ၼႂ်းဝူင်ႈထိ 2 လိူၼ်ဢွၵ်ႊထူဝ်ႊပိူဝ်ႊ ၼႂ်းဝူင်ႈတေမႃးၼႆႉ လူမ်းလႅင်ႉယႂ်ႇထႅင်ႈလုၵ်ႈၼိုင်ႈ တေၽတ်ႉပဝ်ႇၶဝ်ႈၵုင်းၼႂ်းမိူင်းၶႄႇလႄႈမိူင်းမူႇဢေႊသျႃႊထႅင်ႈလုၵ်ႈၼိုင်ႈ ၼႆ ၸုမ်းပႂ်ႉတူၺ်းၾိင်ႈၾႃႉရႃႇသီႇၶဝ်ပိုၼ်ၽၢဝ်ႇဝႆႉၼင်ႇၼႆ။

ဝၼ်းတီႈ 3 လႄႈ 4 ၼႆႉ မီးလူမ်းလႅင်ႉထႅင်ႈလုၵ်ႉၼိုင်ႈ လုၵ်ႉၼႂ်းၼႃႈၼမ်ႉသမ်ႇမုၵ်ႉတြႃႇ ပႄႇသိၾိၵ်ႉသ် ၸဵင်ႇႁွင်ႇဝၼ်းဢွၵ်ႇမိူင်းၾိလိပ်ႉပိၼ်ႊသ်သေ ၶဝ်ႈမႃးၼႃႈဝၼ်းတူၵ်း။ ၼႂ်းဝၼ်းတီႈ 5-6 ၼႆႉ လႅပ်ႈတေႁွတ်ႈထိုင် ၵုၼ် ႁၢႆႊၼၢၼ်ႊ မိူင်းၶႄႇယူႇ ၼႆ ၸုမ်းပၵ်းတႃပႂ်ႉတူၺ်းၾိင်ႈၾႃႉရႃႇသီႇ လၢမ်းၶၢတ်ႈပိုၼ်ၽၢဝ်ႇဝႆႉၼင်ႇၼႆ။

လူမ်းလႅင်ႉလုၵ်ႈၼႆႉ မိူင်းၾိလိပ်ႉပိၼ်ႊသ် တင်ႈၸိုဝ်ႈဝႆႉဝႃႈ လူမ်းလႅင်ႉပဝ်ႊလူဝ်ႊ ဢမ်ႇၼၼ် မႅတ်ႊမူဝ်ႊ ပဵၼ်လူမ်းလႅင်ႉယႂ်ႇ လုၵ်ႈထိ 3 တွၼ်ႈတႃႇပီၼႆႉ။ ၵႅၼ်ၵၢင်ႁႅင်းလူမ်းလႅင်ႉၼႆႉမီး 130 ၵီႊလူဝ်ႊမီႊတႃႊ တေႃႇၸူဝ်ႈမူင်း။ ႁႅင်းထဝ်ႇလတ်းၶၢမ်ႈပၢင်ႇလၢႆႇမႃးသမ်ႉ 1 ၸူဝ်ႈမူင်း 25 ၵီႊလူဝ်ႊမီႊတႃႊ။ သုတ်ႉၶၢႆႉမႃးၸူးတၢင်းမိူင်းၶႄႇယူႇ ၼႆ ၸုမ်းပႂ်ႉတူၺ်းၾိင်ႈၾႃႉမိူင်းၾိလိပ်ႉပိၼ်ႊသ်ပိုၼ်ၽၢဝ်ႇဝႆႉၼင်ႇၼႆ။

မိူင်းၾိလိပ်ႉပိၼ်ႊသ်ၼႆႉ ပူၼ်ႉမႃး 2-3 ဝၼ်းၼႆႉၵူၺ်း ထူပ်းၽေးၽႅၼ်ႇလိၼ်ဝႆ ႁႅင်း 6.9 မႅၵ်ႊၼီႊၵျုတ်ႉ တွၼ်ႈတၢင်းၸၢၼ်းၸိုင်ႈမိူင်း လႄႈ ၵူၼ်းတၢႆ 72 ၵေႃႉ။ ၵွၼ်ႇၼႃႈၼၼ်ႉသမ်ႉ မီးလူမ်းလႅင်ႉႁႅင်းယႂ်ႇ ရႃႊၵႃႊသႃႊ လႄႈ ပူဝ်ႊလွႆႊ ၽတ်ႉပဝ်ႇတၢင်းႁွင်ႇၸိုင်ႈမိူင်း။ ၼၼ်ႉၵေႃႈမီးၵူၼ်းမၢတ်ႇၸဵပ်းလူႉတၢႆၼမ်။ ၾိလိပ်ႉပိၼ်ႊသ်ၼႆႉပဵၼ်မိူင်းၵုၼ်မူႇ ။ ပေႃးထိုင်ၶၢဝ်းၾူၼ်မႃးၼႆ ထူပ်းၽေးလူမ်းလႅင်ႉႁႅင်းယႂ်ႇၵူႈပီ။ ၼိုင်ႈပီဢမ်ႇယွမ်း 20 လုၵ်ႈ။