ၼႂ်းဝၼ်းတီႈ 6/10/2025 ဝၼ်းလိူၼ်မူၼ်းဢွၵ်ႇဝႃႇ ႁူင်းၾႆးမိၼ်ဢွၼ်ႇ တူၵ်းသႂ်ႇႁိူၼ်းယေးၵူၼ်းမိူင်းသေႁဵတ်းႁႂ်ႈၾႆးမႆႈ ၶိုၼ်းလဵဝ်ပဵၼ်ၵႂႃႇ 3 တီႈ – တီႈဝဵင်းလိူဝ်ႇ- တႃႈၵုင်ႈလႄႈ တူၼ်ႈတီး။
ၶမ်ႈၶိုၼ်းဢွၵ်ႇဝႃႇ မွၵ်ႈ 7မူင်းၶိုင်ႈ ႁူင်းၾႆးမိၼ် ဢၼ်ပွႆႇၶိုၼ်ႈၵႂႃႇၼၼ်ႉ ယၢတ်ႇတူၵ်းသႂ်ႇၼိူဝ်ႁိူၼ်းလင်ၼိုင်ႈ ၼႂ်းၸႄႈဝဵင်း ပျီႇၵျီးတၶုၼ်ႇ တိူင်းမၼ်းတလေး၊ ပဵၼ်ႁိူၼ်း ၵင်ႈၽႃ မုင်းႁဵၵ်ႇ၊ ၾႆးႁုပ်ႇမႆႈၵႂႃႇတင်းလင်၊ ၸုမ်းၶႄၾႆးၼႂ်းဝဵင်းလိူဝ်ႇလၢႆလၢႆၸုမ်း လႆႈၵႂႃႇယိုတ်းၾႆးၶႄၾႆးၸွႆႈ ႁိုင်မွၵ်ႈ 20 မိၼိတ်ႉ ၾႆးၸင်ႇမွတ်ႇ ဝႃႈၼႆ။
မိူၼ်ၼႆ ၶၢဝ်းယၢမ်းၵၢင်ၶမ်ႈ မွၵ်ႈ 8 မူင်းၼႆႉ ၾႆးမႆႈႁိူၼ်းထႅင်ႈ ၼႂ်းၸႄႈဝဵင်း ၶျၢၼ်းမျႃႉတႃႇသီႇ ဝဵင်းလိူဝ်ႇ၊ ၸဝ်ႈႁိူၼ်း တိုၵ်ႉဢွၵ်ႇၶၢဝ်းတၢင်းၵႂႃႇမီးတၢင်ႇတီႈလႄႈ လွင်ႈၵူၼ်းမၢတ်ႇၸဵပ်းလူႉတၢႆဢမ်ႇမီးသေတႃႉ ၶူဝ်းၶွင်ၼႂ်းႁိူၼ်းယေး လူႉသုမ်းၵႂႃႇတၢင်းသဵင်ႈ ။
ၽွင်းႁူင်းၾႆးမိၼ်တူၵ်းလူင်းမႃးၼၼ်ႉ မႃးမႅၼ်ႈသႂ်ႇၶႅပ်းၽႅင်သူဝ်ႊလႃႊဢၼ်ယင်ဝႆႉၼိူဝ်လင်ၶႃးႁိူၼ်း။ ၵူၼ်းႁိမ်းႁိူၼ်းယိၼ်းသဵင်တႅၵ်ႇတုပ်ႉတၢပ်ႉယူႇသေတႃႉ ထၢင်ႇဝႃႈပဵၼ်သဵင်မၢၵ်ႇထုပ်ႉမၢၵ်ႇတွပ်းဢၼ်လုၵ်ႈဢွၼ်ႇလဵၼ်ႈၼၼ်ႉၼႆသေဢမ်ႇၾၢင်ႉတူၺ်း။ ၽိူဝ်ႇၾႆးလုၵ်ႈမႆႈလၢမ်းတူဝ်ႈလင်ၶႃးႁိူၼ်းယဝ်ႉၸင်ႇႁူႉဝႃႈၾႆးမႆႈ။ ၵွပ်ႈၼႆ တၢင်းသိူဝ်းၸႂ်လႄႈ ၽေးၶဵၼ်ၼႆႉ လီၾၢင်ႉတႄႉတႄႉ – ၵူၼ်းၼႂ်းပွၵ်ႉလၢတ်ႈၼင်ႇၼႆ။
ၶမ်ႈဝၼ်းလိူၼ် သိပ်းဢဵတ်းမူၼ်းဢွၵ်ႇဝႃႇၼၼ်ႉၵူၺ်းၼင်ႇၵဝ်ႇ မွၵ်ႈၶၢဝ်းယၢမ်းမွၵ်ႈ 8 မူင်းပၢႆ တီႈဝဵင်းလူင်တႃႈၵုင်ႈ ၸႄႈဝဵင်းၵျွၵ်ႉတၢၼ်းၼၼ်ႉၵေႃႈ ၾႆးမႆႈႁိူၼ်းလင်ၼိုင်ႈ။ လႆႈၶႄၾႆးယူႇမွၵ်ႈ ၸူဝ်ႈမူင်းပၢႆ ။
ၼွၵ်ႈသေၼၼ်ႉ တီႈဝဵင်းဢေးသႃႇယႃႇ ပွၵ်ႉ 10 ဝဵင်းလူင်တူၼ်ႈတီးၼၼ်ႉၵေႃႈ ၶၢဝ်းယၢမ်းမွၵ်ႈ 8 မူင်းပၢႆ ၾႆးမႆႈႁိူၼ်းလင်ၼိုင်ႈ။
ၸိူဝ်းၼႆႉပဵၼ်ၾႆးမႆႈယွၼ်ႉႁူင်းၾႆးမိၼ်တူၵ်းသႂ်ႇႁိူၼ်းလွၼ်ႉလွၼ်ႉ- လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ