သိုၵ်းဝႃႉ UWSA ပိုၼ်ၽၢဝ်ႇဝႃႈ တီႉလႆႈၵူၼ်းၵေႃႉဢၼ်ၶုတ်းၸူင်လိၼ်သေၶဝ်ႈလၵ်ႉၶမ်းၼႂ်းႁၢၼ်ႉၶၢႆၶမ်း တီႈဝဵင်းၼမ်ႉတိုၵ်းၼၼ်ႉယဝ်ႉ ဝႃႈၼႆ။
ၵူၼ်းလၵ်ႉၵေႃႉၼႆႉၶဝ်ႈလၵ်ႉတီႈႁိူၼ်းလင်ၼိုင်ႈဢၼ်မီးတီႈဝဵင်းၼမ်ႉတိုၵ်း၊ ၼႂ်းၼႃႈလိၼ်သိုၵ်းဝႃႉ တူင်ႉၼိုင်ၵုမ်းၵမ် မိူဝ်ႈဝၼ်းတီႈ 1/10/2025 ၼၼ်ႉဝႃႈၼႆ။
“ၵူၼ်းလၵ်ႉၼႆႉၸိုဝ်ႈႁွင်ႉ ဢႃးၶျဵင်း ဢႃယု 27 ပီ ။ ပဵၼ်ၵူၼ်းတၢင်းၼႃႈလိၼ်ၵူဝ်းၵၢင်ႉတူင်ႉၼိုင်ၵုမ်းၵမ်။ မၼ်းၸၢႆးလၢတ်ႈတီႈပလိၵ်ႈဝႃႉဝႃႈ – ၶၼ်ၶမ်းၶိုၼ်ႈမႃးၵူႈမိုဝ်ႉၵူႈဝၼ်း။ ၶႂ်ႈသၢင်ႈႁိူၼ်းယေးလႄႈၸင်ႇလၵ်ႉၶမ်းသေတေဢဝ်ၵႂႃႇၶၢႆသေသၢင်ႈႁိူၼ်း” – ဝႃႈၼႆ။
မၼ်းၸၢႆးၼႆႉ ၶဝ်ႈလၵ်ႉဢဝ်ၶူဝ်းၶွင်ငိုၼ်းၶမ်းၼႂ်းႁၢၼ်ႉၶၢႆၶမ်း ႁွင်ႊၶွင်ႊ ၶွင်ၸၢဝ်းၶိူဝ်းၶႄႇ တီႈဝဵင်းၼမ်ႉတိုၵ်း ၸႄႈတွၼ်ႈႁူဝ်ပၢင်ႇ မိူဝ်ႈဝၼ်းတီႈ 28/09/2025 ယၢမ်းၵင်ၼႂ်ၸဝ်ႉ 5 မူင်း။
မၼ်းၸၢႆးလၢတ်ႈထႅင်ႈဝႃႈ – လႆႈသင်ႇၶူဝ်းၶွင်ၶုတ်းၸူင်လိၼ်တၢင်းဢွၼ်ႊလၢႆႊသေ ၶုတ်းၸူင်လိၼ်ၶဝ်ႈၸူးၼႂ်းလၢၼ်ႉ တီႈဝႆႉၶမ်းၼၼ်ႉ တႃႇၶၢဝ်းတၢင်း 9 ဝၼ်း ။ လႆႈတိတ်းတေႃႇၸူးၵူၼ်းသိုဝ်ႉၶမ်း တၢင်းဢွၼ်ႊလၢႆႊ (ၽၢၼ်ႇတၢင်း Kuaishou App) မိူင်းၶႄႇ ဢၼ်မီးတီႈမိူင်းလႃး – ၶၢႆၶမ်းၵႂႃႇတႃႇ 551 ၵရမ်ႊ၊ ၼိုင်ႈၵရမ်ႊ 840 ယွၼ်ႊ၊ တႃႇၵႃႈၶၼ်ငိုၼ်း 463000 ယွၼ်ႊ(မႅၼ်ႈငိုၼ်းမၢၼ်ႈမွၵ်ႈ 2700 သႅၼ်ပျႃး) ။ ၶမ်းလႄႈငိုၼ်းဢၼ်ၵိုတ်းလိူဝ်ၼႂ်းမိုဝ်းၼၼ်ႉတႄႉ ၵဵပ်းဝႆႉလီလီသေ ၶိုၼ်းပွၵ်ႈမႃးၼမ်ႉတိုၵ်း။ ဝၼ်းတီႈ 1/10/2025 ၽွင်းယၢမ်းၵၢင်ၼႂ်မွၵ်ႈ 9 မူင်းၶိုင်ႈၽွင်းႁွတ်ႈထိုင်တီႈၶူဝ်ႁူဝ်ပၢင်ႇၼၼ်ႉ ၺႃးသိုၵ်းဝႃႉ UWSA ပႂ်ႉႁႄႉၵူတ်ႇထတ်းသေတီႉၺွပ်းလႆႈမၼ်းၸၢႆး – သိုၵ်းဝႃႉတႅမ်ႈတၢင်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ