မိူဝ်ႈၼႆႉ ဝၼ်းတီႈ 7 လိူၼ်ဢွၵ်ႊထူဝ်ႊပိူဝ်ႊ ယၢမ်းၵၢင်ၼႂ်ၸဝ်ႉ 6 မူင်းၶိုင်ႈ ႁိူဝ်းမိၼ် (Jet Fighter) ၶွင်သိုၵ်းမၢၼ်ႈယိုတ်းမိူင်း ပွႆႇမၢၵ်ႇသႂ်ႇ ၼႂ်းဝဵင်းၼမ်ႉတူႈထႅင်ႈပွၵ်ႈၵမ်း 3 ၸိုင်ႈတႆးပွတ်းႁွင်ႇ။

မၢၵ်ႇတူၵ်းတႅၵ်ႇသႂ်ႇ ဝတ်ႉပူၵ်ႉပႃႇယူင်ႇ ႁူင်းၵေႃႇၵၢႆႇၸိူဝ်းမီးၼႂ်းဝၢင်းဝတ်ႉၼၼ်ႉ လူႉၵွႆၵႂႃႇတင်းသဵင်ႈ။ ၵူၼ်းတႄႉ ပၢႆႈၽေးသိုၵ်းဝႆႉယဝ်ႉလႄႈ   ဢမ်ႇမီးၽႂ်မၢတ်ႇၸဵပ်းလူႉတၢႆၼႆ ၵူၼ်းမိူင်းပိုၼ်ႉတီႈဝဵင်းၼမ်ႉတူႈလၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“သင်ၶၸိူဝ်းယူႇတီႈဝတ်ႉၼၼ်ႉ ဢွၼ်ၵၼ်ငိူင်ႉဢွၵ်ႇဝႆႉ ၸဵမ်မိူဝ်ႈသိုၵ်းမၢၼ်ႈယိုတ်းမိူင်းမႃးပွႆႇမၢၵ်ႇ ပွၵ်ႈၵမ်း 1 ၼၼ်ႉယဝ်ႉလႄႈ ၶႅၼ်းၸႂ်ဢိတ်းၼိုင်ႈ။ ၼႂ်းဝဵင်းၼမ်ႉတူႈၼႆႉ မိူဝ်ႈလဵဝ် ဢမ်ႇပေႃးမီးၵူၼ်းမိူင်းႁတ်းယူႇယဝ်ႉ။ ၵမ်ႈၼမ်ဢွၼ်ၵၼ်ငိူင်ႉဢွၵ်ႇၵႂႃႇယူႇဝႆႉ ဢွင်ႈတီႈလွတ်ႈၽေးၵၼ်ယဝ်ႉ။”

မိူဝ်ႈပူၼ်ႉမႃး ဝၼ်းတီႈ 2 လိူၼ်ဢွၵ်ႇထူဝ်ႊပိူဝ်ႊ ယၢမ်းၵၢင်ၼႂ်ၸဝ်ႉ 7 မူင်းပၢႆၼၼ်ႉၵေႃႈ ႁိူဝ်းမိၼ်တိုၵ်းၶွင်သိုၵ်းမၢၼ်ႈယိုတ်းမိူင်း ၵိုင်ႉၵၢင်ႉမႃးပွႆႇမၢၵ်ႇသႂ်ႇ တီႈပွၵ်ႉ 8 ဝဵင်းၼမ်ႉတူႈ ဢွင်ႈတီႈမီးၵူၼ်းမိူင်းယူႇသဝ်းဝႆႉၼမ်ၼၼ်ႉလႄႈ ၵူၼ်းမိူင်းလူႉတၢႆၵႂႃႇ 4 ၵေႃႉ မၢတ်ႇၸဵပ်း 6 ၵေႃႉ။

လိူဝ်ၼၼ်ႉ မိူဝ်ႈဝႃး ဝၼ်းတီႈ 6 လိူၼ်ဢွၵ်ႇထူဝ်ႊပိူဝ်ႊ ဝၼ်းလိူၼ်မူၼ်းဢွၵ်ႇဝႃႇ ယၢမ်းၵၢင်ၼႂ်ၵွႆးၼင်ႇၵဝ်ႇ ႁိူဝ်းမိၼ်ၵျႅၵ်ႊၾၢႆႊတိူဝ်ႊၶွင်သိုၵ်းမၢၼ်ႈယိုတ်းမိူင်း ပွႆႇမၢၵ်ႇသႂ်ႇထႅင်ႈ ၼႂ်းၵၢင်ဝဵင်းၼမ်ႉတူႈ ပဵၼ်ပွၵ်ႈၵမ်းသွင်သေ ႁိူၼ်းယေးရူတ်ႉၵႃးၶွင် ၵူၼ်းမိူင်းလူႉၵွႆၵႂႃႇႁၢဝ်ႈႁႅင်း။

ဝဵင်းၼမ်ႉတူႈၼႆႉ ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်း 2 မႃး သိုၵ်းတဢၢင်း (TNLA) ၵုမ်းၵမ်ဝႆႉသေ ပၼ်ႇၵၢၼ်ၽွင်းငမ်းဝႆႉ။ တင်ႈတႄႇၼၼ်ႉမႃး ပၢင်တိုၵ်းဢမ်ႇတွၼ်ႉၵိူတ်ႇၶိုၼ်ႈထႅင်ႈသေၵမ်း။ ၵူၺ်းၵႃႈ ဝၢႆးလင် သိုၵ်းမၢၼ်ႈ ယိုတ်းၵုမ်း ဢဝ်လႆႈၶိုၼ်းၸႄႈဝဵင်းၵျွၵ်ႉမႄးတီႈသိုၵ်းတဢၢင်းယဝ်ႉဢမ်ႇႁိုင် သိုၵ်းမၢၼ်ႈၵေႃႈ ၵိုင်ႉၵၢင်ႉၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းၵၢင်ဝဵင်းၼမ်ႉတူႈၸိူင်ႉၼႆ မီးၵႂႃႇ 3 ပွၵ်ႈ ၵမ်းၼႆႉယဝ်ႉ။

ၼႂ်းလိၵ်ႈၵိၼ်ၵႅၼ်ႇ ၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊ ဢၼ်သိုၵ်းမၢၼ်ႈၶဝ်ႈႁူမ်ႈလူင်းလၢႆးမိုဝ်းၸွမ်းဝႆႉၼၼ်ႉတႄႉပႃးဝႆႉဝႃႈ – “ ပိုၼ်ႉတီႈဢၼ်သိုၵ်းတေဢမ်ႇလႆႈယိုဝ်းလႃးလႃး ႁိုဝ် တေဢမ်ႇလႆႈတိူဝ်ႉလႃးလႃးၼႆႉပဵၼ် -ႁိူၼ်းယေးၵူၼ်းမိူင်း၊ ႁူင်းယႃ ႁွင်ႈယႃ၊ ႁူင်းႁဵၼ်း၊ ဝတ်ႉဝႃးၽႃသိူဝ်ႇ ဢွင်ႈတီႈၵိူဝ်းယမ်၊ သိင်ႇဝႅတ်ႉလွမ်ႉဝၢၼ်ႈသူၼ်၊ ႁႆႈၼႃးမၢၵ်ႇၶဝ်ႈတဝ်ႈၼမ်ႉ၊ ႁူင်းၵၢၼ်ႁူင်းၸၢၵ်ႈဢၼ်ၸၢင်ႈတႅၵ်ႇပဵၼ်ၵွင်ႉငူၼ်ႉမီးၽေးတေႃႇၵူၼ်းမိူင်း” ၸဵမ်ၸိူဝ်းၼႆႉ။ ၵူၺ်းၵႃႈ ၸူဝ်ႈပဵၼ်သိုၵ်းၵၢင်မိူင်းမႃးၶၢဝ်းတၢင်း 4 ပီပၢႆၼႆႉ သိုၵ်းမၢၼ်ႈလႄႈၸုမ်းယိပ်းၵွင်ႈၵၢင်ႇၼႂ်းမိူင်း ဢမ်ႇတွၼ်ႉႁဵတ်းၸွမ်းမႃးသေပွၵ်ႈ။