ၶမ်ႈၶိုၼ်းဝၼ်းတီႈ 12/10/2025 မီးၸၢႆးဢႃယု 32 ပီၵေႃႉၼိုင်ႈ ပွႆႇပူၺ်သေ ပႆၵႂႃႇမႃးယူႇၸွမ်းၵၢင်တၢင်းၼိူဝ်သဵၼ်ႈတၢင်း ၼိမၢၼ်းႁေးမိၼ်း ႁိမ်းႁွမ်းသီႇယႅၵ်ႈၾႆးၶဵဝ်လႅင် ၼႃႈၵၢတ်ႇမေႊယႃႉ ၵၢင်ဝဵင်းၵဵင်းမႂ်ႇ ပိုၼ်ႉတီႈဢၼ်မီးၵူၼ်းၵိုၼ်းၶွၼ်ႈသုတ်း။

ၵူၺ်းၵႃႈၽွင်းမၼ်းၸၢႆး ပွႆႇပူၺ်ဢွၵ်ႇမႃးၼႆႉ ပဵၼ်ၶၢဝ်းယၢမ်းၵၢင်ၶိုၼ်းလိုၵ်း ဢမ်ႇမီးၵူၼ်းၵိုၼ်းယဝ်ႉၼႆသေတႃႉ ၵူၼ်းၼွၵ်ႈမိူင်းၼႂ်းမိူင်း ၸိူဝ်းၼင်ႈယူႇၼႂ်းႁၢၼ်ႉတၢင်းၵိၼ်ၸွမ်းႁိမ်းႁွမ်း ႁၼ်သေ ဢွၼ်ၵၼ်တူၵ်းၸႂ်။

ဝၢႆးၼၼ်ႉ ၸဝ်ႈၼႃႈတီႈပလိၵ်ႈထႆး ႁွတ်ႈထိုင်မႃးတီႈမၼ်းၸၢႆးသေ ဢုပ်ႇလၢတ်ႈတွင်ႈထၢမ်မၼ်းၸၢႆးသေ တိတ်းတေႃႇလႆႈတင်းၵူၼ်းႁိူၼ်းမၼ်းၸၢႆးယဝ်ႉ ဢဝ်တူဝ်မၼ်းၸၢႆးသူင်ႇႁူင်းယႃပၢႆးၸႂ်ဝႆႉယဝ်ႉလႆႈႁူႉၼင်ႇၼႆ။

လႆႈႁူႉဝႃႈၸၢႆးပွႆႇပူၺ်ၼႆႉ ပဵၼ်ၵူၼ်းဢႅဝ်ႇယဵမ်ႈတွင်ႈတဵဝ်း (ၵူၼ်းမိူင်းဝၼ်းတူၵ်း) ႁွတ်ႈထိုင်ဢႅဝ်ႇယဵမ်ႈဝဵင်းၵဵင်းမႂ်ႇၸိုင်ႈထႆး။ မၼ်းၸၢႆးၼႆႉ ပဵၼ်တၢင်းပဵၼ်ပၢႆးၸႂ်ဢမ်ႇမၢၼ်ႇ၊ လႆႈၵိၼ်ယႃႈယႃပၢႆးၸႂ်ဝႆႉ။ မၼ်းၸၢႆးမႃးဢႅဝ်ႇယဵမ်ႈမိူင်းထႆးၸွမ်းၵူၼ်းႁိူၼ်းမၼ်း။ ၵူၺ်းၵႃႈၵွၼ်ႇၼႃႈၼႆႉ 2-3 ဝၼ်းမၼ်းၸၢႆးဢမ်ႇၵိၼ်ယႃႈယႃၵုမ်းပၢႆးၸႂ်ၼၼ်ႉသေဢမ်ႇၵႃး သမ်ႉၵိၼ်လဝ်ႈမဝ်းၵႅပ်ႇၼမ်ဝႆႉလႄႈ ထိုင်မႃးၶမ်ႈၶိုၼ်းဝၼ်းတီႈ 12 မၼ်းၸၢႆးလိုမ်းႁၢင်ႈလိုမ်းတူဝ် ပွႆႇပူၺ်ဢွၵ်ႇႁူင်းႁႅမ်းမႃးပႆၵၢင်ဝဵင်းၸိူင်ႉၼႆ။ ဝၢႆးလင်ႁူႉဝႃႈမၼ်းၸၢႆးႁၢႆယဝ်ႉ ၸိူဝ်းပဵၼ်ၵူၼ်းႁိူၼ်းၵေႃႈႁူမ်ႈတင်းၸဝ်ႈၶွင်ႁူင်းႁႅမ်းတီႈၶဝ်မႃးလိုဝ်ႈၼၼ်ႉသေၸွမ်းဢွၵ်ႇႁႃယူႇ။ ႁိုင်မွၵ်ႈ 2-3 ၸူဝ်ႈမူင်းၵေႃႈၸင်ႇမီးၸဝ်ႈၼႃႈတီႈပလိၵ်ႈထႆး ၵပ်းသိုပ်ႇမႃးတၢင်းႁူင်းႁႅမ်းသေ ၸင်ႇႁူႉဝႃႈမၼ်းၸၢႆးပွႆႇပူၺ်ဢွၵ်ႇပႆၵၢင်ဝဵင်း – ၼႆ ယူႇတီႈပလိၵ်ႈထႆး ပိုၼ်ၽၢဝ်ႇသေ သိုဝ်ႇၶၢဝ်ႇထႆးၼႂ်းဝဵင်းၵဵင်းမႂ်ႇ တႅမ်ႈတၢင်ႇပိုၼ်ၽၢဝ်ႇဝႆႉၼင်ႇၼႆ။