ဝၼ်းတီႈ 10/10/2025 ယၢမ်းၵၢင်ၼႂ် 9 မူင်း 45 မိၼိတ်ႉ ၽႅၼ်ႇလိၼ်ဝႆ တွၼ်ႈၸၢၼ်းမိူင်းၾိလိပ်ႉပိၼ်ႊသ် ႁႅင်းသၼ်ႇဝႆ 7.4 မႅၵ်ႊၼီႊၵျုတ်ႉ လႄႈ ၾၢႆႇပႂ်ႉတူၺ်းၽႅၼ်ႇလိၼ်ဝႆ ပိုၼ်ၽၢဝ်ႇၽေးသိုဝ်ႊၼႃႊမီႊ (ၽႅၼ်ႇလိၼ်ဝႆတႂ်ႈပၢင်ႇလၢႆႇ) ။

သုၼ်ၽႅၼ်ႇလိၼ်ဝႆၼႆႉ ပဵၼ်တီႈ ၽၢႆႇဢွၵ်ႇၵုၼ် မိၼ်ႊၻႃႊၼၢဝ်ႊ Mindanao ဢၼ်ယၢၼ်ၵႆ ဝဵင်းလူင် Davao 123 ၵီႊလူဝ်ႊမီႊတႃႊ (မွၵ်ႈ 79 လၵ်း) ၊ လိုၵ်ႉလူင်းတႂ်ႈလိၼ် 58.1 ၵီႊလူဝ်ႊမီႊတႃႊ (36 လၵ်း)။

ပဵၼ်ၾၢႆႇၸၢၼ်း မိူင်းၾိလိပ်ႉပိၼ်ႊသ် ၊ ပဵၼ်ၾၢႆႇႁွင်ႇ မိူင်းဢိၼ်ႊတူဝ်ႊၼီႊသျႃႊ ။ ၸင်ႇဝႃႈၾၢႆႇပႂ်ႉတူၺ်းၽေးၽႅၼ်ႇလိၼ်ဝႆ ပိုၼ်ၽၢဝ်ႇဝႆႉငဝ်းလၢႆးၶိုၵ်ႉၶၵ်ႉသေ ႁၢင်ႈႁႅၼ်းတူဝ်ႈတၼ်းဝႆႉ ၵူဝ်ပဵၼ်ပႃးၽေး သိုဝ်ႊၼႃႊမီႊ။

သင်ၸိူဝ်ႉပဵၼ် သိုဝ်ႊၼႃႊမီႊတႄႉတႄႉၸိုင် ႁွၼ်ၼမ်ႉၸၢင်ႈၽတ်ႉၶဝ်ႈၾင်ႇတင်းသွင်ၸိုင်ႈမိူင်း မွၵ်ႈၶၢဝ်းယၢမ်း ၵွၼ်ႇထိုင်ၵၢင်ဝၼ်းတဵင်ႈ။ တၢင်းသုင်ႁွၼ်ၼမ်ႉတေမီးမွၵ်ႈ 3 မီႊတႃႊ ( 10 ပေႇ) – ဝႃႈၼႆလႄႈ ဝဵင်းၸိူဝ်းယူႇၶွပ်ႇပၢင်ႇလၢႆႇၸိူဝ်းၼၼ်ႉၵမ်ႈၼမ် သင်ႇပိၵ်ႉႁူင်းႁဵၼ်းလႄႈႁွင်ႈၵၢၼ် လူင်ပွင်ၸိုင်ႈသေ သူင်ႇၶိုၼ်ႈယူႇတၢင်းပွတ်းတွၼ်ႈသုင်/ ယၢၼ်ၵႆၾင်ႇပၢင်ႇလၢႆႇဝႆႉယဝ်ႉ ဝႃႈၼႆ ။

မိူင်းၾိလိပ်ႉပိၼ်ႊသ်ၼႆႉ ယွၼ်ႉပိူဝ်ႈ တင်ႈယူႇၼိူဝ်သဵၼ်ႈဝူင်းၾႆး Ring of Fire ဢၼ်ပဵၼ် သၢႆ ၽႅၼ်ႇလိၼ်ဝႆ ဢၼ်ယၢဝ်း 25,000 လၵ်း (40,000 ၵီႊလူဝ်ႊမီႊတႃႊ) ဢၼ်မီးတႂ်ႈပၢင်ႇလၢႆႇ ပသိၾိၵ်ႉသ် လႄႈ ပဵၼ်မိူင်းဢၼ်ၵႆႉထူပ်းၽေးၽႅၼ်ႇလိၼ်ဝႆ – လွႆၾႆးတႅၵ်ႇလိူဝ်ပိူၼ်ႈသုတ်းၼႂ်းလုမ်ႈၾႃႉ ။ ၵွပ်ႈၼႆလႄႈ လူမ်းလႅင်ႉႁႅင်းယႂ်ႇၵေႃႈ ၽတ်ႉပဝ်ႇၶဝ်ႈၵူႈပီ ၼိုင်ႈပီဢမ်ႇယွမ်း 20 လုၵ်ႈ။

Ref; AP, CNN