ၵႃးတၢင်ႇလိၼ်လႄႈမၢၵ်ႇႁိၼ် ဢၼ်ဢွၵ်ႇတီႈမေႃႇငိုၼ်း မေႃႇႁႄႈဝဵင်းၼမ်ႉတူႈ တၢင်ႇမႃးၼမ်ႉၼၵ်းၼမ်လူၼ်ႉပူၼ်ႉလိူဝ်သေ ၵႂႃႇမႃးၼမ်ၵူႈဝၼ်း ၼိူဝ်သဵၼ်ႈတၢင်းၼမ်ႉတူႈ – လႃႈသဵဝ်ႈ ၸိုင်ႈတႆးပွတ်းႁွင်ႇ ႁဵတ်းႁႂ်ႈသဵၼ်ႈတၢင်းလူႉၵွႆ ၵူၼ်းမိူင်းၵႂႃႇမႃး ယၢပ်ႇၽိုတ်ႇ။

တႄႇၼႂ်းလိူၼ် ဢေႃႊၵတ်ႉသ် ၼႆႉမႃး ၵႃး Truck တၢင်ႇၶူၺ်လိၼ် ၶီႈလိၼ် မၢၵ်ႇႁိၼ် လုၵ်ႉတၢင်းဝဵင်းၼမ်ႉတူႈ လူင်းမႃးတၢင်း ဝၢၼ်ႈဢီႇၼၢႆး ၸႄႈဝဵင်းလႃႈသဵဝ်ႈၶိုၼ်းၶိုၼ်းဝၼ်းဝၼ်းလႄႈႁဵတ်းႁႂ်ႈသဵၼ်ႈတၢင်းလူႉၵွႆ ၵႃးတၢင်ႇၵူၼ်း ၊ ၵႃးတၢင်ႇၵုၼ်ႇ ဢမ်ႇၸၢင်ႈၵႂႃႇမႃးဝႃႈၼႆ ။

ၸဝ်ႈၵႃး လၢတ်ႈၽူႈတွႆႇႁွၵ်ႈဝႃႈ -“ ၼိုင်ႈပွၵ်ႈၼႆႉ 9 လမ်း – 10 လမ်း။ တၢင်ႇၶီႈလိၼ် ၶီႈငိုၼ်းတၢင်ႇလူၼ်ႉတၢင်ႇလိူဝ် မႃးၶိုၼ်းၶိုၼ်းဝၼ်းဝၼ်းလႄႈ သဵၼ်ႈတၢင်းလူႉၵွႆ ။ ၵႃးဢွၼ်ႇ ၵႃးတၢင်ႇၵူၼ်း ဢမ်ႇၸၢင်ႈၵႂႃႇမႃး မီးၸမ် 2 လိူၼ်ယဝ်ႉ ၊ တေႃႈၼင်ႇၵႃးဢၼ်တၢင်ႇႁိၼ်ႁႄႈ ၸိူဝ်းၼႆႉၼႆ ပေႃးၶဝ်လူင်းမႃးၼႆ လႆႈဢဝ်ၵႃးတၢင်ႇသၢႆးမႃးပႃးလမ်းၼိုင်ႈသေ တၢင်းယၢပ်ႇတီႈလႂ် ၶဝ်ဢမ်ႇၸၢင်ႈၶၢမ်ႈတီႈလႂ်ၵေႃႈ ၶဝ်ဢဝ်သၢႆးထွၵ်ႇသႂ်ႇသေ ၸင်ႇၸၢင်ႈၵႂႃႇမႃးလႆႈဢေႃႈ ။ ၵႃးဢွၼ်ႇတႄႉဢမ်ႇၸၢင်ႈၵႂႃႇမႃးၶႃႈ ၊ လႆႈလဵပ်ႈၵႂႃႇတင်း မိူင်းယဵၼ်ဢဝ် ”- ဝႃႈၼႆ ။

ယွၼ်ႉသဵၼ်ႈတၢင်းလူႉၵွႆလႄႈ ၵူၼ်းမိူင်း ယူႇၼႂ်းၵႄႈ ဝၢၼ်ႈဢီႇၼၢႆး – ၼမ်ႉတူႈ ဢမ်ႇၸၢင်ႈတေႃႉၶူဝ်းၵုၼ်ႇၵႂႃႇမႃး ၊ မၢၵ်ႇၶဝ်ႈတဝ်ႈၼမ်ႉၼႂ်းသူၼ်ၵေႃႈ ဢမ်ႇၸၢင်ႈတေႃႉသူင်ႇၵႃႉၶၢႆ ႁဵတ်းႁႂ်ႈၵူၼ်းပိုၼ်ႉတီႈႁႃၵိၼ်လဵင်ႉတွင်ႉယၢပ်ႇၽိုတ်ႇ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ယွၼ်ႉၵႃးၵႂႃႇမႃးဢမ်ႇလႆႈလႄႈ ပေႃးလူဝ်ႇသင်ၵေႃႈ လႆႈဢဝ်ရူတ်ႉၶိူင်ႈ ၵႂႃႇသိုဝ်ႉတင်းဝဵင်းလႃႈသဵဝ်ႈ ဢမ်ႇၼၼ် ၵႃႇသိုဝ်ႉဝဵင်းၼမ်ႉတူႈဢဝ် ၊ ပေႃးဢဝ်ရူတ်ႉၶိူင်ႈၵႂႃႇမႃးၸိူဝ်းၼၼ်ႉသမ်ႉ ၵႃႈၶၼ် ၵေႃႈၵႃႈႁႅင်းလိူဝ်သေတၢင်ႇတီႈ ၊ လိူဝ်ၼၼ်ႉယွၼ်ႉသဵၼ်ႈတၢင်ႈၵႂႃႇမႃးယၢပ်ႇလႄႈ ပေႃးပဵၼ်ၽေးၵိုင်ႉၵၢင်ႉ လူဝ်ႇယူတ်းယႃႇၸိူဝ်းၼႆႉၵေႃႈ ၵႂႃႇမႃးယၢပ်ႇၼႃႇ”- ဝႃႈၼႆ ။

မိူဝ်ႈၵွၼ်ႇ ၵႃးတၢင်းၶီႈလိၼ် လႄႈမၢၵ်ႇႁိၼ်ၸိူဝ်း ၵႂႃႇမႃးသဵၼ်ႈတၢင်းၼမ်ႉတူႈ – လႃႈသဵဝ်ႈၼႆႉ ၼိုင်ႈလမ်းမီးၶႂၢင်ႉတၢင်ႇၼမ်ႉၼၵ်းဢမ်ႇလႆႈလိူဝ် 20-30 တၼ်ႊ။ ၵူၺ်းၵႃႈ ယၢမ်းလဵဝ်ၵႃးၼိုင်ႈလမ်း တၢင်ႇလိၼ် ၼမ်ႉၼၵ်းဢမ်ႇယွမ်း 70 တၼ်ႊ လႄႈႁဵတ်းႁႂ်ႈသဵၼ်ႈတၢင်းလူႉၵွႆႁႅင်း -ၵူၼ်းပိုၼ်ႉတီႈလၢတ်ႈၼင်ႇၼႆ ။

ယွၼ်ႉသဵၼ်ႈတၢင်းလူႉၵွႆၵူၼ်းတၢင်း ဝၢၼ်ႈၼမ်ႉတွင်ႈၵုင်း ၊ ဝၢၼ်ႈပၢင်သပေႇ ၊ ဝၢၼ်ႈၸၢမ် ၊ ဝၢၼ်ႈၵုၼ်ၵျွင်း ၊ ဝၢၼ်ႈၼႃးၵေး ၊ ဝၢၼ်ႈပဵင်းလူင် ၊ ဝၢၼ်ႈၺွင်ႇသွႆႈ ၊ ဝၢၼ်ႈ မႆႉႁုင်း ၊ ဝၢၼ်ႈၼႃးမတ်း ၊ဝၢၼ်ႈၼႃးသၢႆး ၊ ဝၢၼ်ႈလုၵ်းလိူဝ်ႇ ၊ ဝၢၼ်ႈပၢင်ၶႅမ် ၸိူဝ်းၼႆႉ ဢမ်ႇၸၢင်ႈၵႂႃႇမႃး ယၢပ်ႇၽိုတ်ႇဝႆႉ ဝႃႈၼႆ ။

ယွၼ်ႉသဵၼ်ႈတၢင်းၵႂႃႇ ၼမ်ႉတူႈ-လႃႈသဵဝ်ႈ တၢင်းဝၢၼ်ႈ ဢီႇၼၢႆးဢမ်ႇၸၢင်ႈၵႂႃႇမႃးလႄႈ ၊ ယၢမ်းလဵဝ် ပေႃးတေၵႂႃႇၼမ်ႉတူႈ- လႃႈသဵဝ်ႈ လႆႈၵႂႃ တၢင်းသဵၼ်ႈတၢင်းမိူင်းယဵၼ် လႆႈပၼ်ၵႃႈၵႃး ၼိုင်ႈၵေႃႉ 45000 ထိုင် 50000 ပျႃးၸိူဝ်းၼႆႉလႆႈႁူႉၼင်ႇၼႆ။

ဝဵင်းၼမ်ႉတူႈၼႆႉ ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်း 2 မႃး သိုၵ်းတဢၢင်း TNLA ၵုမ်းၵမ်ဝႆႉသေ ပၼ်ႇၵၢၼ်ၽွင်းငမ်းဝႆႉ။