ၵႃႈၾၢၵ်ႇရူတ်ႉၵႃး တီႈပွႆးႁူင်းၾႆးမိၼ် ဝဵင်းတူၼ်ႈတီး ၸိုင်ႈတႆးပွတ်းၸၢၼ်းပီၼႆႉ ၵဵပ်းၵႃႈယႂ်ႇ 1 လမ်း 5 မိုၼ်ႇထိုင် 8 မိုၼ်ႇပျႃး ၸိူဝ်းၼႆႉ ဝႃႈၼႆ။
ပေႃးဢဝ်ရူတ်ႉမႃးႁင်းၵူၺ်း ၵႃႈၾၢၵ်ႇ ရူတ်ႉၶိူင်ႈၼိုင်ႈလမ်း 20000 ပျႃး၊ ၵႃးဢွၼ်ႇၼိုင်ႈလမ်း 50000 ပျႃး ပေႃးပဵၼ်တီႈႁပ်ႉၾၢၵ်ႇၶိုၵ်ႉတွၼ်း ၸမ်ပွႆး/လွတ်ႈၽေး/မီးဢၼ်မုင်းဢၼ်ၵင်ႈၼႆလႆႈပၼ်ထိုင် 8 မိုၼ်ႇပျႃး ၵူၼ်းၶဝ်ႈပွႆးၵေႃႉၼိုင်ႈလၢတ်ႈ ။
ၵူၺ်းၵႃႈ ၶမ်ႈပိုတ်ႇပၢင်ပွႆး ဝၼ်းတီႈ 29/10/2025 ၼၼ်ႉ ၾၢႆႇႁပ်ႉၾၢၵ်ႇရူတ်ႉ ၵဵပ်းငိုၼ်းၼမ်။ ပေႃးပဵၼ်တီႈႁၵ်ႉၾၢၵ်ႇဢၼ်ၵႆပၢင်ပွႆးတႄႉ ၵဵပ်းၵႃႈၾၢၵ်ႇရူတ်ႉၼိုင်ႈလမ်း 1 မိုၼ်ႇထိုင် 3 မိုၼ်ႇပျႃး။ ပေႃးပဵၼ်ရူတ်ႉၵႃးဢၼ်ဢမ်ႇမီးဝႂ်ၶွၼ်ႇ လႆႈၵႂႃႇၾၢၵ်ႇတီႈၵၼ်ၵႆဝၢင်းပၢင်ပွႆးပုၼ်ႉ။ ၵႃႈၶဝ်ႈႁွင်ႈၼမ်ႉ(ထၢင်ၶီႈ) ယင်းလႆႈပၼ်ၼိုင်ႈၵေႃႈ 1000 ထိုင် 1500 ပျႃးယူႇ။ ယူႇတီႈၽူႈမီးပုၼ်ႈၽွၼ်း ၾၢႆႇၸတ်းပၢင်ပွႆးလႄႈ ပလိၵ်ႈ မၢၼ်ႈသိုၵ်းမၢၼ်ႈ ဢမ်ႇၵူတ်ႇထတ်းဢဝ်လိူင်ႈသင်ၼႆ ၵူၼ်းပိုၼ်ႉတီႈတူၼ်ႈတီးၵေႃႉၼိုင်ႈ လၢတ်ႈၼင်ႇၼႆ။
“ၶမ်ႈပိုတ်ႇပၢင်ၼၼ်ႉၵူၼ်းၵိုၼ်းဝႃႈၵိုၼ်းဢေႃႈ။ ၵမ်ႈၼမ်လုၵ်ႉတၢင်းမိူင်းမၢၼ်ႈတူင်ႈပဵင်းၶိုၼ်ႈမႃး။ လုၵ်ႉတၢင်းဝၢၼ်ႈၶိုၼ်ႈမႃး။ ၵူၼ်းၼႂ်းဝဵင်းတႄႉဢမ်ႇၵႂႃႇၶႃႈ။ ၶႅၵ်ႇတီႈႁိူၼ်း ၵႂႃႇပွႆးပွၵ်ႈမႃး ၺႃးပိူၼ်ႈၸူၵ်းထူင်ၸူၵ်းထွင်းၶဝ်။ ငိုၼ်းတွင်းၶူဝ်းၶွင်ၵႃႈယႂ်ႇတႄႉ ဢမ်ႇၵိုတ်းလိူဝ်လႆႈၶႃႈယႃႇတိုဝ်းၵႂႃႇလႃးလႃးလႃႈ။ လုၵ်ႈဢွၼ်ႇယိင်းဢွၼ်ႇၵေႃႈၺႃးၸူၵ်းၼႃႈၸူၵ်းလင်ဢေႃႈ။ ၼႂ်းပၢင်ပွႆးၵေႃႈ ႁူင်းၾႆးမိၼ် ၸၢင်ႈယၢတ်ႇတူၵ်းသႂ်ႇ၊ ယၢမ်းၸၢင်ႈတႅၵ်ႇသႂ်ႇလႄႈ ပေႃးတေၵႂႃႇတႄႉ ႁႂ်ႈလႆႈၾၢင်ႉၵၼ် တႃႇလွတ်ႈၽေးၶႃႈ” – ၵူၼ်းပိုၼ်ႉတီႈၵေႃႉၼိုင်ႈလၢတ်ႈၼင်ႇၼႆ။
ပေႃးထိုင်ၶၢဝ်းပွႆးႁူင်းၾႆးမိၼ်ၼႆ တီႈဝႆႉတီႈၸွတ်ႇရူတ်ႉၵႃး ဢွင်ႈတီႈမၵ်းမၢႆဝႆႉတဵမ်ၵူႈတီႈလႄႈ ၵူၼ်းမိူင်း ၸိူဝ်းၵႂႃႇၶဝ်ႈႁူမ်ႈပၢင်ပွႆးၶဝ် လႆႈၵိုတ်းၸွတ်ႇဝႆႉ ၼႂ်းဝၢင်းႁိူၼ်း တီႈဢမ်ႇပေႃးၸမ်ပေႃးၵႆပၢင်ပွႆး၊ ၸဝ်ႈႁိူၼ်းမၢင်ၵေႃႉၵေႃႈ ပႂ်ႉၵဵပ်းဢဝ် ၵႃႈၸွတ်ႇၵိုတ်းရူတ်ႉၵႃး၊ မၢင်ၸိူဝ်းသမ်ႉ ဢမ်ႇၸွမ်းပိူင် ၼင်ႇၽူႈမီးပုၼ်ႈၽွၼ်းၶဝ်မၵ်းမၼ်ႈဝႆႉသေ တဵၵ်းၶၢၼ်းၵဵပ်းဢဝ် ၵႃႈယႂ်ႇၵႃႈပႅင်း ဝႃႈၼႆ။
လိူဝ်ၼၼ်ႉ တီႈၽၵ်းတူၶဝ်ႈဝၢင်းပၢင်ပွႆးၼၼ်ႉ မီးၶိူင်ႈၵူတ်ႇထတ်း ဢဵၵ်ႊသရေႊ။ တီႈၼၼ်ႉၵေႃႈၽိုတ်ႉၵၼ်ႁိမ်ၵၼ်ၶဝ်ႈ ၵူၼ်းၵပ်ႉၼႅၼ်ႈလူင်ဝႆႉၼႆ – ၵူၼ်းၵႂႃႇၶဝ်ႈပွႆးလၢတ်ႈၼင်ႇၼႆ။
ပွႆးႁူင်းၾႆးမိၼ် တသွင်ႇတၢႆႇ တူၼ်ႈတီးပီၼႆႉ တႄႇၸတ်းႁဵတ်း ဝၼ်းတီႈ 29/10/2025။ တေၸတ်းတေႃႇထိုင်ဝၼ်းတီႈ 5/11/2025 လိူၼ်ၼူဝ်ႊဝႅမ်ႊပိူဝ်ႊ ၶၢဝ်းတၢင်း 8 ဝၼ်း၊ ယၢမ်းၵၢင်ဝၼ်း တေမီးၶပ်ႉမၢႆ ပွႆႇႁူင်းၾႆးမိၼ် ဢၼ်ပဵၼ် ႁုၼ်ႇႁၢင်ႈၼူၵ်ႉလႄႈသတ်း လၢႆလၢႆသႅၼ်း၊ ယၢမ်းၵၢင်ၶမ်ႈသမ်ႉ တေမီးၶပ်ႉမၢႆ ပွႆႇႁူင်းၾႆးမိၼ် ဢၼ်ပႃးယၢမ်း (ညမီးကြီး) လႄႈ ၼႄတၢင်းႁၢင်ႈလီႁူင်းၾႆးမိၼ် (စိန်နပန်) လၢႆလၢႆသႅၼ်း။
ပွႆးႁူင်းၾႆးမိၼ် လိူၼ်သိပ်းသွင်ဝဵင်းတူၼ်ႈတီးၼႆႉ တႄႇၸတ်းမႃးၸဵမ်မိူဝ်ႈပၢၼ်ၸဝ်ႈၾႃႉမိူင်းတႆးႁိူင်း။ ၸတ်းႁဵတ်းမႃးၵူႈပီပီ ထိုင်တီႈလုမ်ႈၾႃႉပေႃးသူၼ်ၸႂ် ၶႅၵ်ႇဢႅဝ်ႇယဵမ်ႈတွင်ႈတဵဝ်းၼမ်။ ၽွင်းၶၢဝ်းၶူဝ်ႊဝိတ်ႉတႄႉ ဢမ်ႇၸၢင်ႈလႆႈၸတ်းသေလႆႈၵိုတ်းၵႂႃႇပႅတ်ႈ။ ဝၢႆးၼၼ်ႉ ထူပ်းၽေးသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်း။ ၸင်ႇႁႃၶိုၼ်းၸတ်းပၢင်ပွႆးၶိုၼ်းၼႂ်းပီ 2023 ၼႆႉမႃးၵူၺ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ