မိူဝ်ႈၼႆႉ ဝၼ်းတီႈ 14/10/2025 ယၢမ်းၵၢင်ၼႂ်ၸမ် 7 မူင်း သိုၵ်းမၢၼ်ႈယိုတ်းမိူင်း ၸႂ်ႉႁိူဝ်းမိၼ် ပွႆႇမၢၵ်ႇသႂ်ႇ တီႈဝၢၼ်ႈ ဢုမ်ႇၸွၼ်ႈ(အုမ်းစွမ်)ၼႂ်းဝဵင်းၼမ်ႉသၼ်ႇ ဢွင်ႈတီႈသိုၵ်းတဢၢင်းၵုမ်းၵမ် ၼၢင်းယိင်းဢွၼ်ႇ 2 ပီႈၼွင်ႉ မၢတ်ႇၸဵပ်း လႄႈလူႉတၢႆ ႁိူၼ်းယေးၵေႃႈ လူႉၵွႆ 8 လင်ဝႃႈၼႆ။
ယိင်းသၢဝ် သွင်ၵေႃႉပီႈၼွင်ႉ ၵေႃႉပီႈဢႃႇယု 17 ပီၼႆႉ လူႉတၢႆသေ ၵေႃႉပဵၼ်ၼွင်ႉယိင်းဢႃယု 15 ပီ ဢိၵ်ႇပႃးထႅင်ႈလုၵ်ႈဢွၼ်ႇယိင်းၸၢႆးၼႂ်းဝၢၼ်ႈ 5 ၵေႃႉတႄႉမၢတ်ႇၸဵပ်း။ ၵူၼ်းမိူင်းဝဵင်းၼမ်ႉသၼ်ႇလၢတ်ႈၼင်ႇၼႆ။
“ၶၢဝ်းၵၢင်ၼႂ်ၸဝ်ႉၼႆႉ ႁိူဝ်းမိၼ် သိုၵ်းမၢၼ်ႈ မႃးပွႆႇမၢၵ်ႇၵႂႃႇ 4 လုၵ်ႈ။ ႁိူၼ်းၵေႃႈတိူဝ်ႉ။ ၵူၼ်းၵေႃႈမၢတ်ႇၸဵပ်းၸွမ်းႁၢဝ်ႈႁႅင်း။ ပဵၼ်ၼႂ်းမုင်ႉႁေႃႁိူၼ်းလဵဝ်ၵၼ်။”
ယိင်းသၢဝ်ဢွၼ်ႇၵေႃႉလူႉတၢႆၵႂႃႇၼႆႉ ၸိုဝ်ႈႁွင်ႉ လူၺ်းတိၼ်ႇတိၼ်ႇၼွႆႇၼႆသေ ၸိူဝ်းမၢတ်ႇၸဵပ်းတႄႉပဵၼ် လူၺ်းမေႇတိၼ်ႇၼွႆႇ ဢႃႇယု 15 ပီ ၊ ဢွၼ်ႇၸၢႆး ဢႃႇယု 5 ပီ ၸိုဝ်ႈႁွင်ႉ မၢႆးၼၼ်းပူႉ၊ ဢႃႇယု 7 ပီ ၸိုဝ်ႈႁွင်ႉ မၢႆးၵွင်းၶျိတ်ႉၽျူဝ်း၊ ဢွၼ်ႇယိင်း ဢႃႇယု 3 ၶူပ်ႇ ၸိုဝ်ႈႁွင်ႉ လူၺ်းမေႇၶျိတ်ႉတႄး လႄႈ ၼုမ်ႇၸၢႆး ဢႃႇယု 33 ပီ ၸိုဝ်ႈႁွင်ႉ ဢူးၼၢၼ်းလိၼ် ၸဵမ်ၸိူဝ်းၼႆႉ။
လိူဝ်ၼၼ်ႉ ႁိူၼ်းယေးၵူၼ်းမိူင်း လူႉၵွႆၵႂႃႇ 8 လင်၊ ရူတ်ႉၶိူင်ႈလူႉၵွႆၵႂႃႇ 6 လမ်း လႄႈ ဝူဝ်းၵူၼ်းဝၢၼ်ႈလူႉတၢႆၵႂႃႇ 2 တူဝ် ၼႆယဝ်ႉ။
တႄႇႁူဝ်လိူၼ်ဢွၵ်ႇထူဝ်ႊပိူဝ်ႊမႃးၼႆႉ သိုၵ်းမၢၼ်ႈယိုတ်းမိူင်း ၸႂ်ႉတိုဝ်းႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းၼႃႈတီႈသိုၵ်းတဢၢင်းၵုမ်းၵမ် ႁၢဝ်ႈႁႅင်း။ မၢင်ပွၵ်ႈၺႃးပွႆႇမၢၵ်ႇထပ်းၵၼ် ႁူဝ်ၶမ်ႈ၊ ႁူဝ်ၼႂ်၊ မၢင်ပွၵ်ႈၶႅၼ်ႈၼိုင်ႈဝၼ်း၊ မၢင်ပွၵ်ႈပွႆႇမၢၵ်ႇထပ်းၵၼ် ၼႂ်းဝဵင်းၼမ်ႉသၼ်ႇ၊ ဝဵင်းၵျွၵ်ႉမႄး၊ ဝဵင်းသီႇပေႃႉ၊ ဝဵင်းမိူင်းၵုတ်ႈ၊ ဝဵင်းမိူင်းလူင် ၸဵမ်ၸိူဝ်းၼႆႉ။
မိူၼ်ၼႆ မိူဝ်ႈဝႃး ဝၼ်းတီႈ 13 ၼႆႉၵေႃႈ သိုၵ်းမၢၼ်ႈၸႂ်ႉႁိူဝ်းမိၼ် ယိုဝ်းမၢၵ်ႇလူင်တူၵ်းတႅၵ်ႇသႂ်ႇ ႁိမ်းႁူင်းႁဵၼ်းသွၼ်လိၵ်ႈလႄႈ ၸွမ်းၼႂ်းပွၵ်ႉ ၼႂ်းယွမ်ႇ ဝၢၼ်ႈၵယႃးၵျီး ဝဵင်းၼမ်ႉသၼ်ႇသေ ၵူၼ်းမိူင်းမၢတ်ႇၸဵပ်းၵႂႃႇၸွမ်း 1 ၵေႃႉ။ ပူၼ်ႉမႃးဝၼ်းတီႈ 4 ၼၼ်ႉသမ်ႉ ၵူၼ်းမိူင်းလူႉတၢႆ 2 ၵေႃႉ၊ မၢတ်ႇၸဵပ်းၵႂႃႇ 18 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ