တီႈလိၼ်လိၼ်တႆး−ထႆး ဝဵင်းတႃႈၶီႈလဵၵ်းၼႆႉ ၽူႈလၵ်ႉၸၵ်ႉၶုတ်ႈလိူင်ႇၼမ်မႃး ၵူႈမိုဝ်ႉၵူႈဝၼ်း ၵူၼ်းလႄႇၵၢင်ၶမ်ႈၵၢင်ၶိုၼ်းၸိူဝ်းၼႆႉၵေႃႈ ၺႃးယိုဝ်း ထိုင်တီႈလူႉတၢႆၵေႃႈမီးဝႃႈၼႆ။
ဝၼ်းတီႈ 8/10/2025 ၵူၼ်းၸၢႆးၵေႃႉၼိုင်ႈၵႂႃႇတၢင်းၼွၵ်ႈသေပွၵ်ႈၶိုၼ်းႁိူၼ်း ၽွင်းမၼ်းၸၢႆးမႃးၵိုတ်းၸွတ်ႇရူတ်ႉမၼ်း ၸၢႆးၼႃႈႁိူၼ်းၼၼ်ႉမီးၵူၼ်းဢမ်ႇႁူႉၾၢႆႇ 2 ၵေႃႉၶီႇရူတ်ႉၵႃးသီလမ်မႃးယိုဝ်းသႂ်ႇမၼ်းၸၢႆး မၢတ်ႇၸဵပ်းႁၢဝ်ႈႁႅင်း တၢႆထင်တီႈ။
ၼၢင်းယိင်းသႅၼ်းပၢၼ်ၵၢင်ၵူၼ်းၵႃႉ ဢၼ်ယူႇတီႈဝဵင်းတႃႈၶီႈလဵၵ်းလၢတ်ႈၽူႈတွႆႇႁွၵ်ႈဝႃႈ – “ ၸႂ်ႈယဝ်ႉဝႃႈ မၼ်းပဵၼ်ၵၢင်ၶမ်ႈ ဝၼ်းတီႈ 8 မွၵ်ႈၶၢဝ်းယၢမ်း 8 မူင်းၶိုင်ႈပၢႆ ၼႆႉၼေႈ။ မႅၼ်ႈမိူဝ်ႈမၼ်းမႃး ၵိုတ်းရူတ်ႉၵႃးတၢင်းၼႃႈႁိူၼ်းမၼ်းၼၼ်ႉၼႃႇ။ သမ်ႉမီးၵူၼ်းမႃးၸွမ်း ၵူၼ်ႈမၼ်းၼႆဢိူဝ်ႈ။ မၼ်းၺႃးဢဝ်ၵွင်ႈယိုဝ်း ထိုင်တီႈလႆႈလူႉတၢႆၵႂႃႇယဝ်ႉဢၼ်ဝႃႈၼႆႉၵေႃႈ ပဵၼ်ယွၼ်ႉပိူဝ်ႈမၼ်းၺႃးမၢတ်ႇၸဵပ်းတီႈၵွၵ်းႁူဝ်မၼ်း ပဵၼ်သွင်ႁွႆးၼႃႇ။ ယဝ်ႉၵေႃႈတင်းတႂ်ႈ(တီႈလင်)မၼ်းၼႆႉပဵၼ်ႁႃႈႁွႆးၼၼ်ႉၼႃႇ။ ”
ၵူၼ်းဢၼ်လူႉတၢႆၵႂႃႇၼႆႉ ၸိုဝ်ႈႁွင်ႉၸၢႆးဢွင်ႇၶမ်း ဢႃယုမီး 35 ပီ ယူႇပွၵ်ႉသၼ်သၢႆးတႆး ဝဵင်းတႃႈၶီႈလဵၵ်း။ ၵူၼ်းမႃးယိုဝ်းၼၼ်ႉပဵၼ်ၽႂ် ယူႇဝႆႉတီႈလႂ်ၼႆ တေႃႇထိုင်ယၢမ်းလဵဝ် ယင်းပႆႇမီးၽႂ်ႁူႉၸွမ်း။ ယွၼ်ႉၼၼ်ၵူၼ်းမိူင်းပိုၼ်ႉတီႈၶဝ် တိုၵ်ႉလႆႈမႆႈၸႂ်လွင်ႈႁူမ်ႇလူမ်ႈ တႃႇၵႂႃႇမႃးၽွင်းၵၢင်ၶမ်ႈၵၢင်ၶိုၼ်း။
ၵူၼ်းမိူင်း ဝဵင်းတႃႈၶီႈလဵၵ်းထႅင်ႈၵေႃႉၼိုင်ႈၵေႃႈလၢတ်ႈၽူႈတွႆႇႁွၵ်ႈဝႃႈ-“မၼ်းလႆႈၾၢင်ႉယူႇၾၢင်ႉၵိၼ် တႄႉတႄႉ ။ ပေႃးပဵၼ်ၵၢင်ၶမ်ႈၵၢင်ၶိုၼ်းၼႆၵေႃႈ ဢမ်ႇႁတ်းဢွၵ်ႇႁိူၼ်းၵႂႃႇဢႅဝ်ႇလႄႇလိုၵ်းယဝ်ႉ ယွၼ်ႉဝႃႈမၼ်းဢမ်ႇမိူၼ်မိူဝ်ႈၵူႈပွၵ်ႈၼၼ်ႉၼႃႇ။ ၵၢၼ်ၵႃႉၵၢၼ်ၶၢႆၵေႃႈ တေလႆႈဝႃႈတူၵ်းတႅမ်ႇ ယေႃႈလူင်းမႃး တေႉတေႉ။ ပေႃးယဝ်ႉၵေႃႈ ၵူၼ်းႁၢႆႉၸိူဝ်းၼႆႉလိူင်ႇၼမ်မႃး။ ၽူႈလၵ်ႉၵူၼ်းၸူၼ်ၵေႃႈလိူင်ႇမႃးႁႅင်းၼႃႇဢိူဝ်ႈ။ ပေႃးဝၢၼ်ႈမိူင်းလီမႃးတႄႉ တေၶႅၼ်းယူႇၵႂႃႈ ။”
ပေႃးပဵၼ်ၼၢင်းယိင်းဢွၼ်ႇၸိူဝ်းၼႆႉယိင်ႈၶႅၼ်းဢမ်ႇမီးလွင်ႈႁူမ်ႇလူမ်ႈသေဢိတ်း။ ပႆႇဝႃႈယၢမ်းၵၢင်ၶိုၼ်း- ၶၢဝ်းယၢမ်းၵၢင်ဝၼ်းၵူၺ်းယင်းၺႃးၸူၼ်ရူတ်ႉၶိူင်ႈ ၸူၼ်ၶူဝ်းၶွင်ငိုၼ်းၶမ်း တေႃႇၼႃႈတေႃႇတႃၵူၼ်းတင်းၼမ်ယူႇ- ၵူၼ်းတႃႈၶီႈလဵၵ်းလၢတ်ႈၼင်ႇၼႆ။
တီႈဝဵင်းတႃႈၶီႈလဵၵ်းၼႆႉၵူၺ်းၼင်ႇၵဝ်ႇ မိူဝ်ႈဝၼ်းတီႈ 5/10/2025 ၼႆႉၵေႃႈ ရူတ်ႉၵႃးၽႃႇၺႃးၵၼ်ယဝ်ႉ ၵူၼ်းႁေႃႈၵႃးသမ်ႉႁေႃႈလႅၼ်ႈပၢႆႈလႄႈ ၽႃႇၺႃးထႅင်ႈရူတ်ႉၵႃးလၢႆလမ်း မီးၵူၼ်းလူႉတၢႆ 5 ၵေႃႉ မၢတ်ႇၸဵပ်း 5 ၵေႃႉ ။
ဝဵင်းတႃႈၶီႈလဵၵ်းၼႆႉ ပဵၼ်ဝဵင်းတိတ်းၸပ်းလႅၼ်လိၼ် ၵူၼ်းတၢင်ႇတီႈသီႇလႅၼ် မႃးယူႇသဝ်းၼမ်၊ ပၢင်တေႃႇလွင်း၊ ယႃႈမဝ်းၵမ်၊ၵဵမ်းဢွၼ်ႊလၢႆႊလႄႈ ၵၢၼ်လွၵ်ႇလႅၼ်ငိုၼ်း ၵျႃႊၽျႅၼ်ႉ ၸိူဝ်းၼႆႉၵေႃႈလိူင်ႇ။ လိူဝ်ၼၼ်ႉၵၢၼ်ၽိတ်းမၢႆမီႈ ၵေႃႈမီးတင်းၼမ်။
ယွၼ်ႉၼၼ်လႄႈ ၽူႈလၵ်ႉၸၵ်ႉၶုတ်ႈလိူင်ႇၼမ်မႃးႁႅင်းသေ ၵႆႉမီးလွင်ႈပိုတ်းယိုဝ်း၊ ၶႃႈႁႅမ်ၵၼ်။သိုၵ်းမၢၼ်ႈလႄႈ ၸဝ်ႈၼႃႈတီႈ ၾၢႆႇပလိၵ်ႈၸိူဝ်းၼႆႉၵေႃႈ ဢမ်ႇသူႈတီႉၺွပ်းလႆႈၵူၼ်းႁၢႆႉ ဢၼ်ၽိတ်းပၵ်းပိူင်မၢႆမီႈၸိူဝ်းၼႆႉလႆႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ