ဝၼ်းတီႈ 13/10/2025 ယၢမ်းဝၢႆးဝၼ်း 1 မူင်းပၢႆ သိုၵ်းမၢၼ်ႈယိုတ်းမိူင်း ၸႂ်ႉႁိူဝ်းမိၼ်သိုၵ်းပွႆႇမၢၵ်ႇသႂ်ႇ ၼႂ်းဝၢၼ်ႈၵယႃးၵျီး ဝဵင်းၼမ်ႉသၼ်ႇ ဢွင်ႈတီႈသိုၵ်းတဢၢင်း (TNLA) ၵုမ်းၵမ်ဝႆႉ ၼႂ်းၸိုင်ႈတႆးပွတ်းႁွင်ႇ။

မၢၵ်ႇလူင်ၶွင်ႁိူဝ်းမိၼ်တိုၵ်းသိုၵ်းမၢၼ်ႈ ၵႂႃႇတူၵ်းတႅၵ်ႇသႂ်ႇ ႁိမ်းႁူင်းႁဵၼ်းသွၼ်လိၵ်ႈ လႄႈ ၸွမ်းၼႂ်းပွၵ်ႉ မီးႁိူၼ်းၵူၼ်းမိူင်း၊ ဝတ်ႉဝႃးၽႃသိူဝ်ႇၸဵမ်ၸိူဝ်းၼႆႉ ၼႆယဝ်ႉ။

ၾၢႆႇတပ်ႉသိုၵ်းတဢၢင်း (TNLA) ၶဝ်ပိုၼ်ၽၢဝ်ႇဢွၵ်ႇဝႆႉဝႃႈ – သိုၵ်းမၢၼ်ႈၸႂ်ႉႁိူဝ်းမိၼ် ပွႆႇမၢၵ်ႇသႂ်ႇ မွၵ်ႈ 6 လုၵ်ႈ၊ ယွၼ်ႉမီးၵူၼ်းမိူင်း ယူႇဝႆႉၼႂ်းပွၵ်ႉၼၼ်ႉလႄႈ ၸၢင်ႈမီးၵူၼ်းမိူင်းမၢတ်ႇၸဵပ်းလူႉၸွမ်းယူႇ ၼႆယဝ်ႉ။

မိူဝ်ႈပူၼ်ႉမႃး ဝၼ်းတီႈ 4 လိူၼ်ဢွၵ်ႇထူဝ်ႊပိူဝ်ႊၼႆႉၵေႃႈ ယွၼ်ႉမၢၵ်ႇလူင်ႁိူဝ်းမိၼ်သိုၵ်းမၢၼ်ႈ တူၵ်းတႅၵ်ႇသႂ်ႇ ၼႂ်းဝၢၼ်ႈသႄႇတူၼ်ႈႁုင်း ဝဵင်းၼမ်ႉသၼ်ႇသေ လုၵ်ႈဢွၼ်ႇလူႉတၢႆထင်တီႈၵႂႃႇၵမ်းသိုဝ်ႈ 2 ၵေႃႉ၊ ၵူၼ်းမိူင်း မၢတ်ႇၸဵပ်းၵႂႃႇႁၢဝ်ႈႁႅင်းထႅင်ႈ 18 ၵေႃႉ ၼႆယဝ်ႉ။

ၼႂ်းၸႄႈဝဵင်းၼမ်ႉသၼ်ႇၼႆႉ ပဵၼ်ဢွင်ႈတီႈသိုၵ်းတဢၢင်းၵုမ်းၵမ် ပၼ်ႇၵၢၼ်ၽွင်းငမ်းဝႆႉၵမ်းသိုဝ်ႈလႄႈ ယၢပ်ႇၽိုတ်ႇၾူၼ်းလႅင်း၊ ၵူၼ်းမိူင်းပိုၼ်ႉတီႈ လႆႈၸႂ်ႉတိုဝ်းဝႆႉ သတႃးလိင်ႉဝႆႉ ပဵၼ်ၸူဝ်ႈၶၢဝ်းၵွႆးလႄႈ ၼင်ႇႁိုဝ်တေႁူႉၶၢဝ်ႇႁူဝ်ယွႆႈၶိုတ်းတၼ်းၼၼ်ႉ ၸုမ်းၶၢဝ်ႇၽူႈတွႆႇႁွၵ်ႈၶတ်းၸႂ်ၵပ်းသိုပ်ႇၵူၼ်းပိုၼ်ႉတီႈဝႆႉသေ တေၶိုၼ်းဢဝ်မႃးတေႃႉတႆႇၶႆႈၼႄပိူင်ပဵၼ်ႁူဝ်ယွႆႈမၼ်းယူႇ။