တီႈၼႂ်းဢၢဝ်ႇပၢင်ႇလၢႆႇ ပင်ႊၵလႃႊ မီးလူမ်းလႅင်ႉႁႅင်းဢွၼ်ႇ 2 ဢၼ် ၸၢင်ႈႁႅင်းယႂ်ႇမႃးလႄႈၼႂ်းႁူဝ်လိူၼ်ဢွၵ်ႊထူဝ်ႊပိူဝ်ႊၼႆႉ မိူင်းမၢၼ်ႈ မိူင်းတႆးပတ်းပိုၼ်ႉ ၸၢင်ႈမီးၾူၼ်တူၵ်းႁႅင်းလႄႈ ႁႂ်ႈၾၢင်ႉလွင်ႈၼမ်ႉထူမ်ႈၼမ်ႉၼွင်းၼႆ ၾၢႆႇလၢမ်းၶၢတ်ႈၾိင်ႈၾႃႉရႃႇသီႇ ပိုၼ်ၽၢဝ်ႇဝႆႉၼင်ႇၼႆ။

ၼႂ်းဝၼ်းတီႈ 1 ထိုင် 10/10/2025 ၼႆႉၾူၼ်ၸၢင်ႈတူၵ်းႁႅင်း ၼႂ်းတိူင်းၼေႇပျီႇတေႃႇ၊ တိူင်းတႃႈၵုင်ႈ၊ တိူင်းပႃႇၵိူဝ်၊ တိူင်းၸႄႈၵႅင်း၊ တိူင်းဢေႇရႃႇဝတီႇ၊ မိူင်းၶၢင်၊ မိူင်းယၢင်းလႅင်၊ မိူင်းယၢင်းၽိူၵ်ႇ၊ မိူင်းမွၼ်း ၊ တိူင်းတႃႈလိူဝ်ႇ၊ တိူင်းမၵူၺ်း၊ တိူင်းၸေႈၵႅင်းပွတ်းတႂ်ႈ၊ တိူင်းတၼၢဝ်းသီ၊ မိူင်းၶျၢင်း ၊ မိူင်းရၶႅင်ႇ ဢိၵ်ႇပႃး ၼႂ်းမိူင်းတႆးၸိူဝ်းၼႆႉ ဝႃႈၼႆ။

ၼႂ်းၶၢဝ်းတၢင်းလၢႆဝၼ်းမႃးၼႆႉ ယွၼ်းၾူၼ်တူၵ်းႁႅင်းသေ ၼမ်ႉသၢႆ တီႈဝဵင်းတႃႈၶီႈလဵၵ်း မိူင်းတႆးပွတ်း ဢွၵ်ႇ ၶိုၼ်ႈသုင် ပူၼ်ႉၶိတ်ႇမၢႆမႆႈၸႂ်ၼၼ်ႉ 1 ထတ်း(1 ပေႇ)၊ ၼႂ်းၶၢဝ်းတၢင်းထႅင်ႈ 1 ဝၼ်း ၼမ်ႉသၢႆ တေၸၢင်ႈၶိုၼ်ႈသုင်ထိုင် 3 ထတ်း၊ ယွၼ်ႉၼၼ် ၾၢႆႇၾိင်ႈၾႃႉၾူၼ်လူမ်း တင်း ၸုမ်းၸွႆႈ ထႅမ်တူင်ႇဝူင်းၵူၼ်းၶဝ် ဢွၼ်ၵၼ်ပၼ်ၾၢင်ႉၵူၼ်းမိူင်းၸိူဝ်းယူႇသဝ်းၸွမ်း ပိုၼ်ႉတီႈတႅမ်ႇ ႁႂ်ႈဢွၼ်ၵၼ်ယုၵ်ႉၶၢႆႉၶူဝ်းၶွင်ဝႆႉတီႈသုင် လႄႈ ၶၢႆႉပၢႆႈယူႇသဝ်း ဢွင်ႈတီႈလွတ်ႈၽေးၼမ်ႉ ၼႆယဝ်ႉ။

ၼႂ်းဝၼ်းတီႈ 1 လႄႈ 2 ၼမ်ႉသၢႆ ၼွင်းလူၼ်ႉၾင်ႇ လႆႈထူမ်ႈၶဝ်ႈ ၼႂ်းပွၵ်ႉယွမ်ႇ ပိုၼ်ႉတီႈတႅမ်ႇၵမ်ႈၽွင်ႈ ၼႂ်းဝဵင်းတႃႈၶီႈလဵၵ်း၊ ၵူၼ်းမိူင်း လႆႈၶၢႆႉပၢႆႈ တီႈလွတ်ႈၽေးၼမ်ႉ ။