ဝၼ်းတီႈ 8/10/2025 ၵၢင်ၶမ်ႈ 9 မူင်းၶိုင်ႈ ၵူၼ်းၸၢႆးၵေႃႉၼိုင်ႈ ၺႃးၵူၼ်းဢမ်ႇႁူႉၾၢႆႇ 2 ၵေႃႉ မႃးယိုဝ်း ၼႂ်းၸႄႈဝဵင်းတႃႈၶီႈလဵၵ်း မၢတ်ႇၸဵပ်းႁၢဝ်ႈႁႅင်းသေ လူႉတၢႆၵႂႃႇတီႈႁူင်းယႃ ။
ၵေႃႉၺႃးယိုဝ်းၼၼ်ႉ ပဵၼ် ၸၢႆးဢွင်ႇၶမ်း ဢႃယု 35 ပီ ယူႇၼႂ်းပွၵ်ႉ သၼ်သၢႆး (ၵ) ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။
ဝၼ်းၼၼ်ႉၵၢင်ၶမ်ႈ ၽွင်းမၼ်းၸၢႆးပွၵ်ႈမိူဝ်းထိုင်ၼႃႈႁိူၼ်း ၼႂ်းပွၵ်ႉသၼ်သၢႆး (ၵ) ဝဵင်းတႃႈၶီႈလဵၵ်းၼၼ်ႉ မီးၵူၼ်းၸၢႆးသွင်ၵေႃႉ လုၵ်ႉၼႂ်းၵႃးသီလမ်ဢွၵ်ႇမႃးသေ လၢၵ်ႈၵွင်ႈယိုဝ်း၊ မၼ်းၸၢႆးၺႃးမၢၵ်ႇၵွင်ႈ ဢမ်ႇယွမ်း 5 ၵမ်း၊ မၢတ်ႇၸဵပ်းတီႈႁူဝ်လႄႈ ၵွင်းလင် ႁၢဝ်ႈႁႅင်း။
ၸုမ်းၸွႆႈထႅမ်တူင်ႇဝူင်းၵူၼ်းၼႂ်းပိုၼ်ႉတီႈ လႆႈႁၢမ်သူင်ႇဝႆႉတီႈႁူင်းယႃလူင်ၵူၼ်းမိူင်း ဝဵင်းတႃႈၶီႈလဵၵ်း ၶမ်ႈၶိုၼ်းၼၼ်ႉၵမ်းလဵဝ်။ ၵူၺ်းၵႃႈမၢတ်ႇၸဵပ်းလိူတ်ႈဢွၵ်ႇၼမ်ႁႅင်းလႄႈ ထိုင်မႃးဝၼ်းတီႈ 9/10/2025 ယၢမ်းၵၢင်ၼႂ် မၼ်းၸၢႆး လူႉတၢႆၵႂႃႇ လႆႈႁူႉၼင်ႇၼႆ။
ၵူၼ်းမႃးယိုဝ်းၼၼ်ႉပဵၼ်ၽႂ်၊ ယွၼ်ႉသင်လႄႈၺႃးယိုဝ်းဢၼ်ဝႃႈၼၼ်ႉတႄႉ ပႆႇမီးၽႂ်ယိုၼ်ယၼ်။
ဝဵင်းတႃႈၶီႈလဵၵ်းၼႆႉ ၸွမ်းၼင်ႇပဵၼ်ဝဵင်းတိတ်းၸပ်းလႅၼ်လိၼ်လႄႈ ၵူၼ်းမိူင်းတၢင်ႇတီႈသီႇလႅၼ် မႃးယူႇသဝ်းၼမ်၊ ပၢင်တေႃႇလွင်း၊ ယႃႈမဝ်းၵမ်လႄႈ ဢွင်ႈတီႈလဵၼ်ႈၵဵမ်ႊဢွၼ်ႊလၢႆႊၵေႃႈ မီးၼမ်။
လိူဝ်ၼၼ်ႉ ၵူၼ်းယိပ်းၵွင်ႈ ယိပ်းမိတ်ႈယိပ်းလႅဝ်း ပႂ်ႉၸူၼ်ႁဵတ်းႁၢႆႉၶႃႈႁႅမ်ၵၼ်တၢႆၵေႃႈ မီးၼမ်လိူင်ႇ၊ ယူႇတီႈၸဝ်ႈၼႃႈတီႈ ပလိၵ်ႈ သိုၵ်းမၢၼ်ႈ ဢမ်ႇဢဝ်ပုၼ်ႈၽွၼ်းပၼ်လႆႈႁႂ်ႈထိုင်တီႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ