မိူဝ်ႈၼႆႉ ဝၼ်းတီႈ 6 တႄႇယၢမ်းၵၢင်ၼႂ် 7 မူင်းၶိုင်ႈ သိုၵ်းမၢၼ်ႈယိုတ်းမိူင်း ၸႂ်ႉႁိူဝ်းမိၼ် (Jet Fighter) ပွႆႇမၢၵ်ႇသႂ်ႇ ၼႂ်းဝဵင်းၼမ်ႉတူႈ လႄႈ ဝဵင်းသီႇပေႃႉ ၼႃႈတီႈသိုၵ်းတဢၢင်းၵုမ်းၵမ်ၸူဝ်ႈၶၢဝ်း ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်းသွင် ၸိုင်ႈတႆး ပွတ်းႁွင်ႇ။
ၶၢဝ်းယၢမ်းၵၢင်ၼႂ်ၸဝ်ႉ ၼႂ်းဝၼ်းဢွၵ်ႇဝႃႇ တႄႇမွၵ်ႈ 7 မူင်းၶိုင်ႈ ႁိူဝ်းမိၼ်တိုၵ်းၶွင်သိုၵ်းမၢၼ်ႈ ပွႆႇမၢၵ်ႇသႂ်ႇ ၼႂ်းဝဵင်းၼမ်ႉတူႈဢွၼ် တၢင်းသေ ယၢၼ်ၵၼ်မွၵ်ႈ 3 မိၼိတ်ႉၵွႆး ႁိူဝ်းမိၼ်သိုပ်ႇၵႂႃႇပွႆႇမၢၵ်ႇသႂ်ႇထႅင်ႈ ၼႂ်းဝဵင်းသီႇပေႃႉ တိူဝ်ႉၺႃးႁိူၼ်းယေးလူႉၵွႆၵႂႃႇတင်း ၼမ်။ လုၵ်ႈဢွၼ်ႇ လႄႈ ၵူၼ်းလူင် မၢတ်ႇၸဵပ်း 4 ၵေႃႉ ။
မၢၵ်ႇႁိူဝ်းမိၼ်တိုၵ်းၶွင်သိုၵ်းမၢၼ်ႈၵႂႃႇတူၵ်းသႂ်ႇ ၼႂ်းပွၵ်ႉ 2 ပၢင်ႁႆး ဝဵင်းၼမ်ႉတူႈ ႁိူၼ်းယေးၵူၼ်းမိူင်းလူႉၵွႆႇၵႂႃႇ ၸမ် 20 လုၵ်ႈ၊ ရူတ်ႉၵႃးၸိူဝ်းၵိုတ်းယူႇၸွမ်းႁိမ်းဝၢင်းလုမ်းႁွင်ႈၵၢၼ်ၾၢႆႇၽွင်းငမ်းၵေႃႈ လူႉၵွႆၵႂႃႇ။ ၼၢင်းယိင်းၵေႃႉၼိုင်ႈမၢတ်ႇၸဵပ်း ၸွမ်းၼႆ ၵူၼ်းမိူင်းၼမ်ႉတူႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။
“မိူဝ်ႈၼႆႉပဵၼ်ဝၼ်းလိူၼ်မူၼ်း ဝၼ်းဢွၵ်ႇဝႃႇၵေႃႈ တိုၵ်ႉဢဝ်မၢၵ်ႇမႃးပွႆႇယူႇ။ မၢၵ်ႇၵႂႃႇတူၵ်းသႂ်ႇၼႂ်းၵႄႈသဵၼ်ႈတၢင်း ၾၢႆႇၼိူဝ်ႁူင်း တူၺ်းၼင် ၼႂ်းပွၵ်ႉပၢင်ႁႆးၼၼ်ႉ။ ပိူၼ်ႈၵႂႃႇလူႇၵႂႃႇတၢၼ်းၵၼ်တီႈဝတ်ႉတီႈဝႃးၼမ်ၼႃႇမိူဝ်ႈၼႆႉ။ ၸွမ်းႁိူၼ်းဢမ်ႇပေႃးမီးၵူၼ်းယူႇ။ ၵတ်ႉၵႃႈၵွၼ်ႇၶႃႈဢေႃႈ။ ႁဝ်းၵေႃႈလႆႈသတိႁႄယူႇဝႆႉ။ ၵမ်ၼမ်တႄႉ ငိူင်ႉဢွၵ်ႇဝဵင်းၼမ်ႉတူႈၵႂႃႇ ၸဵမ်မိူဝ်ႈၶဝ်မႃးပွႆႇမၢၵ်ႇ ပွၵ်ႈဢွၼ်တၢင်း ၼၼ်ႉယဝ်ႉ။”
ၼႂ်းၶၢဝ်းယၢမ်းလဵဝ်ၵၼ်ၼင်ႇၵဝ်ႇ သိုၵ်းမၢၼ်ႈသိုပ်ႇၸႂ်ႉႁိူဝ်းမိၼ်တိုၵ်းၵႂႃႇပွႆႇမၢၵ်ႇသႂ်ႇတီႈၼႂ်းဝဵင်းသီႇပေႃႉ။ မၢၵ်ႇၵႂႃႇတူၵ်းတႅၵ်ႇသႂ်ႇႁိမ်း ႁွင်ႈၵၢၼ်လုမ်းၾၢႆႇၵၢၼ်ဢုပ်ႉပိူင်ႇ လႄႈ လုမ်းၾၢႆႇၵၢၼ်ၵပ်းသၢၼ်သေ လုၵ်ႈဢွၼ်ႇလႄႈ ၵူၼ်းၼုမ်ႇ ဢိၵ်ႇ ၵူၼ်းၶၢဝ်ႉ တိူဝ်ႉမၢတ်ႇၵႂႃႇ ၸွမ်းၼႆ ၾၢႆႇသိုၵ်းတဢၢင်း (TNLA) ပိုၼ်ၽၢဝ်ႇဢွၵ်ႇဝႆႉၼင်ႇၼႆ။
ၵူၼ်းၸိူဝ်းတိူဝ်ႉမၢတ်ႇ ၸၢၵ်ႇမၢၵ်ႇႁိူဝ်းမိၼ်သိုၵ်းမၢၼ်ႈ ၼႂ်းဝၼ်းဢွၵ်ႇဝႃႇၼႆႉ ပဵၼ်လုၵ်ႈဢွၼ်ႇ သႅၼ်းဢႃႇယု 1 ၶူပ်ႇ ၸိုဝ်ႈႁွင်ႉ မွင်ႇၶၢၼ်ႉၺႃးထုၼ်းၵေႃႉၼိုင်ႈ လႄႈ ၵူၼ်းၼုမ်ႇ သႅၼ်းဢႃႇယု 23 ပီ ထိုင် 26 ပီ သွင်ၵေႃႉ။ လိူဝ်ၼၼ်ႉ ႁိူၼ်းယေးၵူၼ်းမိူင်းလူႉၵွႆၵႂႃႇမွၵ်ႈ 10 လင် ၼႆယဝ်ႉ။
သိုၵ်းမၢၼ်ႈ ၸႂ်ႉႁႅင်းသိုၵ်း၊ ႁႅင်းၶိူင်ႈၵွင်ႈ၊ ႁႅင်းၶိူင်ႈတရူၼ်ႊ လႄႈ ႁိူဝ်းမိၼ်တိုၵ်းၸိူဝ်းၼႆႉ လေႃႇတိုၵ်းသႂ်ႇသိုၵ်းတဢၢင်း (TNLA) ၸိူဝ်းၵုမ်းၵမ် ၸႄႈဝဵင်းၵျွၵ်ႉမႄးဝႆႉၼၼ်ႉႁၢဝ်ႈႁႅင်းသေ သိုၵ်းမၢၼ်ႈ ၶဝ်ႈယိုတ်းဢဝ်တီႈယူႇၶိုၼ်းၼႂ်းဝဵင်းၵျွၵ်ႉမႄးလႆႈၶိုၼ်း။ ဝၢႆးလင်ၼၼ်ႉဢမ်ႇႁိုင် ၼႂ်းၶၢဝ်းတၢင်း ၼိုင်ႈဝူင်ႈၵွႆး သိုၵ်းမၢၼ်ႈသိုပ်ႇၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းဝဵင်းသီႇပေႃႉ၊ ၼမ်ႉသၼ်ႇ၊ ၼမ်ႉတူႈ ၸိူဝ်းပဵၼ်ၼႃႈတီႈသိုၵ်းတဢၢင်းတိုၵ်ႉၵုမ်းၵမ်ဝႆႉၼၼ်ႉႁၢဝ်ႈႁႅင်းထႅင်ႈ။
လႆႈႁူႉဝႃႈ ၼႂ်းၶၢဝ်းတၢင်းလၢႆဝၼ်းပူၼ်ႉမႃးၼႆႉ သိုၵ်းမၢၼ်ႈသိုပ်ႇၸတ်းႁႅင်းသိုၵ်း ၶဝ်ႈၵႂႃႇတၢင်းဝဵင်းသီႇပေႃႉလႄႈ ၵူၼ်းမိူင်းၸိူဝ်းယူႇ သဝ်းၸွမ်းသဵၼ်ႈတၢင်းၵႄႈၵၢင် ဝဵင်းၵျွၵ်ႉမႄး တင်း သီႇပေႃႉၼၼ်ႉ လႆႈငိူင်ႉပၢႆႈဢွၵ်ႇဝၢၼ်ႈၵႂႃႇယူႇသဝ်းဝႆႉၸွမ်းဝဵင်း ၸိူဝ်းတေၸၢင်ႈလွတ်ႈၽေးပၢင်တိုၵ်းဝႆႉ။
ၾၢႆႇၼိုင်ႈၵေႃႈ သင်ဢမ်ႇမီးၵူၼ်းယူႇပႂ်ႉႁိူၼ်းၸိုင် မီးၽူႈလၵ်ႉၸၵ်ႉၶုတ်ႈၼမ်လိူင်ႇႁႅင်းလႄႈ ၼိုင်ႈႁိူၼ်းလႂ်ဢေႇသုတ်းၼိုင်ႈၵေႃႉ လႆႈၵိုတ်းယူႇပႂ်ႉတီႈႁိူၼ်းယူႇ ၼႆယဝ်ႉ။
တႄႇလိူၼ်ဢွၵ်ႇထူဝ်ႊပိူဝ်ႊ ဝၼ်းတီႈ 1 မႃး ၶၢဝ်းတၢင်း သီႇဝၼ်းၵွႆး သိုၵ်းမၢၼ်ႈၸႂ်ႉႁိူဝ်းမိၼ်တိုၵ်းပွႆႇမၢၵ်ႇသႂ်ႇ ၼႂ်းဝဵင်းသီႇပေႃႉ ဢမ်ႇယွမ်း 5 ပွၵ်ႈ။ ပူၼ်ႉမႃးဝၼ်းတီႈ 4 ၼၼ်ႉၵေႃႈ မၢၵ်ႇႁိူဝ်းမိၼ်တိုၵ်းၵႂႃႇတူၵ်းသႂ်ႇၼႂ်းဝဵင်းၼမ်ႉသၼ်ႇ လုၵ်ႈဢွၼ်ႇလူႉတၢႆၵႂႃႇ 2 ၵေႃႉ ၵူၼ်းမိူင်းမၢတ်ႇၸဵပ်းၵႂႃႇ 9 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ