႈလိုဝ်း ၼႂ်းဝဵင်းသီႇပေႃႉၵေႃႈ ၾႆးမႆႈၵႂႃႇတင်းၼမ်။

ၵူၼ်းမိူင်းဝဵင်းသီႇပေႃႉ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“တႄႇၶၢဝ်းတၢမ်းၶမ်ႈ 3 မူင်းၶိုင်ႈၼၼ်ႉ သိုၵ်းပလွင်ႈၶဝ် လႄႇႁွၼ်ႈႁႃၸုတ်ႇၾႆးၸွမ်းလုမ်းၵဝ်ႇသိုၵ်းမၢၼ်ႈလူင်ၵႂႃႇ။ သိုၵ်းလွႆၶဝ် ပႃးၵွင်ႈႁႄ ပႂ်ႉဝႆႉၸွမ်းၾၢႆႇၼႃႈလုမ်း ၸိူဝ်းၺႃးၽဝ်ၼၼ်ႉ ၶဝ်ဢမ်ႇပၼ်ၽႂ်ၵႂႃႇၶႄၾႆး။ ၾႆးၼႆႉ တႄႇလုၵ်ႉတီႈ ထွင်ႇလူင်။ ၶဝ်ဢၢၼ်းၵႂႃႇၸုတ်ႇပႃးႁူင်းယႃ။ ပႆႇတၼ်းထိုင်ႁူင်းယႃ သိုၵ်းမၢၼ်ႈသမ်ႉၶဝ်ႈမႃးထိုင်လႆႈၼႂ်းဝဵင်းႁႄ တင်းသွင်ၾၢႆႇယိုဝ်းၵၼ်ယူႇ ၵမ်းၼိုင်ႈ။ သိုၵ်းမၢၼ်ႈတႄႉ လုၵ်ႉတၢင်းႁူင်းယႃၼၼ်ႉႁႄ ဢဝ်တရူၼ်ႊယိုဝ်းသႂ်ႇသိုၵ်းပလွင်ႈ။”

ဢၼ်ၺႃးၾႆးမႆႈၼၼ်ႉပဵၼ်ႁူင်းပလိၵ်ႈ၊ ႁွင်ႈၵၢၼ်လုမ်းၽွင်းငမ်းၵူႈၾၢႆႇၾၢႆႇ(ထွေအုပ်ရုံး)၊ ႁွင်ႈၵၢၼ်ၾၢႆႇၽုၵ်ႇသွမ်ႈ၊ ထွင်ႇလူင် လႄႈ ႁူင်းႁႅမ်းသီႇပေႃႉ တင်း ႁူင်းႁႅမ်း Red Dragon ၸဵမ်ၸိူဝ်းၼႆႉ လႆႈႁူႉၼင်ႇၼႆ။

ၼုမ်ႇၸၢႆး ဢႃႇယု 30 ပၢႆ ၵေႃႉတူင်ႉၼိုင်ၾၢႆႇၸွႆႈထႅမ်တူင်ႇဝူင်းၵူၼ်း ၼႂ်းဝဵင်းသီႇပေႃႉ လၢတ်ႈၽူႈတွႆႇႁွၵ်ႈဝႃႈ-“သဵင်ၵွင်ႈသဵင် မၢၵ်ႇယဵၼ်ၵႂႃႇႁႄ သိုၵ်းမၢၼ်ႈ ဢွၵ်ႇထႅဝ်ႇၸွမ်းၼိူဝ်သဵၼ်ႈတၢင်းလူင်ႁၢႆးဝေး။ ပေႃးငိၼ်းသဵင်ၵူၼ်းမေႃး ၼႂ်းႁိူၼ်းလင်လႂ်ၵေႃႈ ၶဝ်ႁွင်ႉ ပၢဝ်ႇထၢမ်ဝႃႈ- ၸွင်ႇမီးပလွင်ႈႁႃႉ- ၼႆ။ ပေႃးမီးၵူၼ်းယူႇဝႆႉၼႂ်းႁိူၼ်းသေ တွပ်ႇပၼ်ၶဝ်ၶိုၼ်းတႄႉ ၶဝ်ပူၼ်ႉၵႂႃႇ။ ပေႃးပဵၼ်ႁိူၼ်း ဢမ်ႇၼၼ် ပဵၼ်ႁၢၼ်ႉၶၢႆၵုၼ်ႇ၊ ဢမ်ႇမီးၵူၼ်းယူႇၼႆတႄႉ ၶဝ်ယႃႉၶဝ်ႈၵႂႃႇဢဝ်ၵိၼ်လဝ်ႈ ၵိၼ်ပီႇယႃႇပိူၼ်ႈ။” – ဝႃႈၼႆ။

ၸွမ်းၼႂ်းသဵၼ်ႈတၢင်းဝဵင်းသီႇပေႃႉၵမ်ႈၽွင်ႈ ယင်းတိုၵ်ႉမီးသိုၵ်းတဢၢင်း ယူႇသဝ်းဝႆႉလႄႈ ၾၢႆႇသိုၵ်းမၢၼ်ႈ ဢိုတ်းသဵၼ်ႈတၢင်းဝႆႉ ဢမ်ႇပၼ်ၽႂ်လတ်းၵႂႃႇမႃး။

သိုၵ်းမၢၼ်ႈယိုတ်းမိူင်း ၶဝ်ႈထိုင်လႆႈၼႂ်းဝဵင်းသီႇပေႃႉၶိုၼ်း မိူဝ်ႈဝၼ်းတီႈ 16/10/2025 ယၢမ်းတၢမ်းၶမ်ႈ မွၵ်ႈ 5 မူင်းသေ သိုပ်ႇယိုဝ်းၵၼ်တင်း သိုၵ်းတဢၢင်း TNLA တေႃႇထိုင်မိူဝ်ႈၼႆႉ 17/10/2025 ယၢမ်းၵၢင်ဝၼ်း ၼႆယဝ်ႉ။

လႆႈႁူႉဝႃႈ သိုၵ်းတဢၢင်း TNLA ၵမ်ႈၽွင်ႈ ထွႆဢွၵ်ႇၵႂႃႇ ၾၢႆႇတူၵ်းဝဵင်းသီႇပေႃႉ ၸွမ်းသဵၼ်ႈတၢင်းၵႂႃႇ ဝဵင်းသီႇပေႃႉ- ၼမ်ႉတူႈ ဝႃႈၼႆ။

ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်းသွင်မႃး သိုၵ်းတဢၢင်း လႄႈ ၸုမ်းဢူၺ်းလီၶဝ် ယိုတ်းဢဝ်လႆႈၸႄႈဝဵင်းသီႇ ပေႃႉသေ သိုၵ်းတဢၢင်းပၼ်ႇၵၢၼ်ၽွင်းငမ်းၵုမ်းၵမ်ၼႂ်းဝဵင်းသီႇပေႃႉ။
ၾၢႆႇဢွၵ်ႇဝဵင်းသီႇပေႃႉတႄႉ ပဵၼ်သိုၵ်းၵဝ်ႈၵၢင်ႉၵုမ်းၵမ်ဝႆႉလႄႈ ၵူၼ်းမိူင်းဝဵင်းသီႇပေႃႇ ယူႇသဝ်းၵႂႃႇမႃးဝႆႉမိူၼ်ၵဝ်ႇယူႇ။
ဢၼ်လႆႈငိၼ်းသဵင်ၵွင်ႈသဵင်မၢၵ်ႇၼႂ်းဝဵင်းသီႇပေႃႉၼႆႉ ပဵၼ်ၾၢႆႇပွတ်းတူၵ်းဝဵင်း သီႇပေႃႉ လႆႈႁူႉၼင်ႇၼႆ။

သိုၵ်းမၢၼ်ႈၼႆႉ ႁႅၼ်းၵူၼ်းသိုၵ်း လႄႈ ၶိူင်ႈတရူၼ်ႊ ၸႂ်ႉတိုဝ်းပႃး ႁိူဝ်းမိၼ်လေႃႇတိုၵ်းသိုၵ်းတဢၢင်း ၼႂ်းမိူင်းတႆး ပွတ်းႁွင်ႇႁၢဝ်ႈႁႅင်း။ မိူဝ်ႈဝၼ်းတီႈ 1 လိူၼ်ဢွၵ်ႊထူဝ်ႊပိူဝ်ႊၼႆႉ တႄႇယိုတ်းၵုမ်းလႆႈၶိုၼ်း ၸႄႈဝဵင်းၵျွၵ်ႉမႄးတင်းသဵင်ႈ။ ဝၢႆးလင်ၼၼ်ႉ သိုပ်ႇထူဝ်း သိုၵ်း ၶႂၢၵ်ႈပၢင်တိုၵ်းၵႂႃႇတၢင်းဝဵင်းသီႇပေႃႉ ႁိုင်မွၵ်ႈ 15- 16 ဝၼ်းၵူၺ်းယိုတ်းၵုမ်းဢဝ်လႆႈပႃး ၼႂ်းဝဵင်းသီႇပေႃႉထႅင်ႈ ။

ၶၢဝ်းတၢင်းၽႅၼ်ၵၢၼ်သိုၵ်းမၢၼ်ႈ ၶဝ်ႈလူမ်ႇတိုၵ်းသိုၵ်းတဢၢင်း တီႈဝဵင်းသီႇပေႃႉ ပွၵ်ႈၼႆႉ ၸုမ်းသိုၵ်းတင်းသွင်ၾၢႆႇ ဢမ်ႇလႆႈယိုဝ်း ၵၼ်သင်တေႉတေႉဝႃႈဝႃႈသေ ၾၢႆႇသိုၵ်းမၢၼ်ႈၶဝ်ႈၵုမ်းဢဝ်ဝဵင်းသီႇပေႃႉ ငၢႆႈလိူဝ် တၢင်ႇတီႈ။ ၶၢဝ်းယၢမ်းယိုဝ်းၵၼ်ၵေႃႈ ဢမ်ႇတၼ်း ႁိုင်မိူၼ် တၢင်ႇၸႄႈဝဵင်း ။

ဝၢႆးလင်ၽႅၼ်ယၼ်ႇသိုၵ်း 1027 ပွၵ်ႈၵမ်းသွင်ၼႆႉ သိုၵ်းတဢၢင်း ယိုတ်းၵုမ်းလႆႈ ၸႄႈဝဵင်းသီႇပေႃႉ၊ ဝဵင်းၵျွၵ်ႉမႄး၊ ဝဵင်းၼွင်ၶဵဝ်၊ ဝဵင်းမိူင်းလူင်၊ ဝဵင်းမိူင်းငေႃႉ၊ ဝဵင်းမိူင်းမိတ်ႈ၊ ဝဵင်းၼမ်ႉသၼ်ႇ၊ ဝဵင်းမၢၼ်ႈတူင်ႈ၊ ဝဵင်းၵူတ်ႉၶၢႆ၊ ဝဵင်းၼမ်ႉၶမ်း လႄႈ ဝဵင်းၼမ်ႉတူႈ ၸဵမ်ၸိူဝ်းၼႆႉ။

တူဝ်တႅၼ်းၾၢႆႇလူင်ပွင်ၸိုင်ႈမိူင်းၶႄႇ ၸတ်းပၢင်ဢုပ်ႇဢူဝ်း ႁႂ်ႈသိုၵ်းမၢၼ်ႈ တင်း သိုၵ်းတဢၢင်း ငူပ်ႉငီႉၵၼ်လၢႆလၢႆပွၵ်ႈ တီႈၼႂ်းမိူင်းၶႄႇ။ ၾၢႆႇသိုၵ်းမၢၼ်ႈ တုၵ်းယွၼ်းႁႂ်ႈသိုၵ်းတဢၢင်းထွႆႁႅင်းသိုၵ်းဢွၵ်ႇပၼ် ၼႂ်းဝဵင်းၼွင်ၶဵဝ်၊ ၵျွၵ်ႉမႄး၊ သီႇပေႃႉ၊ မိူင်းၵုတ်ႈ၊ မိူင်းမိတ်ႈ ၸိူဝ်းလမ်ႇလွင်ႈတႃႇသဵၼ်ႈတၢင်းၵၢၼ်ၵႃႉၶၢႆ တွၼ်ႈတႃႇမိူင်းမၢၼ်ႈထုင်ႉပဵင်း- မိူင်းတႆးပွတ်းႁွင်ႇ တေႃႇထိုင်လႅၼ်လိၼ် တိတ်းၸပ်းမိူင်းၶႄႇၼၼ်ႉလႄႈ တင်းသွင်ၾၢႆႇ ဢမ်ႇလႆႈၶေႃႈတူၵ်းလူင်သင်ၵၼ် ပၢင်ၵုမ်ယၢႆႈမႃးလၢႆပွၵ်ႈလၢႆၵမ်း ။

ဝႃႈၼၼ်သေတႃႉ ၵဵဝ်ႇလူၺ်ႈၶေႃႈတူၵ်းလူင်း သိုၵ်းတဢၢင်း လႄႈ သိုၵ်းမၢၼ်ႈ ဢုပ်ႇဢူဝ်းငူပ်ႉငီႉၵၼ်ၼႂ်းမိူင်းၶႄႇၼၼ်ႉ ဢမ်ႇမီးၸုမ်းလႂ် ပိုၼ်ၽၢဝ်ႇဢွၵ်ႇၼႄပဵၼ်တၢင်းၵၢၼ် ႁႂ်ႈၵူၼ်းမိူင်းပတ်းပိုၼ်ႉမိူင်းႁူမ်ႈတုမ်ႁူႉႁၼ်ၸွမ်းတႅၵ်ႇလႅင်းသေပွၵ်ႈ။

ၼႂ်းႁူဝ်ပီ 2025 ၼႆႉ သိုၵ်းတဢၢင်း လႆႈထွႆသိုၵ်းဢွၵ်ႇၼႂ်းဝဵင်းသေ ပၼ်သိုၵ်းမၢၼ်ႈၶဝ်ႈမႃးၵုမ်းၵမ်လႆႈၶိုၼ်း ၼႂ်းဝဵင်းၸိူဝ်းၵုမ်းၵမ်လႆႈဝႆႉ မိူဝ်ႈၽွင်းပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်းသွင်ၼၼ်ႉ တႃႇသၢမ်ဝဵင်း။

သိုၵ်းမၢၼ်ႈယိုတ်းၵုမ်းလႆႈၶိုၼ်းဢွၼ်တၢင်း သုတ်းၼႆႉ ပဵၼ်ဝဵင်းၼွင်ၶဵဝ် မိူဝ်ႈလိူၼ်ၵျူႊလၢႆႊ၊ ဝဵင်းထီႉသွင် ပဵၼ်ဝဵင်းၵျွၵ်ႉမႄး မိူဝ်ႈလိူၼ်ဢွၵ်ႇထူဝ်ႊပိူဝ်ႊ 1 ဝၼ်း၊ ဝဵင်းထီႉသၢမ် ပဵၼ်ဝဵင်းသီႇပေႃႉ လိူၼ်ဢွၵ်ႇထူဝ်ႊပိူဝ်ႊ 17 ဝၼ်း ။

ဝဵင်းသီႇပေႃႉ လႄႈ ဝဵင်းသႅၼ်ဝီၼႆႉ ပဵၼ်ဝဵင်းဢၼ်ၸိုဝ်ႈလိုဝ်းလင် ၵိုၵ်းပိုၼ်းမိူင်းတႆးမႃး ၼပ်ႉဢၢၼ်ႇႁူဝ်ပၢၵ်ႇပီမၼ်းသေ ပဵၼ်ဝဵင်းလမ်ႇလွင်ႈတႃႇ ၵၢၼ်ပၢႆးမၢၵ်ႈမီး လႄႈ ၵၢၼ်မိူင်းတေႉတေႉ။

ယၢမ်းလဵဝ်ၵေႃႈၶိူင်ႈမိၼ်သိုၵ်းမၢၼ်ႈ ပိုတ်းယိုဝ်းယူႇတီႈဝဵင်းမိူင်းၵုတ်ႈလႄႈၼမ်ႉသၼ်ႇယူႇၵူႈဝၼ်း။