သိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇ တီႈဝဵင်းမိူင်းငေႃႉ မိူင်းလူင် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ   ၵူၼ်းမိူင်းတၢႆ 10 ပၢႆ  ၼႂ်းၼၼ်ႉ ပႃးလုၵ်ႈဢွၼ်ႇ ဢႃယု 2 ၶူပ်ႇ ။

မိူၼ်ၼႆႉ ဝၼ်းတီႈ 8/10/2025  ယၢမ်းၵၢင်ၼႂ် 11 မူင်းပၢႆၼႆႉ ႁိူဝ်းမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇၼႂ်းပွၵ်ႉတႃႈလူင် ဝဵင်းမိူင်းငေႃႉ ထႅင်ႈ 2 လုၵ်ႈ  ၵူၼ်းမိူင်းတၢႆ 2 ၵေႃႉ မၢတ်ႇၸဵပ်း 2 ၵေႃႉ ႁိူၼ်းယေးလူႉၵွႆ ဢမ်ႇယွမ်း 8 လင်။  

မၢၵ်ႇလူင်သိုၵ်းမၢၼ်ႈတိူဝ်ႉ လုင်းသူၺ်ႇႁူင်ႇ ဢႃယု  50 ပီ ၵၢင်ႉၵႄႇပွၵ်ႉမၢၼ်ႈလူင် လႄႈမေးၼၢင်း ပႃႈလႃႉယဵၼ်ႇ  တၢႆထင်တီႈ။ ၵူၼ်းဝၢၼ်ႈမၢတ်ႇၸဵပ်းႁၢဝ်ႈႁႅင်းၵေႃႉၼိုင်ႈ ႁိူၼ်းယေးၵေႃႈလူႉၵွႆ။

ၵူၼ်းမိူင်းငေႃႉ လၢတ်ႈၽူႈတွႆႇႁွၵ်ႈဝႃႈ -“ မႃးပွႆႇမၢၵ်ႇမိူဝ်ႈ 11 မူင်းပၢႆၼႆႉ ၊ သွင်ၽူဝ်မႄးတၢႆထင်တီႈ ၊  ပဵၼ်ၵၢင်ႉၵႄႇၼႂ်းပွၵ်ႉမၢၼ်ႈလူင် ၊ တီႈပွၵ်ႉတႃႈလူင်ၵေႃႈ ႁိူၼ်းလူႉၵွႆၼိုင်ႈလင် ၵူၼ်းမၢတ်ႇၸဵပ်းၵေႃႉ ၼိုင်ႈ၊ ဢၼ်တုမ်ႉတိူဝ်ႉႁၢဝ်ႈႁႅင်းၼႆႉပဵၼ်ၼႂ်းပွၵ်ႉတႃႈလူင် လႄႈ မၢၼ်ႈလူင်ၵမ်ႈၼမ်”- ဝႃႈၼႆ ။

ဝၢႆးလင် သိုၵ်းမၢၼ်ႈ ယိုတ်းၵုမ်း ဢဝ်လႆႈၶိုၼ်းၸႄႈဝဵင်းၵျွၵ်ႉမႄး ၼႂ်းမိုဝ်းသိုၵ်းတဢၢင်းယဝ်ႉ သိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇ တီႈဝဵင်းမိူင်းလူင် ၊ မိူင်းငေႃႉလႄႈ ႁဵတ်းႁႂ်ႈၵူၼ်းမိူင်းမႆႈၸႂ် လႆႈငိူင်ႉပၢႆႈ ယၢမ်းလဵဝ် လူဝ်ႇတင်းၸွႆႈထႅမ် ၶဝ်ႈၼမ်ႉတင်းၵိၼ်ဝႆႉ   ။

ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၵူၼ်းၵႃႉၶၢႆ ၸိူဝ်းၼၼ်ႉတင်းၵျွၵ်ႉမႄးၵေႃႈ ၶဝ်ႈဢမ်ႇလႆႈ ၊ ဢမ်ႇပၼ်ၶဝ်ႈ ၊ ယွၼ်ႉဢမ်ႇပၼ်ၶဝ်ႈဢွၵ်ႇၸိူင်ႉၼၼ် ၶဝ်ႈၼမ်ႉတင်းၵိၼ်ၵေႃႈၶၢတ်ႇ ၊ မိူဝ်ႈဝၼ်းလိူၼ်မူၼ်းယွၼ်ႉသိုၵ်းမၢၼ်ႈမႃးပွႆႇမၢၵ်ႇလႄႈ ၵူၼ်းတၢင်းမၢၼ်ႈလူင် ပၢႆႈဝႆႉ ၊ မၢင်ၸိူဝ်းၵေႃႈပၢႆႈၵႂႃႇယူႇဝႆႉတင်း သူၼ်ၼဵင်ႈၸိူဝ်းၼႆ”- ဝႃႈၼႆ ။

ၼႂ်းဝၼ်းတီႈ 7/10/2025  ယၢမ်းၵၢင်ဝၼ်းမွၵ်ႈ 12 မူင်းၶိုင်ႈ ႁိူဝ်းမိၼ်သိုၵ်းမၢၼ်ႈပွႆႇမၢၵ်ႇသႂ်ႇ ႁိမ်းဝဵင်းမိူင်းလူင် လုၵ်ႈဢွၼ်ႇ ဢႃယု 2 ၶူပ်ႇ ဢိၵ်ႇပႃး ၵူၼ်းဝၢၼ်ႈ လူႉတၢႆ 10 ၵေႃႉ မၢတ်ႇၸဵပ်းထႅင်ႈ ဢမ်ႇယွမ်း 3 ၵေႃႉ။ 

ဝၼ်းၼၼ်ႉ ႁိူဝ်းမိၼ်သိုၵ်းမၢၼ်ႈပွႆႇမၢၵ်ႇသႅၼ်း 250 ပွင်ႇ သွင်လုၵ်ႈ၊ တူၵ်းတႅၵ်ႇၼႂ်းဝၢၼ်ႈမႆႉႁုင်း တိူဝ်ႉသႂ်ႇ ပႃႈဢူင်းမေႇ ဢႃယု 45 ပီ ၊ ၼၢင်းၶိၼ်ႇပႃႉ ဢႃယု 29 ပီ ၊ ၼၢင်းၵျႃႇၸိင်ႇ ဢႃယု 24 ပီ ၊ လုင်းသၢင်ႇၵျႃႇ ဢႃယု 37 ပီ ၊ လုင်းၸၢမ်ႇပုၼ်ႉ ဢႃယု 35 ပီ ၊ ၸၢႆးဢွင်ႇသႃႇ ဢႃယု 29 ပီ ၊ ၼၢင်းဢေးတိတ်ႉ ဢႃယု 22 ပီ ၊ ပႃႈဢေးမေႇ ဢႃယု 39 ပီ ၊ ၸၢႆးသၢင်ႇတႅင်ႉ 27 ပီ ယူႇဝၢၼ်ႈ သႃႇပႅင်ႇ ၊  ၸၢႆးဢူး ဢႃယု 2 ၶူပ်ႇ လႄႈ ၵူၼ်းမၢတ်ႇၸဵပ်း (3)ၵေႃႉ ၊ ႁူမ်ႈၵူၼ်းလူႉတၢႆ မီး(10) ၵေႃႉ ။

ၼႂ်းၶၢဝ်းတၢင်းဝူင်ႈလဵဝ်ၵူၺ်း ယွၼ်ႉႁိူဝ်းမိၼ်သိုၵ်းမၢၼ်ႈပွႆႇမၢၵ်ႇ ၼႂ်းၼႃႈတီႈသိုၵ်းတဢၢင်းၵုမ်းၵမ် မိူၼ်ၼင်ႇ ၼႂ်းၸႄႈဝဵင်း သီႇပေႃႉ၊ ၼမ်ႉသၼ်ႇ၊ ၼမ်ႉတူႈ၊ မိူင်းလူင်၊ မိူင်းငေႃႉ ၸိူဝ်းၼႆႉသေ ၵူၼ်းမိူင်းလူႉတၢႆ ဢမ်ႇယွမ်း 20 ၵေႃႉ ၵူၼ်းပိုၼ်ႉတီႈၼပ်ႉႁူဝ်ပၢၵ်ႇႁူဝ်ႁဵင် လႆႈငိူင်ႉပၢႆႈၽေးသိုၵ်းဝႆႉ။

ၸွမ်းၼင်ႇၶေႃႈတူၵ်းလူင်း ၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊ တႄႉပႃးဝႆႉဝႃႈ ၵူၼ်းမိူင်းၼႆႉ ဢမ်ႇၸႂ်ႈသိုၵ်း ။ ဢမ်ႇပႃးၼႂ်းၽႅၼ်ၵၢၼ်တိုၵ်း။ ၵွပ်ႈၼႆ ပိုၼ်ႉတီႈဢၼ်သိုၵ်းတေဢမ်ႇလႆႈယိုဝ်းလႃးလႃး ႁိုဝ် တေဢမ်ႇလႆႈတိူဝ်ႉလႃးလႃးၼႆႉပဵၼ် – ႁိူၼ်းယေးၵူၼ်းမိူင်း၊ ႁူင်းယႃ ႁွင်ႈယႃ၊ ႁူင်းႁဵၼ်း၊ ဝတ်ႉဝႃးၽႃသိူဝ်ႇ ဢွင်ႈတီႈၵိူဝ်းယမ်၊ သိင်ႇဝႅတ်ႉလွမ်ႉဝၢၼ်ႈသူၼ်၊ ႁႆႈၼႃးမၢၵ်ႇၶဝ်ႈတဝ်ႈၼမ်ႉ၊ ႁူင်းၵၢၼ်ႁူင်းၸၢၵ်ႈဢၼ်ၸၢင်ႈတႅၵ်ႇပဵၼ်ၵွင်ႉငူၼ်ႉမီးၽေးတေႃႇၵူၼ်းမိူင်း ၸဵမ်ၸိူဝ်းၼႆႉ။

ၵူၺ်းၵႃႈ ၸုမ်းယိပ်းၵွင်ႈၵၢင်ႇၵူႈမူႇၵူႈၸုမ်း ပႃးၸဵမ်ၸုမ်းသိုၵ်းမၢၼ်ႈ ဢၼ်ၶဝ်ႈႁူမ်ႈလူင်းလၢႆးမိုဝ်းၸွမ်းလိၵ်ႈၵိၼ်ၵႅၼ်ႇၼၼ်ႉ ဢမ်ႇမီးၽႂ်ႁဵတ်းၸွမ်းၶေႃႈတူၵ်းလူင်းသေၸုမ်း။ မီးပၼ်ႁႃၵဵဝ်ႇလူၺ်ႈၼႃႈတီႈၵုမ်းၵမ်တေႃႇၵၼ်မႃးၸိုင် ၵူၼ်းမိူင်းၵူၺ်းလႆႈမၢတ်ႇၸဵပ်းလူႉတၢႆၸွမ်းၼႂ်းၵႄႈၵၢင် ၸုမ်းယိပ်းၵွင်ႈမႃးတႃႇသေႇ။