ပူႇၵႄႇ ဝၢၼ်ႈတပ်ႉၵုင်း ဢိူင်ႇၵျၢၼ်ႇတေႃး လႄႈ ၽူႈၶဝ်ႈၸုမ်းၾၢႆႇၽဵဝ်ႈမူၺ်ႉၸုမ်းၵေႃႇၵၢၼ်ႁၢႆႉ (တႂ်ႈသိုၵ်းမၢၼ်ႈ) (ၾၢႆႇႁူမ်ႇလူမ်ႈပိုၼ်ႉတီႈ)ဝၢၼ်ႈမျႃႉတဵင်းတၢၼ်ႇ  ၼႂ်းၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း ၺႃးၸုမ်းဢမ်ႇႁူႉၾၢႆႇ ဢဝ်မိတ်ႈတႅင်း ႁႅမ်တၢႆ ဝႃႈၼႆ။

ၼႂ်းဝၼ်းတီႈ 5/10/2025 ၽူႈၵွၼ်းဝၢၼ်ႈတပ်ႉၵုင်း ဢူးပႃႉမူၺ်း ဢႃယု- 45 ပီလႄႈ ၽူႈၶဝ်ႈၸုမ်းၾၢႆႇႁူမ်ႇလူမ်ႈပိုၼ်ႉတီႈ ဢူးမဵဝ်းၵျေႃႇ ဢႃယု – 39  ပီ ၺႃးၸုမ်းဢမ်ႇႁူႉၾၢႆႇ ဢဝ်မိတ်ႈတႅင်း ၶႃႈႁႅမ်တၢႆ တီႈပွၵ်ႉမဵဝ်ႉၵူင်း ၼႂ်းဝဵင်းယႂႃႇငၢၼ်ႇဝႃႈၼႆ ။

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၽူႈၵွၼ်းဝၢၼ်ႈတပ်ႉၵုင်းလႄႈ ၵူၼ်းဝၢၼ်ႈမျႃႉတဵင်းတၢၼ်ႇ ၺႃးတႅင်းတၢႆ တီႈၶွၵ်ႈမူ ဢၼ်မီးၼႂ်းပွၵ်ႉမဵဝ်ႉၵူင်း ၼႂ်းဝဵင်း ၊ သွင်ၵေႃႉၼၼ်ႉ ႁူမ်ႈၵၼ်တင်းသိုၵ်းမၢၼ်ႈသေ ၵႆႉမႂ်ၵိၼ်ငိုၼ်းၵူၼ်းဝၢၼ်ႈၼႃႇ ၊ ပဵၼ်ၽႂ်မႃးၶႃႈႁႅမ်ၵႂႃႇဢၼ်ဝႃႈၼၼ်ႉတႄႉ ဢမ်ႇလႆႈႁူႉၸွမ်း”- ဝႃႈၼႆ ။

ပူႇၵႄႇဢၼ်ၺႃးၶႃႈႁႅမ်တၢႆယၢမ်းလဵဝ်ၼႆႉ ပဵၼ်ၵူၼ်း ၵႆႉမႂ်ၵိၼ်ငိုၼ်းၵူၼ်းဝၢၼ်ႈသေဢမ်ႇၵႃး ပေႃးဢမ်ႇမီးလွင်ႈပဵင်းပေႃးၸႂ်တေႃႇၵူၼ်းဝၢၼ်ႈၵေႃႈ ၵႆႉၵႂႃႇၸႅင်ႈ/လၢတ်ႈသိုၵ်းမၢၼ်ႈၼႃႇ – ၼႆ ၵူၼ်းပိုၼ်ႉတီႈလၢတ်ႈ။

ၸူဝ်ႈသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ တီႈဝဵင်းယႂႃႇငၢၼ်ႇၼႆႉ ၵၢင်ႉၵႄႇ ၵွၼ်းဢိူင်ႇ  ၵမ်းၵမ်းၺႃးၶႃႈႁႅမ်တၢႆ၊  ပေႃးပႃးၵမ်းၼႆႉ မီး 5 ပွၵ်ႈယဝ်ႉ၊  ဢမ်ႇႁူႉပဵၼ်ၽႂ် ၸုမ်းလႂ်လူင်းမိုဝ်းၶႃႈႁႅမ်တၢႆ။  ငဝ်းလၢႆးၸိူင်ႉၼႆ ၽႂ်ၵေႃႈဢမ်ႇႁတ်း/ ဢမ်ႇၶႂ်ႈႁဵတ်း ၵၢင်ႉၵႄႇ  ၵွၼ်းဢိူင်ႇထႅင်ႈယဝ်ႉ ၵူၼ်းပိုၼ်ႉတီႈလၢတ်ႈၼင်ႇၼႆ။  

“  တီႈၼႆႈၼႆႉ ၵၢင်ႉၵႄႇၵွၼ်းဢိူင်ႇၺႃးၶႃႈႁႅမ်ၼႆႉမီး 5 ပွၵ်ႈယဝ်ႉ ၊ ၵႆႉၺႃးၶႃႈႁႅမ်ၼႃႇလႄႈ ၽႂ်ဢမ်ႇၶႂ်ႈႁဵတ်းၵၢင်ႉၵႄႇ။ ၵူၺ်းၵႃႈ ပေႃးၾၢႆႇသိုၵ်းမၢၼ်ႈတဵၵ်းၸႂ်ႉႁဵတ်းသမ်ႉ ဢမ်ႇၶႂ်ႈႁဵတ်းၵေႃႈၵႃႈလႆႈႁဵတ်း။ ႁဵတ်းၵၢင်ႉၵႄႇၼႆႉမီးၽေးၼႃႇၼေႃႈ ။ ၾၢႆႇပုၼ်ႉၵေႃႈလႆႈၵူဝ် ၾၢႆႇၼႆႉၵေႃႈလႆႈၵူဝ်။    ”- ဝႃႈၼႆ ။   

 ဝၢႆးပဵၼ်လွင်ႈၵၢင်ႉၵႄႇၺႃးၶႃႈႁႅမ်တၢႆၵမ်းၼႆႉ ပလိၵ်ႈ သိုၵ်းမၢၼ်ႈ ထႅမ်ႁႅင်းသိုၵ်းသေ လိုပ်ႈလမ်းၵူတ်ႇထတ်းၼႂ်းပိုၼ်ႉတီႈႁၢဝ်ႈႁႅင်း။ လိူဝ်ၼၼ်ႉ သင်ထၢင်ႇထိူမ်ဝႃႈ ၵဵဝ်ႇၵွင်ႉတင်းၸုမ်းလုၵ်ႉၽိုၼ်ႉ PDF ၼႆ တီႉၺွပ်းထုပ်ႉပေႃႉ ႁဵတ်းႁႂ်ႈၵူၼ်းမိူင်းလႆႈမႆႈၸႂ်လွင်ႈႁူမ်ႇလူမ်ႈဝႆႉႁၢဝ်ႈႁႅင်း- ဢမ်ႇၸၢင်ႈၵႂႃႇႁဵတ်းၵၢၼ်လွတ်ႈလွတ်ႈလႅဝ်းလႅဝ်း- ဝႃႈၼႆ။

မိူၼ်ၼင်ႇၼႆ ဝၼ်းတီႈ 26/11/2024 ယၢမ်းၵၢင်ၶမ်ႈ 6 မူင်းၼၼ်ႉၵေႃႈ   ၵၢင်ႉၵႄႇဝၢၼ်ႈ ၽယႃးၵျီးၵူင်း ဝဵင်းယႂႃႇငၢၼ်ႇ တိုၵ်ႉဢုၵ်ႇၵၼ်တင်းၵူၼ်းဝၢၼ်ႈၵေႃႉၼိုင်ႈယူႇၼၼ်ႉ မီးၽူႈၸၢႆးဢမ်ႇႁူႉၾၢႆႇ 2 ၵေႃႉ  ၶဝ်ႈႁိူၼ်းမႃးယိုဝ်းတၢႆထင်တီႈ တင်းၵၢင်ႉၵႄႇလႄႈၵူၼ်းဝၢၼ်ႈ တင်း 2 ၵေႃႉ   ။

ဝဵင်းယႂႃႇငၢၼ်ႇၼႆႉ ၵူႈပွၵ်ႈ ၵွၼ်ႇသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းၼၼ်ႉ – ၼွၵ်ႈလိူဝ်သိုၵ်းမၢၼ်ႈယဝ်ႉ  ဢမ်ႇမီးၸုမ်းယိပ်းၵွင်ႈၵၢင်ႇ ဢမ်ႇမီးၸုမ်းလုၵ်ႈၽိုၼ်ႉ။  ၼႂ်းမိူင်းတႆးၼႆႉလႆႈဝႃႈပဵၼ်ပိုၼ်ႉတီႈ ဢၼ်ၵတ်းယဵၼ်ယူႇငၢႆႈသေပိူၼ်ႈတီႈၼိုင်ႈ။ ၵူၺ်းၵႃႈၸူဝ်ႈသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ ၸုမ်းလုၵ်ႉၽိုၼ်ႉသိုၵ်းမၢၼ်ႈၵေႃႈမီးမႃး။ သိုၵ်းမၢၼ်ႈၵေႃႈထႅမ်ႁႅင်းသိုၵ်းၶဝ်ႈတဝ်ၼႂ်းဝၢၼ်ႈၼႂ်းဝဵင်းသေ ယိင်ႈၶႅၼ်းတဵၵ်းတဵင်ပေႉၵိၼ်ၵူၼ်းမိူင်းပိုၼ်ႉတီႈ။