ၼႂ်းမိူင်းႁူမ်ႈတုမ်မၢၼ်ႈၼႆႉ ဢိင်ၼိူဝ် ဢမ်ႇမီးလွင်ႈၽဵင်ႇပဵင်းပဵၼ်ထမ်းသေ ၸင်ႇမီးမႃးၸုမ်းယိပ်းၵွင်ႈၵၢင်ႇတင်းၼမ်တင်းလၢႆ ။ ၸုမ်းယိပ်းၵွင်ႈၵၢင်ႇၵမ်ႈၼမ်ၼႆႉ မိူဝ်ႈတႄႉမၼ်းတႄႉ ဢၢင်ႈၸိုဝ်ႈဝႃႈ တႃႇဢဝ်ၶိုၼ်းသုၼ်ႇလႆႈ တႃႇႁႄႉၵင်ႈၵူၼ်းမိူင်းၼႆသေ မႅၵ်ႇၵွင်ႈလုၵ်ႉၽိုၼ်ႉမႃး။ ၵူၺ်းၵႃႈ ၵွႆပၢႆဝၢႆးမႃး ၵၢၼ်လုၵ်ႉၽိုၼ်ႉၵေႃႈ ပိူင်ႈႁွႆႈသေ ၵူၼ်းမိူင်းလႆႈၵူဝ်တင်းသိုၵ်းမၢၼ်ႈလႄႈသိုၵ်းလုၵ်ႉၽိုၼ်ႉ။ၶၢဝ်းတၢင်း ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇယိုတ်းမိူင်းၼႆႉ သမ်ႉၶႅၼ်းၼႃႇ ။ မိူၼ် တီႈ ၽႃၵၢၼ်ႉ ၸႄႈမိူင်းၶၢင်ၼႆႉ ယၢမ်းလဵဝ် သိုၵ်းၶၢင် လႄႇႁႃၵဵပ်းသိုၵ်းၸွမ်းၼႂ်းၵႄႈၵူၼ်းၶွၼ်ႈ ။ ဢွင်ႈတီႈ ဢၼ်မီးမေႃႇသႅင်ၸိူဝ်းၼႆႉၵေႃႈ ဢမ်ႇဝႆႉ။ၼႂ်းလိူၼ်သႅပ်ႊထိမ်ႊပိူဝ်ႊၼႆႉၵူၺ်း ၵူၼ်းႁဵတ်းၵၢၼ်ၶုတ်းသႅင်ၸွမ်းလူၺ်ႈမႃႇလူၺ်ႈႁႅင်းၸဝ်ႈၵဝ်ႇ  ၺႃးသိုၵ်းၶၢင် တီႉၺွပ်းၵႂႃႇ  300 ၵေႃႉ။  ၵူၼ်းမိူင်းၽႃၵၢၼ်ႉ ႁႃၵိၼ်လဵင်ႉတွင်ႉယၢပ်ႇ တေပၢႆႈၵေႃႈသမ်ႉၵူဝ်ဢမ်ႇလွတ်ႈ   ။

ႁၢင်လိူၼ် သႅပ်ႊထိမ်ႊပိူဝ်ႊ 2025 ၼႆႉ သိုၵ်းၶၢင် တိူဝ်းလူင်းၵဵပ်းသိုၵ်း တီႈၽႃၵၢၼ်ႉ ၸႄႈမိူင်းၶၢင် ။ ၽႃၵၢၼ်ႉၼႆႉသမ်ႉ ၵမ်ႈၼမ် ၵူၼ်းၵႆႉၶွၼ်ႈၵၼ် တီႈၶုတ်းႁႄႈၶုတ်းသႅင် ။

ၼႂ်းလိူၼ်သႅပ်ႊထိမ်ႊပိူဝ်ႊၼႆႉၵူၺ်း သိုၵ်းၶၢင် တီႉလႆႈၵူၼ်းၵႂႃႇ ဢမ်ႇယွမ်း 300 ၵေႃႉ  ။ လိူဝ်သေ လႄႇႁႃတီႉၺွပ်း ၸွမ်းၼႂ်းမေႃႇသႅင်ၸိူဝ်းၼၼ်ႉယဝ်ႉ သမ်ႉပၢႆ ပႂ်ႉၸွမ်းသဵၼ်ႈတၢင်းၶဝ်ႈဝၢၼ်ႈဢွၵ်ႇဝၢၼ်ႈၸိူဝ်းၼႆႉထႅင်ႈ။ ၵႂႃႇႁဵတ်းၵၢၼ်ႁိူဝ်ႉမႃး သမ်ႉမႃးၺႃး သိုၵ်းၶၢင် KIA ပႂ်ႉတီႉၺွပ်းပွတ်းတၢင်း တေလႅၼ်ႈပၢႆႈၵေႃႈ သမ်ႉၵူဝ်ၺႃးယိုဝ်း ၼႆ ၵူၼ်းပိုၼ်ႉတီႈလၢတ်ႈ။

မၢင်ၸိူဝ်း ၵိုင်ႉၵၢင်ႉ ႁၼ်သိုၵ်းၶၢင်မႃးႁႃတီႉၺွပ်းလႄႈ လႅၼ်ႈပၢႆႈ ထိုင်တီႈတူၵ်းလုၵ်းတူၵ်းလဝ်သေ လူႉတၢႆၵေႃႈမီး။ မိူဝ်ႈဝၼ်းတီႈ 30/09/2025 တၢမ်းၶမ်ႈ 4 မူင်းပၢႆၼၼ်ႉ ၵူၼ်းၸၢႆးၵေႃႉၼိုင်ႈ ၵူၼ်းဝၢၼ်ႈၼမ်ႉမေႃႇ ပွၵ်ႉ1  လႅၼ်ႈ ပၢႆႈသိုၵ်းၶၢင်သေ ပလၢတ်ႈတူၵ်းႁူၺ်ႈ လူႉတၢႆၵေႃႉၼိုင်ႈ ၼႆ ၵူၼ်းၽႃၵၢၼ်ႉၵေႃႉၼိုင်ႈလၢတ်ႈ။

ၶမ်ႈ ဝၼ်းတီႈ 30/09/2025 ၼၼ်ႉၵူၺ်းၼင်ႇၵဝ်ႇ တေႃႇထိုင် 10 မူင်းၵၢင်ၶမ်ႈ ၼၼ်ႉ သိုၵ်းၶၢင် လူင်းလႄႇသွၵ်ႈတဝ်ႈ ၸွမ်းႁိူၼ်းယေး ၵူၼ်းဝၢၼ်ႈၼမ်ႉမေႃႇ ဝၢၼ်ႈၵွင်းသၢင်း ဝၢၼ်ႈဢွင်ႇၸူႉၵျေႃႇ ၸိူဝ်းၼႆႉလႄႈ သဵင်ႈႁွင်ႉသဵင်ႈႁႆႈ လုၵ်ႈလၢင်းၼၢင်းမေး ၵူၼ်းၸၢႆးၸိူဝ်းဢၼ်ၺႃးၺွပ်းၵႂႃႇၸိူဝ်းၼၼ်ႉ ပေႃးၼၼ်ႈၵႂႃႇသဵင်ႈၼႆ ၵူၼ်းပိုၼ်ႉတီႈ ၵေႃႉၼိုင်ႈလၢတ်ႈ။

ၼႂ်းၵႄႈ ဝၢၼ်ႈ 3 ဝၢၼ်ႈ ဢၼ်ပဵၼ် ၵူၼ်းဝၢၼ်ႈၼမ်ႉမေႃႇ ဝၢၼ်ႈၵွင်းသၢင်း ဝၢၼ်ႈဢွင်ႇၸူႉၵျေႃႇ ၼႆႉသမ်ႉ မီးဝႆႉ ဢွင်ႈတီႈမေႃႇသႅင်တီႈၼိုင်ႈ ဢၼ်ၵူၼ်းပိုၼ်ႉတီႈႁွင်ႉဝႃႈ ထၢင်ၼိုင်ႈသၢမ်တူဝ်( 111) ၾၢႆႇ မၢၼ်ႈႁွင်ႉဝႃႈ တစ်သုံးလုံးကျင်း ။ တီႈၼႆႈ ၵူၼ်းၶုတ်းသႅင်လူၺ်ႈၵႃႈမႃႇၵႃႈႁႅင်းၸဝ်ႈၵဝ်ႇ မီးၼမ် ။ ပဵၼ်တီႈသိုၵ်းၶၢင်ပၵ်းတႃပႂ်ႉတူၺ်း တႃႇၵဵပ်းသိုၵ်း။

မိူဝ်ႈဝၼ်းတီႈ 24/09/2025 ၼၼ်ႉၵေႃႈ ၵူၼ်းၶုတ်းသႅင် ဢွၼ်ၵၼ်လႅၼ်ႈပၢႆႈသိုၵ်းၶၢင် ၽွင်းၵၢင်ၶမ်ႈၵၢင်ၶိုၼ်းလႄႈ သမ်ႉပေႃးၽႃႇၺႃး ၼၢင်းယိင်းပႃးတွင်ႉၵေႃႉၼိုင်ႈလူမ်ႉ ထိုင်တီႈလုၵ်ႈဢွၼ်ႇၼႂ်းတွင်ႉလူႉတၢႆ ။ မိူဝ်ႈလဵဝ် ၼၢင်းယိင်းၼၼ်ႉ တိုၵ်ႉလႆႈယူတ်းယႃတူဝ်ဝႆႉမီးတီႈႁူင်းယႃ။

မိူၼ်ၼင်ႇ ၼႂ်း ဢိူင်ႇလူင်းၶၢင်း ဢိူင်ႇၽႃၵၢၼ်ႉ ဢိူင်ႇသိူၵ်ႈမူႇ ဢိူင်ႇႁူၺ်ႈၶႃႇ ဢိူင်ႇတႃႈမၢၵ်ႇၶၢမ် လႄႈ ထႅင်ႈလၢႆဢိူင်ႇ ပေႃးယူႇၼႂ်းၽႃၵၢၼ်ႉယူႇတႄႉ တိုၼ်းလႆႈၺႃး သိုၵ်းၶၢင်ၵဵပ်းသိုၵ်း။ မိူဝ်ႈဢွၼ်တၢင်းတႄႉ ၶဝ်လၢတ်ႈဝႃႈ ၵဵပ်းၵူၼ်း ၸိူဝ်းဢမ်ႇယူႇၸွမ်းပၵ်းပိူင်ၵူၺ်းၼႆသေတႃႉ ဝၢႆးလင်ၼႆႉမႃး ႁၼ်ၽႂ်ၵေႃႈ ၶႂ်ႈၺွပ်းဢဝ်ၵႂႃႇ ႁဵတ်းသိုၵ်းမူတ်းယဝ်ႉ ၼႆ ၵူၼ်းပိုၼ်ႉတီႈလၢတ်ႈ –

“မိူဝ်ႈဢွၼ်ႇတၢင်း ၶဝ်တေၺွပ်းၵူၼ်းဢၼ်ၵႂႃႇၵၢင်ၶမ်ႈၵၢင်ၶိုၼ်း ၊ ၵူၼ်းၸိူဝ်း ၵႃႉၶၢႆၽိတ်းမၢႆမီႈ။ ၵူၼ်းၸၢႆးၸိူဝ်း ဢၼ်ၵႆႉၵႂႃႇ ႁူင်းမိပ်ႈၼူတ်ႈၸိူဝ်းၼႆႉ။ တင်းၽႃၵၢၼ်ႉၼႆႉ မၼ်းမီးမေႃႇသႅင်လႄႈ မၼ်းလိူင်ႇၼႃႇ။ ၶဝ်တေၵႆႉၺွပ်း ၼႂ်းလၢၼ်ႉတၢင်းၵိၼ် လၢၼ်ႉပီႇယႃႇဝႃႇၸိူဝ်းၼႆႉ။ ၼႂ်း Bar ၼႂ်း KTV ၸိူဝ်းၼႆႉ။ ယဝ်ႉၵေႃႈ ၺွပ်းပႃး ၵူၼ်းၸိူဝ်းၵႂႃႇၵႃႉသႅင် ၶၢႆသႅင် ၶုတ်းသႅင်ၸိူဝ်းၼႆႉ”

သိုၵ်းၶၢင် ယၢမ်ႈလၢတ်ႈတီႈၵူၼ်းၽႃၵၢၼ်ႉဝႃႈ ဢၼ်ၵဵပ်းၵူၼ်းၵႂႃႇၸိူဝ်းၼႆႉ တႃႇႁႂ်ႈၵူႈၵေႃႉမေႃၶႄတူဝ်ၽႂ်မၼ်း ၽွင်းထူပ်းၽေး ၊ ႁႂ်ႈမေႃယိုဝ်းၵွင်ႈၵူႈၵေႃႉလႄႈ ႁႂ်ႈၵႂႃႇၾိုၵ်း ။ ၵူၺ်းၵႃႈ ၸိူဝ်းမီးငိုၼ်းသမ်ႉ ဢဝ်ငိုၼ်းမွၼ်သေ လွတ်ႈဢွၵ်ႇမႃးလႆႈငၢႆႈငၢႆႈသေ ၸိူဝ်းဢမ်ႇမီးငိုၼ်းတႃႇထုတ်ႇတူဝ်သမ်ႉ ဢဝ်ႁဵတ်းသိုၵ်းလႄႈ လွင်ႈၼႆႉ ဢမ်ႇၵိုင်ႇလီပဵၼ်ၼႆ ၵူၼ်းၽႃၵၢၼ်ႉသိုပ်ႇလၢတ်ႈၼင်ႇၼႆ –

“ဢၼ်ယၢပ်ႇၼႆႉ ဢၼ်ၶဝ်ၺွပ်းၵႂႃႇၼႆႉ ပေႃးဝႃႈ ပဵၼ်ၵူၼ်းမီးငိုၼ်း သမ်ႉဢဝ်ငိုၼ်းထုတ်ႇလႆႈၼၼ်ႉၶႃႈဢိူဝ်ႈ။ဢၼ်ၼႆႉ မၼ်းဢမ်ႇပေႃးထုၵ်ႇလီပဵၼ်။ ၵူၼ်းဢၼ်ယူႇၼႂ်းၽႃၵၢၼ်ႉၼႆႉ တေလႆႈႁဵတ်းသိုၵ်းၵူႈၵေႃႉဢိူဝ်ႈၼႆၵေႃႈ ။ ၸဵမ်ၼႃႈ လဵၵ်ႉ ၼႃႈယႂ်ႇ ငိုၼ်းၵေႃႈ တေဢမ်ႇလႆႈထုတ်ႇလႆႈ။ၵူၼ်းဢၼ်မီးငိုၼ်းသမ်ႉဝႃႈ ထုတ်ႇဢွၵ်ႇမႃး ၊ ၵူၼ်းဢမ်ႇမီးငိုၼ်း မၼ်းသမ်ႉဝႃႈ တေလႆႈၵႂႃႇယိပ်းၵွင်ႈ ။ ၵႂႃႇဢွၵ်ႇၼႃႈသိုၵ်းထႅင်ႈ ။မၼ်းဢမ်ႇမီးလွင်ႈၽဵင်ႇပဵင်းၵၼ်ၸိူင်ႉၼႆလႄႈ ပီႈၼွင်ႉၽႃၵၢၼ်ႉႁဝ်း တုၵ်ႉၶ။ၽႂ်ၵေႃႈ ဢမ်ႇၶႂ်ႈႁဵတ်းသိုၵ်းလေႃႇ။ ၵမ်ႈၼမ် ဢၼ်မႃးၶုတ်းမေႃႇၼႆႉ ၽႂ်ၵေႃႈ ၶႂ်ႈလဵင်ႉလူၼႃႈႁိူၼ်းၽႂ်မၼ်း”

မိူဝ်ႈသိုၵ်းၶၢင်ၶဝ် လူင်းၵဵပ်းၵူၼ်းၼၼ်ႉ မၢင်ဝၢၼ်ႈ ဢမ်ႇလႆႈၵူၼ်းၵေႃႈ သမ်ႉပၢႆဢဝ်ပႃး ၶိူင်ႈၶူဝ်းႁိူၼ်းယေး ၵူၼ်းမိူင်း ၵႂႃႇပႃး ။ မိူၼ်ၼင်ႇ ရူတ်ႉၶိူင်ႈ (သႅၼ်းဢၼ်ႁဵတ်းဢွၵ်ႇမိူင်းၶႄႇ) ၸိူဝ်းၼႆႉၵေႃႈဢဝ် လူၺ်ႈဢမ်ႇလႆႈဢၼုၺၢတ်ႈ တီႈၸဝ်ႈၶွင်မၼ်း ။ ငဝ်းလၢႆးမိူဝ်ႈလဵဝ် သိုဝ်ႉသင်ၵေႃႈ ၵႃးလႄႈ ရူတ်ႉၶိူင်ႈလမ်းၼိုင်ႈၵေႃႈ ဢမ်ႇယွမ်း 40 သႅၼ်ပျႃး ယဝ်ႉၼႆ ၵူၼ်းပိုၼ်ႉတီႈလၢတ်ႈ။

ၽွင်းၵူၼ်းမိူင်း တိုၵ်ႉၵိၼ်းၸႂ်ၸွမ်း ပၼ်ႁႃပၢႆးမၢၵ်ႈမီးတူၵ်းယူႇၼႆႉ ၸုမ်းယိပ်းၵွင်ႈၵင်ႇၸိူဝ်းဢၢင်ႈၸိုဝ်ႈဝႃႈ ၸုမ်း လုၵ်ႉၽိုၼ်ႉၸိူဝ်းၼႆႉသမ်ႉ ဢဝ်ၵူၼ်းမိူင်းပဵၼ်ၶိူင်ႈမိုဝ်းယူႇတိၵ်းတိၵ်းလႄႈ ဢဝ်ၵူၼ်းမိူင်းၶႂ်ႈဢိမ်ႇမိူဝ်ႇၸၢၼ်ႈ လွင်ႈၵၢၼ်လုၵ်ႉၽိုၼ်ႉမႃးၵမ်းလွႆးလွႆးယဝ်ႉၼႆၽူႈၶဝ်ႈၸုမ်းတူင်ႇၵူၼ်းၵေႃႉၼိုင်ႈလၢတ်ႈ။