ၽွင်းၸမ် ၶၢဝ်းပွႆးႁူင်းၾႆးမိၼ် တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ၽူႈလၵ်ႉၼမ်လိူင်ႇႁႅင်း  ဢွင်ႈတီႈၵူၼ်းၵိုၼ်း မိူၼ်ၼင်ႇၼႂ်းၵၢတ်ႇၼႂ်းဝဵင်းၸိူဝ်းၼႆႉ ၺႃးလၵ်ႉၼမ် သုမ်းပႃးၵႂႃႇ ၾူၼ်းလႄႈ ငိုၼ်းတင်းၼမ်  ။  

ၼႂ်းဝၼ်းတီႈ 12/10/2025 ယၢမ်းဝၢႆးဝၼ်း မသူႉသူႉ ( ၸိုဝ်ႈပွမ် )  ဢႃယု 20 ပၢႆ ၽွင်းမၼ်းၼၢင်းၵႂႃႇၵိၼ်တင်းၵိၼ်တီႈၼႂ်းၵၢတ်ႇလူင်ၼၼ်ႉ ၺႃးၽူႈလၵ်ႉၸၵ်ႉဢဝ် ၾူၼ်းလႄႈဢႅပ်ႇငိုၼ်းမၼ်းၼၢင်းၵႂႃႇဝႃႈၼႆ ။

ၼၢင်းယိင်းဢွၼ်ႇ  ဢူးၵေႃႉမသူႉသူႉ လၢတ်ႈၽူႈတွႆႇႁွၵ်ႈဝႃႈ -“ၽွင်းတိုၵ်ႉၵိၼ်ၶဝ်ႈမုၼ်းယူႇၼၼ်ႉ တၼ်းဢဝ်ၵႂႃႇမိူဝ်ႈလႂ်ၵေႃႈဢမ်ႇႁူႉ ၊ ငိုၼ်းၼႆႉပႃးၵႂႃႇ 15 သႅၼ် ၊ တလဵဝ် ပဵၼ်ၶၢဝ်းပွႆးတသွင်ႇတၢႆႇ လႄႈၵူၼ်းၵေႃႈၵိုၼ်း ပေႃးတေၵႂႃႇလႂ်ၵေႃႈ ၾၢင်ႉၼႆႉလီသေပိူၼ်ႈယဝ်ႉ”- ဝႃႈၼႆ ။

မိူၼ်ၼင်ႇၼႆ ၼႂ်းဝၼ်းတီႈ 11/10/2025 ၼၼ်ႉၵေႃႈ ပီႈၼွင်ႉတၢင်ႇတီႈၸိူဝ်းမႃးပွႆးၼၼ်ႉမႃးလႄႇၵၢတ်ႇ ၼႂ်းၵၢတ်ႇလူင်မဵဝ်ႉမဝဵင်းတူၼ်ႈတီး ၺႃးလၵ်ႉ ၾူၼ်းလႄႈဢႅပ်ႇငိုၼ်းမိူၼ်ၵၼ် ပႃးၵႂႃႇ 10 သႅၼ်ပျႃး။  ၼႂ်းဝၼ်းတီႈ 10 ပူၼ်ႉမႃးၼၼ်ႉၵေႃႈ ႁိမ်းၵၢတ်ႇၼၼ်ႉၵူၺ်းၼင်ႇၵဝ်ႇ ၺႃးလၵ်ႉ ရူတ်ႉၶိူင်ႈ 2လမ်းလႄႈ ၵႃးဢွၼ်ႇလမ်းၼိုင်ႈ ပလိၵ်ႈသိုၵ်းမၢၼ်ႈပႆႇတီႉၺွပ်းလႆႈ။

“ပဵၼ်တီႈၵၢတ်ႇလူင်ဢေႃႈ ၽွင်းၶဝ်တေၸၢႆႇငိုၼ်းၼၼ်ႉ ၸူၵ်းဢဝ်ဢႅပ်ႇငိုၼ်းၼႂ်းထူင် ဝႃႇ ၽိူဝ်ႇတူၺ်းထူင်ပွင်ႇဝႆႉဢႅပ်ႇငိုၼ်းၵေႃႈဢမ်ႇၵိုတ်းသင် ၊ ၺႃးထႅၵ်ႇထူင်ၵႂႃႇၽွင်းဢမ်ႇႁူႉတူဝ်ဢေႃႈ ငိုၼ်းၼႆႉပႃးၵႂႃႇ 10 သႅၼ် ၊ ဢဝ်မိတ်ႈႁႃႉ ဢဝ်ၵိမ်း တတ်းႁႃႉ ၵေႃႈဢမ်ႇႁူႉ ၶဝ်လႅတ်းၼႃႇ ၽူႈလၵ်ႉၸိူဝ်းၼႆႉ”- ဝႃႈၼႆ ။

ၶၢဝ်းဢွၵ်ႇဝႃႇလႄႈ ပွႆးႁူင်းၾႆးမိၼ် လိူၼ်သိပ်းသွင်တီႈဝဵင်းတူၼ်ႈတီးၼႆႉ ၶႅၵ်ႇၼွၵ်ႈမိူင်းၼႂ်းမိူင်းမႃးဢႅဝ်ႇၼမ်။ ၵူၼ်းမိူင်းမၢၼ်ႈပွတ်းၵၢင်လႄႈတူင်ႈပဵင်းၸိူဝ်းၼႆႉၵေႃႈ မႃးဢႅဝ်ႇ မႃးၶၢႆၶူဝ်းလႄႈတၢင်းၵိၼ်တၢင်းယမ်ႉ ၼမ်ၵူႈပီ။

ၵူၼ်းၵိုၼ်းလႄႈၽူႈလၵ်ႉၸၵ်ႉၶုတ်ႈၵေႃႈလိူင်ႇ။ ၼႂ်းပွႆး ၼႂ်းၵၢတ်ႇၶၢႆတၢင်းၵိၼ် တီႈပၢင်ႇပွႆႇႁူင်းၾႆးမိၼ် လႄႈၼႃႈၶဵင်ႇမူၼ်ႈသိူဝ်းႁွင်ႉၵႂၢမ်းၸိူဝ်းၼႆႉ ၶူဝ်းၶွင်ငိုၼ်းတွင်းၵႆႉႁၢႆၼႃႇ။ ၸွမ်းႁိမ်းႁွမ်းၵၢတ်ႇလူင်ၵေႃႈ ရူတ်ႉထိပ်ႇ ရူတ်ႉၶိူင်ႈၵႆႉႁၢႆၼႃႇ ၵူၼ်းၶၢႆၶူဝ်းၼႂ်းၵၢတ်ႇလူင်ဝဵင်းတူၼ်ႈတီးၵေႃႉၼိုင်ႈလၢတ်ႈ။

ယွၼ်ႉၼၼ် ပေႃးဢွၵ်ႇတၢင်းၼွၵ်ႈ ယႃႇပေၵႂႃႇမႃးၵေႃႉလဵဝ် ၊ ယႃႇပေၵႂႃႇတီႈဢမ်ႇမီးၵူၼ်း၊ ၵူၼ်းၶၢတ်ႇ ၊ ၽွင်းၵႂႃႇၸွမ်းတၢင်း ပေႃးၵူၼ်းပႅၵ်ႇၼႃႈ ႁႄႉရူတ်ႉၵေႃႈ တိုၼ်းယႃႇပေၵိုတ်းပၼ် ၊ ႁႂ်ႈၾၢင်ႉၵၼ်ၵႂႃႇမႃးၼႆ -ၼၢင်းယိင်းၽူႈၸွႆႈထႅမ်ၼႂ်းဝၢၼ်ႈၼႂ်းၶူင်ႇ တီႈဝဵင်းတူၼ်ႈတီးၵေႃႉၼိုင်ႈပၼ်ၾၢင်ႉလၢတ်ႈၼင်ႇၼႆ ။

ပေႃးထိုင်မႃးဝၼ်းတီႈ 29 /10/2025 ၼႆႉ ႁွင်ႈၵၢၼ်ၾၢႆႇၽွင်းငမ်းဝဵင်းတႂ်ႈသိုၵ်းမၢၼ်ႈ တေၸတ်းႁဵတ်း ပွႆးႁူင်းၾႆးမိၼ် တီႈဝဵင်းတူၼ်ႈတီး၊ ယွၼ်ႉမီးၽူႈလၵ်ႉၸၵ်ႉၶုတ်ႈၼမ်ႁႅင်းလႄႈ ၵူၼ်းမိူင်းတၢင်ႇတီႈသီႇလႅၼ် ၸိူဝ်းတေမႃးၶဝ်ႈႁူမ်ႈပၢင်ပွႆး ႁႂ်ႈလႆႈၾၢင်ႉ ၶူဝ်းၶွင်ငိုၼ်းၶမ်းရူတ်ႉၵႃးၸဝ်ႈၵဝ်ႇၼႆ ၵူၼ်းပိုၼ်ႉတီႈတူၼ်ႈတီး တိုၵ်းသူၼ်းလၢတ်ႈဝႆႉၼင်ႇၼႆ။

ဝၢႆးသိုၵ်းမၢၼ်ႈ ယိုတ်းဢဝ်ဢႃႇၼႃႇဝၢၼ်ႈမိူင်းမႃးၼႆႉ တီႈဝဵင်းတူၼ်ႈတီး မီးၵူၼ်းတၢင်းမိူင်းမၢၼ်ႈတူင်ႈပဵင်းၶိုၼ်ႈမႃးယူႇသဝ်းၼမ်။ ပဵၼ်ၼႃႈတႃလႄႈၾၢင်ႁၢင်ႈမိူၼ်သိုၵ်းထၢၵ်ႈ- လၢတ်ႈၵႂၢမ်းမၢၼ်ႈလွၼ်ႉလွၼ်ႉ။ ၸိူဝ်းၶဝ်ၶဝ်ႈတဝ်ၵႂႃႇမႃး ၼႂ်းပွၵ်ႉၼႂ်းယွမ်ႇ ၼႂ်းၵိဝ်ႇ ။ ၵူၼ်းပိုၼ်ႉတီႈလၢတ်ႈဝႃႈ ၶူဝ်းၶွင်ႁိူၼ်းယေးၵႆႉႁၢႆ။ ရူတ်ႉၶိူင်- ၸၢၵ်ႈ- ဢိၵ်ႇၶူဝ်းၶွင်မီးၵႃႈၶၼ်တႄႉဢမ်ႇၵိုတ်းလႆႈ ဝႃႈၼႆ။