မိူဝ်ႈၼႆႉ ဝၼ်းတီႈ 2 /10/2025 ယၢမ်းၵၢင်ၼႂ် 7 မူင်းပၢႆ သိုၵ်းမၢၼ်ႈယိုတ်းမိူင်း ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႅၼ်း 500 ပွင်ႊ တူၵ်းသႂ်ႇႁိူၼ်းယေး ၵူၼ်းမိူင်း ပွၵ်ႉ 8 ဝဵင်းၼမ်ႉတူႈ တီႈဢၼ်မီးၵူၼ်းပၢႆႈၽေးသိုၵ်း၊ မီးလွင်ႈမၢတ်ႇၸဵပ်းလူႉတၢႆၼမ်။
တီႈဢၼ်မၢၵ်ႇလူင်တူၵ်းသႂ်ႇၼၼ်ႉမီးၵူၼ်းမိူင်းၸိူဝ်း လုၵ်ႉတၢင်းဝဵင်းၵျွၵ်ႉမႄး ပၢႆႈၽေးပၢင်တိုၵ်း မႃးသွၼ်ႈ ယူႇသဝ်းဝႆႉၸွမ်းၸူဝ်ႈၶၢဝ်း ၊ တိူဝ်ႉသႂ်ႇၼၢင်းယိင်း လူႉတၢႆၵႂႃႇ 3 ၵေႃႉ ၵူၼ်းၸၢႆး 1 ၵေႃႉ လႄႈ မၢတ်ႇၸဵပ်း ႁၢဝ်ႈႁႅင်း 5 ၵေႃႉ လႆႈႁူႉၼင်ႇၼႆ။
ၵူၼ်းၸိူဝ်းတၢႆၵႂႃႇၼၼ်ႉ ပဵၼ်ၵူၼ်းၸၢႆးပၢႆးယူႇလီဢမ်ႇပေႃးၶႅမ်ႉ လႄႈ ၼၢင်းယိင်းၸိူဝ်းဢႃႇယုယႂ်ႇ ပဵၼ်ၵူၼ်းပိုၼ်ႉတီႈ ဝဵင်းၼမ်ႉ တူႈၼႆ ၵူၼ်းၸၢႆး ဢႃႇယု 35 ပီ ၵူၼ်းၼမ်ႉတူႈ လၢတ်ႈၽူႈတွႆႇႁွၵ်ႈၼင်ႇၼႆ။
“ဢမ်ႇထၢင်ႇဝႃႈ ၶဝ်တေမႃးပွႆႇမၢၵ်ႇတီႈၼမ်ႉတူႈသေဢိတ်းမေႃႉ။ ၶဝ်မႃးပွႆႇၼႂ်းဝဵင်းၼႆႉ ပွၵ်ႈၼႆႉပဵၼ်ဢွၼ်တၢင်းသုတ်းယဝ်ႉ။ ဢမ်ႇတၼ်းလႆႈ ႁၢင်ႈႁႅၼ်းတူဝ်သင်ၼႃႇ။ ၵိုင်ႉၵၢင်ႉမႃးပွႆႇၼႆ တၢႆထင်တီႈၵႂႃႇၵမ်းသိုဝ်ႈ 3 ၵေႃႉ။ ၼၢင်းယိင်းၵေႃႉၼိုင်ႈတႄႉ ၵႂႃႇတၢႆတီႈႁူင်း ယႃ။ ဢၼ်မၢတ်ႇၸဵပ်းၼၼ်ႉတႄႉ တင်းမူတ်းမီး 5 ၵေႃႉ။ မိူဝ်ႈလဵဝ် သူင်ႇယႃတူဝ်ဝႆႉတီႈႁူင်းယႃယဝ်ႉ။”
လႆႈႁူႉဝႃႈ ၵူၼ်းၸိူဝ်းလူႉတၢႆၵႂႃႇ 4 ၵေႃႉၼႆႉ ပဵၼ်ၵူၼ်းမိူင်း ၸိူဝ်းပၢႆႈၽေးပၢင်တိုၵ်း တၢင်းထုင်ႉၼွင်ပိင် ၸႄႈဝဵင်းၵျွၵ်ႉမႄး ၵႂႃႇယူႇသဝ်းဝႆႉၸူဝ်ႈၶၢဝ်း တီႈဝဵင်းၼမ်ႉတူႈ ၼႆယဝ်ႉ။
တႄႇမိူဝ်ႈဝႃး ဝၼ်းတီႈ 1 /10/2025 မႃး သိုၵ်းမၢၼ်ႈယိုတ်းမိူင်း ၶဝ်ႈဢဝ်တီႈယူႇၶိုၼ်း ၼႂ်းဝဵင်းၵျွၵ်ႉမႄး ဢွင်ႈတီႈသိုၵ်းတဢၢင်း ၵုမ်းၵမ်ဝႆႉ ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း ပွၵ်ႈၵမ်း 2 ၼၼ်ႉသေ ထိုင်မႃးဝၼ်းတီႈ 2 မိူဝ်ႈၼႆႉ ယၢမ်းၵၢင်ၼႂ် သိုၵ်းမၢၼ်ႈၸႂ်ႉၶိုၼ်းႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းဝဵင်းၼမ်ႉတူႈ ပဵၼ်ပွၵ်ႈဢွၼ်တၢင်းသုတ်း ။
ၼႂ်းဝၼ်းလဵဝ်ၵၼ် လႄႈ ၶၢဝ်းယၢမ်းႁၢင်ႇၵႆၵၼ်မွၵ်ႈ 15 မိၼိတ်ႉၵူၺ်း သိုၵ်းမၢၼ်ႈသိုပ်ႇၸႂ်ႉ ႁိူဝ်းမိၼ်တိုၵ်း ပွႆႇမၢၵ်ႇသႂ်ႇပႃး ဝဵင်းမၢၼ်ႈ တူင်ႈ ဢွင်ႈတီႈသိုၵ်းတဢၢင်းၵုမ်းၵမ်ဝႆႉၸူဝ်ႈၶၢဝ်းၼၼ်ႉထႅင်ႈသေ မၢၵ်ႇၵႂႃႇတူၵ်းသႂ်ႇၼႂ်းဝၢင်းတပ်ႉပၢင်သဝ်းၵဝ်ႇသိုၵ်းမၢၼ်ႈ ၶလရ- 130 လႄႈ ဢမ်ႇမီးၵူၼ်းမိူင်းမၢတ်ႇၸဵပ်းလူႉတၢႆၸွမ်းသင် ။
ပေႃးထိုင်မႃး ဝၼ်းတီႈ 28/12/2025 ၼႆႉ သိုၵ်းမၢၼ်ႈယိုတ်းမိူင်းဢၢၼ်းၸတ်းႁဵတ်းပၢင်လိူၵ်ႈတင်ႈ ပတ်းပိုၼ်ႉ ၸိုင်ႈမိူင်းၼႆသေ ပိုၼ်ၽၢဝ်ႇမၵ်းမၼ်ႈဝႆႉၸႄႈဝဵင်းၸိူဝ်းတေၸတ်းႁဵတ်းပၢင်လိူၵ်ႈတင်ႈ ၼပ်ႉသႂ်ႇပႃးဝႆႉ ဝဵင်းၼွင်ၶဵဝ်၊ ဝဵင်းသီႇပေႃႉ၊ ၵျွၵ်ႉမႄး ၸိူဝ်းပိုၼ်ႉတီႈ သိုၵ်းတဢၢင်းၵုမ်းၵမ်ဝႆႉ ၸူဝ်ႈၶၢဝ်း။
ၵွၼ်ႇၼႃႈပႆႇထိုင် ၶၢဝ်းၸတ်းႁဵတ်းပၢင်လိူၵ်ႈတင်ႈၼႆႉ သိုၵ်းမၢၼ်ႈၸႂ်ႉတိုဝ်းႁႅင်းၵူၼ်းသိုၵ်း၊ ႁႅင်းၶိူင်ႈၵွင်ႈၵၢင်ႇ၊ ၶိူင်ႈတရူၼ်ႊ ၵူႈသႅၼ်း သႅၼ်း ၸႂ်ႉပႃး ႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းပိုၼ်ႉတီႈသိုၵ်းတဢၢင်းၵုမ်းၵမ်သေ လေႃႇတိုၵ်းၶိုၼ်းၵွႆးဢမ်ႇၵႃး သိုၵ်းမၢၼ်ႈ ၶဝ်ႈႁႃ ပႃး လူင်ပွင်ၸိုင်ႈမိူင်းၶႄႇသေ ယွၼ်းတၢင်းၸွႆႈထႅမ် ႁႂ်ႈဢီးသူၼ်း မိပ်ႇငႅၼ်းၸတ်းၵၢၼ်တတ်းၶၢတ်ႇလွင်ႈၵမ်ႉထႅမ် ပၼ်သိုၵ်းတဢၢင်း ၸဵမ်ၸိူဝ်းၼႆႉ။
ၼႂ်းလိၵ်ႈၵိၼ်ၵႅၼ်ႇ ၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊ ဢၼ်သိုၵ်းမၢၼ်ႈၶဝ်ႈႁူမ်ႈလူင်းလၢႆးမိုဝ်းၸွမ်းဝႆႉၼၼ်ႉတႄႉပႃးဝႆႉဝႃႈ – “ ပိုၼ်ႉတီႈဢၼ်သိုၵ်းတေဢမ်ႇလႆႈယိုဝ်းလႃးလႃး ႁိုဝ် တေဢမ်ႇလႆႈတိူဝ်ႉလႃးလႃးၼႆႉပဵၼ် -ႁိူၼ်းယေးၵူၼ်းမိူင်း၊ ႁူင်းယႃ ႁွင်ႈယႃ၊ ႁူင်းႁဵၼ်း၊ ဝတ်ႉဝႃးၽႃသိူဝ်ႇ ဢွင်ႈတီႈၵိူဝ်းယမ်၊ သိင်ႇဝႅတ်ႉလွမ်ႉဝၢၼ်ႈသူၼ်၊ ႁႆႈၼႃးမၢၵ်ႇၶဝ်ႈတဝ်ႈၼမ်ႉ၊ ႁူင်းၵၢၼ်ႁူင်းၸၢၵ်ႈဢၼ်ၸၢင်ႈတႅၵ်ႇပဵၼ်ၵွင်ႉငူၼ်ႉမီးၽေးတေႃႇၵူၼ်းမိူင်း” ၸဵမ်ၸိူဝ်းၼႆႉ။ ၵူၺ်းၵႃႈ ၸူဝ်ႈပဵၼ်သိုၵ်းၵၢင်မိူင်းမႃးၶၢဝ်းတၢင်း 4 ပီပၢႆၼႆႉ သိုၵ်းမၢၼ်ႈလႄႈၸုမ်းယိပ်းၵွင်ႈၵၢင်ႇၼႂ်းမိူင်း ဢမ်ႇတွၼ်ႉႁဵတ်းၸွမ်းမႃးသေပွၵ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ